Purba Mira Otro Hende Manera Yehova Ta Mira Nan

“Dios no ta mira manera hende ta mira.”—1 SAMUEL 16:7.

1, 2. Den ki manera Yehova su punto di bista di Eliab ta distinto for di esun di Samuel, y kico nos por siña di esaki?

DURANTE siglo 11 prome cu nos era, Yehova a manda profeta Samuel riba un mision secreto. El a bisa e profeta pa e bai cas di un homber cu yama Yese y ungi un di Yese su yiu hombernan como e futuro rei di Israel. Ora Samuel a mira Eliab, e yiu mayo di Yese, el a kere sigur cu el a haya esun cu Dios a scohe. Pero Yehova a bis’e: “No wak su aparencia ni e haltura di su estatura, pasobra mi a rechas’e; pasobra Dios no ta mira manera hende ta mira, pasobra hende ta wak aparencia di pafo, ma SEÑOR ta wak curason.” (1 Samuel 16:6, 7) Samuel no a mira Eliab manera Yehova a mir’e. *

² Ta masha facil pa hende faya ora di evalua otro. Di un banda, nos por ser engaña door di hendenan cu di pafo ta parce masha bon y agradabel, mientras cu di paden nan ta hende sin ningun principio moral. Di otro banda, nos por ta masha severo y stricto den e manera cu nos ta evalua hende sinsero cu tin rasgonan di personalidad cu ta molestia nos.

3, 4. (a) Si dos cristian tin problema cu otro, kico cada un mester ta determina pa haci? (b) Ki preguntanan nos mester haci nos mes ora nos tin un desacuerdo serio cu un compañero creyente?

³ Nos por haya nos cu problema ora nos ta lihe pa husga otronan, asta esnan cu nos conoce pa hopi aña. Podise bo tawatin un pleito serio cu un cristian cu un tempo tawata bo amigo pega. Lo bo kier drecha e relacion ei? Kico lo yuda bo logra esaki?

⁴ Pakico no purba haya un punto di bista mas profundo y positivo di bo ruman cristian? Y haci esaki cu e palabranan aki di Hesus na mente: “Ni un hende no por bin serca mi, si no ta e Tata cu a manda mi a hal’e.” (Huan 6:44) Anto puntra bo mes: ‘Dicon Yehova a hala e persona aki serca Su Yiu? Ki cualidadnan agradabel e persona aki tin? Mi ta lubidando riba e cualidadnan aki of ta considera nan insignificante? Dicon nos a bira amigo na principio? Kico a hala mi serca e persona aki?’ Na prome instante kisas bo no ta cai mes riba su bon cualidadnan, specialmente si bo tin algun tempo caba ta carga rencor. Sinembargo, esaki ta un paso importante pa drecha e relacion entre boso dos. Pa mustra con lo bo por haci esaki,  laga nos ban busca algun caracteristica positivo den dos homber cu de bes en cuando ta bini padilanti den un lus negativo. Nan ta profeta Yonas y apostel Pedro.

Un Bista sin Prehuicio Riba Yonas

5. Ki tarea Yehova a duna Yonas y con el a reacciona?

⁵ Yonas a sirbi como profeta pa e reino di nort di Israel den e dianan di Rei Jeroboam II, yiu homber di Joas. (2 Reinan 14:23-25) Un dia Yehova a duna Yonas ordo pa e bandona Israel y biaha bai Ninive, e capital di e poderoso Imperio di Asiria. Kico e mester a bai haci einan? Avisa e habitantenan cu nan stad grandi ta bai wordo destrui. (Yonas 1:1, 2) En bes di sigui Yehova su instruccion, Yonas a hui! El a subi un barco cu tawata bai Tarsis, un sitio leu for di Ninive.—Yonas 1:3.

