Consola Esnan Cu Ta Tristo

“SEÑOR a ungi mi . . . pa consola tur esnan cu ta yora.” —ISAIAS 61:1, 2.

1, 2. Ken nos tin cu consola, y pakico?

YEHOVA, e Dios di tur berdadero consuelo, ta siña nos mustra interes den otro hende ora nan ta pasa den calamidad. E ta siña nos “encurasha esnan cu ta falta animo” y consola tur esnan cu ta verdriet. (1 Tesalonicensenan 5:14) Ora nos rumannan den fe tin mester di e yudansa ei, nos ta duna nan esei. Tambe nos ta mustra amor na esnan cu ta pafo di e congregacion, asta na esnan cu kisas den pasado no a duna muestra di kier nos bon.—Mateo 5:43-48; Galationan 6:10.

² Hesucristo a lesa y aplica na su mes e siguiente tarea profetico: “E spirito di Señor DIOS ta riba mi, pasobra SEÑOR a ungi mi pa hiba bon nobo na esnan aflihi; El a manda mi pa cura hende di curason kibra, . . . pa consola tur esnan cu ta yora.” (Isaias 61:1, 2; Lucas 4:16-19) Pa hopi tempo caba, cristiannan ungi di actualidad a reconoce cu e tarea aki ta aplica na nan tambe, y gustosamente e “otro  carnenan” ta compaña nan den e trabou ei.—Huan 10:16.

3. Ora hende ta puntra: “Pakico Dios ta permiti calamidad?”, con nos lo por yuda nan?

³ Na momento di desaster cu ta laga hende tristo, hopi bes nan ta puntra nan mes: “Pakico Dios ta permiti calamidad?” Bijbel ta contesta e pregunta ei bon cla. Pero un persona cu no ta studiante di Bijbel kisas no ta compronde e contesta mesora y completamente. E publicacionnan di Testigonan di Yehova ta ofrece yudansa. * Pero pa cuminsa, e solo echo cu algun persona a mira den Bijbel un texto manera esun di Isaias 61:1 y 2 a consola nan, pasobra e ta expresa e deseo cu Dios tin pa hende ricibi consuelo.

4. Con un Testigo na Polonia a logra yuda un teenager deprimi cu ta bai scol, y con e experencia ei ta yuda bo pa abo por yuda otro hende?

⁴ Tanto hoben como bieu tin mester di consuelo. Na Polonia, un teenager deprimi a bai busca conseho serca un conoci di dje. E amiga aki, kende ta un Testigo di Yehova, bondadosamente a hacie algun pregunta mas profundo y a ripara cu e mucha mohe tawatin yen di pregunta y inkietud: “Pakico tin tanto maldad? Pakico hende ta sufri? Pakico mi ruman mohe paralitico ta sufri? Pakico mi tin problema cu curason? Iglesia ta bisa cu esei ta ‘e boluntad di Dios.’ Pero si ta asina, ami ta stop di kere den dje!” E Testigo a haci un oracion na Yehova den silencio y despues a bisa: “Mi ta contento cu bo a haci mi e preguntanan aki. Mi ta bai trata di yuda bo.” E Testigo a bis’e cu e tambe tawatin su inkietudnan tempo cu e tawata mucha y cu Testigonan di Yehova a yud’e. El a splica: “Mi a siña cu Dios no ta pone hende sufri. E stima hende, E kier lo miho pa nan, y pronto lo E trece cambionan grandi riba tera. Enfermedad, problema di biehes y morto lo disparce, y hende obediente lo biba pa semper, riba e planeta aki mes.” El a mustra e teenager Revelacion 21:3 y 4; Job 33:25; Isaias 35:5-7 y 65:21-25. Despues di un combersacion largo, e mucha mohe a bisa, cu un alivio riba su cara: “Awor mi sa pakico mi ta biba. Mi por bini bek serca bo?” El a cuminsa studia Bijbel dos biaha pa siman.

