Bo Sa Puntra: “Unda Yehova Ta?”

“Nan a aleha for di mi . . . Y nan no a bisa: ‘Unda Yehova ta?’” —YEREMIAS 2:5, 6, NW.

1. Kico hende por tin na mente ora nan puntra: “Unda Dios ta”?

“UNDA Dios ta?” Hopi hende a yega di haci e pregunta ei. Tin di nan simplemente kier a compronde un echo basico di e Creador, esta, na unda precis E ta biba? Otronan a haci e pregunta ei despues di un calamidad grandi of ora nan personalmente a haya nan cu hopi dificultad y no por a compronde dicon Dios no a cai aden. Sinembargo, tin hende cu no ta haci e pregunta ei mes, pasobra nan ta rechasa e idea cu Dios ta existi.—Salmo 10:4.

2. Ken tawatin exito den nan buskeda di Dios?

² Claro cu tin hopi hende cu si ta keda combenci a base di e tantisimo pruebanan cu tin un Dios. (Salmo 19:1; 104:24) Algun di e hendenan aki ta keda satisfecho cu cualkier forma di religion. Pero amor intenso pa e berdad a motiva miyones di hende, den tur pais, pa busca e Dios berdadero. Nan esfuerso no tawata en vano, ya cu e “no ta leu di cada un di nos.”—Echonan 17:26-28.

3. (a) Unda Dios ta biba? (b) Kico e pregunta biblico “Unda Yehova ta”, ta indica indirectamente?

³ Ora un persona realmente haya Yehova, e ta realisa cu “Dios ta Spirito”, invisibel pa bista humano. (Huan 4:24) Hesus a referi na e Dios berdadero como “mi Tata cu ta den shelo.” Kico esei kiermen? Cu den un sentido spiritual, nos Tata celestial ta biba den un luga eleva, mescos cu e shelo literal ta hopi halto for di tera. (Mateo 12:50; Isaias 63:15) Nos no por mira Dios cu nos wowo literal, sinembargo, El a haci posibel pa nos conoc’e y siña hopi cos tocante su propositonan. (Exodo 33:20; 34:6, 7) E ta contesta preguntanan di hende sinsero cu kier sa kico ta e proposito di bida. Relaciona cu asuntonan cu ta influencia nos bida, E ta percura un base confiabel pa nos compronde “unda Yehova ta”, loke biblicamente por nifica con Yehova ta mira e asuntonan ei y si nos deseonan ta na harmonia cu su proposito. E kier pa nos puntra kico ta su punto di bista relaciona cu e cosnan ei y haci un esfuerso sinsero pa haya contesta. Mediante profeta Yeremias, Yehova a scual e pueblo di antiguo Israel pasobra nan no a haci esaki. Nan tawata sa e nomber di Dios, pero nan no a puntra: “Unda Yehova ta?” (Yeremias 2:6, NW) Yehova su proposito no tawata nan precupacion principal. Nan no tawata busca su guia. Ora abo ta confronta decisionnan, sea grandi of chikito, abo sa puntra: “Unda Yehova ta?”

Esnan Cu A Busca Dios Su Guia

4. Con nos por beneficia di e ehempel cu David a pone den busca Yehova su guia?

⁴ Siendo un hoben ainda, David yiu di Yese (Isai) a desaroya fe fuerte den Yehova. E tawata conoce Yehova como “e Dios bibo.” David personalmente a experencia Yehova su proteccion. Motiva pa fe y pa amor pa ‘e nomber di Yehova’, David a mata e gigante Filisteo fuertemente arma, Goliat. (1 Samuel 17:26, 34-51) Sinembargo, David su exito no a pon’e confia den su mes. E no a rasona cu awor Yehova lo dun’e exito den kico cu e bai haci. Durante e añanan cu a sigui, varios bes David  a busca Yehova su guia ora cu e mester a tuma decision. (1 Samuel 23:2; 30:8; 2 Samuel 2:1; 5:19) El a sigui resa: “Haci mi conoce bo camindanan, o SEÑOR; siña mi bo bereanan. Guia mi den bo berdad y siña mi, pasobra ta abo ta e Dios di mi salbacion; riba Bo mi ta spera henter dia.” (Salmo 25:4, 5) Ki un excelente ehempel pa nos sigui!

