Cristo Ta Papia cu e Congregacionnan
Cristo Ta Papia cu e Congregacionnan
“Esun cu ta tene e shete streyanan den su man drechi . . . ta bisa esaki.”—REVELACION 2:1.
1, 2. Dicon nos mester ta interesa den loke Cristo a bisa e shete congregacionnan na Asia Menor?
YEHOVA su Yiu unigenito, Hesucristo, ta Cabes di e congregacion cristian. Pa mantene e congregacion di su siguidonan ungi sin mancha, Cristo ta eherce su autoridad como Cabes door di elogia nan y tambe corigi nan. (Efesionan 5:21-27) Revelacion capitulo 2 y 3 ta contene ehempel di esaki. Einan nos ta haya mensahenan potente y amoroso cu Hesus a dirigi na shete congregacion na Asia Menor.
2 Prome cu apostel Huan a tende loke Hesus a bisa e shete congregacionnan, el a ricibi un vision di “e dia di Señor.” (Revelacion 1:10) E “dia” ei a cuminsa ora cu e Reino Mesianico a wordo estableci na 1914. Pesei loke Cristo a bisa e congregacionnan ei ta sumamente importante den e ultimo dianan aki. Hesus su animacion y conseho ta yuda nos trata cu situacionnan cu nos ta confronta den e tempo trabahoso aki.—2 Timoteo 3:1-5.
3. Kico ta e nificacion simbolico di e “streyanan”, “angelnan” y “candelanan di oro” cu apostel Huan a mira?
3 Huan a contempla Hesucristo glorifica, kende “ta tene e shete streyanan den su man drechi”, y kende “ta cana meimei di e shete candelanan [of, candelarianan] di oro”, of congregacionnan. E “streyanan” ta “e angelnan di e shete iglesianan [of, congregacionnan].” (Revelacion 1:20; 2:1) Streya tin biaha ta simbolisa criaturanan spiritual of angel, pero Cristo lo no a uza un hende pa skirbi mensahe pa criaturanan spiritual. Pesei, e “streyanan” aki logicamente ta referi na superintendentenan ungi of cuerponan di anciano ungi pa spirito. E palabra “angelnan” tin di aber cu nan papel como mensahero. Como cu e organisacion di Dios a crece, ‘e mayordomo fiel’ a nombra tambe como superintendente hombernan cualifica cu ta di e “otro carnenan” di Hesus.—Lucas 12:42-44; Huan 10:16
4. Con ancianonan ta beneficia door di paga bon tino na loke Cristo a bisa e congregacionnan?
4 E “streyanan” ta den e man drechi di Hesus, es decir, bou di su poder, control, aprobacion y proteccion. Pesei nan tin cu duna cuenta na dje. Door di haci caso di e palabranan cu Hesus a dirigi na cada un di e shete congregacionnan, ancianonan djawe ta mira con nan por atende situacionnan similar. Ta mas cu claro cu ta tur cristian tin cu scucha e Yiu di Dios. (Marco 9:7) Pues anto, kico nos por siña door di paga bon tino na loke Cristo a bisa e congregacionnan?
Na e Angel di Efeso
5. Ki tipo di stad Efeso tawata?
5 Hesus a elogia e congregacion na Efeso, pero tambe el a scual e. (Lesa Revelacion 2:1-7.) E tempel inmenso di e diosa Artemis tawata situa den e centro comercial rico y religioso aki na costa west di Asia Menor. Aunke Efeso tawata yen di inmoralidad, religion falso y practicamento di magia, Dios a bendiciona e sirbishi di apostel Pablo y di otro cristiannan den e stad.—Echonan, capitulo 19.
