E Trabou di Predica Ta Algo Unico

“Solo ta kima. Ta parce cu no tin fin na e caminda yen di sero. Despues di a surpasa varios obstaculo, finalmente nos ta alcansa nos meta: e pueblo di mas leu. Cansancio ta cambia bira goso ora nos yama na e prome cas y ser ricibi hospitalariamente. Na fin di e dia, nos a laga tur e literatura cu nos a trece y a cuminsa varios studio di Bijbel. E hendenan tin masha gana di siña. Nos tin cu bai aworaki, pero nos ta priminti di bini bek.”

UN GRUPO di pionero na Mexico ta pasa tur ora den e experencianan ei. Yen di entusiasmo, nan ta determina pa cumpli cu e tarea cu Hesucristo a duna su disipelnan: “Boso lo ta mi testigonan . . . te na e parti mas aleha di mundo.” (Echonan 1:8) Na Mexico tin campañanan special di predicacion—cu yama rutanan di pionero—pa por alcansa teritorionan cu no ta asigna na ningun congregacion, y cu door di esei no ta ricibi e bon nobo di e Reino di Dios regularmente. Por lo general, ta trata aki di teritorionan leu y dificil pa alcansa. Tambe nan ta yuda congregacionnan aisla cu tin teritorio extenso pa cubri.

Pa por determina ki area di e pais e rutanan di pionero lo cubri, e sucursal di Testigonan di Yehova ta analisa e necesidadnan di e teritorio. * Despues di esaki nan ta manda gruponan di pionero special pa cubri e teritorio. E pioneronan aki ta haya vehiculonan adecua pa e camindanan di tera den mal condicion. E mesun vehiculonan aki ta sirbi tambe pa warda literatura y como luga di drumi ora ta necesario.

Nan Ta Responde Mesora

For di october 1996 a cuminsa invita otro predicadonan di e bon nobo pa participa den e actividad aki door di compaña e pioneronan special. Publicadonan di Reino y tambe pioneronan regular cu ta dispuesto pa sirbi caminda e necesidad ta mas grandi, ta join e campaña den diferente etapa. Algun ta ser asigna na e congregacionnan cu ta riba e ruta pa nan por predica den e teritorio y cultiva e interes cu nan haya. Hopi publicado y pionero jong a acepta e invitacionnan aki y a haya experencianan cu a anima nan masha tanto.

Por ehempel, Abimael, un hoben cristian cu tawatin un trabou cu ta paga bon na un compania di telefon cellular, a dicidi di participa den e actividad di predica den e regionnan aisla ei. Ora su doñonan di trabou a haya sa cu e tawatin intencion di kita, nan a ofrec’e un promocion y aumento di sueldo. Su coleganan di trabou a pone presion riba dje, insistiendo cu esei tawata un oportunidad unico y cu lo tawata bobo di su parti pa rechasa e oferta. Sinembargo, Abimael tawata dicidido pa apoya e campaña special di predicacion pa tres luna. Despues cu el a disfruta di e sirbishi aki, el a dicidi di keda pa un tempo na un congregacion aisla caminda tin gran necesidad di publicado di Reino. Awor e tin un trabou modesto y a siña simplifica su bida.

Den un otro caso, Julissa tawatin cu biaha 22 ora cu bus pa yega su asignacion. Net na e parti final di su biahe, el a perde e ultimo bus di e dia ei. Sinembargo, tawatin un pickup cu ta transporta obrero. Julissa a tuma un curashi  y a pidi nan un lift. Ta di compronde cu como unico hende mohe meimei di tanto homber asina, e tawatin poco miedo. Ora el a cuminsa predica na un yoncuman, el a haya sa cu esaki tawata un Testigo di Yehova! Julissa ta bisa: “Ademas, a resulta cu e chauffeur di e pickup ta un anciano den e congregacion na cua mi a ser asigna!”

Hende Grandi Tambe Ta Participa

Sinembargo, e actividad aki no ta pa esnan mas jong so. Semper Adela, un ruman mohe di mas edad, tawatin gana di dedica mas tempo na e trabou di predica. E oportunidad ei a presenta ora el a ricibi un invitacion pa participa den e actividad special aki. E ta conta: “Mi a gusta mi asignacion asina tanto cu mi a pidi e ancianonan den congregacion pa laga mi keda pa un tempo. Mi ta contento pasobra aunke mi ta mas grandi, ainda mi por ta util pa Yehova.”