5, 6. Con Josafat a busca Yehova na varios ocasion durante su bida?

⁵ Den tempo di Rei Josafat (Yehosafat), e di cinco Rei den e liña di desendencia real di David, un ehersito combina di tres nacion a bini pa bringa contra Huda. Ora Josafat a hay’e confronta cu e crisis nacional aki, el a “dicidi di busca SEÑOR.” (2 Cronicanan 20:1-3) Esaki no tawata prome bes cu Josafat a busca Yehova. Anteriormente, e Rei a keda leu for di e adoracion di Baal cu Israel apostata, e reino di nort, a practica y a scohe pa cana den e caminda di Yehova. (2 Cronicanan 17:3, 4) Pesei awor cu Josafat a confronta un crisis, con el a ‘busca Yehova’?

⁶ Den un oracion publico cu el a haci na Herusalem na e momento critico ei, Josafat a indica cu el a corda riba Yehova su forsa todopoderoso. El a pensa profundamente riba e proposito di Yehova y con El a revela esei door di core cu otro nacionnan for di un parti di e tera y dun’e na Israel como herencia. E Rei a reconoce cu e tawatin mester di Yehova su yudansa. (2 Cronicanan 20:6-12) Yehova a laga nan hay’e na e ocasion ei? Sigur cu si. Via Jahaziel, un Levita, Yehova a percura guia specifico, y e siguiente dia El a duna su pueblo victoria. (2 Cronicanan 20:14-28) Con abo por tin sigur cu Yehova lo laga bo tambe hay’e ora cu bo acudi na dje pa guia?

7. Ken su oracion Dios ta tende?

⁷ Yehova no ta haci distincion di persona. E ta invita hende di tur nacion pa busc’e den oracion. (Salmo 65:2; Echonan 10:34, 35) E ta tuma nota di loke tin den curason di esnan cu ta haci peticion na dje. E ta sigura nos cu e ta tende oracion di e hustonan. (Proverbionan 15:29) E ta laga su mes wordo haya door di personanan cu anteriormente no a mustra interes den dje, pero cu awor humildemente ta busca su guia. (Isaias 65:1) E ta asta tende oracion di esnan cu no a cumpli cu su lei, pero cu awor ta repenti humildemente. (Salmo 32:5, 6; Echonan 3:19) Sinembargo, ora un persona su curason no ta sumiso na Dios, ta pornada e ta haci oracion. (Marco 7:6, 7) Ban analisa algun ehempel.

Nan A Puntra Pero Nan No A Haya Contesta

8. Kico a haci Rei Saul su oracionnan inaceptabel pa Yehova?

⁸ Despues cu profeta Samuel a bisa Rei Saul cu el a ser rechasa door di Dios pa motibo di su desobediencia, Saul a cai na suela pa adora Yehova. (1 Samuel 15:30, 31; NW) Pero esei tawata simplemente pa bista di hende. Saul su deseo no tawata pa obedece Dios, sino cu e kier a ser honra dilanti di e pueblo. Mas despues, ora cu e Filisteonan tawata bringa contra Israel, pa formalidad Saul a puntra Yehova kico pa haci. Sinembargo, ora cu e no a haya contesta, el a consulta un hacido di bruha,  aunke e tawata sa cu Yehova a condena esaki. (Deuteronomio 18:10-12; 1 Samuel 28:6, 7) Resumiendo e asunto, 1 Cronicanan 10:14 ta bisa di Saul: “[E] no a consulta cu SEÑOR.” Dicon? Pasobra Saul su oracionnan no tawata basa riba fe. Pues, ta como si fuera e no a haci oracion mes.