Consola Otro Hende cu e Consuelo Cu Dios Ta Duna

5. Ora nos ta expresa duele, kico lo duna berdadero consuelo?

⁵ Ora nos ta trata na consola otro hende, ta bon pa uza palabranan cu ta expresa nos duele. Nos ta purba laga e persona tristo sinti na nos palabra y tono di bos cu nos ta profundamente interesa den su situacion. Nos no ta logra esei cu palabranan insinsero y bashi. Bijbel ta bisa nos cu “dor di perseverancia y e encurashamento [“consuelo”, NW] di Scrituranan nos por tin speransa.” (Romanonan 15:4) En bista di esaki, nos por splica na un momento apropia kico e Reino di Dios ta, y nos por mustra for di Bijbel con lo e resolve e problemanan actual. Anto e ora ei nos por rasona riba pakico esei ta un speransa confiabel. Den e manera aki, nos ta consola otro hende.

6. Kico nos mester yuda hende compronde pa asina nan por beneficia plenamente di e consuelo den e Scritura?

⁶ Pa un persona beneficia plenamente di e  consuelo cu nos ta ofrec’e, e mester conoce e Dios berdadero, sa ki clase di Persona E ta y cu su promesanan ta confiabel. Ora nos ta trata na yuda un persona cu ainda no ta un adorado di Yehova, ta bon pa splic’e e siguiente puntonan. (1) E consuelo cu nos ta haya den Bijbel ta bini di Yehova, e Dios berdadero. (2) Yehova ta e Todopoderoso, Creador di shelo y tera. E ta un Dios di amor y ta abundante den bondad amoroso y berdad. (3) Nos por haya e fortalesa pa soporta cierto situacionnan si nos hala serca Dios door di gana un conocemento exacto di su Palabra. (4) Bijbel ta contene textonan cu tin di aber cu pruebanan specifico cu diferente persona a enfrenta.

7. (a) Kico nos por logra door di enfatisa cu e consuelo cu Dios ta duna ta “abunda door di Cristo”? (b) Con lo bo por consola un persona cu ta realisa cu su conducta tawata malo?

⁷ Algun ruman a yega di duna animacion spiritual na personanan desconsola cu conoce Bijbel caba door di lesa 2 Corintionan 1:3-7. Den esei nan a enfatisa e palabranan “nos consuelo tambe ta abunda door di Cristo.” E texto aki por yuda un persona compronde cu Bijbel ta un fuente di consuelo na cua e mester duna mas atencion. Tambe esaki por habri caminda pa sigui papia mas aleu riba e asunto, kisas na otro ocasionnan. Si un persona ta sinti cu su problemanan ta bini door di cosnan malo cu el a yega di haci, e ora ei nos por bis’e, sin ser mucho critico, cu loke tin skirbi na 1 Huan 2:1 y 2, y Salmo 103:11-14 ta un gran consuelo. Den e maneranan aki nos por echt consola otronan cu e consuelo cu Dios ta duna.

Consola Esnan Afecta pa Violencia of Dificultad Economico

8, 9. Con nos por consola na un manera apropia hende cu a sufri pa motibo di violencia?

⁸ Miyones di hende a bira victima di violencia—violencia causa pa criminalidad den un comunidad of e violencia di guera. Con nos por consola nan?

⁹ Cristiannan berdadero ta wak pa nan no tuma parti ni cu echo ni cu palabra pa ningun partido den e conflictonan di mundo. (Huan 17:16) Pero si nan ta uza Bijbel na un manera apropia pa mustra cu e condicionnan critico di actualidad lo no sigui pa semper. Nan lo por lesa Salmo 11:5 pa mustra kico Yehova ta pensa di esnan cu ta gusta violencia, of Salmo 37:1-4 pa mustra con Dios ta anima nos pa no tuma vengansa sino pa confia den dje. E palabranan di Salmo 72:12-14 ta mustra con e Salomon Mayor, Hesucristo, kende awor ta goberna como Rei celestial, ta sinti pa hende cu ta sufri pa motibo di violencia.

