Desplega “Tur Suavidad pa cu Tur Hende”
Desplega “Tur Suavidad pa cu Tur Hende”
“Sigui recorda nan . . . pa ta rasonabel, desplegando tur suavidad pa cu tur hende.”—TITO 3:1, 2, NW.
1. Dicon no ta semper facil pa desplega suavidad?
“SEA imitadonan di mi, mescos cu ami tambe ta di Cristo”, apostel Pablo a skirbi. (1 Corintionan 11:1) Tur sirbido di Dios awe ta haci esfuerso pa sigui e conseho aki. Ta berdad cu esei no ta facil, pasobra loke nos a hereda for di nos prome mayornan humano ta deseonan egoista y caracteristicanan cu no ta di acuerdo cu e ehempel di Cristo. (Romanonan 3:23; 7:21-25) No obstante, pa loke ta trata suavidad, nos tur por desplega e cualidad aki si nos haci esfuerso. Pero no ta basta pa djis depende riba nos determinacion propio. Kico mas ta necesario?
2. Con nos por desplega “tur suavidad pa cu tur hende”?
2 E suavidad cu Dios kier pa nos tambe cultiva ta parti di e fruta di spirito santo. Mas nos sigui e direccion di Dios su forsa activo, mas su fruta lo ta bisto den nos. Ta e ora ei numa nos lo por desplega “tur suavidad pa cu tur hende.” (Tito 3:2, NW) Laga nos analisa con nos por imita e ehempel di Hesus y asina yuda esnan cu bini den contacto cu nos “haya sosiego”, es decir, sinti nan refresca.—Mateo 11:29; Galationan 5:22, 23.
Den Famia
3. Ki situacion den famia ta refleha e spirito di mundo?
3 Un caminda cu suavidad ta di sumo importancia ta den famia. Organisacion Mundial di Salu ta calcula cu violencia den famia ta forma un riesgo mas grandi pa salu di hende mohe cu accidentenan di trafico y malaria hunto. Por ehempel, na Londen, Inglatera, un cuart di tur crimen violento raporta ta den famia. Hopi bes polis ta topa hende cu ta expresa nan sintimentonan cu “griteria” y palabranan ofensivo. Piyo ainda, algun pareha a laga “amargura” malicioso afecta nan relacion. Tur esaki ta un refleho lamentabel di “e spirito di mundo” y como tal, e ta inaceptabel den famianan cristian.—Efesionan 4:31; 1 Corintionan 2:12.
4. Ki efecto suavidad por tin riba un famia?
4 Pa contraresta tendencianan mundano, nos tin mester di Dios su spirito. “Caminda e spirito di Señor ta, ei tin libertad.” (2 Corintionan 3:17) Amor, bondad, dominio propio y pasenshi ta fortalece e union di esposo y esposa imperfecto. (Efesionan 5:33) Un genio suave ta haci e ambiente na cas mas alegre, y e ta un dushi contraste for di e pleitamento y bringamento cu ta destrui hopi famia. Loke un persona bisa ta importante, pero e manera cu e ta expresa su mes ta transmiti e sintimento y actitud cu tin tras di su palabranan. Ora un hende expresa su precupacion na un manera suave, esei ta plakia tension. Rei sabi Salomon a skirbi: “Un contesta suave ta kita rabia, ma un palabra skerpi ta lanta rabia.”—Proverbionan 15:1.
5. Con suavidad por yuda den un cas dividi pa motibo di religion?
5 Vooral den un cas dividi pa motibo di religion, suavidad ta importante. Suavidad compaña pa obranan bondadoso por yuda gana esnan cu no ta na e banda di Yehova pa bira su sirbido. Pedro a conseha esposanan cristian: “Sea sumiso na boso mes esposonan, pa si algun di nan ta desobedecido na e palabra, nan por wordo gana sin palabra pa medio di e conducta di nan esposanan, ora nan observa boso conducta puro y respetuoso. Y no laga boso dornamento ta di pafo so—vlechtmento di cabei, bistimento di hoyas di oro, of bistimento di paña luhoso; ma lag’e ta e persona scondi di e curason, cu e cualidad incoruptibel di un spirito suave y keto, locual ta precioso den bista di Dios.”—1 Pedro 3:1-4.
