“Hala Serca Dios y E Lo Hala Serca Boso”

Antes y Awor Pasado Scur, Futuro Briyante

“E PALABRA di Dios ta bibo y activo y mas skerpi cu cualkier spada di dos filo . . . y ta capas pa husga e pensamentonan y intencionnan di curason.” (Hebreonan 4:12) Esei ta loke apostel Pablo a bisa di e poder penetrante di e mensahe di Dios. Specialmente durante e prome siglo di nos era tawata bisto cu e mensahe por a alcansa curason. Apesar di e mal influencia di e tempo ei, esnan cu a bira cristian a bisti e personalidad nobo.—Romanonan 1:28, 29; Colosensenan 3:8-10.

E poder cu e Palabra di Dios tin pa transforma bida di hende ta bisto awe tambe. Por ehempel, wak e caso di un homber halto y fuerte cu yama Richard. E tawata un homber cu ta rabia lihe y djis pa un cos chikito e tawata cla pa bringa. Violencia a perhudic’e hopi. Richard a asta join un club di boxeo. E tawata train duro y a sali campion peso completo di Westphalia, Alemania. Tambe Richard tawata bebe pisa y hopi bes e tawata haya su mes den pelea di caya. Na un di e ocasionnan ei, un persona a perde su bida y Richard a hera bai sera.

Kico di Richard su matrimonio? Richard ta corda: “Prome cu ami cu Heike a studia Bijbel, nos cada un tawata cohe nos caminda. Heike tawata pasa hopi tempo cu su amiganan, y ami tawata gusta mi hobinan—principalmente boxeo, surf y sambuya.”

Ora Richard y Heike a cuminsa studia Bijbel cu Testigonan di Yehova, Richard no por a imagina su mes ta haci cambionan aparentemente imposibel, pa biba segun e normanan halto di e Palabra di Dios. Sinembargo, segun cu Richard a siña conoce Yehova Dios miho, el a desaroya un deseo fuerte di agrad’e. Richard a realisa cu Dios no ta acepta amantenan di violencia of personanan cu ta dibirti cu violencia. Richard a siña cu “esun cu ta gusta violencia [Yehova] su alma ta odia.”—Salmo 11:5.

Ademas, e speransa di biba pa semper den un paradijs riba tera a fasina tanto Richard como Heike. Nan kier tawata hunto einan! (Isaias 65:21-23) E invitacion pa “hala serca Dios y E lo hala serca boso” a conmove Richard profundamente. (Santiago 4:8) El a mira e balor di sigui e conseho inspira: “No envidia un hende di violencia, y no scohe ningun di su camindanan. Pasobra e hende perverso ta un abominacion pa SEÑOR, ma E tin comunion intimo cu e hende recto.”—Proverbionan 3:31, 32.

Apesar cu Richard tawatin un deseo profundo pa cambia su bida, el a realisa cu e no por a haci esei riba su mes forsa. El a mira cu tawata necesario pa busca yudansa di Dios den oracion. Pues, el a sigui loke Hesus a bisa Su apostelnan: “Haci oracion [“continuamente”, NW], pa boso no cai den tentacion; e spirito ta boluntario, ma e carni ta debil.”—Mateo 26:41.

Despues cu Richard a siña con Dios ta mira violencia y rabiamento, no tawatin duda den mente di Richard cu boxeo ta un deporte inaceptabel. Cu yudansa di Yehova y cu animacion  di parti di esnan cu tawata studia Bijbel cu ne, Richard a laga violencia para. El a stop di box y di bringa riba caya y a dicidi di mehora su bida di famia. “E berdad cu mi a siña for di Bijbel a yuda mi para keto y pensa prome cu mi actua”, segun Richard, kende awor ta un superintendente suave den un congregacion di Testigonan di Yehova. E ta agrega: “E principionan di amor y respet ta guia mi awor den mi relacion cu mi casa y mi yiunan. Door di esei nos famia a bira mas pega cu otro.”

A yega di sosode cu hende mal informa ta acusa Testigonan di Yehova di ta kibra famia. Sinembargo, ehempel di personanan manera Richard ta refuta loke nan ta bisa. En realidad, e berdad di Bijbel por resulta den stabilidad na cas y un futuro briyante pa esnan cu tawatin un pasado scur.—Yeremias 29:11.

[Comentario na pagina 9]

“E speransa di un paradijs riba tera a duna mi e motivacion pa cambia”

[Cuadro na pagina 9]

Principionan di Bijbel den Accion

Bijbel por eherce un influencia poderoso den bida di hende. At’aki algun principio biblico cu a yuda personanan violento cambia:

“Esun cu no ta rabia lihe ta miho cu e poderoso, y esun cu ta goberna su spirito ta miho cu esun cu ta captura un stad.” (Proverbionan 16:32) Rabia descontrola ta un señal di debilidad, no di fortalesa.

“Prudencia [“perspicasia”, NW] di un hende ta haci cu e no ta rabia lihe.” (Proverbionan 19:11) Perspicasia y comprondemento di un situacion ta yuda bo mira mas aleu cu e aparente motibonan di un conflicto y por evita cu un hende su rabia ta lanta.

‘No sera amistad cu hende cu ta gusta rabia, ni no siña su camindanan.’ (Proverbionan 22:24, 25) Cristiannan ta haci bon di evita di anda cu personanan cu ta cla pa rabia.