Probecha di Cambio di Circunstancia

Pum, Jan, Dries y Otto, cuater anciano cristian cu ta biba na Hulanda, tin hopi cos en comun. Nan tur cuater ta casa y tin yiu. Ademas, algun aña pasa nan tawata traha fulltime y a biba den nan casnan comodo. Sinembargo, nan tur a stop di traha y a cuminsa dedica tur nan tempo y energia na sirbishi cu ta apoya e Reino di Dios. Kico a yuda nan haci e cambio aki? Nan tur cuater a probecha di cambio di circunstancia.

CU TEMPO e circunstancia di mayoria di nos ta cambia di un manera of otro. Hopi di e cambionan ei ta trece mas responsabilidad, por ehempel si nos casa, haya yiu of tin cu cuida mayornan cu a bira bieu. Pero algun cambio ta duna nos mas libertad pa expande nos sirbishi cristian. (Mateo 9:37, 38) Por ehempel, nos yiunan adulto kisas no ta biba na cas mas of nos ta baha cu pension.

Ademas, aunke ta un echo cu nos circunstancianan por cambia sea cu nos kier esei of no, algun cristian a logra crea cambio den nan circunstancia cu a permiti nan haci mas den sirbishi. Esei ta exactamente loke Pum, Jan, Dries y Otto a haci. Con?

Ora Yiunan No Ta Biba na Cas Mas

Pum tawata traha como boekhouder na un compania di remedi. E cu su casa Anny, a sirbi hopi bes como pionero ausiliar hunto cu nan dos yiu mohenan. Pum cu Anny tawata percura tambe pa nan yiunan tin tempo pa recrea cu otro rumannan cu ta den e sirbishi di pionero. Nan a conta: “Esaki a proteha nan contra problemanan cu otro tipo di amistad lo por a causa.” Stimula pa e ehempel di nan mayornan, ambos yiu a bira pionero regular asina cu nan a caba scol secundario.

Ora cu nan yiunan no tawata biba na cas mas, Pum cu Anny a realisa cu e cambio di circunstancia aki a duna nan mas libertad y placa cu nan por a probecha di dje pa biaha bai luganan interesante of pa gosa di otro formanan di recreo. Sinembargo, en bes di haci e cosnan ei e pareha a dicidi di probecha di e cambio di circunstancia pa expande nan sirbishi cristian. Pesei Pum a pidi su doño di trabou pa e traha un dia menos pa siman. Despues, Pum a haci areglo pa e cuminsa traha 7’or di mainta y stop 2 or di merdia. Claro cu menos ora di trabou a nifica tambe menos entrada. Pero nan a logra biba di esei, y na 1991 Pum a join su casa como pionero regular.

Mas despues Pum a haya e invitacion pa yuda cuida un Salon di Asamblea di Testigonan di Yehova. E invitacion ei a nifica cu e pareha mester a bandona e cas cu nan a biba aden pa 30 aña y muda pa un apartamento riba tereno di e Salon di Asamblea.  Nan a hacie. Tawata dificil pa hacie? Anny a bisa cu ki ora cu e haya heimwee, e tawata puntra su mes: ‘Mi ta manera e casa di Lot?’ Anny a nenga di “drai wak patras.”—Genesis 19:26; Lucas 17:32.

Pum cu Anny ta haya cu nan decision a hiba na hopi bendicion. Entre otro, nan ta disfruta di nan sirbishi na e Salon di Asamblea, di e trabou di preparacion pa congresonan di districto y di e contacto cu nan tin cu superintendentenan di sircuito (ministernan biahero) cu ta duna discurso na e salon. De bes en cuando, nan ta bishita diferente congregacion ora cu Pum ta sirbi como superintendente di sircuito substituto.

Kico a duna e pareha aki exito ora nan a expande nan sirbishi? Pum a bisa: “Ora bo bida cambia drasticamente, bo mester ta dicidido pa probecha lo maximo di bo circunstancianan nobo.”

