Suavidad—Un Cualidad Cristian di Sumo Importancia
Suavidad—Un Cualidad Cristian di Sumo Importancia
“Bisti boso cu . . . suavidad.”—COLOSENSENAN 3:12, NW.
1. Kico ta haci suavidad un cualidad remarcabel?
ORA biento ta supla suave, e ta dushi, agradabel. Ta un placer pa ta den compania di un persona suave, of di genio suave, manera nan sa bisa. Y toch, segun e Rei sabi Salomon: “Un lenga suave ta kibra weso.” (Proverbionan 25:15) Suavidad ta un cualidad remarcabel cu ta combina amabilidad cu poder.
2, 3. Ki conexion tin entre suavidad y spirito santo, y kico nos lo considera den e articulo aki?
2 Apostel Pablo a inclui suavidad den su lista di “fruta di e spirito”, cu nos ta haya na Galationan 5:22 y 23. E palabra Griego cu na versiculo 23 den e Traduccion di Mundo Nobo ta ser traduci como “suavidad”, den otro versionnan di Bijbel—incluso Beibel Santu y Beibel na papiamentu koriente—ta ser traduci hopi bes como “mansedumbre” of “humildad.” De echo, den mayoria otro idioma ta dificil pa haya un ekivalente exacto pa e palabra Griego aki pasobra e expresion original ta nifica ser suave y bondadoso di paden, y no djis un manifestacion externo di suavidad (mansedumbre); e ta sinta, no den e manera cu un persona ta comporta, sino den e condicion di su mente y curason.
3 Laga nos considera cuater ehempel biblico cu por yuda nos compronde mas plenamente e nificacion y balor di suavidad. (Romanonan 15:4) Segun nos ta analisa e ehempelnan, nos lo siña no solamente kico e cualidad aki ta, sino tambe con nos por hay’e y despleg’e den tur nos trato cu otro hende.
“Precioso den Bista di Dios”
4. Con bin nos sa cu suavidad tin gran balor den bista di Yehova?
4 Siendo cu suavidad ta parti di e fruta di Dios su spirito, ta logico cu e ta estrechamente liga cu Dios su maraviyoso personalidad. Apostel Pedro a skirbi cu un “spirito suave y keto” ta “precioso den bista di Dios.” (1 Pedro 3:4) Si, suavidad ta un cualidad cu Yehova ta desplega; y e tin gran balor den su bista. Esaki so ta suficiente motibo pa tur sirbido di Dios cultiva suavidad. Pero con Dios Todopoderoso, e Autoridad di mas halto den universo, ta demostra suavidad?
5. Ki speransa pa futuro Yehova su suavidad ta brinda nos?
5 Ora e prome pareha humano, Adam cu Eva, a desobedece Dios su ordo bon cla pa no come di e palo di conocemento di bon y malo, nan a haci esei deliberadamente. (Genesis 2:16, 17) E acto delibera ei di desobediencia a resulta den pica, morto y alehamento for di Dios pa nan y pa nan yiunan cu a bini despues. (Romanonan 5:12) Aunke Yehova tawatin tur motibo valido pa dicta e huicio ei, E no a bira lomba pa e famia humano como algo completamente incorigibel y sin posibilidad di ser rescata. (Salmo 130:3) Al contrario, door cu Yehova ta bondadoso y ta dispuesto pa no ser exigente—manifestando asina suavidad—El a percura e medio via cua humanidad pecaminoso por acerc’e y haya su aprobacion. Si, mediante e regalo di e sacrificio di rescate di su Yiu Hesucristo, Yehova a haci posibel pa nos por aserca su trono eleva sin miedo.—Romanonan 6:23; Hebreonan 4:14-16; 1 Huan 4:9, 10, 18.
6. Con suavidad tawata bisto den Dios su trato cu Cain?
6 Hopi prome cu Hesus a bini na mundo, Yehova a desplega su suavidad ora cu Cain cu Abel, e yiunan di Adam, a ofrece sacrificio na Dios. Yehova a wak kico tawatin den nan curason, y pesei El a rechasa Cain su ofrenda pero a “aprecia” Abel y su ofrenda. E echo cu Dios a aproba fiel Abel y su sacrificio, a causa un mal reaccion di parti di Cain. E relato biblico ta bisa: “Cain a rabia masha pisa y su cara a sera.” Con Yehova a reacciona? El a sintie ofendi door di Cain su mal actitud? No. Suavemente El a puntra Cain pakico e tawata asina rabia. Yehova asta a splica Cain kico e por a haci pa e “wordo acepta.” (Genesis 4:3-7) Di berdad Yehova ta suavidad en persona.—Exodo 34:6.
