Con Importante Bondad Amoroso Ta?

“LOKE ta deseabel den un hende ta su cariño [“bondad amoroso”, NW]” segun Bijbel. (Proverbionan 19:22) Si, actonan di bondad motiva pa amor ta realmente deseabel. Sinembargo, e palabra “bondad amoroso” cu Bijbel ta papia di dje ta referi na un bondad cu hende ta mustra a base di un relacion cu ta existi caba. Kisas, e relacion ei a resulta for di actonan anterior di bondad cu e otro persona a mustra na nan. Pues, e ta duna idea di lealtad.

Rei Joas di Huda no a cultiva e cualidad deseabel aki. E mester tawata hopi gradicido na su tanta y tambe na su omo Joiada. Tempo cu Joas no tawatin ni un aña ainda, su wela malbado a haci su mes reina y a mata tur Joas su ruman hombernan, e herederonan di e trono. Sinembargo, e wela no por a mata Joas pasobra su tanta y omo a scond’e hopi bon. Tambe nan a siñ’e e Lei di Dios. Ora Joas tawatin shete aña, su omo a uza su autoridad como sumo sacerdote pa laga mata e reina malbado y corona Joas como Rei.—2 Cronicanan 22:10–23:15.

E Rei hoben Joas a goberna di un manera excelente te na morto di su omo. Pero despues di esei, el a cuminsa adora idolo. Dios a manda Zacarias, yiu homber di Joiada, pa adverti Joas di su apostasia. Joas a laga piedra Zacarias mata. Esta un acto cruel di deslealtad pa cu un famia cu a haci asina hopi p’e!—2 Cronicanan 24:17-21.

Bijbel ta declara: “Joas no a corda e cariño [“bondad amoroso”, NW] cu [Zacarias su] tata Joiada a mustr’e, ma el a mata su yiu homber.” Y ora Zacarias tawata muriendo, el a bisa: “Cu SEÑOR mira y tuma vengansa!” E palabranan di Zacarias a cumpli ora Joas a bira hopi malo y su mes sirbidonan a mat’e.—2 Cronicanan 24:17-25.

En bes di bira manera Rei Joas, tur hende cu sigui e siguiente conseho aki lo ser bendiciona den futuro: “No laga misericordia [“bondad amoroso”, NW] y berdad bandona bo. . . . Asina lo bo haya gracia y aprobacion den bista di Dios y hende.”—Proverbionan 3:3, 4.