Pregunta di Lector

Si un cristian ta tende stem, esei ta nifica automaticamente cu e ta bou di atake di demoño?

No. Aunke tin informe cu demoñonan sa manifesta nan mes di e forma ei, hopi hende cu ta tende stem of experencia otro sensacionnan inexplicabel y molestioso a haya sa, despues di investigacion, cu nan tin un problema medico.

Asta den prome siglo ta parce cu hende a reconoce cu tin bes problema di salu y atakenan di demoño sa produci e mesun sintomanan. Na Mateo 17:14-18 (NW), nos ta lesa di un hoben cu Hesus a cura. Aunke e mucha homber a manifesta sintomanan severo di epilepsia, realmente ta demoño a pon’e sufri. Sinembargo, na un ocasion mas prome ora e hendenan a trece multitud di hende malo pa Hesus cura, tawatin entre nan ‘hende posei pa demoño y epilepticonan.’ (Mateo 4:24) Aparentemente hende a mira cu algun persona cu epilepsia no tawata posei pa demoño. Nan tawatin un problema fisico.

Tin informe cu ta bisa cu hende cu ta sufri di skizofrenia, un malesa cu hopi bes por ser trata cu remedi, ta tende stem of experencia otro sintomanan cu lo por parce algo sobrenatural. * Tambe tin otro condicionnan fisico cu por causa confusion mental y pone hende pensa eroneamente cu ta trata di atake di demoño. Pesei, aunke un persona cu ta tende stem of experencia sensacionnan molestioso lo no kier descarta atake di demoño, mester anima e persona aki definitivamente pa investiga si no tin un splicacion medico pa loke e ta experenciando.

[Nota]