6. Dicon Yehova a scohe Yonas pa bai Ninive?

⁶ Kico ta bini na bo mente ora bo pensa riba Yonas? Bo ta pensa cu e tawata un profeta desobediente? Si bo djis wak e aribariba, en berdad bo por pensa asina. Pero ta pasobra Yonas tawata desobediente Yehova a nombr’e como profeta? Claro cu no! Yonas lo mester tawatin cualidadnan cu Dios a gusta. Pensa riba tur e cosnan cu el a haci como profeta.

7. Bou di ki circunstancia Yonas tawata sirbi Yehova na Israel, y con e echo cu bo sa esaki mester influencia bo punto di bista tocante dje?

⁷ Realidad ta cu Yonas tawata un trahado fiel na Israel, un teritorio masha inhospitalario. Profeta Amos, kende a biba rond di e mesun tempo cu Yonas, a describi e Israelitanan di e tempo ei como hende materialista cu a stima placer. * Tawatin cosnan malo ta tuma luga den e pais, pero e Israelitanan no tawata precupa mes cu e cosnan ei. (Amos 3:13-15; 4:4; 6:4-6) Apesar di esei, dia tras dia Yonas a cumpli fielmente cu su tarea di predica na e hendenan aki. Si bo ta un proclamado di e bon nobo, bo  sa con dificil ta pa papia cu hende indeferente y cu ta contento cu nan situacion. Pues anto, aunke nos ta reconoce cu Yonas tawatin debilidad, laga nos no pasa por halto di su bon cualidadnan, esta, e fieldad y perseverancia cu el a manifesta ora e tawata predica na e Israelitanan infiel.

8. Ki desafionan un profeta Israelita lo a hay’e cu ne na Ninive?

⁸ E asignacion pa bai Ninive a encera un tarea asta mas dificil ainda. Pa yega e stad, Yonas lo mester a biaha 800 kilometer na pia, un biahe dificil cu lo a dura rond di un luna. Una bes einan, e profeta lo mester a predica na e Asirionan, kendenan tawata conoci pa nan crueldad. Den nan gueranan nan tawata gusta tortura hende na un manera sadista. Nan tawata asta broma tocante nan echonan salbahe. Pesei no ta un sorpresa cu Bijbel a yama Ninive “e stad tur na sanger.”—Nahum 3:1, 7.

9. Cua cualidadnan Yonas a desplega ora un tormenta violento a menasa e marineronan?

⁹ Door cu Yonas no kier a obedece Yehova su mandamento, el a subi un barco cu a hib’e mas y mas leu for di su asignacion. Sinembargo, Yehova no a perde confiansa den su profeta ni laga un otro hende remplas’e. En bes di esei, Yehova a cuminsa tuma accion pa laga Yonas bolbe na su sano huicio. Di prome, Yehova a laga un tormenta fuerte bini riba lama. E olanan bruto tawata castiga e boto cu Yonas tawata aden. Hombernan inocente tawata bai perde nan bida, y tur esei pa motibo di Yonas! (Yonas 1:4) Con Yonas a reacciona? Door cu e no tawata kier pa e marineronan abordo di e barco perde nan bida pa su motibo, el a bisa nan: “Hisa mi benta na lama. E ora ei lama lo calma pa boso.” (Yonas 1:12) E no tawatin ningun motibo pa pensa cu ora e marineronan bent’e na awa, Yehova lo a salb’e for di lama. (Yonas 1:15) Toch, Yonas tawata dispuesto pa paga cu su bida, pa e marineronan no muri. Nos no ta ripara den e caso aki cu el a desplega cualidadnan manera curashi, humildad y amor?

10. Kico a sosode ora Yehova a bolbe duna Yonas e mesun tarea?

¹⁰ Finalmente Yehova a rescata Yonas. E ultimo actonan ei di Yonas a pone cu nunca mas e no por a sirbi atrobe como representante di Dios? No, yen di misericordia y amor Yehova a bolbe duna e profeta e tarea pa bai predica na e Ninivitanan. Ora Yonas a yega Ninive, cu curashi el a bisa e habitantenan cu nan gran maldad a yega na Dios su atencion y cu nan stad ta bai ser destrui denter di 40 dia. (Yonas 1:2; 3:4) Despues cu e Ninivitanan a tende e mensahe franco di Yonas, nan a repenti y nan stad a keda gespar.