10. Si pa añanan largo bo a biba meimei di guera, con e textonan cita den e paragraf por consola bo?

¹⁰ Algun hende a haya nan ta pasa den un conflicto tras di otro segun cu partidonan ta bringa pa haya control. Pa nan, ta normal cu guera y su consecuencianan a bira parti di nan bida. E unico posibel speransa cu nan ta mira ta cu cos lo drecha pa nan si nan logra hui bai un otro pais. Pero mayoria di nan no ta logra esei nunca, y hopi di esnan cu a purba, a perde nan bida den e intento. Hopi bes, esnan cu si a logra yega un otro pais ta haya cu kisas nan a libra nan mes di algun problema si, pero cu awor nan ta haya nan cu otro problema. Nos lo por uza Salmo 146:3-6 pa yuda hende asina pone nan speransa den algo mas confiabel cu djis bai biba un otro caminda. E profecia na Mateo 24:3, 7 y 14 of 2 Timoteo 3:1-5 lo por yuda nan compronde e situacion miho y e nificacion di e condicionnan cu nos ta soportando, esta, cu nos ta bibando den e conclusion di e mundo bieu aki. Textonan manera Salmo 46:1-3, 8 y 9, y Isaias 2:2-4 lo por yuda nan realisa cu en berdad tin speransa pa un futuro pacifico.

11. Ki textonan a consola un señora na West Africa, y pakico?

¹¹ Durante un periodo di guera continuo na West Africa, un señora a hui for di su cas meimei di un awasero di bala. E tawatin hopi miedo y el a pasa basta tristesa y decepcion penoso den bida. Mas despues, tempo cu su famia tawata biba den un otro pais, su esposo a dicidi  di kima nan trouwboek y core cu tanto e, aunke e tawata na estado, como nan yiu homber di dies aña for di cas, pa e esposo bira pasto. Ora a mustra e señora e textonan di Filipensenan 4:6 y 7, y Salmo 55:22, hunto cu articulonan biblico di E Toren di Vigilancia y Spierta!, finalmente el a bin haya consuelo y proposito den bida.

12. (a) Ki alivio e Scritura ta ofrece na esnan cu ta bou di presion economico serio? (b) Con un Testigo na Asia a yuda un cliente?

¹² Crisis economico a afecta bida di miyones di hende. Tin biaha esaki tambe ta debi na guera y su consecuencianan. Ademas, un combinacion di mal gobernacion y golosidad, y falta di honestidad di parti di esnan na poder a caba cu tur e placa cu hende a spar y obliga nan sali for di nan propiedadnan. Di otro banda, tin hende cu nunca no tawatin hopi di e comodidadnan cu e mundo aki ta ofrece. Tur e personanan aki por haya consuelo ora nan siña cu Dios ta garantisa alivio pa esnan cu ta confia den dje y un mundo husto den cua hende lo disfruta di e obra di nan mannan. (Salmo 146:6, 7; Isaias 65:17, 21-23; 2 Pedro 3:13) Ora un Testigo den un pais Asiatico a tende un cliente expresa su precupacion serio pa e situacion economico di e pais, el a splic’e cu loke tawata pasando einan tawata parti di un patronchi di susesonan cu ta tumando luga rond mundo. Un combersacion riba Mateo 24:3-14 y Salmo 37:9-11 a hiba na un studio regular di Bijbel.

13. (a) Ora hende keda desilusiona pa motibo di promesanan bashi, con nos lo por uza Bijbel pa yuda nan? (b) Si hende ta haya cu e mal condicionnan ta duna prueba cu no tin Dios, con lo bo por purba rasona cu nan?

