Corte Supremo Ta Apoya Adoracion Berdadero na “Tera di Ararat”

Un homber Armenio cabei shinishi y tata di tres yiu, ta para dilanti di e tribunal di mas halto di su nacion. Tanto su libertad como esun di su compañeronan di fe ta na peliger. Corte ta scucha segun cu e ta cita for di Bijbel pa splica su creencianan. Laga nos analisa e desaroyonan cu a hiba na e huicio aki cu a resulta den un gran victoria na fabor di adoracion berdadero.

ARMENIA ta keda na oost di Turkia y djis suit di e seronan extenso di Caucasus. E tin un poblacion di mas cu tres miyon hende. For di Yerevan, capital di e nacion, bo tin un bista masha impresionante riba dos punta di Sero Ararat, caminda, segun tradicion, e arca di Noe a bin para despues di e Dilubio mundial.—Genesis 8:4. *

Ta for di 1975 Testigonan di Yehova ta efectua nan actividad cristian na Armenia. Despues cu Armenia a logra su independencia for di ex Union Sovietico na 1991, nan a forma un Conseho di Estado pa Asuntonan  Religioso pa registra organisacionnan religioso. Sinembargo, bes tras bes e conseho aki a nenga di registra Testigonan di Yehova, principalmente debi na e cuestion di neutralidad cristian. A consecuencia di esei, for di 1991 mas cu 100 Testigo hoben na Armenia a ser sentencia y den mayoria caso encarsela, pa nan posicion biblico pa cu servicio militar.

Tambe e Conseho a pidi ministerio publico pa investiga e actividad religioso di Lyova Margaryan, un anciano cristian y abogado diligente cu tawata emplea na e planta local di energia atomico. Cu tempo nan a presenta acusacionnan contra Ruman Margaryan a base di Articulo 244 di Codigo Penal. Esaki tawata un lei Sovietico bieu cu nan a pasa durante e era di Prome Minister Khrushchev, cu e intencion di stroba, y finalmente elimina, Testigonan di Yehova y otro gruponan religioso.

Segun e lei ei, ta un crimen pa organisa of dirigi un grupo religioso cu, bou di e pretexto di predica creencianan religioso, ‘ta lok hobennan pa asisti na reunionnan religioso di un religion cu no ta registra’ y ‘ta influencia miembronan pa nenga di cumpli cu nan debernan como ciudadano.’ Pa apoya su ponencia, fiscal a consentra riba e presencia di muchanan menor di edad na reunionnan cu Ruman Margaryan a dirigi den e stad di Metsamor. Tambe fiscal a pretende cu Ruman Margaryan a prohibi miembronan hoben di e congregacion di drenta servicio militar.

E Huicio Ta Cuminsa

E huicio a cuminsa riba diabierna, 20 di juli 2001, den e corte di districto di Armavir, presidi pa Hues Manvel Simonyan, y a sigui te den augustus. E testigonan cu fiscal a presenta, al final a bin admiti durante nan testimonio cu agentenan di Ministerio di Siguridad Nacional (anteriormente KGB) a bisa nan precis kico nan mester a skirbi como parti di nan declaracion contra Ruman Margaryan y a obliga nan firma e declaracionnan ei. Den un caso, un señora a admiti cu un cierto funcionario di Ministerio di Siguridad a dun’e instruccion pa declara cu “Testigonan di Yehova ta contra nos gobierno y nos religion.” E señora a confesa cu e no conoce ningun Testigo di Yehova personalmente, y cu ta simplemente na television di Estado el a tende acusacionnan contra nan.

Ora a yega turno pa Ruman Margaryan papia, el a bisa cu e muchanan menor di edad cu ta asisti na reunionnan di Testigonan di Yehova ta bini cu permit di nan mayornan. Tambe el a splica cu e decision tocante servicio militar ta un decision personal. Durante varios dia fiscal a sigui interog’e. Ruman Margaryan a uza Bijbel pa contesta trankilamente e preguntanan tocante su creencia, mientras cu fiscal a controla tur e textonan biblico den su mes Bijbel.

Dia 18 di september 2001, hues a dicta cu Margaryan ta inocente, y a declara cu “e no a comete ningun crimen” cu su actividad. E agencia di noticia Associated Press a publica un informe revelador cu a bisa lo siguiente: “Awe un lider di Testigonan di Yehova na Armenia a keda absolve di e acusacion di ta  cana comberti hende y di ta prohibi hobennan di drenta servicio militar. Despues di un huicio di dos luna, Corte a bisa cu no tawatin suficiente prueba contra e lider Levon Markarian [Lyova Margaryan]. E por a haya un castigo di cinco aña di prizon. . . . Aunke e Constitucion di Armenia ta garantisa libertad di religion, ta dificil pa gruponan nobo registra. E leinan ta na fabor di e Iglesia Apostolico Armenio, cu ta esun cu ta predomina.” E Organisacion pa Siguridad y Cooperacion na Europa (OSCE) a declara den su comunicado di prensa di 18 di september 2001: “Aunke nos ta aplaudi e veredicto, e Oficina di OSCE ta sigui lamenta cu tal acusacion a ser presenta mes den corte.”

