Ta Necesario pa Mi Yiu Bai Scol?

IMAGINA bo cu bo no por a lesa e palabranan riba e pagina aki, of cu bo no por a papia e idioma oficial di bo pais. Supone cu bo no sa mes unda bo pais ta riba mapa di mundo. Wel, ta masha hopi mucha ta lanta cu e limitacionnan ei. Kico di bo yiu?

Ta necesario pa bo yiu bai scol? Den hopi pais, educacion basico y secundario ta obligatorio y hopi bes gratis. E Tratado di Derechonan di Mucha ta considera cu formacion escolar ta un derecho fundamental. E Declaracion Universal di Derechonan Humano tambe ta bisa asina. Sinembargo, den algun pais kisas scol no ta gratis y esei por bira un carga financiero pa mayornan. Laga nos wak e asunto aki for di e punto di bista di mayornan cristian cu kier pa nan yiunan siña lesa y skirbi, sea mediante un educacion escolar of otro medio.

Ehempel Biblico di Hende Cu Por A Lesa y Skirbi

Mayoria sirbido di Dios menciona den Bijbel por a lesa y skirbi. Pedro y Huan, apostelnan di Hesus, tawata piscado Hudiu pero nan a skirbi buki di Bijbel na Griego, no na nan dialecto Galileo. * Aparentemente, nan mayornan a haci sigur cu nan yiunan a ricibi un educacion basico. Otro escritornan di Bijbel cu tawata den un situacion similar ta entre otro e wardado di carne David, e cunukero Amos, y Hesus su mita ruman Hudas, kende probablemente tawata un carpinte.

E homber Job por a lesa y skirbi, y e buki biblico cu ta carga su nomber ta indica cu e tawata sa algo di ciencia. Tambe lo e mester tawatin talento artistico, pasobra su declaracionnan cita den e buki di Job ta den forma poetico. Y nos sa cu e prome cristiannan tawata por a lesa y skirbi pasobra a haya pidanan di klei cu tawata contene loke ta parce nan notanan biblico.

Educacion Ta Importante pa Cristiannan

Tur cristian mester progresa den conocemento di Bijbel si nan kier agrada Dios. (Filipensenan 1:9-11; 1 Tesalonicensenan 4:1) Uzo diligente di e Scritura y di publicacionnan pa studia Bijbel por promove progreso spiritual. Y siendo cu Dios a percura su Palabra den forma skirbi, E ta spera cu esnan cu ta ador’e por lesa y skirbi. Door di lesa y compronde Bijbel, ta bira mas facil pa aplica su conseho. Claro cu nos lo tin cu lesa cierto partinan mas cu un biaha pa por absorbe loke nan ta bisa y medita riba nan.—Salmo 119:104; 143:5; Proverbionan 4:7.

Tur aña, e pueblo di Yehova ta ricibi centenares di pagina cu informacion util prepara bou di e guia di “e esclabo fiel y prudente.” (Mateo 24:45-47) Tal literatura ta trata cu bida di famia, custumbernan, religion, ciencia y hopi otro tema. Mas importante ainda, e ta contene conseho biblico riba asuntonan  spiritual. Si bo yiunan no por lesa, nan lo perde hopi informacion vital.

Ta importante pa siña historia di humanidad pasobra e ta yuda nos compronde pakico nos mester di e Reino di Dios. Un conocemento basico di geografia tambe ta deseabel. Bijbel ta papia di hopi luga, manera Israel, Egipto y Grecia. Bo yiu por mustra nan riba un mapa di mundo? E por haya su mes pais? Un persona cu no por lesa mapa por haya su mes cu dificultad asta pa cumpli cu su sirbishi den un area asigna.—2 Timoteo 4:5.

Privilegionan den Congregacion

Ancianonan y sirbidonan ministerial cristian tin hopi responsabilidad cu tin di aber cu lesamento. Por ehempel, nan mester prepara parti pa e reunionnan di congregacion. Nan mester yena formularionan relaciona cu suministro di literatura y donacion. Sin un educacion basico, un persona lo tin hopi dificultad pa atende cu e responsabilidadnan aki na un manera eficas.

Trahadonan boluntario ta sirbi den casnan di Betel rond mundo. Pa e personanan aki por comunica bon y cumpli cu nan tareanan, manera traduci literatura y drecha mashin, nan mester por lesa y skirbi den e idioma oficial di e pais den cua nan ta biba. Si bo kier pa un dia bo yiunan disfruta di e tipo di privilegionan aki, por lo general un educacion basico ta un necesidad. Pa ki otro motibo practico ta bon pa manda bo yiu scol?

Pobresa y Supersticion

Hende cu ta biba den pobresa ta casi indefenso den cierto circunstancianan. Sinembargo, den otro casonan, un educacion rasonabel lo por yuda tanto nos como nos yiunan evita di sufri innecesariamente. Masha poco hende cu no sa lesa ni skirbi por biba na drechi. Yiunan y asta mayornan tin biaha ta muri pasobra cu un entrada abou ta bira imposibel pa nan haya asistencia medico. Hende cu a haya masha poco scol of nada mes ta sufri di mal nutricion y ta biba den casnan deplorabel. Un formacion escolar of por lo menos e capasidad di lesa cu skirbi por yuda nan riba e puntonan aki.

