Unda Bo Por Haya Berdadero Balornan Religioso?

“SI BO kier sigui un religion djis pa no kibra cu tradicion di famia, pakico no scohe e religion Celtico cu nos antepasadonan a practica 2.000 aña pasa?” Rodolphe ta puntra cu un tono di mofa. E idea ta pone e hoben cu ta scuch’e smile.

“Mi relacion cu Dios ta masha importante pa mi”, Rodolphe ta bisa. “Mi ta totalmente contra e idea cu pa tradicion mi ta obliga pa sigui cierto conviccion religioso djis pasobra mi famianan cu a biba decena of asta centenares di aña pasa a practica un cierto religion.” Rodolphe a evalua cosnan bon; e no a trata e asunto importante aki djis como algo cu el a hereda.

Aunke awendia no ta manera antes mas cu religion ta pasa di un generacion pa otro, ainda mayoria hende ta pertenece na e religion di nan famia. Pero ta semper corecto pa pega na e balornan religioso di bo mayornan? Kico Bijbel ta bisa?

Despues di a pasa 40 aña den desierto, Hosue, susesor di Moises, a pone e Israelitanan dilanti un escohencia: “Si ta desagradabel den boso bista pa sirbi SEÑOR, scohe pa boso mes awe kende boso lo sirbi: sea e diosnan cu boso tatanan tawata sirbi, cualnan tawata na e otro banda di Riu Eufrates, of e diosnan di e Amoreonan, den kende nan tera boso ta biba; ma pa loke ta ami y mi cas, nos lo sirbi SEÑOR.”—Hosue 24:15.

Un di e tatanan of antepasadonan cu Hosue a referi na dje tawata Tare, tata di Abraham, kende a biba den e stad di Ur, den e tempo ei situa na oost di Riu Eufrates. Bijbel no ta papia mucho di Tare. Si e ta bisa cu e tawata adora otro diosnan. (Hosue 24:2) Su yiu Abraham, aunke e no tawatin un comprondemento completo di e proposito di Dios, tawata dispuesto pa bandona su stad natal ora Yehova a mand’e haci esei. Si, Abraham a scohe un religion diferente for di esun di su tata. Door cu el a haci esei, Abraham a ricibi e bendicionnan cu Dios a primintie, y el a bira e persona cu hopi religion ta reconoce como “tata di tur cu ta kere den Dios.”—Romanonan 4:11, Today’s English Version.

Tambe Bijbel ta papia bon di Rut, antepasado di Hesucristo. Rut, un mohe Moabita kende tawata casa cu un Israelita, a bira biuda y a hay’e ta tuma un decision: keda den su pais of bai Israel bek hunto cu su suegra. Reconociendo e balor superior di Yehova su adoracion compara cu e adoracion di dios falso cu su mayornan a practica, Rut a declara na su suegra: “Bo pueblo lo ta mi pueblo, y bo Dios, mi Dios.”—Rut 1:16, 17.

 Comentando riba e importancia di e relato aki den e historia di Bijbel, Dictionnaire de la Bible ta splica cu e relato aki ta mustra “con un mohe di un pais stranhero, cu a nace den un pueblo pagano, enemigo di Israel, y odia pa Israel, . . . tawatin e oportunidad unico di bira antepasado di santo Rei David pa motibo di su amor pa Yehova su nacion y adoracion.” Rut no a duda pa scohe un religion cu tawata diferente for di esun di su mayornan, y como resultado di e decision ei, el a ricibi e bendicion di Dios.

E relato cu ta conta con cristianismo a cuminsa ta splica mas cla ainda pakico Hesus su disipelnan a bandona e religion di nan antepasadonan. Den un discurso masha combencente apostel Pedro a invita su auditorio pa “scapa for di e generacion perverso aki” door di repenti di nan picanan y batisa den e nomber di Hesucristo. (Echonan 2:37-41) Un di e ehempelnan mas remarcabel tawata esun di Saulo, un Hudiu cu a persigui cristiannan. Ora e tawata riba caminda pa Damasco, el a mira un vision di Cristo, despues di cua el a bira cristian. El a bira conoci como apostel Pablo.—Echonan 9:1-9.

