Keda Firme, y Gana e Careda pa Bida

SI BO tin cu nabega riba un lama bruto durante mal tempo, ki clase di embarcacion lo bo prefera? Lo bo kier un boto chikito of un barco solido y bon traha? No tin duda cu lo bo scohe e barco, ya cu lo e por pasa den e olanan bruto sin mucho problema.

Segun cu nos ta nabega door di e sistema di cosnan turbulento y peligroso aki, nos ta confronta dificultadnan inkietante. Por ehempel, hobennan tin biaha ta sinti nan mes desorienta y insigur meimei di e mundo aki su idea- y tendencianan confuso. Personanan cu resientemente a cuminsa hiba un bida cristian kisas ainda ta sinti nan un poco instabil. Asta cristiannan firme cu tin hopi aña di fiel sirbishi na Dios tras di lomba, kisas ta pasando un prueba debi cu nan expectativanan no a cumpli ainda completamente.

E sintimentonan ei no ta nobo. Tawatin ocasion cu fiel sirbidonan di Yehova, manera Moises, Job y David, a sinti nan perturba. (Numbernan 11:14, 15; Job 3:1-4; Salmo 55:4) Sinembargo, nan bida tawata caracterisa pa un debocion firme na Yehova. Nan bon ehempel ta anima nos pa ta firme, pero Satanas e Diabel kier desvia nos for di e careda pa bida eterno. (Lucas 22:31) Pesei con nos por keda solido, ‘firme den fe’? (1 Pedro 5:9) Y con nos por fortalece nos rumannan den fe?

Yehova Kier pa Nos Ta Firme

Si nos ta fiel na Yehova, lo E t’ei semper pa yuda nos mantene nos stabilidad. E salmista David a confronta hopi situacion dificil, pero el a spera den Dios y pesei e por a canta: “[Yehova] a saca mi for di e pos di destruccion, for di e lodo di klei; y el a pone mi pia riba un baranca y a haci mi pasonan firme.”—Salmo 40:2.

Yehova ta fortalece nos pa “lucha e bon lucha di fe” di manera cu nos por “gara e bida eterno.” (1 Timoteo 6:12) Tambe E ta percura e medio pa nos keda stabil y sali victorioso den nos guera spiritual. Apostel Pablo a urgi su rumannan cristian pa ta “fuerte den Señor, y den e forsa di su poder”, y pa ‘bisti e armadura completo di Dios, pa nan por para firme contra e trampanan di Diabel.’ (Efesionan 6:10-17) Pero kico asina por pone nos perde nos balansa? Y con nos por resisti tal influencianan peligroso?

Tene Cuidou cu Cosnan Cu Por Pone Nos Perde Balansa

Ta sabi pa corda e echo masha importante aki: E decisionnan cu nos ta tuma, tardi of  tempran ta influencia nos stabilidad cristian sea den un manera positivo of negativo. Hobennan tin cu tuma decision relaciona cu asuntonan manera un carera, educacion avansa y matrimonio. Adultonan kisas tin cu dicidi si nan ta bai muda pa un otro luga of si nan ta tuma un job adicional. Tur dia nos ta dicidi con pa uza nos tempo y tocante hopi otro asunto mas. Kico lo yuda nos tuma decisionnan sabi cu ta pone nos bira mas firme y stabil como sirbido di Dios? Un cristian di hopi tempo a bisa: “Mi ta pidi Yehova yuda mi ora di tuma decision. Mi ta kere cu ta importante pa acepta y aplica conseho cu nos ta haya den Bijbel, y na reunionnan cristian, serca e ancianonan y den publicacionnan basa riba Bijbel.”

Ora di tuma decision, lo ta bon pa nos puntra nos mes: ‘Aki cinco of dies aña, lo mi ta contento cu e decisionnan cu mi a tuma awe, of lo mi lamenta nan? Mi ta purba di haci sigur cu mi decisionnan lo no pone mi perde mi balansa spiritual, sino mas bien lo contribui na mi progreso spiritual?’—Filipensenan 3:16, NW.

Algun persona batisa tin un bida instabil door cu nan ta cai den tentacion of ta cana na rand di e berdad. Un par di nan cu a ser expulsa di e congregacion debi cu nan a sigui un proceder pecaminoso sin arepenti, a traha duro pa nan ser restaura, pero ta bolbe ser expulsa—tin biaha djis despues—pa e mesun malecho. Probablemente nan no a haci oracion pidi Dios yuda nan odia of ‘aborece loke ta malo y tene firme na loke ta bon.’ (Romanonan 12:9; Salmo 97:10) Nos tur tin cu sigui ‘traha bereanan stret pa nos pia.’ (Hebreonan 12:13) Pesei laga nos considera algun punto cu por yuda nos keda spiritualmente stabil.

Keda Firme Mediante Actividad Cristian

Un manera pa mantene un ritmo constante den nos careda pa bida ta door di tin hopi di haci den e trabou di predica e Reino. Si, nos sirbishi cristian ta un yudansa balioso pa mantene nos curason y mente enfoca riba hacimento di e boluntad di Dios y firmemente fiha riba e premio di bida eterno. Relaciona cu esaki, Pablo a urgi e Corintionan: “Mi rumannan stima, sea firme, constante, semper abundando den e trabou di Señor, sabiendo cu boso trabou no ta en vano den Señor.” (1 Corintionan 15:58) E palabra cu nan a uza pa “firme” den e idioma original ta nifica ‘firmemente pega na su luga.’ Esun uza pa “constante” por nifica ‘cu no ta permiti su mes wordo gelos for di anker.’ Pesei, e echo cu nos ta activo den sirbishi por yuda duna stabilidad na nos bida cristian. Yuda otro hende siña conoce Yehova ta duna nos bida un proposito y ta haci nos felis.—Echonan 20:35.