6. Den ki manera cristiannan fiel djawe ta mescos cu esnan di Efeso di antiguedad?
6 Cristo a elogia e congregacion di Efeso, bisando: “Mi conoce bo obranan y bo trabou duro y perseverancia, y cu bo no por soporta hende malbado, y bo ta pone na prueba esnan cu ta yama nan mes apostel, ma cu no ta, y bo a haya sa cu nan ta falso.” Awe, e congregacionnan di Hesus su siguidonan berdadero tambe tin mesun reputacion di ta hende cu ta haci bon obra, traha duro y persevera. Nan no ta tolera rumannan falso cu kier pa hende considera nan manera “apostel.” (2 Corintionan 11:13, 26) Mescos cu e Efesionan, cristiannan fiel awe “no por soporta hende malbado.” Pesei, pa mantene Yehova su adoracion puro y pa proteha e congregacion, nan no ta asocia cu personanan apostata cu no repenti.—Galationan 2:4, 5; 2 Huan 8-11.
7, 8. Ki problema serio tawatin den e congregacion di Efeso, y con nos por trata cu un situacion similar?
7 Sinembargo, cristiannan di Efeso tawatin un problema serio. Hesus a bisa: “Mi tin esaki contra bo, cu bo a bandona bo prome amor.” Miembronan di e congregacion tawatin cu rebiba e prome amor cu nan tawatin pa Yehova. (Marco 12:28-30; Efesionan 2:4; 5:1, 2) Nos tur tin cu proteha nos mes pa nos no perde nos prome amor pa Dios. (3 Huan 3) Pero kico nos mester haci si cosnan manera un deseo pa rikesa material of coremento tras di placer a cuminsa domina den nos bida? (1 Timoteo 4:8; 6:9, 10) E ora ei nos mester haci oracion ferviente y pidi Dios yuda nos remplasa e inclinacionnan aki cu amor profundo pa Yehova y cu gratitud pa tur loke E cu su Yiu a haci pa nos.—1 Huan 4:10, 16.
8 Cristo a anima e Efesionan: “Corda for di unda bo a cai, y repenti y haci e obranan cu bo tawata haci prome.” Y si nan no a haci esaki? Hesus a bisa: “Sino mi ta bin serca bo, y lo kita bo candela for di su luga.” Si tur e carnenan a perde nan prome amor, e “candela” of congregacion, lo no a existi mas. Pesei como cristiannan celoso, laga nos traha duro pa yuda e congregacion sigui briya spiritualmente.—Mateo 5:14-16.
9. Con nos tin cu mira formacion di secta?
9 Un cos bon di e Efesionan tawata cu nan a odia “e obranan di e Nicolaitanan”, of e “secta di Nicolas” (NW). Fuera di loke ta ser bisa den Revelacion, nos no sa masha tocante e origen, siñansanan y practicanan di e secta aki. Sinembargo, como cu Hesus a condena siguimento di hende, nos tin cu keda odia formacion di secta, mescos cu e cristiannan di Efeso a haci.—Mateo 23:10, NW.
10. Kico esnan cu haci caso di loke e spirito ta bisa, lo experencia?
10 Cristo a bisa: “Esun cu tin horea, lag’e tende loke e spirito ta bisa e iglesianan.” Tempo cu Hesus tawata riba tera el a papia bou di influencia di e spirito di Dios. (Isaias 61:1; Lucas 4:16-21) Pesei nos mester paga bon tino na loke Dios ta bisa awor via Hesus mediante spirito santo. Bou di guia di e spirito, Hesus a priminti: “Esun cu vence lo mi laga come di e palo di bida, cu ta den e paraiso di Dios.” Pa esnan ungi, cu ta haci caso di loke e spirito ta bisa, esaki ta nifica bida inmortal den e “paraiso di Dios” den shelo, esta, den presencia di Yehova. E “multitud grandi”, cu tambe ta scucha loke e spirito ta bisa, lo disfruta di un paraiso riba tera caminda nan lo bebe for di “un riu di e awa di bida”, y lo haya curacion for di ‘e blachinan di e palonan’ cu ta na cada banda.—Revelacion 7:9; 22:1, 2; Lucas 23:43.
11. Con nos lo por promove amor pa Yehova?
11 E Efesionan a perde nan prome amor, pero kico si un situacion similar ta desaroyando den un congregacion awe? Laga nos cada un promove amor pa Yehova door di papia tocante su caminda y manera amoroso di haci cosnan. Nos por expresa nos gratitud pa e amor cu Dios a mustra door di percura e rescate mediante su Yiu stima. (Huan 3:16; Romanonan 5:8) Si ta apropia, nos por menciona e amor di Dios ora nos duna comentario of ora nos tin parti na reunion. Nos por demostra nos propio amor pa Yehova door di alaba su nomber den e sirbishi cristian. (Salmo 145:10-13) Si, nos palabra- y echonan por contribui hopi na rebiba of fortifica e prome amor di un congregacion.