Mescos tambe, aprecio pa Yehova y amor pa prohimo a motiva Martha di 60 aña di edad pa haci su mes disponibel pa participa den e campaña. Ora el a tuma nota cu e distancianan envolvi y e tereno dificil di e teritorio a stroba su grupo di alcansa tur hende, el a cumpra un auto pa e pioneronan uza. E contribucion di e ruman mohe aki a haci posibel pa cubri mas teritorio y pa comparti e berdad di Bijbel cu mas hende.

Reaccion Caloroso

Meta di esnan cu ta participa den e campañanan special aki ta pa ‘haci disipel.’ Te asina leu, e resultadonan tawata excelente. Pueblonan aisla a ricibi e berdadnan di Bijbel cu ta salba bida. (Mateo 28:19, 20) E pioneronan a cuminsa hopi studio di Bijbel. E publicadonan cu ta biba den e area of esnan cu a bini y keda den e teritorio ta sigui conduci e studionan. Den algun caso, a forma grupo di publicado y den otro casonan, asta congregacionnan chikito.

Magdaleno y su compañeronan a uza transporte publico pa yega na e teritorio aisla na cua nan a ser asigna. Na caminda, nan a probecha di e oportunidad pa predica na e chauffeur. “E homber aki a bisa nos cu e siman prome, algun Testigo a bini na su cas mientras e mes tawata afo. Ora el a yega cas, su famia a cont’e loke nan a tende. Nos a bis’e  cu nos no ta di e area ei pero cu nos a bini for di varios estado den e pais pa apoya e actividad special aki, y cu cada un di nos a cubri nos mes gastonan. E chauffeur a keda masha impresiona y el a bisa cu lo e cuminsa studia Bijbel hunto cu su famia e mesun siman ei. Asta el a contribui na e obra door di no cobra nos pa e biahe.”

Magdaleno tambe a keda masha impresiona cu e reaccion di e pueblonan nativo den e seronan di Chiapas. “Ami cu mi casa tawatin e experencia di comparti e mensahe di Reino cu un grupo di 26 hoben cu tawata bai Iglesia Presbiteriano. Nan tur a scucha atentamente pa 30 minuut. Nan a saca nan Bijbelnan y nos por a duna nan un testimonio cabal tocante e proposito di Yehova. Mayoria di e pueblo tin nan mes Bijbel den e idioma di Tzeltal.” Nos a cuminsa varios studio di Bijbel progresivo.

Oposicion Ta Baha un Poco

Pa motibo di oposicion di parti di algun hende, pa dos aña largo un comunidad na Chiapas no a wordo bishita cu e mensahe di Bijbel. Teresa, un evangelisado di tempo completo, a ripara cu algun Testigo tawatin un tiki miedo di bai predica den e pueblito ei. “Pa sorpresa di tur hende, e pueblo tawata dispuesto pa scucha. Ora nos a caba di predica, awa a cuminsa yobe masha duro. Buscando un caminda di sconde, nos a yega na cas di un persona hospitalario cu yama Sebastián, kende a permiti nos drenta paden y sconde pa awa. Unabes paden, mi a puntr’e si el a haya un bishita caba. Ora el a bisa no, mi a cuminsa dun’e testimonio y start un studio di Bijbel uzando e buki Conocimentu cu Ta Hiba na Bida Eterno. * Ora nos a caba, Sebastián a roga nos cu awa na wowo pa bin bek pa studia cu ne.”

Un otro grupo di pionero cu a bishita Chiapas ta informa: “Danki na Yehova, nos a haya bon resultado. Den e prome siman, nos a cuminsa 27 studio; den e di dos, nos a invita e hendenan pa bin mira nos video Bijbel—Su Poder den Bo Bida. Tawatin 60 persona presente. Tur a gusta masha. Na final, nos a propone pa cuminsa un grupo di studio di Bijbel. Pa nos sorpresa, a cuminsa dos grupo di studio den e pueblo aki.

Despues cu nos a caba di traha e teritorionan asigna, nos a bolbe bishita e pueblo pa fortalece esnan interesa y pa mira con ta bai cu e gruponan organisa di studio di Bijbel. Nos a invita nan na un reunion publico y na e Studio di Toren di Vigilancia. Sinembargo, no  tawatin un luga suficiente grandi pa tene e reunionnan. E persona cu a ofrece su cas pa e grupo di studio a mustra riba su cura patras y a bisa: ‘Nos por tene e reunionnan den cura patras.’”