11. Kico ta indica cu Yonas a siña un les balioso?

¹¹ Ainda Yonas no tawatin e punto di bista corecto. Sinembargo, mediante un les practico, cu pasenshi Yehova a yuda Yonas compronde cu E ta wak mas aleu cu aparencia. E ta examina curason. (Yonas 4:5-11) E relato franco cu Yonas mes a skirbi ta duna prueba cu el a compronde e les balioso. E echo cu e tawata dispuesto pa skirbi di su fayonan cu detayenan cu lo a dun’e berguensa ta duna mas prueba di su humildad. Ademas, un hende mester tin curashi pa e admiti su fayo!

12. (a) Con nos por sa cu Hesus ta mira hende mescos cu Yehova ta mira nan? (b) Con nos mester mira e hendenan na ken nos ta predica e bon nobo? (Wak cuadro na pagina 18.)

¹² Siglonan despues, Hesucristo a haci un remarca positivo tocante un suseso den bida di Yonas. El a bisa: “Mescos cu Yonas tawata tres dia y tres anochi den bariga di e monster di lama, asina e Yiu di Hende lo ta tres dia y tres  anochi den curason di tera.” (Mateo 12:40) Despues cu Yonas resusita, lo e haya sa cu Hesus a compara e tempo cu E a pasa den graf cu e periodo di inactividad aki den bida di e profeta. Nos no ta contento pa sirbi un Dios cu no ta rechasa su sirbidonan ora nan comete fayo? E salmista a skirbi: “Mescos cu un tata tin compasion cu su yiunan, asina SEÑOR tin compasion cu esnan cu ta tem’e. Pasobra e sa di kico nos ta traha; E ta corda cu ta stof nos ta.” (Salmo 103:13, 14) Si, e “stof” aki—incluso hende imperfecto awe—por logra hopi cos cu e apoyo di Dios su spirito santo!

Un Punto di Bista Balansa di Pedro

13. Cua caracteristicanan di Pedro por bini na bo mente, pero pakico Hesus a scoh’e como apostel?

¹³ Awor laga nos brevemente considera un di dos ehempel, esun di apostel Pedro. Si bo mester splica ken ta Pedro, lo bo pensa mesora riba caracteristicanan manera descabeya, impulsivo y asta arogante? De bes en cuando, Pedro a manifesta e cualidadnan aki. Sinembargo, Hesus lo a scohe Pedro como un di su 12 apostelnan si realmente e tawata un persona descabeya, impulsivo of arogante? (Lucas 6:12-14) Claro cu no! Hesus a wak mas aleu cu e fayonan aki y a mira cu Pedro tawatin bon cualidad.

14. (a) Kico por ta un splicacion pa e echo cu Pedro tawata cla pa hiba palabra? (b) Dicon nos mester ta gradicido cu Pedro a haci pregunta frecuentemente?

¹⁴ De bes en cuando Pedro a actua como bosero di e otro apostelnan. Tin hende por considera esaki como evidencia di falta di modestia. Pero esaki necesariamente mester ta asina? Algun hende ta bisa cu podise Pedro tawata mas grandi cu e otro apostelnan, y kisas asta mas grandi cu Hesus mes. Si esei ta corecto, esaki lo por ta un splicacion pakico hopi bes Pedro tawata esun cu a hiba palabra. (Mateo 16:22) Sinembargo, tin un otro factor pa tene cuenta cu ne. Pedro tawata un homber spiritual. Su sed pa conocemento a motiv’e pa haci pregunta. Y e preguntanan aki a beneficia nos. Hesus a duna algun contesta balioso riba Pedro su preguntanan, y esakinan a keda conserva den Bijbel. Por ehempel, ta ora Hesus tawata contesta un pregunta di Pedro el a papia tocante ‘e fiel mayordomo.’ (Lucas 12:41-44) Y pensa riba e pregunta aki cu Pedro a haci: “Ata nos a bandona tur cos y a sigui bo; kico anto nos lo haya?” Esaki a hiba na e promesa fortalecedor di Hesus: “Tur hende cu a bandona casnan of ruman hombernan of ruman mohenan of tata of mama of yiunan of cunucunan pa causa di mi nomber, lo ricibi hopi bes mas tanto, y lo hereda bida eterno.” (Mateo 15:15; 18:21, 22; 19:27-29)

