“Mantene un Bon Consenshi”

“HACI segun bo consenshi”, ta un conseho cu bo ta tende hopi bes. Pero pa nos consenshi por ta un guia confiabel, e mester ta bon entrena pa distingui bon for di malo, y nos mester haci loke e ta indica nos.

Considera e experencia cu ta para skirbi den Bijbel di un homber cu yama Zakeo. Zakeo, kende tawata biba na Yerico, tawata hefe di e cobradonan di belasting (of publicanonan) y tawata un homber rico. E mes a admiti cu el a yega na su rikesa door di comete fraude, un practica cu sigur a perhudica otro hende. Zakeo su consenshi a molesti’e pa motibo di e actonan inhusto aki? Si esei tawata e caso, ta parce cu e no a haci caso di su consenshi.—Lucas 19:1-7.

Sinembargo, a surgi un situacion cu a pone Zakeo reconsidera su manera di actua. Hesus a bin Yerico. Zakeo kier a wak Hesus, pero door cu e tawata cortico e multitud a strob’e di mir’e. Pesei, el a core bai dilanti y a subi den un palo pa asina e haya un miho bista. Hesus a keda impresiona cu Zakeo su gran interes, y el a bis’e cu lo e bishit’e na su cas. Gustosamente Zakeo a mustra hospitalidad na su distinguido bishitante.

Loke Zakeo a mira y tende ora e tawata den compania di Hesus a conmove su curason y a motiv’e pa haci cambio den su bida. El a anuncia: “Mira, Señor, mita di mi bienesnan lo mi duna na pober, y si mi a defrauda cualkier hende den algo, lo mi debolbe cuater bes mas tanto.”—Lucas 19:8.

Zakeo su consenshi a haya entrenamento y el a scucha su consenshi y haci loke el a mand’e. E bon resultadonan tawatin efecto di largo alcanse. Imagina bo con Zakeo lo mester a sinti ora Hesus a bis’e: “Awe salbacion a bin na e cas aki!”—Lucas 19:9.

E ehempel aki ta un gran animacion pa nos. E ta mustra cu sin importa e estilo di bida cu nos a hiba den pasado, nos por haci cambio. Mescos cu Zakeo, nos por haci caso di e palabranan di Hesus—cu ta para skirbi den Bijbel—y desaroya nos sentido di bon y malo. E ora ei nos por haci loke apostel Pedro a urgi, esta, “mantene un bon consenshi.” Nos por scucha nos consenshi entrena y haci loke ta corecto.—1 Pedro 3:16.