¹³ Ora hende a sufri pa hopi aña of a keda desilusiona door di promesanan bashi, nan por bira mescos cu e Israelitanan na Egipto cu “pa motibo di falta di animo” no a scucha. (Exodo 6:9) Den e casonan ei, lo ta bon pa resalta e maneranan cu Bijbel por yuda nan enfrenta e problemanan actual cu exito y evita e trampanan cu ta perhudica hopi hende innecesariamente. (1 Timoteo 4:8b) Algun hende kisas ta mira e mal condicionnan cu nan ta biba aden como prueba cu no tin Dios of cu E no ta interesa den nan. Lo bo por rasona cu nan riba algun texto apropia pa yuda nan realisa cu Dios ta percura yudansa pero cu ta hopi hende no ta acept’e.—Isaias 48:17, 18.

Consola Esnan Afecta pa Tormenta y Temblor

14, 15. Ora un desaster a laga hopi hende den estado di shock, con Testigonan di Yehova a mustra nan interes?

¹⁴ Desasternan causa pa tormenta, temblor, candela of explosion ta cosnan cu por trece gran tristesa. Kico nos por haci pa consola e sobrevivientenan?

¹⁵ E hendenan mester sa cu tin un persona cu ta interesa den nan. Despues di un atake terorista den un pais, bastante hende a keda den estado di shock. Varios di nan a perde famia, cabes di cas, amigo, trabou of e sentido di siguridad cu nan a pensa cu nan tawatin. Testigonan di Yehova a ofrece yudansa na e hendenan di nan comunidad, expresando duele pa nan perdidanan grandi y ofreciendo palabranan di consuelo for di Bijbel. Hopi a keda masha gradicido pa e interes mustra.

16. Ora desaster a asota un region na El Salvador, pakico e sirbishi di veld di e Testigonan local a surti un bon efecto?

¹⁶ Na 2001, un temblor fuerte sigui pa schuifmento di tera na El Salvador a costa bida di bastante hende. E yiu homber di 25 aña di un Testigo, y dos ruman mohe di e mucha homber su enamorada a ser mata. Mama di e mucha homber hunto cu esaki su enamorada djis despues di e desaster a mantene nan mes ocupa den sirbishi di veld. Hopi hende a bisa nan cu ta Dios a tuma esnan cu a muri of cu esei tawata e boluntad di Dios. E Testigonan a cita Proverbionan 10:22 pa mustra cu Dios no kier pa nos pena. Nan a lesa Romanonan 5:12 pa mustra cu morto a bini pa medio di e pica di  hende, no pasobra esei tawata e boluntad di Dios. Tambe nan a mustra riba e mensahe di consuelo haya na Salmo 34:18, Salmo 37:29, Isaias 25:8 y Revelacion 21:3 y 4. E hendenan tawata ansioso pa scucha, specialmente door cu e dos señoranan mes a perde miembro di famia den e desaster. Hopi a cuminsa studia Bijbel.

17. Den tempo di desaster, ki clase di yudansa nos por duna?

¹⁷ Den tempo di desaster, bo por haya hende cu mester di yudansa fisico y material mesora. Esaki por encera yama docter, yuda un persona yega un clinica, of haci tur loke ta posibel pa percura cuminda y alohamento. Na 1998, durante un desaster asina na Italia, un periodista a ripara cu Testigonan di Yehova “ta traha na un manera practico, dunando un man na esnan cu ta sufri, sin precupa na ki religion nan ta pertenece.” Den algun area, susesonan profetisa pa e ultimo dianan ta causa gran sufrimento. Den e luganan ei, Testigonan di Yehova ta mustra cu eseinan ta parti di e profecianan di Bijbel. Tambe nan ta consola hende cu e siguransa cu Bijbel ta duna di cu e Reino di Dios lo trece berdadero siguridad pa humanidad.—Proverbionan 1:33; Mikeas 4:4.

Consuelo Ora di Morto den Famia

18-20. Ora tin morto den famia, kico bo por bisa of haci pa duna consuelo?

¹⁸ Tur dia miyones di hende ta yora morto di un ser keri. Ora bo ta den e ministerio cristian of den bo actividadnan di tur dia, bo por topa hende cu ta yora nan morto. Kico bo por bisa of haci pa consola nan?

