E Prome Cristiannan y e Lei di Moises

“Lei a bira nos tutor pa guia nos na Cristo.”—GALATIONAN 3:24.

1, 2. Kico ta algun di e beneficionan cu e Israelitanan cu a obedece e Lei di Moises cuidadosamente a ricibi?

NA 1513 prome cu nos era, Yehova a duna e Israelitanan un codigo di lei. El a bisa e pueblo cu si nan obedece su bos, lo E bendiciona nan cu un bida felis y yen di satisfaccion.—Exodo 19:5, 6.

² E codigo di lei ei, yama tambe e Lei di Moises of simplemente e “Lei”, tawata “santo y husto y bon.” (Romanonan 7:12) El a promove birtud of cualidadnan excelente manera compasion, honestidad, decencia y bondad. (Exodo 23:4, 5; Levitico 19:14; Deuteronomio 15:13-15; 22:10, 22) Tambe e Lei a motiva e Hudiunan pa stima otro. (Levitico 19:18) Fuera di eseinan, nan no tawatin mag di asocia cu e paganonan cu no tawata bou di Lei ni casa cu nan. (Deuteronomio 7:3, 4) E Lei di Moises tawata manera un “muraya” di proteccion entre e Hudiunan y e paganonan, y el a evita cu e pueblo di Dios a ser contamina door di practicanan y manera di pensa di e paganonan.—Efesionan 2:14, 15; Huan 18:28.

3. Siendo cu ningun hende no por a cumpli cu e Lei perfectamente, ki efecto esaki tawatin?

³ Sinembargo, ni e Hudiunan di mas cauteloso no por a cumpli cu e Lei di Dios perfectamente. Yehova tawata rekeri demasiado di nan? No. Un di e motibonan pakico Dios a duna Israel e Lei tawata “pa haci hende su desobediencia na Dios evidente.” (Galationan 3:19, Beibel na papiamentu koriente) E Lei a haci Hudiunan sinsero conciente cu nan tin mester di un Rescatador urgentemente. Y ora El a yega, Hudiunan fiel a keda contento. Nan liberacion for di e maldicion di pica y morto tawata serca!—Huan 1:29.

4. Den ki sentido e Lei tawata ‘un tutor pa guia na Cristo’?

 ⁴ E Lei di Moises lo mester tawata un areglo temporal. Den Pablo su carta na su compañeronan cristian el a describie como un ‘tutor pa guia na Cristo.’ (Galationan 3:24) Den antiguedad, un tutor [“yaya cu ta cuida mucha”, BPK] tawata hiba muchanan scol y busca nan bek. Normalmente e no tawata e maestro; e tawata djis guia e muchanan y hiba nan serca e maestro. Di mes manera e Lei di Moises tawata diseña pa guia Hudiunan temeroso di Dios na Cristo. Hesus a priminti cu lo e ta cu su siguidonan “semper, te na fin di mundo.” (Mateo 28:20) Pesei, una bes cu e congregacion cristian a ser forma, e “tutor”—e Lei—no tawatin sentido mas. (Romanonan 10:4; Galationan 3:25) Sinembargo, tawatin algun cristian Hudiu cu no a compronde e berdad vital aki mesora. Consecuentemente, nan a sigui practica algun rasgo di e Lei asta despues cu Hesus a resusita. Toch tawatin otronan si cu a ahusta nan manera di pensa. Door di esei, nan a pone un excelente ehempel pa nos awe. Laga nos mira con.

Desaroyonan Interesante den Doctrina Cristian

5. Ki instruccion Pedro a ricibi den un vision, y dicon el a keda babuca?

⁵ Na aña 36 di nos era, apostel cristian Pedro a haya un vision extraordinario. E tempo ei un bos celestial a mand’e mata y come parha y bestianan cu e Lei a considera impuro. Pedro a keda babuca! Nunca e no come nada “profano [contamina, NW] ni impuro.” Pero e bos a bis’e: “Loke Dios a haci limpi, no considera esei profano.” (Echonan 10:9-15) En bes di ser inflexibel y keda pega na e Lei, Pedro a cambia su manera di mira cosnan. Door di a haci e ahuste aki e por a descubri cosnan asombroso relaciona cu Dios su proposito.