9. Kico tawatin di malo den Sedekias su ruego pa haya Yehova su guia?

⁹ Di igual manera, segun cu e fin di e reino di Huda tawata acerca, e pueblo tawata haci mas oracion y consulta cu e profetanan di Yehova. Pero na mesun tempo cu e pueblo a pretende di tin respet pa Yehova nan a practica idolatria. (Sofonias 1:4-6) Pa formalidad nan a puntra Dios kico pa haci, ma nan no a prepara nan curason pa somete nan mes na su boluntad. Rei Sedekias a roga Yeremias pa puntra Yehova p’e. Ma Yehova a bisa e Rei caba kico e mester a haci. Pero pa falta di fe y pa miedo di hende, e Rei no a obedece e bos di Yehova, y Yehova no a duna un otro contesta cu lo tawata mas na agrado di e Rei.—Yeremias 21:1-12; 38:14-19.

10. Kico tawatin di malo den e manera cu Johanan a busca instruccion serca Yehova, y kico nos ta siña for di su eror?

¹⁰ Despues cu Herusalem a ser destrui y e ehersito di Babilonia a bai cu e exiliadonan Hudiu, Johanan a prepara pa bai Egipto cu e grupo chikito di Hudiu cu a keda na Huda. Nan a traha nan plan, pero prome cu nan a bai nan a pidi Yeremias haci oracion pa nan y busca instruccion serca Yehova. Sinembargo, ora nan no a haya e contesta cu nan a desea, nan a sigui cu loke nan tawatin plania caba. (Yeremias 41:16–43:7) Abo por siña algo for di e susesonan aki? Bo por saca lesnan cu por beneficia bo, ya asina ora bo ta busca Yehova su cara (of, guia) lo E laga bo hay’e?

“Sigui Haci Sigur”

11. Pakico nos mester aplica Efesionan 5:10?

¹¹ Adoracion berdadero ta encera mas cu solamente simbolisa nos dedicacion mediante bautismo den awa, asisti na reunionnan di congregacion y participa den sirbishi di veld. E ta envolve henter nos bida. Diariamente nos ta experencia presion—algun di nan masha fini, algun mas bisto—cu lo por desvia nos for di e caminda cu ta na harmonia cu debocion na Dios. Con nos lo reacciona riba e presionnan aki? Ora apostel Pablo tawata skirbi e fiel cristiannan na Efeso, el a anima nan: “Sigui haci sigur di loke ta aceptabel pa Señor.” (Efesionan 5:10, NW) E Scritura ta informa di hopi situacion cu ta demostra e bentaha di haci esei.

12. Dicon Yehova a rabia ora David a laga transporta e arca di pacto pa Herusalem?

¹² Despues cu nan a debolbe e arca di pacto na Israel y el a keda pa hopi aña na Kiriat-jearim, Rei David kier a trec’e Herusalem. El a consulta cu e cabesantenan di e pueblo y a bisa cu lo hiba e Arca ‘si ta parce nan bon y si ta e boluntad di Yehova.’ Pero pa negligencia David no a busca suficiente informacion pa haci sigur kico tawata Yehova su boluntad relaciona cu e asunto. Pasobra si el a haci esei, nunca nan lo no a pone e Arca riba un garoshi. Nan lo a laga e Levitanan Coatita carg’e riba nan scouder, segun e instruccionnan  bon cla cu Dios a duna. Aunke David cu frecuencia a busca Yehova su guia, na e ocasion aki el a faya, y no a hacie na e manera corecto. E resultado tawata desastroso. Despues David a admiti: “E rabia di SEÑOR nos Dios a lanta contra nos, pasobra nos no a busc’e conforme e ordenansa.”—1 Cronicanan 13:1-3; 15:11-13; Numbernan 4:4-6, 15; 7:1-9.