Crea un Bida Mas Simpel

Jan cu su casa Woth, tin tres yiu. Mescos cu Pum cu su famia, Jan a probecha bon di un cambio di circunstancia. Pa hopi aña Jan tawatin un puesto bon paga na un banco y a duna su famia un bida comodo. Sinembargo, su deseo pa expande su sirbishi tawata crece. El a splica: “Den transcurso di mi bida mi aprecio pa e berdad a bira mas profundo y mi amor pa Yehova a crece.” Pesei na 1986, Jan a trece un cambio den su circunstancia. El a conta: “Mi a probecha di un reorganisacion na trabou y a cuminsa traha menos ora. Mi coleganan a keda sorprendi y nan a duna mi e beinam Diwodo, pasobra mi tawata traha solamente riba dinsdag, woensdag y donderdag. Mi salario a baha cu 40 porshento. Mi a bende nos cas y a cumpra un woonboot (un boto-cas) pa asina nos por a sirbi caminda tin mas necesidad di publicado di Reino. Mas despues, mi a probecha di e areglo pa baha cu pension prematuro; mi entrada a bolbe baha cu 20 porshento, pero na 1993 mi por a cuminsa sirbi como pionero regular.”

Awe Jan ta miembro di un Comite di Contacto cu Hospital y a sirbi cu regularidad como superintendente di congreso. Woth ta sirbi como pionero ausiliar de bes en cuando apesar cu su salu no ta bon. Tur tres yiunan ta casa awor, y hunto cu nan casanan, nan ta sirbidonan celoso di e Reino.

 Con Jan cu Woth a logra custumbra cu menos entrada? Jan a contesta: “Tempo cu nos tawatin na abundancia, nos a haci sigur di no pega nos curason masha na cosnan material. Awe kisas ta un poco laf cu bo tin cu warda prome cu bo por cumpra algo, pero e bendicionnan y privilegionan spiritual cu nos a ricibi ta mas cu compensa esei.”

Mescos cu Jan cu Woth, asina Dries cu su casa Jenny tambe a tuma e decision di tene nan bida simpel ya asina nan por dedica mas tempo na e asuntonan di e Reino di Dios. Dries cu Jenny a sirbi como pionero te ora cu nan a haya yiu. Anto pa percura pa su famia, Dries tawata traha como administrado den un compania grandi. Su hefenan a aprecia su trabou y a ofrec’e un promocion. Pero Dries a nenga e promocion pasobra si el a acept’e esei lo a nifica menos tempo pa actividadnan cristian.

Gran parti di e pareha su tempo y energia a bai na cria nan yiunan y tambe percura pa e mama di Jenny cu tawata malo. Pero toch nan a sigui cultiva e spirito di pionero. Kico a yuda nan haci esaki? Jenny a splica: “Nos a laga pioneronan biba hunto cu nos, nos a invita pioneronan pa bin come serca nos y nos a ofrece alohamento na superintendentenan di sircuito.” Dries a agrega: “Nos a tene nos bida simpel y a evita di hinca nos curpa den debe. Nos a tuma e decision di nunca envolve nos mes den negoshinan grandi ni cumpra cas, pa asina den futuro e cosnan ei no stroba nos.”

E decision di Dries cu Jenny pa crea circunstancianan cu lo a duna nan mas tempo pa dedica na asuntonan di e Reino di Dios tawatin resultadonan recompensador. Ambos yiu homber ta sirbi awor como anciano, y uno ta traha pionero hunto cu su casa. Dries cu Jenny a sirbi como pionero special, y despues Jenny a compaña Dries den e trabou di sircuito. Awor nan ta traha como boluntario na Betel, caminda Dries ta sirbi como miembro di e Comite di Sucursal.

Pension Prematuro

Mescos cu Dries cu Jenny, Otto cu su casa Judy, tambe a traha pionero prome cu nan tawatin nan dos yiu mohenan. Ora Judy tawata na estado di nan prome yiu, Otto a haya trabou como meneer di scol.

Segun cu e muchanan tawata crece, Otto cu Judy hopi bes a invita pioneronan na nan cas pa asina nan yiu mohenan por a mira e goso cu cristiannan den e trabou di tempo completo tin. Cu tempo nan yiu mohe mayo a drenta e sirbishi di pionero. Despues el a bai Scol di Galad y, hunto cu su casa, e ta sirbi awor como misionero na Africa. Nan yiu mohe menor a  cuminsa traha pionero na 1987, y Judy tambe a cuminsa hunto cu ne.