6, 7. Kico a yuda Pedro compronde cu e por a predica na e paganonan, y probablemente cua otro conclusionnan el a saca?

⁶ Loke a sosode ta lo siguiente. Tres homber a bai na e cas caminda Pedro tawata keda pa pidie bai cu nan na cas di un pagano insircuncida y deboto cu yama Cornelio. Pedro a invita nan paden y a laga nan keda einan. Siendo cu Pedro a compronde e nificacion di e vision, e siguiente dia el a bai cu nan na cas di Cornelio. Einan Pedro a duna un testimonio cabal tocante Hesucristo. Na e ocasion ei Pedro a declara: “Di berdad mi ta compronde awor cu Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.” No ta Cornelio so a eherce fe den Hesus, sino su famianan y amigonan mas yega tambe, y “spirito santo a baha riba tur esnan cu tawata scucha e mensahe.” Reconociendo cu Yehova su man tawata den e asunto, Pedro a “ordena nan pa wordo batisa den e nomber di Hesucristo.”—Echonan 10:17-48.

⁷ Kico a laga Pedro compronde cu awor e paganonan cu no a somete nan mes na e Lei di Moises por a bira siguido di Hesucristo? Esei ta discernimento spiritual. Ya cu Dios a mustra cu e ta aproba e paganonan insircuncida door di basha su spirito riba nan, Pedro a compronde cu nan por a ser acepta pa bautismo. Y ta parce cu na mesun tempo Pedro a realisa tambe cu Dios no a exigi di paganonan cu a bira cristian pa cumpli cu e Lei di Moises pa nan por a batisa. Si bo a biba e tempo ei, lo bo tawata mes dispuesto cu Pedro pa cambia bo manera di mira cosnan?

Algun A Keda Sigui e “Tutor”

8. Ki punto di bista di sircuncision, distinto for di esun di Pedro, algun cristian cu tawata biba den Herusalem tawata promove, y dicon?

⁸ Despues cu Pedro a sali for di cas di Cornelio, el a bai Herusalem. E noticia di cu paganonan insircuncida “a ricibi e palabra di Dios” a yega na e congregacion einan, y un cantidad di disipel Hudiu no a gusta e asunto ei. (Echonan 11:1-3) Aunke “esnan cu tawata sircuncida” y cu a apoya sircuncision, a acepta cu e paganonan por a bira siguido di Hesus, toch nan  a insisti cu e hendenan aki di e nacionnan cu no tawata Hudiu mester a cumpli cu e Lei pa nan por haya salbacion. Di otro banda, den e areanan caminda e paganonan tawata predomina, y caminda tawatin poco cristian Hudiu, sircuncision no tawata un punto di discusion. E dos opinionnan aki a persisti pa mas o menos 13 aña. (1 Corintionan 1:10) Esei si lo tawata un prueba pa e cristiannan di prome, specialmente pa e paganonan cu tawata biba den areanan unda tawatin mas tanto Hudiu.

9. Dicon tawata vital pa resolve e cuestion di sircuncision?

⁹ Finalmente e cuestion a yega na un culminacion na aña 49 di nos era ora cristiannan di Herusalem a bini Antiokia na Siria caminda Pablo tawata predica. Nan a cuminsa siña e hendenan cu e paganonan cu a comberti mester ser sircuncida di acuerdo cu e Lei. Y no ta poco nan a discuti cu Pablo y Barnabas! Si no a resolve e cuestion ei, siguramente algun cristian sea di parti di e Hudiunan of di e paganonan lo a trompica. Pesei, nan a haci areglo pa Pablo y otro cristiannan bai Herusalem y pidi e cuerpo gobernante cristian pa resolve e cuestion unabes y pa semper.—Echonan 15:1, 2, 24.

