Pobresa Lo Caba un Dia?

REI sabi Salomon di antiguo Israel a bisa: “Ata, mi a wak e lagrimanan di esnan oprimi, y cu nan no tawatin ni un hende pa consola nan; y pa banda di nan opresornan tawatin poder, ma nan no tawatin ni un hende pa consola nan.” (Eclesiastes 4:1) Sin duda, hopi di e hendenan oprimi cu e tawatin na mente tawata pober tambe.

Bo no por midi pobresa solamente a base di montante di placa. Datonan suministra door di Banco Mundial na juni 2002 ta mustra cu “segun calculo, na 1998, 1,2 mil miyon hende rond mundo a biba cu menos cu un dollar Mericano pa dia . . . y 2,8 mil miyon a biba cu menos cu dos dollar Mericano pa dia.” Nan a remarca cu aunke e cantidadnan ei ta mas abou cu calculonan anterior, “ainda tin mucho hende ta sufri debi na pobresa.”

Pobresa lo caba un dia? Hesucristo a bisa su disipelnan: “E pobernan boso tin semper serca boso.” (Huan 12:8) Pero esaki ta nifica cu pobresa y su consecuencianan desagradabel lo sigui pa semper? No. Pasobra e echo cu Hesus no a priminti su siguidonan cu nan tur lo ta rico den sentido material no mester pone nos conclui for di su palabranan cu no tin speransa pa hende pober.

Aunke hende su esfuersonan y promesanan pa caba cu pobresa hopi bes a fracasa, Bijbel, e Palabra di Dios, ta sigura nos cu pronto lo no tin hende pober mas. De echo, Hesus a predica “evangelio na e pobernan.” (Lucas 4:18) E evangelio aki ta inclui e promesa cu pobresa lo ser elimina. Esaki lo sosode ora e Reino di Dios introduci condicionnan husto riba tera.

Esei si lo ta un mundo diferente! E Rei celestial Hesucristo “lo tin compasion di e pober y di esun den necesidad, y e lo salba bida di esnan den necesidad.” Si, e “lo rescata nan bida for di opresion y violencia.”—Salmo 72:13, 14.

Relaciona cu e tempo ei, Mikeas 4:4 ta bisa: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan, pasobra e boca di e SEÑOR di ehersitonan a papia.” E Reino di Dios lo soluciona tur problema cu ta aflihi humanidad, si, e ta bai elimina asta malesa y morto. Dios “lo traga morto pa semper, y Señor DIOS lo seca awa di wowo for di tur cara.”—Isaias 25:8.

Bo por tin confiansa den e promesanan aki pasobra ta Dios mes a inspira nan. Pakico bo no ta investiga evidencia cu ta duna prueba cu e profecianan ei di Bijbel ta confiabel?

[Reconocemento di plachi na pagina 32]

FAO photo/M. Marzot