Cada Un Lo Sinta bou di Su Palo di Figo

DURANTE e zomernan cayente na paisnan den Medio Oriente ta masha dificil pa bo haya pida sombra. Cualkier palo cu ta proteha bo contra e rayonan di solo ta bonbini, specialmente si e ta crece banda di bo cas. E palo di figo, cu su blachinan grandi y hancho y su takinan cu ta span leu, ta duna miho sombra cu cualkier otro palo den e region ei.

Segun e buki Plants of the Bible (Matanan di Bijbel), “nan ta bisa cu e sombra [di un palo di figo] ta mas dushi y fresco cu esun di un tent.” Palonan di figo cu tawata crece na rand di cunucunan di wendruif den Israel di antiguedad a duna trahadonan di cunucu un luga ideal pa sosega un rato.

Na fin di un dia largo y cayente, miembronan di famia por a sinta bou di nan palo di figo y disfruta di compañerismo agradabel. Ademas, e palo di figo ta recompensa su doño cu masha hopi fruta nutritivo. Pesei for di tempo di Rei Salomon, e echo cu un persona por sinta bou di su mes palo di figo a representa pas, prosperidad y abundancia.—1 Reinan 4:24, 25.

Siglonan prome cu esei, profeta Moises a describi e Tera Priminti como ‘un tera di palo di figo.’ (Deuteronomio 8:8) Diesdos homber cu a bai spiona e tera a bini bek na e campamento Israelita cu figo y otro fruta pa proba cu e tera ta productivo. (Numbernan 13:21-23) Un homber cu a biaha den e paisnan di Bijbel den siglo 19 a informa cu palo di figo tawata un di e palonan mas comun einan. Nada straño anto cu e Scritura hopi bes ta menciona figo y palo di figo!

Un Palo Cu Ta Pari Dos Bes pa Aña

Palo di figo ta adapta su mes na mayoria tera, y e manera extenso cu su raiznan ta plama ta yud’e pasa door di e zomernan largo y cayente di Medio Oriente. E palo aki ta extraordinario pasobra e ta duna un cosecha di  prome figo na juni y un cosecha principal cuminsando for di augustus. (Isaias 28:4) Por lo general e Israelitanan tawata come e prome cosecha como fruta fresco. Nan tawata seca e segundo cosecha pa nan uza durante aña. Nan tawata pres figo seco den forma di bolo of cuki rondo, y tin biaha nan tawata agrega almendra. E cukinan aki di figo tawata cumbiniente, nutritivo y sabroso.

E mohe discreto Abigail a duna David 200 clompi (cuki) di figo gepres, casi sigur pensando cu esaki lo ta un cuminda ideal pa fugitivonan. (1 Samuel 25:18, 27) Figo gepres tawata wordo uza tambe como remedi. Nan a pone un compres di figo seco riba un blufein cu a menasa e bida di Rei Ezekias, aunke su recuperacion despues tawata principalmente debi na Yehova su intervencion. *—2 Reinan 20:4-7.

Den tempo di antiguedad figo seco tawatin hopi balor den henter e region di Mediteraneo. E estadista Cato, cu figo den man, a purba combence e Senado Romano pa bai bringa contra Cartago den e Tercer Guera Punico. E miho figonan seco na Roma a bini di Caria na Asia Menor. Pesei e palabra carica a bira e nomber Latin pa figo seco. E mesun region ei cu awe ta cai den Turkia, ainda ta produci figo seco di excelente calidad.

Cunukeronan Israelita hopi bes a planta palo di figo den cunucu di wendruif, pero nan tawata kap palonan cu no tawata pari. Bon tera tawata mucho scars pa nan malgast’e cu palo cu no ta pari. Den Hesus su comparacion di un palo di figo improductivo, e cunukero a bisa e cuidado di cunucu di wendruif: “Mira, pa tres aña caba mi ta bin busca fruta na e palo di figo aki sin haya nada. Kap e! Pakico e mester caba cu forsa di e tera?” (Lucas 13:6, 7) Como cu den tempo di Hesus mester a paga impuesto riba palo di fruta, cualkier palo improductivo lo tawata tambe un carga economico.