Ora cu cambio di circunstancia a permiti Otto traha menos ora na scol, el a uza e tempo extra ei pa traha pionero. Cu tempo el a stop di traha como meneer di scol. Awe Otto ta den e trabou biahero y e ta uza su habilidad como maestro pa fortalece e congregacionnan spiritualmente.

Ki conseho Otto tin pa esnan cu ta baha cu pension prematuro? El a bisa: “Ora bo baha cu pension, no dicidi di bai trankil pa mas o menos un aña. Facilmente bo ta custumbra cu e bida ‘trankil.’ Prome cu bo sa, bo ta lubida tocante trahamento di pionero. Mas bien, cuminsa haci mas mesora den sirbishi y den congregacion.”

Haci Bon Uzo di Bo Experencia di Bida

Ta cierto cu awor rumannan manera Pum, Jan, Dries y Otto no tin e fortalesa ni resistencia cu nan tawatin tempo nan tawata mas jong. Pero si nan tin mas madures, mas experencia y mas sabiduria. (Proverbionan 20:29) Nan sa kico kiermen ser tata, y door di traha hunto cu nan esposa, nan tin un idea di cuanto cos ta envolvi den ser mama. Hunto cu nan esposa, nan a atende problemanan di famia y a pone meta teocratico pa nan yiunan. Otto a bisa: “Ora mi ta duna conseho como superintendente di sircuito den asuntonan cu ta trata cu famia, e experencia cu mi tin door cu mi mes a lanta un famia ta haci mi conseho mas practico.” Asina tambe, Dries su experencia como tata ta hacie awor un parti balioso di e famia di Betel, caminda tin hopi trahado hoben.

Si, experencia personal ta yuda e rumannan ei percura pa un gran variedad di necesidad den congregacion. Na moda di papia, nan experencia a mula e hermentnan cu nan ta uza, di manera cu nan ta uza nan energia na e miho manera. (Eclesiastes 10:10) De echo, den un periodo spesifico, hopi bes nan por logra mas cu esnan cu ta mas fuerte fisicamente pero cu tin menos experencia.

E rumannan ei, hunto cu nan esposa, ta un excelente ehempel pa hobennan den e pueblo di Yehova. Hobennan ta mira cu parehanan asina a experencia personalmente hopi di e retonan y bendicionnan cu ta sali publica den nos literatura cristian. Ta un animacion pa mira hende homber y mohe cu ta desplega un actitud di sacrificio propio mescos cu Caleb kende, maske e tawata bieu, a pidi un asignacion cu tawata dificil.—Hosue 14:10-12.

Imita Nan Fe

Ta posibel cu bo por imita e fe y accion di e parehanan menciona den e articulo aki? Corda, nan estilo di bida a consentra riba e berdad. Nan a cultiva den nan yiunan e deseo di traha pionero. Manera Jan a expres’e, nan a haci esei, “door di ta un ehempel den stima Yehova y su organisacion, door di haci areglo pa nan tin bon asociacion y door di siña nan yiunan con pa mantene nan mes.” Tambe nan a traha hunto y recrea hunto como famia. Pum ta corda cu “durante temporada di facansi normalmente henter e famia tawata sali bai predica mainta, anto atardi [nan] a gosa di recreo hunto.”

Ademas, e cristiannan aki a plania di antemano, ya asina ora nan circunstancia a cambia, nan tawata cla pa probecha di e situacion nobo. Nan a pone meta y a tuma decisionnan cu a yuda nan alcansa nan metanan mas lihe. Nan a busca maneranan pa traha menos y tawata dispuesto pa biba di menos entrada. (Filipensenan 1:10, BPK) E esposanan a apoya nan esposonan completamente. Hunto nan tawatin e deseo fuerte pa drenta “e porta grandi cu ta hiba na actividad” y, como resultado, nan ta gosa di bendicionnan abundante for di Yehova.—1 Corintionan 16:9, NW; Proverbionan 10:22.

Bo tambe tin e deseo di expande bo participacion den sirbishi? Si ta asina, e clave kisas ta pa bo probecha di cambio di circunstancia.

[Plachi na pagina 20]

Pum cu Anny cuidando e Salon di Asamblea

[Plachi na pagina 20]

Jan cu Woth den e trabou di predica

[Plachi na pagina 21]

Dries cu Jenny sirbiendo na Betel

[Plachi na pagina 21]

Otto cu Judy preparando pa bishita e siguiente congregacion