6. Con e lasonan entre mayor y yiu por bira mas fuerte door di desplega suavidad?
6 E relacion entre mayor y yiu por ta bou di tension, specialmente si no tin amor pa Yehova. Pero den tur cas di famia cristian, ta necesario pa demostra suavidad. Pablo a conseha tatanan: “No proboca boso yiunan na rabia, ma lanta nan den e disiplina y instruccion di Señor.” (Efesionan 6:4) Ora ta reina suavidad den un famia, e lasonan entre mayor y yiu ta bira mas fuerte. Dean, kende ta bini di un famia di cinco yiu, ta corda lo siguiente di su tata: “Papa tawatin un genio suave. Mi no ta corda cu mi a yega di pleita cu ne, ni tempo mi tawata teenager. Semper e tawata masha suave, asta ora e tawata rabia. Tawatin biaha cu el a manda mi bai mi camber pa straf of a kita cierto privilegionan for di mi, pero nunca nos no a pleita. E no tawata solamente nos tata. E tawata nos amigo tambe, y nos no kier a desapunt’e.” Suavidad en berdad ta yuda reforsa e lasonan entre mayor y yiu.
Den Nos Sirbishi
7, 8. Dicon ta importante pa desplega suavidad den sirbishi di veld?
7 Un otro caminda cu suavidad ta importante ta den sirbishi di veld. Segun cu nos ta comparti e bon noticia di e Reino cu otro hende, nos ta topa personanan di diferente caracter. Tin di nan gustosamente ta scucha e mensahe di speransa cu nos ta trece pa nan. Otronan, pa un of otro motibo, kisas ta reacciona negativo. Ta na e momentonan ei e cualidad di suavidad ta di gran yudansa pa nos por cumpli cu nos tarea di ser testigo te na e parti mas aleha di mundo.—Echonan 1:8; 2 Timoteo 4:5.
8 Apostel Pedro a skirbi: “Santifica Cristo como Señor den boso curason, y sea semper dispuesto pa duna contesta na cada un cu pidi boso pa duna cuenta di e speransa cu tin den boso, sinembargo cu suavidad y reverencia [“respet profundo”, NW].” (1 Pedro 3:15) Door cu nos tin gran aprecio pa Cristo como nos Ehempel, nos ta percura pa nos desplega tanto suavidad como respet ora nos ta duna testimonio na esnan cu ta papia malo cu nos. E forma di actua aki hopi bes ta produci resultadonan remarcabel.
9, 10. Conta un experencia cu ta mustra e balor di suavidad den sirbishi di veld.
9 Keith su esposa a bai wak ta ken a bati na porta di nan apartamento, mientras cu Keith mes a keda patras. Ora su casa a haya sa cu e bishitante tawata un Testigo di Yehova, rabia el a acusa e Testigonan di ta comete crueldad contra mucha. E ruman a keda calmo. Suavemente, el a contesta: “Ta duel mi cu bo ta pensa asina. Mi tin mag di mustra bo kico Testigonan di Yehova ta kere?” Keith a scucha tur cos. Anto el a bini na porta, para e combersacion y core cu e ruman.
10 Despues, e pareha a haya duele cu nan a trata nan bishitante asina bruto. Su manera suave a conmove nan. Pa nan sorpresa, un siman despues e ruman a bolbe, y Keith cu su casa a lag’e mustra nan e base biblico di su creencia. Mas despues nan a comenta: “Durante e siguiente dos añanan, nos a scucha hopi di loke otro Testigonan tawata bisa.” Nan a bai di acuerdo pa haya un studio di Bijbel, y cu tempo nan tur dos a batisa como simbolo di nan dedicacion na Yehova. Ki un gran recompensa pa e Testigo cu a bishita Keith cu su casa pa prome bes! E Testigo ei a topa e pareha añanan despues y a haya sa cu awor nan ta su rumannan spiritual. Suavidad ta duna bon resultado.
11. Den ki manera suavidad por prepara e caminda pa un hende acepta e berdad cristian?
11 Loke Harold a pasa aden como solda a hacie un persona amarga, yen di rencor, y a pon’e duda cu Dios ta existi. E situacion a bira piyo ora cu un accidente di trafico, causa door di un chauffeur burachi, a laga Harold mancaron pa resto di su bida. Ora Testigonan di Yehova a pasa na su cas, Harold a bisa nan cu e no kier pa nan bishit’e mas. Pero un dia, un Testigo cu yama Bill kier a bishita un persona interesa cu ta biba dos porta despues di Harold. Pa kibocacion, Bill a bati na porta di Harold. Ora Harold, cu tawata cana cu dos kruk, a habri porta, Bill a pidi despensa mesora, y a splica cu ta na e otro cas e mester a bai. Con Harold a reacciona? Bill no tawata sa cu Harold a mira na noticia na television con e Testigonan a traha hunto pa construi un Salon di Reino nobo den un tempo masha cortico. Harold a keda impresiona ora el a mira asina hopi hende trahando hunto den union, y el a cambia su actitud pa cu e Testigonan. Conmovi pa Bill su manera suave y agradabel y e manera bondadoso cu el a pidi despensa, Harold a dicidi di laga e Testigonan bishit’e. El a studia Bijbel, haci progreso y a batisa como un sirbido di Yehova.