E Angel di Smirna
12. Kico historia ta revela tocante Smirna y su practicanan religioso?
12 E congregacion na Smirna a haya elogio serca Cristo, “‘E Prome y e Ultimo’, kende tawata morto y ta biba atrobe” pa medio di un resureccion. (Lesa Revelacion 2:8-11.) Nan a construi Smirna (awor Izmir, Turkia) na e costa west di Asia Menor. Griegonan a pobla e stad, pero e Lidionan a destru’e rond di aña 580 prome cu nos era. E susesornan di Alehandro e Grandi a reconstrui Smirna na un luga nobo. El a bira parti di e provincia Romano di Asia y tawata un centro comercial prospero y famoso pa su bunita edificionan publico. E tempel di Tiberio Cesar cu tawatin einan a pone cu el a bira un centro pa adora emperado. E adoradonan mester a kima un tiki sencia y bisa “Cesar ta Señor.” Cristiannan no por a cumpli cu esei pasobra pa nan ta ‘Hesus ta Señor.’ Consecuentemente, nan a haya nan cu tribulacion.—Romanonan 10:9.
13. Aunke e cristiannan di Smirna tawata materialmente pober, den ki sentido nan tawata rico?
13 Fuera di tribulacion, cristiannan na Smirna a pasa den hopi pobresa. Posiblemente nan a sufri pa motibo di restriccionnan economico pasobra nan no kier a participa den adoracion di emperado. Yehova su sirbidonan djawe tambe ta pasa den pruebanan similar. (Revelacion 13:16, 17) Pero maske nan ta pober den sentido material, esnan cu ta manera e cristiannan di Smirna ta rico den sentido spiritual, y esei ta loke realmente ta conta!—Proverbionan 10:22; 3 Huan 2.
14, 15. Ki consuelo e unginan por saca for di Revelacion 2:10?
14 Mayoria Hudiu na Smirna tawata “un snoa [sinagoga] di Satanas” pasobra nan a sigui tradicionnan cu tawata bai contra e Scritura, nan a rechasa e Yiu di Dios y a blasfema Hesus su siguidonan engendra pa spirito. (Romanonan 2:28, 29) Pero e unginan por saca gran consuelo for di e siguiente palabranan di Cristo. El a bisa: “No tene miedo di loke bo ta bai sufri. Mira, Diabel ta bai tira algun di boso den prizon, pa boso wordo poni na prueba, y boso lo sufri tribulacion dies dia largo. Sea fiel te na morto y lo mi duna bo e corona di bida.”—Revelacion 2:10.
15 Hesus no tawatin miedo di muri pasobra el a sostene Yehova su derecho como Soberano. (Filipensenan 2:5-8) Aunke actualmente Satanas ta haci guera contra e resto ungi, nan no tin miedo di e cosnan cu como grupo nan lo tin cu sufri: tribulacion, encarselacion of morto violento. (Revelacion 12:17) Nan lo vence mundo. Y en bes di un corona di flor cu ta marchita, cu e ganadonan den e weganan pagano tawata bisti, Cristo ta priminti e unginan resusita “e corona di bida” como criaturanan inmortal den shelo. Ki un regalo balioso!
16. Si nos ta asocia cu un congregacion manera esun di antiguo Smirna, riba ki cuestion nos mester enfoca nos atencion?
16 Sea cu nos speransa ta pa shelo of pa tera, kico nos por haci si nos ta asocia cu un congregacion manera esun di antiguo Smirna? Den tal caso, laga nos yuda nos rumannan den fe enfoca riba e motibo principal pakico Dios ta permiti persecucion: e cuestion di soberania universal. Tur Testigo di Yehova cu keda fiel ta duna prueba cu Satanas ta un mentiroso y ta demostra cu asta un hende persigui por ta un apoyado firme di Dios su derecho di goberna como Soberano Universal. (Proverbionan 27:11) Laga nos encurasha otro cristiannan pa persevera bou di persecucion y, como resultado, haya e privilegio di ‘por sirbi Yehova sin temor, den santidad y husticia dilanti di dje, tur e dianan di nos bida’, asta pa semper.—Lucas 1:68, 69, 74, 75.
