Nan Ta Sirbi e Hermandad Cristian na un Escala Internacional

BO A yega di tende di “sirbidonan internacional” y “boluntarionan internacional”? Testigonan di Yehova cu ta forma parti di e gruponan aki ta duna di nan tempo y habilidadnan boluntariamente pa yuda construi facilidadnan pa imprimi y distribui e mensahe biblico di Reino. E rumannan boluntario aki ta yuda tambe den construccion di Salonnan di Reino y di Asamblea cu ta sirbi como centronan di instruccion biblico. Actualmente e boluntarionan aki ta yuda den 34 proyecto di construccion den varios pais, principalmente den paisnan di poco recurso. Ki goso y desafionan particular e ministernan aki ta experencia segun cu nan ta sirbi e hermandad cristian na un escala internacional? Con nan ta sinti tocante e “sirbishi sagrado” cu nan ta rindi? (Revelacion 7:9, 15, NW) Pa nos haya sa, laga nos combersa cu algun boluntario cu a sirbi na Mexico.

Boluntarionan internacional a yega Mexico pa prome bes na mei 1992. Djis despues di esei nan a hunga un papel importante den e trabounan di construccion pa amplia e sucursal cu ta supervisa e actividadnan di Testigonan di Yehova na Mexico. E proyecto a consisti di 14 edificio nobo cu a encera entre otro un compleho di residencia pa boluntarionan cu ta sirbi na e oficina di sucursal, un imprenta, y un edificio pa oficina.

Pa yuda den e proyecto aki, mas cu 730 boluntario a bini for di Canada, Gran Bretania, Merca y otro paisnan pa sirbi scouder cu scouder hunto cu centenares di boluntario for di tur parti di Mexico. Fuera di esei, mas cu 28.000 Testigo cu ta asisti na e rond di 1.600 congregacionnan situa den e area di e sucursal a yuda cu actividadnan di construccion durante fin di siman. Tur tawata dispuesto pa sirbi y a duna di nan habilidadnan gratuitamente. Pa nan, tawata un privilegio pa sirbi Yehova di e manera aki. Durante henter e proyecto di construccion, nan a tene na mente e palabranan inspira registra na Salmo 127:1: “Si SEÑOR no traha e cas, ta en vano esnan cu ta trah’e ta traha cansa curpa.”

Desafionan Cu Nan Ta Enfrenta

Kico ta e desafionan cu e boluntarionan internacional ta enfrenta ora nan ta sirbi den un  asignacion den estranheria? At’aki algun di nan observacionnan. Curtis cu Sally ta un pareha di Merca cu a yuda den proyectonan di construccion na Alemania, India, Mexico, Paraguay, Rumania, Rusia, Senegal y Zambia. Curtis ta conta: “E prome desafio tawata cu nos mester a bandona nos yiu mohe cu tawata sirbi como pionero [sirbido di tempo completo], y tambe nos congregacion na Minnesota. Ami cu mi casa a asisti na e congregacion ei pa 24 aña largo, y nos tawata sinti nos masha na cas einan.”

Sally ta remarca: “Ta un desafio pa biba den situacionnan cu bo no a custuma cu ne, kisas e ta asta mas dificil pa hende mohe cu pa hende homber. Pero mi a siña con pa adapta mi mes. Asta mi a siña tolera hopi tipo di insecto!” E ta agrega: “Tawatin un pais caminda nos dies boluntario mester a comparti un apartamento sin cushina y cu solamente dos baño. Einan mi a siña mustra mas pasenshi.”

Siña un idioma nobo ta un otro desafio cu ta rekeri esfuerso y humildad. Sharon, kende a sirbi hunto cu su casa den proyectonan di construccion den diferente pais, ta bisa: “Ora bo no sa e idioma di e pais caminda bo ta sirbi, e ta un desafio. Na principio ta dificil pa pega na bo rumannan spiritual ora cu bo no por expresa bo sintimentonan facilmente. E cos ei ta masha frustrante. Pero e rumannan cu nos ta topa den nos asignacionnan den estranheria tin masha pasenshi cu nos y nan ta masha interesa den nos bienestar. No ta dura hopi tempo prome cu nos por comunica cu nan di un of otro manera.”