Suavidad Ta Atrae Hende y Refresca Nan
7, 8. (a) Con nos por siña compronde Yehova su suavidad? (b) Kico e palabranan di Mateo 11:27-29 ta revela tocante Yehova y Hesus?
7 Un di e miho maneranan pa compronde Yehova su cualidadnan inigualabel ta door di studia e bida y ministerio di Hesucristo. (Huan 1:18; 14:6-9) Ora Hesus tawata na Galilea durante e di dos aña di su campaña di predica, el a haci hopi milager den e stadnan Corazin, Betsaida y Capernaum y e area rond di nan. Sinembargo, mayoria di e hendenan tawata orguyoso y desinteresa, y nan a nenga di kere. Con Hesus a reacciona? Aunke el a recorda nan firmemente di e consecuencianan di nan falta di fe, el a sinti compasion pa e ʽam ha·ʼárets, e pueblo humilde y comun entre nan, debi na nan mal condicion spiritual.—Mateo 9:35, 36; 11:20-24.
8 Loke Hesus a haci despues a demostra cu di berdad e “conoce e Tata” y a imit’e. Hesus a extende e siguiente invitacion caloroso na e pueblo comun: “Bin serca mi tur cu ta cansa y carga, y lo mi duna boso sosiego. Tuma mi yugo riba boso, y siña di mi, pasobra mi ta manso [“di genio suave”, NW] y humilde di curason; y boso lo haya sosiego pa boso alma.” E palabranan ei sigur a consola y refresca e hendenan cu a ser trapa y oprimi! Nan ta consola y refresca asta nos awe. Si sinseramente nos bisti nos mes cu suavidad, e ora ei nos lo ta entre esnan ‘na ken e Yiu kier revela’ su Tata.—Mateo 11:27-29.
9. Cua cualidad ta liga cu suavidad, y con Hesus ta un bon ehempel di esaki?
9 Humildad, of ser “humilde di curason”, ta estrechamente liga cu suavidad. Di otro banda, orguyo ta hiba na halsamento di bo mes y hopi bes por pone un hende trata otronan na un manera bruto y sin heful. (Proverbionan 16:18, 19) Hesus a demostra humildad durante henter su ministerio riba tera. Asta ora el a drenta Herusalem seis dia prome cu su morto y a ser aclama como Rei di e Hudiunan, Hesus tawata hopi diferente for di e gobernantenan di mundo. El a cumpli cu e profecia Mesianico di Zacarias: “Ata bo Rei ta bin serca bo, manso [“di genio suave, NW] y sinta riba un burico, un yiu di burico, yiu di un bestia di carga.” (Mateo 21:5; Zacarias 9:9) Fiel profeta Daniel a mira un vision den cua Yehova a delega autoridad di goberna na su Yiu. Sinembargo, den un profecia mas prome, el a describi Hesus como e “hende di mas humilde.” En berdad anto, suavidad y humildad ta cana hunto.—Daniel 4:17; 7:13, 14.
10. Dicon suavidad cristian no kiermen debilidad of falta di poder?
10 E dushi suavidad cu Yehova y Hesus a desplega ta yuda nos hala serca nan. (Santiago 4:8) Claro cu suavidad no ta un indicacion di debilidad of falta di poder. Sigur cu no! Yehova, e Dios Todopoderoso, tin forsa y poder abundante. E tin hopi rabia riba inhusticia. (Isaias 30:27; 40:26) Hesus tambe a demostra un determinacion firme pa no compromete, ni ora e tawata bou di atake di Satanas e Diabel. El a nenga di tolera e practicanan comercial ilegal di e lidernan religioso di su tempo. (Mateo 4:1-11; 21:12, 13; Huan 2:13-17) Sinembargo, ora di trata cu e fayonan di su disipelnan, el a mantene su genio suave, y cu pasenshi el a soporta nan debilidadnan. (Mateo 20:20-28) Un experto di Bijbel aptamente a describi suavidad asin’aki: “Tras di e ternura tin un forsa di staal.” Laga nos desplega e cualidad aki di Cristo, esta, suavidad.
Esun di Genio Mas Suave di Su Tempo
11, 12. En bista di Moises su criansa, kico a haci su suavidad sobresaliente?
11 E di tres ehempel cu nos lo considera ta esun di Moises. Bijbel ta describie como “masha humilde [“di genio mas suave”, NW, nota na pia di pagina], mas cu tur homber cu tawatin riba superficio di tera.” (Numbernan 12:3) Ta bou di inspiracion di Dios e palabranan aki a wordo skirbi. Moises su suavidad sobresaliente a pone cu e tawata cla pa ricibi Yehova su guia.