15. Dicon nos por bisa cu Pedro en berdad tawata leal?

¹⁵ Pedro tawatin un otro cualidad excelente: e tawata leal. Ora cu hopi di Hesus su disipelnan a stop di siguie pasobra nan no a compronde un di su siñansanan, ta Pedro tawata  esun cu a tribi di papia na nomber di e 12 apostelnan y a bisa: “Señor, serca ken nos lo bai? Abo tin e palabranan di bida eterno.” (Huan 6:66-68) E palabranan aki mester a emociona Hesus su curason! Despues ora un multitud desordena a bini pa aresta e Doño, mayoria di e apostelnan a hui. Sinembargo, Pedro a sigui e multitud na un distancia y a drenta te den e plenchi di e sumo sacerdote. Ta curashi y no cobardia a pone cu el a yega te einan. Mientras nan tawata interoga Hesus, Pedro a join un grupo di Hudiu cu tawata keinta nan curpa na un candela intenso. Un di e esclabonan di e sumo sacerdote a reconoc’e y a acus’e di tawata hunto cu Hesus. Si, Pedro a nenga su Doño, pero laga nos no lubida cu ta lealtad y interes den Hesus a pone Pedro den e situacion peligroso ei, un situacion cu mayoria apostel no a tribi di enfrenta.—Huan 18:15-27.

16. Pa ki motibo practico nos a considera e cualidadnan positivo di Yonas y Pedro?

¹⁶ Pedro su bon cualidadnan ta surpasa su debilidadnan. Esei ta e caso tambe cu Yonas. Mescos cu nos a tira un bista mas positivo riba Yonas y Pedro cu normalmente nos lo a haci, asina tambe nos tin cu entrena nos mes pa ta mas positivo den e manera cu nos ta considera of evalua nos rumannan spiritual. Door di esei nos por tin un miho relacion cu nan. Dicon ta echt necesario pa nos tin un punto di bista positivo di nos rumannan?

Aplicando e Les Awe

17, 18. (a) Ki friccion por desaroya entre cristiannan? (b) Ki conseho di Bijbel por yuda nos resolve problemanan cu compañeronan creyente?

¹⁷ Awendia tin homber, mohe y mucha di tur rasa, di tur nivel economico y cu tur tipo di educacion ta sirbi Yehova unidamente. (Revelacion 7:9, 10) Tin un variedad masha grandi di personalidad den e congregacion cristian! Ya cu nos tur ta sirbi Dios den contacto estrecho cu otro, ta inevitabel cu nos ta haya nos cu friccion de bes en cuando.—Romanonan 12:10; Filipensenan 2:3.

¹⁸ Aunke nos no ta sera wowo pa e debilidadnan di nos rumannan, nos no ta enfoca riba esakinan. Nos ta haci esfuerso pa imita Yehova, di kende e salmista a canta: “Si abo, SEÑOR, tuma inikidadnan na cuenta, o Señor, ken lo por a keda para?” (Salmo 130:3) En bes di consentra riba rasgonan di personalidad cu lo por dividi nos, nos ta “busca e cosnan cu ta trece pas y edificacion di otro.” (Romanonan 14:19) Nos ta haci esfuerso pa mira hende manera Yehova ta mira nan door di pasa por halto di nan faltanan y enfoca riba nan bon cualidadnan. Ora nos haci esei, e ta yuda nos sigui “soporta otro.” (Colosensenan 3:13)