Mayoria di e prome cristiannan no a pasa den un experencia espectacular asina. No obstante, nan tur mester a bandona sea hudaismo of e adoracion di varios dios pagano. Esnan cu a acepta cristianismo tawata bon na haltura di e echonan, hopi bes despues cu nan tawatin combersacionnan largo tocante e papel di Hesus como e Mesias. (Echonan 8:26-40; 13:16-43; 17:22-34) Claramente, e prome cristiannan ei tawata bon conciente cu nan mester a haci cambio den nan bida. Tanto Hudiu como hende no Hudiu a haya e invitacion, pero e mensahe a keda mescos. Pa agrada Dios, tawata necesario pa sigui un forma nobo di adoracion, esun di cristianismo.

Un Opcion Relevante pa Nos

No tin duda cu e hendenan den prome siglo mester tawatin curashi pa rechasa tradicion religioso di famia—manera hudaismo, adoracion di emperador, adoracion di diosnan pagano—y pa join un movemento cu tanto Hudiu como Romano a ridiculisa. Den poco tempo e escohencia aki a hiba na persecucion cruel. Awe, bo mester tin un curashi similar pa bo no “laga e ambiente reinante di conforma bo cu loke bo ta, traga bo y tene bo den su gara”, manera Hippolyte Simon, obispo catolico di Clermont-Ferrand ta bisa den su buki Vers une France païenne? (Rumbo pa un Francia Pagano?) Bo mester tin curashi pa asocia cu un movemento religioso minoritario cu sa ser critica: Testigonan di Yehova.

Paul, un mucha homber di Bastia, Corsica, kende a lanta den religion catolico, tawata participa de bes en cuando den actividadnan di iglesia, manera bendemento di bolo pa crea fondo pa un organisacion catolico di caridad. E kier a compronde Bijbel miho, pesei el a bai di acuerdo pa combersa regularmente cu Testigonan di Yehova. Cu tempo el a realisa cu loke e tawata siñando lo a resulta den beneficionan duradero. Pa e motibo ei, Paul a acepta e balornan di Bijbel den nan totalidad y a bira un Testigo di Yehova. Su mayornan a respeta su decision, locual no a afecta nan lasonan estrecho di famia.

Amélie ta biba den sur di Francia. Cuater generacion di su famia ta Testigo di Yehova. Pakico el a opta pa acepta e balornan religioso di su mayornan? E ta bisa: “Bo no ta bira Testigo di Yehova pa motibo cu bo mayornan of welanan ta  of tawata Testigo di Yehova. Pero un dia, bo ta bisa bo mes, ‘Ta mi religion pasobra esakinan ta mi conviccionnan.’” Mescos cu hopi otro hoben Testigo di Yehova, Amélie sa cu su conviccionnan religioso solido ta dun’e un proposito den bida y cu nan ta un fuente di felicidad duradero.

Pakico Acepta Balornan di Dios

E buki di Proverbionan, capitulo 6, versiculo 20, ta anima personanan cu kier agrada Dios: “Mi yiu, warda e mandamento di bo tata, y no bandona e siñansa di bo mama.” En bes di recomenda hobennan pa sigui otronan ciegamente, e conseho ei ta anima nan pa acepta normanan di Dios door di profundisa nan fe y door di tuma nan posicion na e banda di Dios. Apostel Pablo a invita su compañeronan pa “samina tur cos”, aberigua si loke nan tawata siña tawata na harmonia cu e Palabra di Dios y Su boluntad, y pa actua di acuerdo cu esei.—1 Tesalonicensenan 5:21.

Sea cu e mas cu seis miyon Testigonan di Yehova a lanta den un cas cristian of no, hoben y bieu a tuma e decision ei. Atrabes di un studio profundo di Bijbel, nan a haya contesta confiabel riba nan preguntanan tocante e proposito di bida y a haya un comprondemento cla di Dios su boluntad pa humanidad. Despues di a haya e conocemento aki, nan a acepta e balornan di Dios y ta haci nan best pa cumpli cu e boluntad di Dios.

Sea cu bo ta un lector regular di e revista aki of no, pakico no acepta e oferta di Testigonan di Yehova pa yuda bo analisa e balornan spiritual di Bijbel. Den e manera aki, lo bo por “purba y mira cu SEÑOR ta bon” y haya e conocemento cu, ora bo pon’e na practica, ta hiba na bida eterno.—Salmo 34:8; Huan 17:3.

[Plachi na pagina 5]

Cuater generacion di un famia Testigo di Yehova na Francia

[Plachi na pagina 7]

Rut a scohe pa sirbi Yehova en bes di e diosnan di su antepasadonan