13. Ki recordatorio tawatin den un cantica cu a ser canta ora cu nan a logra transporta e Arca sin problema?

¹³ Ora cu finalmente e Levitanan a transporta e Arca for di e cas di Obed-edom pa Herusalem, e hendenan a canta un cantica cu David a compone. E cantica tawatin e recordatorio sinsero aki: “Busca SEÑOR y su fortalesa; busca su cara continuamente. Corda su echonan maraviyoso cu El a haci, su señalnan y e huicionan di su boca.”—1 Cronicanan 16:11, 12.

14. Ki beneficio nos por saca di Salomon su bon ehempel y di e erornan cu el a haci ora el a bira bieu?

¹⁴ Prome cu e muri, David a conseha su yiu Salomon: “Si bo busca [Yehova], E lo laga bo hay’e.” (1 Cronicanan 28:9) Ora cu Salomon a subi trono el a bai Gabaon, caminda e tent di reunion tawata situa, y a ofrece sacrificio na Yehova. Einan Yehova a duna Salomon e invitacion: “Pidi loke bo kier pa Mi duna bo.” Como contesta riba Salomon su peticion, Yehova generosamente a dun’e sabiduria y conocemento pa husga Israel, y ademas El a agrega rikesa y honor na esei. (2 Cronicanan 1:3-12) Salomon a uza e mapa di construccion cu Yehova a duna David y a traha un tempel magnifico. Pero relaciona cu su propio asuntonan matrimonial, Salomon no a busca e guia di Yehova. Salomon a casa cu mohenan cu no tawata adora Yehova. Despues ora el a bira bieu, nan a desvia su curason for di Yehova. (1 Reinan 11:1-10) Pesei, pa prominente of sabi cu nos por ta, of pa cuanto conocemento cu nos por tin, ta importante pa “sigui haci sigur di loke ta aceptabel pa Señor”!

15. Dicon ora cu Zera e Etiope a bini contra Huda, Asa por a haci oracion cu e confiansa cu Yehova lo libra Huda?

¹⁵ Esaki ta ser enfatisa mas aleu den e relato di e reinado di Asa, un bisanieto di Salomon. Diesun aña despues cu Asa a bira rei, Zera e Etiope a encabesa un ehersito di un miyon solda cu a bini contra Huda. Yehova lo a libra Huda? Mas cu 500 aña prome, Yehova a declara bon cla kico su pueblo por a spera si nan a scuch’e y warda su mandamentonan, y kico nan por a spera si nan no haci esei. (Deuteronomio 28:1, 7, 15, 25) Na principio di su reinado, Asa a elimina for di su pais e altarnan y pilarnan uza den adoracion falso. El a anima e pueblo pa ‘busca Yehova.’ Asa a haci esei prome cu el a confronta calamidad. Pesei cu fe den Yehova, Asa por a haci oracion na nan fabor. E resultado? Huda tawatin un victoria impresionante.—2 Cronicanan 14:2-12.

16, 17. (a) Aunke Asa a sali victorioso, ki recordatorio Yehova a dun’e? (b) Ki yudansa Asa a haya ora el a actua na un manera bobo, pero con el a reacciona? (c) Ki beneficio nos por saca door di analisa e comportacion di Asa?

¹⁶ No obstante, ora cu Asa a regresa victorioso, Yehova a manda Azarias bai contra cu e Rei y bis’e: “Scucha mi, Asa, y henter Huda y Benjamin: SEÑOR ta cu boso ora boso ta cu ne. Y si boso busc’e, E lo laga boso hay’e; ma si boso bandon’e, E lo bandona boso.” (2 Cronicanan 15:2) Yen di celo atrobe, Asa a promove adoracion berdadero. Pero 24 aña despues, ora cu Asa a bolbe confronta un guera, e no a busca Yehova su guia. E no a consulta e Palabra di Dios, y e no a corda kico Yehova a haci ora cu e ehersito Etiope a invadi Huda. El a comete e bobedad di sera un aliansa cu Siria.—2 Cronicanan 16:1-6.