¹⁹ E persona ta visiblemente tristo y agita? Tin yen di famia tristo den e cas? Podise tin hopi cos cu bo tin gana di bisa, pero ta importante pa ser discreto. (Eclesiastes 3:1, 7) Kisas ta mas na su luga pa duna condolencia, laga un publicacion biblico apropia (un foyeto, revista  of tratado), anto pasa despues di un par di dia pa mira ki yudansa mas bo por duna. Na un ora apropia, ofrece pa comparti algun pensamento di animacion for di Bijbel. Esaki por calma e persona y alivia su dolor. (Proverbionan 16:24; 25:11) Bo no por resusita morto, manera Hesus a haci. Pero si bo por splica loke Bijbel ta bisa tocante e condicion di e mortonan, aunke esaki kisas no ta ora pa bai corigi ideanan robes. (Salmo 146:4; Eclesiastes 9:5, 10; Ezekiel 18:4) Boso por lesa hunto e promesanan di Bijbel relaciona cu resureccion. (Huan 5:28, 29; Echonan 24:15) Posiblemente, uzando un relato di Bijbel di un resureccion, bo por splica kico esakinan ta nifica. (Lucas 8:49-56; Huan 11:39-44) Hala atencion tambe na e cualidadnan di e Dios amoroso cu ta duna nos un speransa asina. (Job 14:14, 15; Huan 3:16) Splica con e siñansanan aki a beneficia abo y pakico bo tin confiansa den nan.

²⁰ Un invitacion pa bai Salon di Reino lo por yuda personanan tristo conoce hende cu di berdad stima nan prohimo y cu sa con pa edifica otro. Un señora di Suecia a ripara cu esaki ta net loke e tawata busca durante henter su bida.—Huan 13:35; 1 Tesalonicensenan 5:11.

21, 22. (a) Kico nos mester haci si nos kier duna consuelo? (b) Con nos por consola un persona cu conoce Bijbel bon bon caba?

²¹ Ora bo sa cu un persona ta tristo, sea den e congregacion cristian of pafo, bo sa sinti tin biaha cu bo no sa sigur kico pa bisa of haci? E palabra Griego cu hopi bes ta ser traduci como “consuelo” den Bijbel ta nifica literalmente “yama un hende pa e bin banda di bo.” Ser un berdadero consolador ta encera haci bo mes disponibel pa esnan cu ta tristo.—Proverbionan 17:17.

²² Kico bo por haci si e persona cu bo kier consola sa caba kico Bijbel ta bisa tocante morto, e rescate y resureccion? E presencia so caba di un amigo cu tin e mesun creencianan por ta un consuelo. Si e kier papia, sea un bon scuchado. No sinti cu bo tin cu duna un discurso. Si boso lesa textonan, trata esakinan como expresionnan di Dios cu ta fortalece curason di boso tur dos. Expresa e conviccion firme cu boso tur dos tin den e promesanan cu e textonan ta papia di dje. Door di refleha e compasion di Dios y door di comparti e berdadnan precioso cu tin den e Palabra di Dios, bo por yuda esnan cu ta tristo haya consuelo y fortalesa for di e “Dios di tur consuelo”, Yehova.—2 Corintionan 1:3.

[Nota]

Kico Ta Bo Comentario?

• Ken hopi hende ta culpa pa calamidadnan, y con nos por yuda nan?

• Kico nos por haci pa yuda otro hende beneficia plenamente di e consuelo cu Bijbel ta ofrece?

• Ki situacionnan ta causa tristesa pa hopi hende den bo area, y con bo por consola nan?

[Preguntanan di Estudio]

[Plachi na pagina 23]

Compartiendo un mensahe di berdadero consuelo den tempo di angustia

[Reconocemento]

Campo di refugiado: UN PHOTO 186811/J. Isaac

[Plachi na pagina]

E presencia so caba di un amiga por ta un consuelo