Unidad—Despues di un Desacuerdo Abierto!

10. Kico ta algun factor cu e cuerpo gobernante a tene cuenta cu ne prome cu el a tuma un decision relaciona cu e posicion di e paganonan?

¹⁰ Ta parce cu durante e reunion cu a ser teni, algun hende a trece nan argumentonan na fabor di sircuncision y otronan a trece nan punto di bista contrario. Pero nan emocionnan no a domina den e reunion. Despues di hopi deliberacion, apostel Pedro y Pablo a duna un splicacion di e señalnan cu Yehova a efectua entre e cristiannan insircuncida. Nan a splica cu Dios a basha spirito santo riba paganonan insircuncida. Den un sentido nan a puntra: ‘E congregacion cristian tin derecho di rechasa loke Dios a acepta?’ Despues disipel Santiago a lesa un pasashi for di Bijbel cu a yuda tur presente compronde kico ta Yehova su boluntad den e asunto.—Echonan 15:4-17.

11. Ki factor no tawata envolvi ora a tuma decision relaciona cu sircuncision, y kico ta mustra cu Yehova a bendiciona e decision?

¹¹ Awor tur bista tawata fiha riba e cuerpo gobernante. Nan origen Hudiu lo a influencia nan pa tuma un decision na fabor di sircuncision? No. E hombernan fiel aki tawata determina pa sigui e Scritura y e guia di Dios su spirito santo. Despues di a tende tur testimonio relevante, e cuerpo gobernante unanimamente a bai di acuerdo, cu e paganonan cu a bira cristian no tin nodi sircuncida ni sigui e Lei di Moises. Ora e rumannan a tende esaki, nan a alegra y e congregacionnan a cuminsa “bira cada dia mas hopi.” E cristiannan aki cu a somete  nan na direccion teocratico bon cla, a wordo bendiciona cu un contesta solido for di Bijbel. (Echonan 15:19-23, 28, 29; 16:1-5) Sinembargo, tawatin un pregunta importante mas cu mester a haya contesta.

Kico di Cristiannan Hudiu?

12. Cua pregunta no a haya contesta?

¹² E cuerpo gobernante a indica bon cla cu e paganonan cu a bira cristian no tawatin nodi ser sircuncida. Pero kico di e cristiannan Hudiu? E decision cu e cuerpo gobernante a tuma no a contesta e parti spesifico ei di e cuestion.

13. Dicon tawata incorecto pa pretende cu hende mester a cumpli cu e Lei di Moises pa haya salbacion?

¹³ Algun cristian Hudiu cu tawata “yen di celo pa e Lei” a sigui sircuncida nan yiunan y cumpli cu cierto aspectonan di e Lei. (Echonan 21:20) Otronan a bai mas leu ainda door di asta insisti cu cristiannan Hudiu mester cumpli cu Lei pa nan por ser salba. Nan tawata gravemente kiboca. Por ehempel, con un cristian Hudiu por a ofrece un sacrificio di bestia pa pordon di pica? Hesus su sacrificio a cansela tur e sacrificionan ei. Kico di e rekisito di Lei cu a mustra cu Hudiunan mester a evita di sera mucho cu paganonan? Lo tawata masha dificil pa e predicadonan cristian celoso tene nan mes na e restriccionnan aki y toch cumpli cu e tarea di siña e paganonan tur e cosnan cu Hesus a siña. (Mateo 28:19, 20; Echonan 1:8;  10:28) * No tin evidencia cu e asunto aki a ser clarifica durante un reunion di e cuerpo gobernante. Sinembargo, e congregacion no a keda sin yudansa.