Persecucion Legal Ta Sigui

Sinembargo, e fiscalnan a apela e caso, y e huicio di apelacion a dura un cuater luna mas. Na principio di e huicio, ora cu tawata Ruman Margaryan su turno pa duna declaracion, ta un hues den e panel a hacie e prome pregunta. Ora Ruman Margaryan a cuminsa contesta, e presidente di corte a interumpie y papia contra dje. Despues di esei, e no a laga Ruman Margaryan caba di contesta ni un solo pregunta. Tambe sin duna motibo, el a laga scrap for di e notanan skirbi di e huicio, mayoria pregunta cu e abogado defensor a puntra Ruman Margaryan. Durante e huicio, cada bes fanaticonan religioso anti-Testigo cu a yena e sala di corte, tawata manda palabranan di insulto contra Ruman Margaryan. Despues di e sesion, nan a pasa varios informe infunda y troci di e huicio na television, bisando por ehempel cu Ruman Margaryan, eigenlijk a admiti su culpabilidad.

Na mita di e huicio, e presidente di e panel di tres hues a sorprende tur presente door di presenta un carta di e Conseho di Estado pa Asuntonan Religioso den cua nan ta exigi pa oficina di fiscal tuma medida contra Ruman Margaryan. E paso aki a shock observadonan internacional cu tawata presente na e caso. Pasobra ora cu Armenia a solicita pa bira  miembro di e Conseho di Europa, Armenia a acepta su obligacion di “haci sigur cu tur Iglesia y comunidad religioso, particularmente esnan cu ta ser yama ‘no tradicional’, por practica nan religion sin descriminacion.”

Segun cu e huicio a sigui durante e siguiente simannan, e ambiente a bira mas tenso. Opositornan a sigui molestia y ataca Testigonan tanto paden como pafo di sala di corte. Nan tawata scop rumannan mohe Testigo na nan pia. Ora nan a ataca un Testigo y e no a reacciona bek, nan a dal e di patras na su weso di lomba y e mester a ser hospitalisa.

Mientrastanto, nan a nombra un hues nobo como presidente di e panel. Apesar di e intentonan di algun hende den auditorio pa intimida e abogado defensor, e presidente nobo aki a domina e situacion y asta a manda polis saca for di e sala un mohe cu tawata grita menasanan contra e abogado defensor.

E Caso Ta Bai e Tribunal di Mas Halto

Finalmente, dia 7 di maart 2002, e corte di apelacion a sostene e veredicto di corte di prome instancia. Algo curioso ta cu un dia prome cu nan a anuncia e veredicto, gobierno a disolve e Conseho di Estado di Asuntonan Religioso. Atrobe, fiscal ta apela e decision, e biaha aki serca e tribunal di mas halto di Armenia: Cassatie. E biaha aki e fiscalnan a pidi pa Corte dicta cu mester cuminsa e caso di nobo pa por “entrega un veredicto di culpabel.”

Un panel di seis hues, presidi pa Hues Mher Khachatryan, a reuni 11 or di mainta dia 19 di april 2002. Den su declaracion di apertura, un di e fiscalnan a expresa gran indignacion pa e echo cu e dos cortenan anterior no a haya Ruman Margaryan culpabel. Sinembargo, e biaha aki ta e cuater huesnan a interumpi fiscal y interog’e cu preguntanan direct. Un hues a scual e fiscal pasobra el a purba crea prehuicio serca e huesnan door di menciona den e acusacionnan cu el a entrega contra Ruman Margaryan, e trabou di predica di Testigonan di Yehova y e echo cu nan ta un religion cu no ta registra; mientras cu Articulo 244 no ta defini ningun di e dos puntonan ei como algo criminal. Caba e hues a describi e accionnan di fiscal como “persecucion mediante un caso criminal.” Un otro hues a menciona varios caso di Corte Europeo den cua Testigonan di Yehova a ser reconoce como un “religion conoci” cu tin derecho di haya proteccion a base di e Tratado Europeo di Derechonan Humano. Na e ocasion ei, un pasto den sala di corte a grita cu Testigonan di Yehova ta dividi e nacion. Corte a duna ordo pa e keda keto.

E ora ei e huesnan a yama Lyova Margaryan for di den auditorio, un paso sin precedente pa e corte halto aki. Ruman Margaryan a duna un bon testimonio tocante Testigonan di Yehova su posicion cristian riba varios asunto. (Marco 13:9) Despues di un deliberacion cortico, Corte a regresa y unanimamente a sostene e veredicto “inocente.” Bo por a mira cu Ruman Margaryan a sinti un gran alivio. Den su decision por escrito, Corte a declara: “E actividad aki [di Lyova Margaryan] no ta ser considera como un crimen segun e leinan existente, y e tipo di acusacionnan aki ta contradeci Articulo 23 di e Constitucion di Armenia y Articulo 9 di e Tratado Europeo.”

Efectonan di e Decision

Si ministerio publico a logra gana e caso, esei lo a habri caminda pa tuma pasonan legal contra otro ancianonan Testigo den congregacionnan rond Armenia. Nos ta spera cu e decision bon cla cu Corte a dicta lo evita tal hostigamento. Un decision desfaborabel tambe lo a bira un pretexto pa sigui nenga di registra Testigonan di Yehova. Danki Dios, cu awor Corte a kita e pretexto falso ei.

Tempo y dia lo mustra si nan lo laga registra e mas cu 7.000 Testigonan di Yehova cu tin den e pais aki. Mientrastanto, adoracion berdadero ta sigui prospera den “tera di Ararat.”

[Nota]

[Plachi na pagina 12]

Lyova Margaryan durante su huicio

[Plachi na pagina 13]

Ruman Margaryan hunto cu su famia