¹⁷ Pa e motibo aki Yehova a laga profeta Hanani scual Asa. Asta na e momento ei, ora cu Yehova su punto di bista di e asunto a wordo splica, no tawata mucho laat pa Asa beneficia.  Pero en bes di esei, Asa a sintie ofendi y a laga sera Hanani den prizon. (2 Cronicanan 16:7-10) Esta tristo! Ke tal di nos? Nos ta busca Dios anto despues nenga di acepta conseho? Ora un anciano precupa y amoroso ta uza Bijbel pa conseha nos pasobra nos ta birando envolvi den mundo, nos ta mustra aprecio pa e yudansa amoroso cu nos ta ricibi pa haya sa “loke ta aceptabel pa Señor”?

No Lubida di Puntra Unda Yehova Ta

18. Con nos por beneficia di loke Eliu a bisa Job?

¹⁸ Bou di stress, asta un persona cu tin un excelente registro den e sirbishi di Yehova por faya. Ora Job a haya un malesa repugnante, perde su yiunan y su pocesionnan material, y a ser acusa falsamente door di su compañeronan, su pensamentonan a consentra solamente riba su mes. Eliu a record’e: “Ningun hende no ta bisa: ‘Unda Dios, Esun cu a traha mi, ta?’” (Job 35:10) Job mester a consentra su atencion riba Yehova y analisa con E a mira e situacion. Humildemente Job a acepta e recordatorio ei, y su ehempel por yuda nos haci mescos.

19. Kico e pueblo di Israel a keda sin haci hopi biaha?

¹⁹ E pueblo di Israel tawata conoce e historia tocante e manera cu Dios a trata cu nan nacion. Pero demasiado biaha nan no a corda riba esei ora nan a trata cu situacionnan specifico den nan bida. (Yeremias 2:5, 6, 8) Ora nan mester a tuma decision den bida, nan a sigui tras di nan propio placer en bes di puntra: “Unda Yehova ta?”—Isaias 5:11, 12.

Sigui Puntra: “Unda Yehova Ta?”

20, 21. (a) Ken awe a demostra e spirito di Eliseo den nan buskeda di e guia di Yehova? (b) Con nos por imita y beneficia di nan ehempel di fe?

²⁰ Ora Elias su sirbishi publico a termina, su sirbido Eliseo a cohe e mantel oficial cu a cai for di Elias, bai na Riu Yordan cu ne, dal e awa y puntra: “Unda SEÑOR, e Dios di Elias, ta?” (2 Reinan 2:14) Yehova a contesta door di  demostra cu awor su spirito tawata riba Eliseo. Kico nos por siña for di esaki?

²¹ Algo similar a sosode den tempo moderno. Cierto cristiannan ungi cu tawata hiba delantera den e trabou di predica a muri. Esnan cu e ora ei a ser confia cu e supervision, a examina e Scritura y a haci oracion pidi Yehova su guia. Semper nan tawata puntra: “Unda Yehova ta?” Como resultado, Yehova a sigui dirigi su pueblo y laga nan actividad prospera. Nos ta imita nan fe? (Hebreonan 13:7) Si ta asina, nos lo keda pega cu Yehova su organisacion, sigui su instruccionnan y participa plenamente den e trabou cu e organisacion ta haciendo bou di guia di Hesucristo.—Zacarias 8:23.

Con Lo Bo Contesta?

• Cu ki intencion nos mester puntra: “Unda Yehova ta?”

• Con nos awe por haya contesta riba e pregunta: “Unda Yehova ta?”

• Dicon algun oracion cu ta pidi guia di Dios no ta haya contesta?

• Ki ehempelnan biblico ta demostra e necesidad di “sigui haci sigur di loke ta aceptabel pa Señor”?

[Preguntanan di Estudio]

[Plachi na pagina 9]

Con Rei Josafat a busca Yehova?

[Plachi na pagina 10]

Dicon Saul a consulta un hacido di bruha?

[Plachi na pagina 12]

Haci oracion, studia y medita pa bo haci sigur “unda Yehova ta”