Den Congregacion
12. Ki caracteristicanan mundano e miembronan di e congregacion cristian mester resisti?
12 Un di tres caminda cu suavidad ta importante ta den e congregacion cristian. Conflicto ta algo comun den sociedad awe. Serca hendenan cu tin un punto di bista mundano di bida ta masha normal pa tin debate, discutimento y pleito. De bes en cuando, e caracteristicanan mundano aki ta gatia drenta den e congregacion cristian y ta manifesta nan mes den pleito y discusion. Ruman hombernan den puesto di responsabilidad ta bira tristo ora nan tin cu trata cu e situacionnan aki. No obstante, amor pa Yehova y pa nan rumannan ta motiva nan pa purba yuda esnan cu a faya pa nan repenti y bira bek.—Galationan 5:25, 26.
13, 14. Kico por ta e resultado di “corigi cu suavidad esnan cu ta den oposicion”?
13 Den prome siglo, algun persona den congregacion a causa problema pa Pablo y su compañero Timoteo. Pablo a spierta Timoteo pa tene cuidou cu rumannan cu a parce articulonan “pa deshonor.” Pablo a rasona: “E sirbido di Señor no mester ta pleitado, ma cariñoso cu tur hende, cu capasidad pa siña, cu pasenshi ora cu e wordo trata inhustamente, cu ta corigi cu suavidad esnan cu ta den oposicion.” Ora nos ta mantene un genio suave asta ora nos ser proboca, esnan cu ta na desacuerdo hopi bes ta ser motiva pa reevalua nan critica. Anto manera Pablo a sigui bisa, kisas Yehova na su turno, ta “duna nan repentimento cu ta hiba na conocemento di e berdad.” (2 Timoteo 2:20, 21, 24, 25) Ripara tambe cu Pablo ta conecta pasenshi y ser cariñoso cu suavidad.
14 Pablo mes a practica loke el a predica. Ora e tawata trata cu e “super-apostelnan” den e congregacion di Corinto, el a urgi e rumannan: “Awor ami, Pablo, personalmente ta roga boso pa medio di e suavidad y ternura di Cristo—ami cu ta suave ora mi ta cara cara cu boso, ma for di un distancia masha fuerte mes pa cu boso.” (2 Corintionan 10:1; 11:5) Pablo di berdad a imita Cristo. Tuma nota cu el a haci su apelacion na e rumannan aki “pa medio di suavidad” di Cristo. Asina el a evita un actitud arogante y dictatorial. Indudablemente, esnan den congregacion cu tawatin curason receptivo a gusta su animacion. El a suavisa relacionnan cu tawata bou di tension y a pone e base pa pas y union den e congregacion. Esaki no ta un forma di actua cu nos tur por haci esfuerso pa imita? Specialmente ancianonan, tin cu actua segun e ehempel di Cristo y Pablo.
15. Dicon suavidad ta importante ora di duna conseho?
15 E responsabilidad di yuda otro siguramente no ta conta solamente ora cu e pas y union di e congregacion ta core peliger. E rumannan mester di guia amoroso hopi prome cu tension lanta den nan relacion. Pablo a haci e yamada: “Rumannan, aunke un homber dal un paso robes prome cu e realisa esei, boso cu tin cualidadnan spiritual, trata na reahusta e homber ei.” Pero den ki manera? “Cu un spirito di suavidad, vigilando bo mes, pa miedo cu bo mes tambe no ser tenta.” (Galationan 6:1, NW) No ta semper facil pa mantene “un spirito di suavidad”, specialmente door cu tur cristian, incluso e hombernan nombra, tin tendencianan pecaminoso. No obstante, ta suavidad di parti di esun cu ta duna conseho lo pone cu ta bira mas facil pa esun cu a faya haci e reahustenan necesario.
16, 17. Kico lo por yuda kita un hende su mala gana di aplica conseho?