Na e Angel di Pergamo
17, 18. Pergamo tawata un centro di ki clase di adoracion, y kico lo por tawata e consecuencia pa un hende cu a nenga di participa den tal idolatria?
17 E congregacion di Pergamo a haya elogio y tambe coreccion. (Lesa Revelacion 2:12-17.) Situa un 80 kilometer nort di Smirna, Pergamo tawata un stad hopi meti den religion pagano. Aparentemente magonan Caldeo (astrologonan) a hui for di Babilonia bini einan. Cantidad grandi di hende malo tawata bishita Pergamo su famoso tempel di Asclepio (of, Esculapio), e dios falso di curacion y medicina. Pergamo, cu su tempel dedica na e adoracion di Cesar Augusto, a ser yama “e centro principal di adoracion di emperado na principio di e imperio.”—Encyclopædia Britannica, 1959, Volumen 17, pagina 507.
18 Na Pergamo tawatin un altar dedica na Zeus (Jupiter). E stad tawata tambe un centro di adora hende, un adoracion inspira pa Diabel. No ta un sorpresa anto cu Hesus a bisa cu e congregacion a biba caminda “Satanas su trono” tawata! Si un persona cu ta apoya Yehova su soberania a nenga di adora emperado, esei lo por a resulta den su morto. Te ainda mundo ta bou di control di Diabel, y awendia hende ta adora simbolonan nacional como idolo. (1 Huan 5:19) For di prome siglo te cu awe, hopi cristian fiel a ser mata pa nan fe, manera esun cu Cristo a yama “Antipas, mi testigo, esun cu ta fiel na mi, kende a wordo mata meimei di boso.” Yehova Dios y Hesucristo sigur ta corda riba sirbidonan fiel asina.—1 Huan 5:21.
19. Kico Balam a haci, y contra kico tur cristian mester vigila?
19 Tambe Cristo a papia di “e siñansa di Balam.” E profeta falso Balam tawata golos pa ganashi material y pesei el a purba maldiciona Israel. Ora cu Dios a cambia su maldicion den un bendicion, Balam a bai coopera cu Rei Balak di Moab y a lok hopi Israelita na idolatria y inmoralidad. Ancianonan cristian mester ta mesun firme pa husticia cu Finehas (Finees), kende a actua contra e obranan di Balam. (Numbernan 22:1–25:15; 2 Pedro 2:15, 16; Hudas 11) De echo, tur cristian mester vigila contra idolatria y percura pa inmoralidad sexual no drenta den congregacion.—Hudas 3, 4.
20. Kico un cristian mester haci si el a cuminsa cana rond cu pensamentonan apostata?
20 E congregacion na Pergamo tawata den gran peliger pasobra nan a permiti den nan esnan cu “ta tene na e siñansa di e Nicolaitanan.” Cristo a bisa e congregacion: “Repenti; sino mi ta bin pronto serca bo, y lo mi haci guera contra nan cu e spada di mi boca.” Hende cu ta forma secta kier haci cristiannan daño spiritual, y esnan cu ta dicidido pa promove division y secta lo no hereda e Reino di Dios. (Romanonan 16:17, 18; 1 Corintionan 1:10; Galationan 5:19-21, NW) Si cualkier cristian a cuminsa cana rond cu pensamentonan apostata den su mente y kier plama nan, lo ta bon pa e acepta e spiertamento di Cristo! Pa e scapa su mes di desaster, e mester repenti y busca yudansa spiritual serca e ancianonan den congregacion. (Santiago 5:13-18) Ta masha importante pa actua umbes, pasobra Hesus ta bini pronto pa ehecuta huicio.
21, 22. Ken ta come di e “mana scondi”, y kico esei ta simbolisa?