14. Ki guia relaciona cu e Lei, Pablo su cartanan inspira a duna?

¹⁴ Guia a bini, no den forma di un carta di e cuerpo gobernante, sino den otro cartanan inspira cu e apostelnan a skirbi. Por ehempel, apostel Pablo a manda un mensahe fuerte pa e cristiannan Hudiu y e paganonan comberti cu tawata biba na Roma. Den su carta el a splica nan cu un berdadero Hudiu “ta Hudiu di paden; y sircuncision ta esun di curason, segun e spirito.” (Romanonan 2:28, 29) Den e mesun carta Pablo a uza un ilustracion pa mustra cu cristiannan no ta bou di Lei mas. El a rasona cu un mohe no por ta casa cu dos homber na mes momento. Sinembargo, si su casa muri, e ta liber pa casa atrobe. Caba Pablo a aplica e ilustracion, mustrando cu cristiannan ungi no por somete nan na e Lei di Moises y na mesun tempo pertenece na Cristo. Nan mester a “muri pa [cu e] Lei” pa nan por a uni cu Cristo.—Romanonan 7:1-5.

Slow pa Capta e Punto

15, 16. Dicon algun cristian Hudiu no a capta e punto relaciona cu e Lei, y kico esaki ta mustra nos tocante e necesidad pa keda spiritualmente alerta?

¹⁵ Pablo su rasonamento relaciona cu e Lei tawata indiscutibel. Con por ta anto cu algun cristian Hudiu no a capta e punto? Un di e  motibonan ta cu nan no tawatin discernimento spiritual. Por ehempel, nan a neglisha di alimenta nan mes cu cuminda spiritual solido. (Hebreonan 5:11-14) Nan no tawata asisti regularmente na reunionnan cristian tampoco. (Hebreonan 10:23-25) Un otro motibo pakico algun no a capta e punto por tin di aber cu e manera cu e Lei tawata hinca den otro. E tawata consentra riba cosnan manera e tempel y sacerdocio, esta, cosnan cu hende por a mira, sinti y mishi cu ne. Tawata mas facil pa un persona cu no ta spiritual acepta e Lei, cu acepta e principionan mas profundo di cristianismo cu ta consentra riba cosnan cu no ta wordo mira.—2 Corintionan 4:18.

¹⁶ Den Pablo su carta na e Galationan, el a duna un otro motibo pakico algun hende cu tawata yama nan mes cristian tawata ansioso pa sigui e Lei. El a splica cu e hombernan aki tawata kier pa hende considera nan como miembronan respeta di un religion cu hopi hende ta sigui of acepta. En bes di ta dispuesto pa sobresali como diferente den e comunidad, nan tawata dispuesto pa casi compromete nan fe pa ta parti di e comunidad. Nan tawata mas interesa pa haya e aprobacion di hende cu gana e aprobacion di Dios.—Galationan 6:12.

17. Na ki tempo e punto di bista corecto relaciona cu siguimento di e Lei a bira perfectamente cla?

¹⁷ E cristiannan cu a studia cuidadosamente loke Pablo y otronan a skirbi bou di inspiracion a saca e conclusionnan exacto relaciona cu e Lei. Sinembargo, ta na aña 70 di nos era, e punto di bista corecto relaciona cu e Lei di Moises a bira definitivamente cla pa tur cristian Hudiu. Esaki a sosode ora Dios a permiti pa Herusalem, su tempel y e registronan di su sacerdocio wordo destrui. Door di esaki no tawata posibel mas pa ningun hende cumpli cu tur e aspectonan di e Lei.

Aplicando e Les Awe

18, 19. (a) Ki actitud nos mester tin y cua actitud nos mester evita pa nos por keda den bon condicion spiritualmente? (b) Kico Pablo su ehempel ta siña nos relaciona cu siguimento di e guia cu nos ta ricibi for di rumannan cu ta hiba delantera? (Mira cuadro na pagina 24.)