Ademas, hende cu sa lesa y skirbi tin menos tendencia di ta supersticioso. Claro cu tanto hende educa como hende sin educacion sa ta supersticioso. Pero hende cu no tin scol tin mas chens di ser engaña. Door cu nan no por lesa informacion cu ta revela tal engaño, otronan ta probecha di nan. Pesei nan tin e tendencia di ta mas supersticioso y kere cu un curandero por haci milager pa nan.—Deuteronomio 18:10-12; Revelacion 21:8.

Educacion No Ta Solamente pa Haya Trabou

Hopi hende ta kere cu e proposito principal di educacion ta pa gana placa. Sinembargo, tin hende educa cu no tin trabou of cu no ta gana suficiente placa pa tene cabes riba awa. Pesei algun mayor ta pensa cu no tin ningun beneficio den manda yiu scol. Pero formacion escolar no ta solamente pa gana placa; e ta prepara yiunan pa bida en general. (Eclesiastes 7:12) Si un persona por papia, lesa y  skirbi e idioma oficial di e pais den cua e ta biba, cosnan manera atende cu docter, autoridad civil of empleado di banco ta bira mas facil, asta rutinario, en bes di algo cu ta spant’e.

Den algun pais, mayornan di mucha cu no a haya scol ta manda esakinan serca un hende pa nan siña pega bloki, pisca, cose of un otro ofishi. Riba su mes ta bon pa siña un ofishi, pero si e muchanan aki no bai scol nunca, probablemente, nan lo no siña lesa y skirbi na drechi. Si nan ricibi un educacion basico prome y despues bai siña un ofishi, sin duda nan lo tin mas chens di evita cu otro hende ta probecha di nan y nan lo hiba un bida mas satisfactorio.

Hesus di Nazaret tawata un carpinte y aparentemente a siña e ofishi serca su tata di criansa, Hose. (Mateo 13:55; Marco 6:3) Tambe Hesus por a lesa y skirbi pasobra for di su 12 aña, e por a hiba un combersacion profundo cu e hombernan educa na e tempel. (Lucas 2:46, 47) Den Hesus su caso, siñamento di un ofishi no a strob’e di haya otro tipo di educacion.

Mester Manda Yiu Mohe Tambe Scol?

Tin biaha mayornan ta manda yiu homber scol pero yiu mohe no. Algun mayor ta pensa cu ta mucho caro pa manda yiu mohe scol. Nan ta haya cu mucha mohe por ta mas util pa nan mama door di keda cas henter dia.  Pero analfabetismo lo stroba un yiu mohe. Un publicacion di UNICEF (Fondo di Nacionnan Uni pa Mucha) ta declara: “Un estudio tras di otro a demostra cu educacion di mucha mohe ta un di e miho strategianan pa combati pobresa.” (Pobresa y Mucha: Lesnan di Añanan ’90 pa Paisnan Menos Desaroya) Mucha mohe educa ta miho prepara pa trata cu problemanan di bida y tuma decisionnan mas sabi, beneficiando asina henter e famia.

Un estudio riba mortalidad di mucha na Benin, West Africa, a indica cu di cada 1.000 yiu bou di cinco aña cu mamanan analfabeto haya, 167 ta muri, mientras cu mamanan cu tin scol secundario ta perde 38. UNICEF ta conclui: “Pesei e nivel di educacion ta un factor determinante den e porsentahe di mortalidad di mucha na Benin, manera ta e caso rond mundo.” Pues, tin varios beneficio den manda yiu mohe tambe scol.

Cursonan di Alfabetisacion Ta Suficiente?

Caminda ta necesario, Testigonan di Yehova ta duna cursonan di alfabetisacion pa miembronan di congregacion cu no por lesa. * E provision util aki ta yuda hende siña lesa, generalmente den nan idioma local. Esaki ta un substituto apropiado pa un  formacion escolar? Ta e congregacion mester educa bo yiunan asta si tin scol regular den bo area?

Aunke cursonan di alfabetisacion ta un areglo amoroso di parti di congregacionnan di Testigonan di Yehova, nan ta diseña pa adultonan cu como mucha nunca no a haya chens di bai scol. Podise nan mayornan no tawata conciente di e importancia di por lesa y skirbi, of kisas no tawatin scol disponibel. E personanan ei por ricibi yudansa door di sigui e curso di alfabetisacion den e congregacion. Pero e cursonan aki no ta un substituto pa un scol regular ni no ta diseña pa duna educacion basico. Cursonan pa siña lesa y skirbi no ta trata temanan manera ciencia, matematica y historia. Sinembargo, na un scol regular si nan sa trata e temanan aki.

Na Africa, e congregacionnan ta duna curso di alfabetisacion principalmente den e idiomanan di tribu, pero no masha den e idioma oficial di e pais. Pero educacion escolar mes si ta den e idioma oficial. Esaki ta trece beneficionan adicional pa e muchanan pasobra ta den e idioma oficial tin mas buki y varios otro material pa lesa. Aunke e cursonan di alfabetisacion por complementa e formacion escolar di un mucha, nan no por remplas’e. Caminda ta posibel anto, no ta sabi pa laga yiu ricibi un formacion escolar?