E weekend ei tanto e pioneronan cu tawata di bishita como hende interesa a yuda cu entusiasmo pa prepara e cura pa tene reunion den dje. Tawatin 103 persona presente pa e prome reunion. Awor tin 40 studio di Bijbel den e pueblito ei.

“Un Experencia Maraviyoso”

Ademas di e resultadonan excelente den e trabou di predica, esnan cu a participa den e actividad aki a haya hopi beneficio. María, un pionero jong cu a participa den un di e campañanan aki, a expresa su sintimentonan asina aki: “Tawata un experencia maraviyoso pa dos motibo. Mi goso den e trabou di predica a aumenta, y mi relacion cu Yehova a bira mas estrecho. Un biaha cu nos tawata subi un sero, nos a keda morto cansa. Despues cu nos a pidi Yehova su yudansa, nos a experimenta loke Isaias 40:29-31 ta bisa: ‘Esnan cu spera riba SEÑOR lo haya forsa renoba.’ Di manera cu nos a yega nos destinacion y a conduci studio cu hende cu a ricibi nos masha hospitalariamente.”

Un otro pionero hoben, Claudia di 17 aña, ta bisa nos: “Mi a saca hopi beneficio. Mi a siña pa ta mas competente den e ministerio, loke a duna mi hopi goso, y esaki a yuda mi pone metanan spiritual. Tambe mi a madura spiritualmente. Na cas, mi mama tawata haci tur cos pa mi. Awor cu mi a haya mas experencia, mi a bira mas responsabel. Por ehempel, mi tawata gusta haci zes pa loke ta comemento; mi no tawata come tur cos. Pero awor cu mi a haya mi ta adapta na diferente circunstancia, mi no ta keha mas tocante cuminda. E forma di sirbishi aki a yuda mi cultiva masha bon amistad. Nos ta comparti tur loke nos tin y ta yuda otro.”

Un Cosecha Gososo

Den kico e esfuerso special aki a resulta? Na cuminsamento di 2002, rond di 28.300 pionero a participa den e rutanan di pionero aki. Nan a conduci mas cu 140.000 studio di Bijbel, dedicando mas cu dos miyon ora den e trabou di predica. Pa yuda hende siña e berdad di Bijbel, nan a laga casi 121.000 buki y casi 730.000 revista. No ta algo excepcional cu algun pionero ta conduci 20 of mas studio di Bijbel.

E hendenan cu a wordo alcansa cu e mensahe di Bijbel debi na e esfuerso special y bondadoso aki, ta profundamente gradicido. Apesar cu nan ta pober, hopi di nan ta insisti pa e publicadonan acepta donacion. Semper un señora pober di 70 aña tawata ofrece algo na e pioneronan cu tawata bishit’e. Si nan nenga di acepta, e ta yora. Un famia di poco recurso ta bisa e evangelisadonan di tempo completo cu e galiña a pone algun webo specialmente pa nan y ta roga nan pa acepta e webonan.

Mas importante, e hendenan sinsero ei ta mustra aprecio di curason pa cosnan spiritual. Por ehempel, un señora hoben ta cana su so tres ora y mei pa yega e reunionnan cristian, sin faya ningun di nan. Apesar cu un señora interesa di edad tin problema cu su rudianan, el a cana dos ora pa por ricibi instruccion di Bijbel durante e bishita di e superintendente biahero. Algun cu no tawatin scol kier a siña lesa y skirbi pa asina nan por beneficia mas di educacion di Bijbel. Nan esfuersonan a ser ricamente bendiciona.

Den e buki di Echonan, Lucas ta describi un vision cu apostel Pablo a mira: “Un homber di Macedonia tawata para su dilanti y tawata rog’e, bisando: ‘Bin Macedonia y yuda nos.’” Pablo a acepta e invitacion di buena gana. Awe, den e areanan aisla di Mexico, hopi a responde cu e mesun spirito, haciendo nan mes disponibel pa declara e bon nobo “na e parti mas aleha di mundo.”—Echonan 1:8; 16:9, 10.

[Nota]

[Plachi na pagina 9]

Hopi Testigo Mexicano a participa den campañanan special di predica