21 Fiel cristiannan ungi y nan compañeronan leal no tin nodi tin miedo di e benidero huicio. Bendicion ta spera tur esnan cu ta haci caso di e conseho cu Hesus a duna bou di guia di Dios su spirito santo. Por ehempel, e unginan cu vence mundo lo haya e invitacion pa come di “e mana scondi”, y lo duna nan “un piedra blanco” cu “un nomber nobo” skirbi riba dje.
22 Dios a percura mana pa sostene e Israelitanan durante nan biahe trabahoso di 40 aña door di desierto. Nan a warda un tiki di e “pan” ei den un butishi di oro den e arca di aliansa. Di e manera ei e tawata scondi den e Santisimo di e tabernakel, caminda un lus milagroso a simbolisa e presencia di Yehova. (Exodo 16:14, 15, 23, 26, 33; 26:34; Hebreonan 9:3, 4) Ningun hende no tawatin mag di come di e mana scondi ei. Sinembargo, ora Hesus su siguidonan ungi ser resusita, nan lo haya inmortalidad y esei ta ser simbolisa door di come di “e mana scondi.”—1 Corintionan 15:53-57.
23. Kico e “piedra blanco” y e “nomber nobo” ta nifica?
23 Bou di e sistema hudicial Romano un piedra preto a nifica condenacion, mientras cu un piedra blanco a nifica absolucion. Hesus ta duna “un piedra blanco” na e cristiannan ungi cu vence, y esei ta indica cu e ta considera nan inocente, puro y limpi. Siendo cu e Romanonan tawata uza piedra tambe como carchi di entrada na eventonan importante, e “piedra blanco” por indica cu ta laga e persona ungi haya un luga den shelo durante e matrimonio di e Lamchi. (Revelacion 19:7-9) E “nomber nobo” evidentemente ta nifica e privilegio di ta uni cu Hesus como coheredero den e Reino celestial. Tur esaki sigur ta anima e unginan y tambe nan compañeronan den e sirbishi di Yehova, cu ta spera di biba riba e tera comberti den paraiso!
24. Ki posicion nos mester tuma pa cu apostasia?
24 Ta bon pa corda cu apostatanan tawata un menasa pa e congregacion di Pergamo. Si un situacion similar ta menasa e bienestar spiritual di e congregacion cu cua nos ta asocia, laga nos rechasa apostasia completamente y sigui cana den e berdad. (Huan 8:32, 44; 3 Huan 4) Como cu maestronan falso of personanan cu ta inclina den direccion di apostasia por corumpi henter un congregacion, nos mester mantene un posicion firme contra apostasia. Nunca no permiti pa nan rasonamento malbado stroba nos di obedece e berdad.—Galationan 5:7-12; 2 Huan 8-11.
25. E mensahenan di Cristo na cua congregacion nos lo trata den e siguiente articulo?
25 E palabranan di elogio y conseho cu Hesucristo glorifica a papia cu tres di e shete congregacionnan di Asia Menor y cu nos a considera, ta duna nos hopi cos pa pensa ariba! Sinembargo, bou di direccion di spirito santo e tawatin hopi di bisa tambe na e cuater congregacionnan cu a resta. E mensahenan aki cu nos lo bai trata den e siguiente articulo, tawata dirigi na Tiatira, Sardis, Filadelfia y Laodicea.
Con Lo Bo Contesta?
• Dicon nos mester paga bon tino na loke Cristo a bisa e congregacionnan?
• Con nos lo por yuda rebiba e prome amor di un congregacion?
• Dicon nos por bisa cu e cristiannan materialmente pober na Smirna, en realidad tawata rico?
• Reflexionando riba e situacion den e congregacion na Pergamo, con nos mester mira ideanan apostata?
[Preguntanan di Estudio]
[Map on page 10]
(Pa texto den su formato completo, wak publicacion)
GRECIA
ASIA MENOR
Efeso
Smirna
Pergamo
Tiatira
Sardis
Filadelfia
Laodicea
[Plachi na pagina 12]
E “multitud grandi” lo disfruta di un paraiso riba tera
[Plachi na pagina 13]
Cristiannan persigui ta vence mundo