Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Ki les nos por saca ora nos siña tocante e famia di Safan?

Safan tawata un copista y secretario di Rei Yosias di Huda. Como un homber cu hopi influencia den e reinado, Safan a apoya e campaña di e Rei pa restaura adoracion berdadero. Dos yiu homber di Safan a keda leal na profeta Yeremias. Un otro yiu homber di dje y dos nieto tambe a uza nan influencia pa apoya adoracion berdadero. Di mes manera, nos tambe mester uza nos recursonan y influencia pa apoya adoracion berdadero.—15/12, pagina 19-22.

• Con Irene Hochstenbach a logra vence un gran incapasidad y tambe sirbi Yehova?

Ora e tawatin shete aña di edad, el a bira sordo. Aunke e tawata sordo, el a siña comunica cu otro hende, y awor e ta biaha hunto cu su casa (un superintendente di sircuito) sirbiendo congregacionnan na Hulanda.—1/1, pagina 23-6.

• Cua dos publicacion nobo di studio a keda presenta na e Congresonan di Districto “Proclamadonan Celoso di e Reino”?

Cristiannan rond mundo a keda contento di por a ricibi e buki Adora e Unico Dios Berdadero, cu a ser prepara pa studia cu hendenan nobo despues cu nan a caba di studia e buki Conocimentu cu Ta Hiba na Bida Eterno; un otro buki nobo ta Hala Serca Yehova, y esaki ta consentra riba e cualidadnan di Yehova y e manera cu E ta trata cu hende. Tambe e buki ta mustra con nos por imita Yehova door di desplega su cualidadnan.—15/1, pagina 23-4.

• Kico Proverbionan 12:5 kiermen cu: “E pensamentonan di e hustonan ta corecto”?

Asta e pensamentonan di bon hende ta moralmente sano y dirigi riba loke ta imparcial y husto. Hende husto tin bon intencion pasobra ta amor pa Dios y pa prohimo ta motiva nan.—15/1, pagina 30.

• Kico por yuda un persona cultiva un punto di bista balansa di trabou?

Ta bon pa cuminsa train mucha for di chikito pa aprecia trabou. Bijbel ta anima nos pa cultiva un bon etica di trabou y evita flohera. (Proverbionan 20:4) Tambe e ta anima cristiannan pa no ta demasiado precupa cu trabou. Nos mester reconoce cu sirbishi na Dios merece e prome luga den nos bida. (1 Corintionan 7:29-31) Ademas, cristiannan berdadero tin confiansa cu Dios lo no laga nan bandona.—1/2, pagina 4-6.

• Na unda Bijbel ta menciona altar pa prome bes?

Na Genesis 8:20 ora e ta referi na e altar cu Noe a traha dia cu a el a sali for di e arca despues di Dilubio. Sinembargo, probablemente Cain cu Abel tambe a uza altar pa haci nan ofrendanan. (Genesis 4:3, 4)—15/2, pagina 28.

• Con algun cristian por probecha di cambio di circunstancia?

Algun a acepta—of haci—cambio den nan trabou cu a duna nan mas tempo pa bai den sirbishi. Otronan a cuminsa dedica mas tempo den sirbishi y tambe a acepta mas privilegio di sirbishi ora nan responsabilidadnan di famia a mengua, manera den caso di yiunan cu a bira adulto y casa.—1/3, pagina 19-22.

• Con e ehempelnan di Yonas y Pedro ta yuda nos mira otro hende manera Yehova ta mira nan?

Ta bon conoci cu tanto Yonas como Pedro a yega di faya den e manera cu nan a pensa y reacciona riba pruebanan di fe y obediencia. Sinembargo, ta bisto cu Yehova a mira bon cualidadnan den nan y a sigui uza nan den su sirbishi. Ora otro hende ofende nos of desapunta nos, nos por enfoca riba nan bon cualidadnan cu kisas den pasado nos a haya atractivo y riba e bon cu Dios ta mira den nan.—15/3, pagina 16-19.

• Dicon e sistema di numera e Salmonan ta varia di un traduccion di Bijbel pa otro?

Tin un diferencia entre e manera cu a numera e buki den e idioma original Hebreo y den su traduccion na Griego den e Septuaginta. Traduccionnan mas resien por varia, dependiendo di cua texto nan a uza como base, sea esun Hebreo of esun di Septuaginta.—1/4, pagina 31.