12 Moises su criansa no tawata normal. Yehova a haci sigur cu e yiu homber aki di mayornan Hebreo fiel a keda gespar durante un tempo di traicion y asesinato. Moises a pasa e prome añanan di su bida bou di cuido di su mama, kende cuidadosamente a siñ’e tocante e Dios berdadero, Yehova. Despues nan a saca Moises for di su cas y a hib’e den un ambiente cu tawata totalmente diferente. Esteban, un martir cristian di prome siglo, a conta: “Moises a wordo educa den tur e siñansa di e Egipcionan, y e tawata un homber di poder den palabra y echo.” (Echonan 7:22) Su fe a keda demostra ora el a observa e inhusticianan cu e capatasnan di Farao tawata comete contra su rumannan. Moises a hay’e ta hui for di Egipto y bai na e tera di Madian pasobra el a mata un Egipcio cu el a mira ta bati un Hebreo.—Exodo 1:15, 16; 2:1-15; Hebreonan 11:24, 25.
13. Ki efecto Moises su estadia di 40 aña na Madian tawatin riba dje?
13 Na edad di 40 aña, Moises tawatin cu percura pa su mes den un desierto. Na Madian el a topa e shete yiu mohenan di Reuel y el a yuda nan saca awa pa duna e tou grandi di nan tata. Ora e mucha mohenan a bai cas bek, contento nan a splica Reuel cu ta “un Egipcio” a libra nan for di e wardadonan di carne cu tawata molestia nan. Riba invitacion di Reuel, Moises a keda biba cu e famia. E contratiemponan cu el a hay’e cu ne no a hacie un persona amarga, yen di rencor; ni nan no a strob’e di adapta su estilo di bida na su ambiente nobo. Su deseo pa haci e boluntad di Yehova nunca no a mengua. Durante 40 aña largo, Moises a desaroya y rafina e cualidad cu despues a bira un caracteristica di dje. Den transcurso di e tempo ei, el a cuida e carnenan di Reuel, el a casa cu Sefora (Zipora), y a lanta dos yiu homber. Si, door di soporta contratiempo, Moises a siña suavidad.—Exodo 2:16-22; Echonan 7:29, 30.
14. Describi un incidente cu a demostra Moises su suavidad durante e tempo cu e tawata lider di Israel.
14 Despues cu Yehova a nombr’e lider di e nacion di Israel, Moises a keda demostra su cualidad di suavidad. Un mucha homber a bin conta Moises cu Eldad y Medad tawata profetisa den e campamento, maske nan dos no tawata presente ora Yehova a drama su spirito riba e 70 ancianonan cu mester a sirbi como ayudante di Moises. Hosue a declara: “Mi señor Moises, prohibi nan!” Moises a contesta suavemente: “Bo ta yalurs pa mi motibo? Ohala cu henter e pueblo di SEÑOR tawata profeta, cu SEÑOR lo a pone su spirito riba nan!” (Numbernan 11:26-29) Suavidad a yuda plakia e situacion tenso.
15. Aunke Moises tawata imperfecto, dicon ta bon pa nos sigui su ehempel?
15 Ta parce cu na un ocasion Moises su suavidad a lag’e na caya. Na Meriba, serca di Kades, e no a dirigi gloria na Yehova, Esun cu ta haci milager. (Numbernan 20:1, 9-13) Aunke Moises tawata imperfecto, su fe firme a sosten’e durante henter su bida, y su suavidad sobresaliente ta conmove nos te awe.—Hebreo 11:23-28.
Brutalidad Contra Suavidad
16, 17. Ki spiertamento nos ta saca for di e relato di Nabal cu Abigail?
16 Nos ta haya un ehempel spiertador den tempo di David, djis despues di morto di Dios su profeta Samuel. Ta trata di un pareha casa, Nabal y su esposa Abigail. Ki un contraste tawatin entre e dos hendenan aki! Mientras cu Abigail tawata “discreto” [NW], su casa tawata “bruto y di mala fe.” David su hombernan a yuda proteha e tounan grandi di Nabal contra ladron. Pero ora nan a bai pidi Nabal pa duna nan poco cos di come y bebe, Nabal a nenga nan peticion na mal ordo. Hopi indigna, y cu nan rason, David y un grupo di homber a faha nan spadanan y a sali bai cu intencion di bringa contra Nabal.—1 Samuel 25:2-13.