¹⁸ Despues di a considera e susesonan aki cu a tuma luga hopi tempo pasa, kisas bo ta puntra bo mes: ‘Si mi tawata biba e tempo ei, con lo mi a reacciona ora Dios su boluntad a ser revela progresivamente? Lo mi a keda pega strictamente na e punto di bista tradicional? Of lo mi a warda cu pasenshi te ora cu e comprondemento corecto a bira cla? Y ora esaki a sosode, lo mi a apoy’e di henter mi curason?’

¹⁹ Claro cu nos no por ta sigur con nos lo a reacciona si nos a biba e tempo ei. Pero nos por puntra nos mes: ‘Con mi ta reacciona awe ora cu bin clarificacionnan den comprondemento di Bijbel? (Mateo 24:45) Ora mi haya guia basa riba Bijbel, mi ta purba aplic’e, door di pega no solamente na e palabranan di lei sino tambe na e spirito tras di dje? (1 Corintionan 14:20) Mi ta warda cu pasenshi riba Yehova ora ta parce cu mi preguntanan no tin fin di haya contesta?’ Ta masha importante pa nos haci bon uzo di e cuminda spiritual cu nos tin na nos disposicion awe pa “nos no aparta nos for di e caminda.” (Hebreonan 2:1) Laga nos scucha cu atencion ora Yehova ta duna nos instruccion mediante su Palabra, su spirito y su organisacion riba tera. Si nos haci esei, Yehova lo bendiciona nos cu un bida felis y yen di satisfaccion pa semper.

[Nota]

Con Lo Bo Contesta?

• Den ki sentido e Lei di Moises tawata manera ‘un tutor cu ta guia na Cristo’?

• Con lo bo splica e diferencia entre e reaccion di Pedro y esun di “esnan cu tawata sircuncida” y cu a apoya sircuncision, riba ahustenan den comprondemento di e berdad?

• Kico bo a siña tocante e manera cu Yehova ta revela e berdad awe?

[Preguntanan di Estudio]

[Cuadro/Plachi na pagina 24]

Cu Humildad Pablo Ta Enfrenta un Prueba

Despues di un biahe di misionero exitoso, Pablo a yega Herusalem na aña 56 di nos era. Einan el a hay’e cu un prueba. E congregacion a tende cu Pablo tawata siña hende cu e Lei no ta aplicabel mas. E ancianonan tawatin miedo cu e cristiannan Hudiu resien comberti lo a trompica door di e manera franco cu Pablo tawata papia riba e tema di Lei y cu nan lo por a conclui cu cristiannan no tin respet pa Yehova su areglonan. Tawatin cuater cristian Hudiu cu a haci un voto, kisas nan a hura como Nazareno. Nan mester a bai tempel pa nan por a cumpli cu nan voto.

E ancianonan a pidi Pablo pa bai na e tempel hunto cu e cuater hombernan aki y paga nan gastonan. Pablo a skirbi por lo menos dos carta inspira den cua el a rasona cu hende no tin nodi cumpli cu e Lei pa nan haya salbacion. Sinembargo, el a tene cuenta cu consenshi di otro hende. Mas prome el a skirbi: “Pa esnan cu ta bou di lei mi a bira manera bou di lei . . . pa mi por gana esnan cu ta bou di lei.” (1 Corintionan 9:20-23) Aunke nunca Pablo no a compromete principionan vital di e Scritura, el a sinti cu e por a acepta e sugerencia di e ancianonan. (Echonan 21:15-26) Loke el a haci no tawata robes. Ningun caminda e Scritura no ta prohibi hende di haci un voto, y nan tawata uza e tempel pa adoracion puro y no pa idolatria. Pesei pa Pablo no pone ningun hende trompica, el a haci loke nan a pidie. (1 Corintionan 8:13) Sin duda, Pablo mester tawata hopi humilde, y esaki ta pone cu nos ta haya mas aprecio p’e.

[Plachi na pagina 22, 23]

Pa algun aña, e cristiannan tawatin diferente punto di bista tocante e Lei di Moises