16 Na Griego original, e palabra traduci “reahusta” por referi tambe na e procedura pa spalk weso kibra, algo doloroso. E docter cu ta spalk un weso kibra ta trankilisa bo door di papia positivo tocante e beneficionan di e procedura. Cu su manera calmo y bisando algun palabra di antemano, e ta calma e dolornan di mas piyo. Asina tambe por sosode cu un reahuste spiritual ta doloroso. Pero suavidad lo yuda hacie mas soportabel, y door di esei prepara caminda pa esun cu a faya cambia su rumbo y restaura relacionnan agradabel. Asta si na principio e persona ta resisti e conseho, suavidad di parti di esun cu ta ofrece yudansa por kita su mala gana di sigui conseho biblico sano.—Proverbionan 25:15.
17 Ora nos ta yuda otro hende reahusta nan mes, semper tin e peliger cu nan por considera e conseho como critica. Un escritor a expres’e asin’aki: ‘Ora di scual hende nos ta den gran peliger di ser demasiado severo y pesei ta esencial pa na ocasionnan asina nos ta mas manso.’ Loke lo yuda e consehero cristian evita e peliger aki ta di cultiva suavidad cu ta bini di humildad.
“Pa cu Tur Hende”
18, 19. (a) Dicon kisas por ta dificil pa cristiannan desplega suavidad ora di trata cu autoridadnan? (b) Kico lo yuda cristiannan desplega suavidad pa cu esnan den puesto di autoridad, y cu ki posibel resultado?
18 Un area caminda hopi hende ta haya cu ta dificil pa demostra suavidad ta ora di trata cu autoridadnan. Ta berdad cu e manera cu algun hende den puesto di autoridad ta actua, ta revela cu nan ta duro y no tin cu nes cu otro hende. (Eclesiastes 4:1; 8:9) Sinembargo, nos amor pa Yehova lo yuda nos reconoce su autoridad supremo, y duna autoridadnan gubernamental e sumision relativo cu nan mester haya. (Romanonan 13:1, 4; 1 Timoteo 2:1, 2) Asta ora hende den posicion halto ta purba stroba nos di adora Yehova publicamente, gustosamente nos ta busca maneranan cu ainda ta habri pa ofrece nos sacrificio di alabansa.—Hebreonan 13:15.
19 Bou di ningun circunstancia nos lo uza agresividad. Nos ta haci esfuerso pa ta rasonabel, pero toch sin nunca compromete principionan husto. Ta den e manera aki, nos rumannan ta logra efectua nan sirbishi den 234 pais rond mundo. Nos ta haci caso di Pablo su conseho “pa ta sumiso y pa ta obediente na gobierno y autoridadnan como gobernante, pa ta cla pa tur bon obra, pa no papia malo di ningun hende, pa no busca guera, pa ta rasonabel, desplegando tur suavidad pa cu tur hende.”—Tito 3:1, 2, NW.
20. Ki recompensa tin pa esnan cu desplega suavidad?
20 Tur hende cu ta desplega suavidad lo disfruta di bendicion na abundancia. Hesus a declara: “Felis ta esnan di genio suave, ya cu nan lo hereda e tera.” (Mateo 5:5, NW) Pa Cristo su rumannan ungi pa spirito, mantene suavidad ta garantisa nan felicidad y e privilegio di goberna e parti terenal di e Reino. Pa loke ta e “multitud grandi” di ‘otro carne’, nan ta sigui desplega suavidad y ta anhela pa biba den Paradijs aki riba tera. (Revelacion 7:9; Huan 10:16; Salmo 37:11) Tur ta perspectivanan masha maraviyoso den futuro! Laga nos nunca neglisha e recordatorio cu Pablo a duna e cristiannan na Efeso: “Pesei, ami, prizonero di Señor, ta roga boso pa cana na un manera digno di e yamada cu cual boso a wordo yama, cu tur humildad y suavidad.”—Efesionan 4:1, 2.
Como Repaso
• Ki bendicion nos ta ricibi ora nos ta desplega suavidad
• den famia?
• den sirbishi di veld?
• den congregacion?
• Ki recompensa Bijbel ta priminti na esnan cu ta di genio suave?
[Preguntanan di Estudio]
[Plachi na pagina 21]
Suavidad ta importante specialmente den un famia dividi pa motibo di religion
[Plachi na pagina 21]
Suavidad ta haci e lasonan di famia mas fuerte
[Plachi na pagina 23]
Duna un contesta cu suavidad y respet profundo
[Plachi na pagina 24]
E suavidad di un consehero por yuda esun cu a faya