17 Ora Abigail a tende kico a pasa, rapidamente el a prepara pan, biña, carni y troshi di rasenchi y figo y a sali bai contra David. El a rog’e: “Laga e culpa ta riba ami so, mi señor. Y [por] fabor, laga bo sirbiente papia cu bo, y scucha e palabranan di bo sirbiente.” Abigail su suplica suave a haci David su curason moli. Despues di a scucha Abigail su splicacion, David a declara: “Bendiciona sea e SEÑOR Dios di Israel, kende a manda bo e dia aki pa contra cu mi, y bendiciona sea bo discernimento, y bendiciona sea abo mes, kende a kita mi awe di drama sanger.” (1 Samuel 25:18, 24, 32, 33) Nabal su manera bruto al final a causa su morto. Abigail su bon cualidadnan cu tempo a dun’e e goso di bira David su esposa. Su suavidad ta un ehempel pa tur hende cu kier sirbi Yehova awe.—1 Samuel 25:36-42.
Busca Suavidad
18, 19. (a) Ki cambionan ta bira bisto segun cu nos ta bisti nos mes cu suavidad? (b) Kico por yuda nos haci un bon examinacion propio?
18 Pues anto, suavidad ta un cualidad indespensabel. E ta mas cu djis tin un manera suave; e ta un cualidad atractivo di caracter cu ta refresca otro hende. Den pasado, kisas nos tawatin e custumber di papia bruto y actua sin bondad. Sinembargo, ora nos a siña e berdadnan di Bijbel, nos a cambia y a bira un persona mas dushi y agradabel. Pablo a papia di e cambio aki ora el a anima compañeronan cristian: “Bisti boso cu tierno cariño di compasion, amabilidad, humildad di mente, suavidad, y gran pasenshi.” (Colosensenan 3:12, NW) Bijbel ta compara e transformacion aki cu e cambio for di bestia salbahe feros—lobo, leopardo, leon, beer y vibora—pa bestia domestico pasifico: lamchi di carne, lamchi di cabrito, bishe y baca. (Isaias 11:6-9; 65:25) Tal cambionan di personalidad ta asina extraordinario cu observadonan ta keda asombra. Pero nos ta atribui e transformacion aki na e obramento di Dios su spirito, pasobra suavidad ta parti di su fruta remarcabel.
19 Acaso esaki ta nifica cu unabes nos a haci e cambionan necesario y a dedica nos mes na Yehova, nos no tin nodi traha mas riba e cualidad di suavidad? No. Por ehempel, paña nobo tin mester di cuido constante pa nan por keda cu un aparencia limpi y presentabel. Si nos fiha den e Palabra di Dios y medita riba e ehempelnan cu e ta contene, esei lo yuda nos haci un examinacion propio desde un angulo fresco y obhetivo. Ora bo wak bo mes den e spiel di e Palabra di Dios, kico e ta revela?—Santiago 1:23-25.
20. Con nos por logra desplega suavidad?
20 Di naturalesa cada hende tin nan caracter. Pa algun sirbido di Dios ta mas facil pa desplega suavidad cu pa otronan. No obstante, tur cristian tin cu cultiva e fruta di Dios su spirito, incluso suavidad. Cu amor Pablo a conseha Timoteo: “Busca husticia, santidad, fe, amor, perseverancia y mansedumbre [“suavidad”, NW].” (1 Timoteo 6:11) E palabra “busca” ta indica cu mester haci esfuerso. Beibel na papiamentu koriente a traduci e animacion aki ‘lucha pa bo tine.’ Si bo haci esfuerso pa medita riba e excelente ehempelnan cu tin den e Palabra di Dios, nan por bira un parti di bo, como si fuera ta planta nan ta den bo. Nan lo forma bo y guia bo.—Santiago 1:21.
21. (a) Dicon nos mester busca suavidad? (b) Kico nos lo trata den e siguiente articulo?
21 E manera cu nos ta comporta nos mes cu otro hende ta mustra te na ki grado nos ta desplega suavidad. “Ken entre boso ta sabi y huicioso?” disipel Santiago a puntra. “Laga e mustra door di su bon conducta su obranan den suavidad di sabiduria.” (Santiago 3:13) Con nos por desplega e cualidad cristian aki na cas, den sirbishi cristian y den congregacion? E siguiente articulo lo presenta algun sugerencia practico.
Como Repaso
• Kico bo a siña tocante suavidad for di e ehempel di
• Yehova?
• Hesus?
• Moises?
• Abigail?
• Dicon nos mester busca suavidad?
[Preguntanan di Estudio]
[Plachi na pagina 16]
Dicon Yehova a aproba e ofrenda di Abel?
[Plachi na pagina 17]
Hesus a demostra cu suavidad y humildad ta cana hunto
[Plachi na pagina 18]
Moises a pone un excelente ehempel di suavidad