Ta Responsabilidad di Mayor

Homber cu ta hiba delantera den sirbi e necesidadnan spiritual di e congregacion mester ta cristiannan ehemplar. Nan mester maneha nan cas y nan yiunan “bon.” (1 Timoteo 3:4, 12) Maneha “bon” ta inclui haci tur loke ta posibel pa yuda nos yiunan evita desbentaha den futuro.

Dios a duna mayornan cristian un gran responsabilidad. Nan mester lanta nan yiunan segun su Palabra y yuda nan “stima conocemento.” (Proverbionan 12:1; 22:6; Efesionan 6:4) Apostel Pablo a skirbi: “Ma si un hende no provee pa su mes hendenan, y specialmente pa esnan di su cas, el a nenga e fe y ta piyo cu un incredulo.” (1 Timoteo 5:8) Nos yiunan tambe mester haya un educacion apropiado.

Tin biaha ta e sistema di scol mes ta deficiente. Esei por bini door cu tin demasiado mucha na scol, falta di fondo of kisas maestronan malcontento y mal paga. Pesei ta importante pa mayornan mustra interes activo den loke nan yiunan ta siña na scol. Ta bon pa sera conoci cu e maestronan, specialmente na cuminsamento di cada aña escolar nobo, asta pidiendo nan conseho riba con e yiunan por bira miho studiante. Di e forma ei maestronan por sinti nan aprecia y motiva pa haci mas esfuerso pa cumpli cu e necesidadnan educacional di e muchanan.

Educacion ta un parti vital di un mucha su desaroyo. “E hende sabi ta montona sabiduria”, segun Proverbionan 10:14. Esaki ta specialmente e caso cu conocemento di Bijbel. E pueblo di Yehova—tanto hoben como bieu—mester ta miho informa posibel pa por yuda otro hende den sentido spiritual y ‘pa presenta nan mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na un manera corecto.’ (2 Timoteo 2:15; 1 Timoteo 4:15) Pues, anto, ta necesario pa manda bo yiu scol? Sin duda lo bo conclui cu si, aunke hopi lo depende di e posibilidadnan den bo pais. Pero mayornan cristian tin cu contesta e pregunta mas importante aki: ‘Mi yiunan mester wordo educa?’ Sin importa unda bo ta biba, bo no ta di acuerdo cu e contesta mester ta un si bon cla?

[Nota]

[Cuadro/Plachi na pagina 12, 13]

ORA NO TIN POSIBILIDAD DI BAI SCOL

Den algun situacion ta imposibel pa bai scol. Por ehempel, e revista Refugees a informa cu apenas 1 di cada 5 mucha cu ta bini na remarca, por bai scol den un campo di refugiado. Den algun caso, welga ta paralisa scolnan pa un periodo largo. Kisas e scol ta mucho leu of no tin scol mes den algun area. Persecucion di cristiannan tambe por pone cu ta kita mucha for di scol.

Con bo por yuda bo yiunan den e circunstancianan ei? Kico bo por haci si bo tin varios yiu y bo ta biba den un area caminda bo no tin moda di manda nan tur scol? Wel, lo bo por afford pa manda un of dos di bo yiunan scol sin hinca nan den peliger spiritual? Si ta posibel, kisas nan lo por siña bo otro yiunan loke nan ta siñando na scol.

Den algun pais, ta un di e mayornan mes ta fungi como maestro na cas. * Por lo general, e ta dedica un par di ora pa dia na duna e mucha les. Den tempo di e patriarcanan, mayornan tawatin basta exito cu siñansa di nan yiunan. Aparentemente debi na e bon entrenamento cu Yosef a ricibi di su tata Yacob, na un edad jong caba e por a supervisa otro hende.

Den un luga manera un campo di refugiado, kisas ta dificil pa obtene un programa oficial di les, pero mayornan lo por uza e literatura cu Testigonan di Yehova ta publica como base pa instruccion. Por ehempel, Mi buki di relato bíblico por ta util pa siña yiu chikito. E revista Spierta! ta contene articulonan riba un gran variedad di topico. Por uza e buki Bida—Con El A Presenta? Door di Evolucion of Creacion? pa siña temanan cientifico. E Anuario di Testigonan di Yehova tin un mapa chikito di mundo y ta conta tocante bida y e trabou di predica den varios pais.

Mayornan cu ta prepara e instruccion bon y adapt’e na e nivel di comprondemento di e muchanan, lo por logra bon resultado. Si e muchanan sigui lesa y siña, lo ta mas facil pa nan adapta nan mes na un scol regular, si un dia esaki bira posibel. Cu iniciativa y esfuerso, lo bo por duna bo yiunan un bon educacion—algo cu ta bale la pena!

[Nota]

[Plachi na pagina 13]

Kico lo bo por haci si bo ta biba un caminda cu bo yiunan no por bai un scol regular?