Figo tawata un parti masha importante di e dieta Israelita. Pesei un mal cosecha di figo—kisas debi na un huicio di Yehova—lo tawata un calamidad. (Oseas 2:12; Amos 4:9) Profeta Habacuk a bisa: “Maske e palo di figo no floria, y e matanan di wendruif no carga fruta, maske e cosecha di e palo di oleifi faya, y e cunucunan no produci cuminda . . . Toch lo mi alegra den SEÑOR, lo mi regociha den e Dios di mi salbacion.”—Habacuk 3:17, 18.

Simbolo di un Nacion sin Fe

E Scritura tin biaha ta uza figo of palo di figo simbolicamente. Por ehempel, Yeremias a compara e fiel exiliadonan di Huda cu un macutu di bon figo, e prome figonan cu por lo general nan ta come fresco. Sinembargo, e exiliadonan infiel a ser compara cu mal figo, cu hende no por a come y cu mester a benta afo.—Yeremias 24:2, 5, 8, 10.

Den su comparacion di un palo di figo improductivo, Hesus a mustra con Dios tawatin pasenshi cu e nacion Hudiu. Manera nos a menciona anteriormente,  el a papia di un cierto homber cu tawatin un palo di figo den su cunucu di mata di wendruif. E palo tawatin tres aña sin pari fruta, y e doño tawata a punto di laga kap e. Pero e cuidado di cunucu di wendruif a bisa: “Shon, lag’e para e aña aki ainda, te ora cu mi coba rond di dje y pone gordura; y si e duna fruta otro aña, bon; ma si no t’asina, kap e.”—Lucas 13:8, 9.

Ora Hesus a duna e comparacion aki, ya caba e tawatin tres aña ta predica, purbando di cultiva fe den e miembronan di e nacion Hudiu. Hesus a intensifica su actividad, poniendo “gordura” na e palo di figo simbolico—e nacion Hudiu—y dunando nan e oportunidad pa produci fruta. Sinembargo, e siman prome cu Hesus a muri a bira bisto cu e nacion en general a rechasa e Mesias.—Mateo 23:37, 38.

Tawatin un biaha mas cu Hesus a uza palo di figo pa ilustra e mal condicion spiritual di e nacion. Biahando di Betania pa Herusalem cuater dia prome cu su morto, el a mira un palo di figo cu tawatin hopi blachi pero ningun fruta. Como cu e prome figo ta sali hunto cu e blachinan—y tin biaha asta prome cu e palo saca blachi—e echo cu e palo no tawatin fruta a mustra cu e no tawatin balor.—Marco 11:13, 14. *

Mescos cu e palo di figo improductivo pero cu aparencia salu, asina e nacion Hudiu tawatin un aparencia exterior engañoso. Pero e no a pari fruta cu a agrada Dios, y finalmente a rechasa Yehova su propio Yiu. Hesus a maldiciona e palo steril ei, y e siguiente dia, e disipelnan a ripara cu ya caba el a seca. E palo ei cu a seca a mustra bon cla cu pronto Dios lo a rechasa e Hudiunan como su pueblo scohi.—Marco 11:20, 21.

‘Siña for di e Palo di Figo’

Tambe Hesus a uza palo di figo pa siña hende un les importante tocante su presencia. El a bisa: “Awor siña e parabola aki for di e palo di figu: ora su rama a bira moli caba, y e saca su blachinan, boso sa cu zomer ta serca; asina boso tambe, ora boso mira tur e cosnan aki, sabi cu e ta serca, dilanti di porta.” (Mateo 24:32, 33) E palo di figo su blachinan berde cla ta un señal riparabel y inconfundibel di zomer. Asina tambe e gran profecia di Hesus cu ta para skirbi na Mateo capitulo 24, Marco capitulo 13 y Lucas capitulo 21, ta duna evidencia cla di su presencia actual den poder di Reino celestial.—Lucas 21:29-31.

Siendo cu nos ta bibando den un tempo asina crucial den historia, nos sigur kier siña for di e palo di figo. Si nos haci esei y keda spiritualmente lanta, nos tin e speransa di ricibi e cumplimento di e gran promesa: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan, pasobra e boca di e SEÑOR di ehercitonan a papia.”—Mikeas 4:4.

[Nota]