Bo Mester Tin Curashi pa Participa den Sirbishi

Aunke e boluntarionan ei cu ta haci sacrificio propio ta yuda hopi pa e trabou di construccion avansa, nan ta conciente cu e trabou di mas importante ta esun di predica e bon nobo di Dios su Reino. Pesei nan ta duna pleno  apoyo na e trabou di predica cu e congregacion cu nan ta asisti na dje ta efectua. Åke cu Ing-Mari, un pareha cu a yuda den e proyectonan di construccion na Guadeloupe, Malawi, Mexico y Nigeria, ta admiti cu bo mester tin curashi pa predica na un otro idioma den sirbishi di veld den paisnan stranhero.

Ing-Mari ta conta: “Na principio nos tawata participa masha poco. Semper nos tawata bai hunto cu Testigonan local, pero berguensa a pone cu hopi bes nos tawata laga nan papia. Sinembargo, un mainta nos a dicidi di bai den sirbishi di veld nos so, aunke nos tawata masha nervioso. Nos a topa un señora hoben cu a scucha e presentacion cu mi a prepara. Mi a lesa un texto y a laga algun literatura. Anto e señora a bisa: ‘Mi tin un pregunta pa bo. Mi tin un famia cu ta studia Bijbel cu Testigonan di Yehova. Con ami tambe por haya un studio?’ Mi a keda babuca. Despues mi a bin bei y a ofrec’e un studio di Bijbel.”

Ing-Mari ta agrega: “Bo por imagina bo con contento y gradicido mi a keda na Yehova pasobra el a bendiciona nos iniciativa y nos deseo pa comparti e berdad cu otro hende?” E señora aki a progresa bon y a batisa como Testigo di Yehova na un congreso di districto na Mexico City. Åke cu Ing-Mari a resumi nan sirbishi cu e siguiente palabranan: “Nos ta duna hopi balor na nos asignacionnan den e varios proyectonan di construccion, pero no tin nada cu ta surpasa e goso y satisfaccion di yuda un persona acepta e berdad.”

Un Spirito di Sacrificio Propio

Ta un echo cu boluntarionan cu ta bandona famia- y amigonan ta haci sacrificio pa sirbi nan rumannan den estranheria. Pero, tambe e ta un goso sin igual. Con asina?

Howard, kende a sirbi hunto cu su casa Pamela na Angola, Colombia, Ecuador, El Salvador, Guyana, Mexico y Puerto Rico, ta splica: “Ta un privilegio pa topa rumannan di diferente pais y experencia personalmente e lasonan di amor cu ta existi den nos hermandad internacional. Hopi bes nos ta lesa di esaki, pero ora bo ta biba y sirbi hunto cu otronan cu tin cultura y custumbernan diferente, bo ta aprecia nos hermandad mucho mas.”

Gary, kende a yuda den proyectonan di construccion na Colombia, Costa Rica, Ecuador, Mexico y Zambia, tambe ta sinti cu e programa aki a benefici’e masha. E ta relata: “Cu e entrenamento cu mi a ricibi atrabes di añanan door di asocia cu rumannan maduro cu ta sirbi na sucursalnan den e paisnan na cua mi a ser asigna, mi ta miho prepara pa enfrenta desafionan den mi asignacionnan. Esaki a fortalece mi fe pasobra el a duna mi e oportunidad pa experencia e unidad cu ta caracterisa Yehova su organisacion mundial: un unidad cu ta surpasa diferencia di idioma, rasa of cultura.”

Entretanto, nan a completa e construccion na Mexico, y e parti nobo di e sucursal a wordo dedica e aña aki. Motiva pa nan amor pa Dios, sirbidonan y boluntarionan internacional a contribui grandemente na e expansion di adoracion berdadero na Mexico y otro caminda. E echo cu nan tawata disponibel y dispuesto pa haci sacrificio pa sirbi nan rumannan cristian den otro paisnan ta ser aprecia masha door di Testigonan di Yehova rond mundo.

[Plachi na pagina 25]

Ecuador

[Plachi na pagina 25]

Colombia

[Plachi na pagina 25]

Angola

[Plachi na pagina 26]

E hardin na sucursal

[Plachi na pagina 26]

Trabou ta cuminsa na e facilidadnan nobo na e sucursal di Mexico

[Plachi na pagina 26]

Abou: Algun miembro di e Departamento di Construccion dilanti di un parti di e facilidadnan nobo

[Plachi na pagina 27]

Boluntarionan den construccion ta gusta apoya e trabou di predica hunto cu e congregacion local