19. Menciona algun paso practico cu un cristian por dal pa resolve desacuerdonan serio.

¹⁹ Pero kico nos lo haci si surgi un mal comprondemento cu nos no por simplemente resolve den nos curason so? (Salmo 4:4) Esaki a sosode entre abo y un compañero di fe? Pakico no trata di drecha e asunto? (Genesis 32:13-15) Di prome, acerca Yehova den oracion y pidie su guia. Anto cu e persona su bon cualidadnan na mente, acerc’e “den suavidad di sabiduria.” (Santiago 3:13) Bis’e cu bo kier haci pas cu ne. Corda e conseho inspira cu ta mustra cu nos mester “ta lihe pa tende, no lihe pa papia y no lihe pa rabia.” (Santiago 1:19) E conseho pa no ta “lihe pa rabia” ta indica indirectamente cu e otro persona lo por haci of bisa algo cu lo por pone bo rabia. Si esei sosode, pidi Yehova yuda bo pa bo domina bo mes. (Galationan 5:22, 23) Laga bo ruman bisa loke e tin di bisa, y  abo scuch’e cu atencion. No interumpie, ni maske bo no ta acuerdo cu tur loke e ta bisa. Su punto di bista por ta robes, pero ta esei ta loke e ta pensa. Purba mira e problema for di su punto di bista. Esaki lo por nifica cu bo tin cu mira bo mes manera bo ruman ta mira bo.—Proverbionan 18:17.

20. Ora di resolve desacuerdo, ki otro pasonan probablemente por resulta den un reconsiliacion?

²⁰ Ora ta bo turno pa papia, hacie cu gracia. (Colosensenan 4:6) Bisa bo ruman loke bo ta gusta di dje. Pidi despensa pa cualkier cos cu bo por a haci cu a causa e mal comprondemento. Si bo esfuersonan humilde hiba na un reconsiliacion, gradici Yehova. Si esei no ta e caso, sigui pidi Yehova guia mientras bo ta busca otro oportunidadnan pa haci pas.—Romanonan 12:18.

21. Con e consideracion aki a yuda bo mira otronan manera Yehova ta mira nan?

²¹ Yehova ta stima tur su sirbidonan. E ta contento pa uza nos tur den su sirbishi apesar di nos imperfeccionnan. Segun cu nos ta siña mas tocante e manera cu E ta mira otro hende, nos amor pa nos rumannan lo sigui crece. Si nos amor pa un compañero cristian a fria, e por lanta atrobe. Nos lo ricibi hopi bendicion si nos haci un esfuerso determina pa mira otro hende cu un punto di bista positivo, si, pa mira nan manera Yehova ta mira nan!

[Nota]

Con Lo Bo Contesta?

• Con Yehova ta mira fayo di su sirbidonan fiel?

• Cua cualidadnan positivo di Yonas y Pedro bo por menciona?

• Ki punto di bista di bo rumannan cristian bo ta determina pa keda cu ne?

[Preguntanan di Estudio]

[Cuadro na pagina 18]

Pensa Con Dios Ta Mira Otro Hende

Ora bo medita riba e relato biblico di Yonas, bo no ta sinti cu bo tin cu haya un otro punto di bista di e personanan na ken bo ta predica e bon nobo regularmente? Podise nan ta parce di ta contento cu nan situacion of indeferente mescos cu e Israelitanan, of nan ta contra e mensahe di Dios. Pero con Yehova Dios ta mira nan? Mescos cu e rei di Ninive a repenti como resultado di e predicacion di Yonas, asta algun hende cu ta prominente den e sistema di cosnan aki por cuminsa busca Dios un dia.—Yonas 3:6, 7.

[Plachi na pagina 15]

Bo ta mira otro hende manera Yehova ta mira nan?

[Plachi na pagina 16, 17]

Hesus a saca algo positivo for di e experencia di Yonas