Pauline, un cristian cu a dedica mas cu 30 aña na e trabou di misionero y otro actividadnan di predicacion di tempo completo, a comenta: “Sirbishi di veld ta un proteccion pasobra e dunamento di testimonio ta combence mi cu mi tin e berdad.” Nos por haya un conviccion similar tambe door di participa regularmente den otro actividadnan cristian, manera asisti na reunionnan caminda nos ta adora Dios y haci studio di Bijbel personal y diligente.

Bira Stabil Door di un Hermandad Amoroso

Siendo parti di un organisacion mundial di adorado berdadero por contribui hopi na nos stabilidad. Ta ki un bendicion grandi di por asocia cu un hermandad mundial asina amoroso! (1 Pedro 2:17) Y nos por yuda nos rumannan bira stabil.

Considera e accionnan practico di e homber recto Job. Asta e consolador falso Elifaz mester a admiti: “Bo palabranan a yuda esnan cu ta trompica pa nan keda para, y bo a fortalece rudianan debil.” (Job 4:4) Con nos ta den e aspecto aki? Nos cada un tin e responsabilidad di yuda nos rumannan spiritual persevera den e sirbishi di Dios. Ora nos ta hunto cu nan, nos por actua a base di e palabranan: “Encurasha  esnan agota, y fortalece esnan debil.” (Isaias 35:3) Pakico no pone e meta di fortalece y encurasha un of dos ruman cristian cada biaha cu bo reuni cu nan? (Hebreonan 10:24, 25) Palabranan alentador di elogio y aprecio pa nan esfuersonan continuo pa agrada Yehova, di berdad por yuda nan keda firme cu e prospecto di gana e careda pa bida.

Ancianonan cristian por logra hopi door di anima e rumannan mas nobo. Podise nan por haci esaki door di duna sugerencianan practico y conseho biblico sano y door di traha hunto cu nan den sirbishi di veld. Apostel Pablo semper a probecha di oportunidadnan pa fortalece otro hende. El a anhela pa mira e cristiannan na Roma pa asina e por a fortalece nan spiritualmente. (Romanonan 1:11) Pablo a considera su rumannan stima na Filipos como su “goso y corona” y a encurasha nan pa “para firme den Señor.” (Filipensenan 4:1) Ora Pablo a tende di e dificultadnan di su rumannan na Tesalonica, el a manda Timoteo pa ‘fortalece y encurasha nan, pa ningun hende no bira intrankil pa motibo di afliccion.’—1 Tesalonicensenan 3:1-3.

Apostel Pablo y Pedro a reconoce y aprecia e esfuersonan fiel di nan rumannan den fe. (Colosensenan 2:5; 1 Tesalonicensenan 3:7, 8; 2 Pedro 1:12) Laga nos tambe enfoca, no riba e debilidadnan di nos rumannan, sino riba nan bon cualidadnan y e exito cu nan tin den nan lucha pa keda firme y honra Yehova.

Si nos ta negativo of critico, kisas sin cu nos sa nos ta stroba algun di nos rumannan keda firme den fe. Ta masha apropia anto pa corda cu nos rumannan ta “cansa y plama” den e sistema di cosnan aki! (Mateo 9:36) Nan mester por haya consuelo y refrescamento den e congregacion cristian. Pesei laga nos tur haci nos best pa edifica nos rumannan den fe y yuda nan keda firme.

De bes en cuando tin ruman por trata nos na un manera cu lo por suak nos firmesa. Pero, nos lo laga un comentario severo of un acto cu no ta bondadoso pone nos baha man den nos sirbishi na Yehova? Laga nos nunca permiti ningun hende desvia nos for di nos firmesa!—2 Pedro 3:17.

E Promesa di Dios Ta Yuda Nos Bira Stabil

Yehova su promesa di un futuro maraviyoso bou di e gobernacion di Reino ta duna nos speransa cu ta yuda nos mantene nos firmesa. (Hebreonan 6:19) Anto e conviccion di cu Dios semper ta cumpli cu su promesanan ta motiva nos pa ‘keda alerta y para firme den fe.’ (1 Corintionan 16:13; Hebreonan 3:6) E echo cu ta parce cu algun promesa di Dios ta tarda pa cumpli kisas ta pone nos fe na prueba. Pesei ta masha importante pa nos wak bon pa nos no ser engaña door di siñansanan falso y wordo movi for di nos speransa.—Colosensenan 1:23; Hebreonan 13:9.

E mal ehempel di e Israelitanan cu a muri pasobra nan no tawatin fe den e promesanan di Yehova mester sirbi como un spiertamento pa nos. (Salmo 78:37) En bes di ta manera nan, laga nos ta firme, sirbiendo Dios cu un sentido di urgencia den e ultimo dianan aki. Un anciano experencia a bisa: “Mi ta biba tur dia como  si fuera e dia di Yehova lo bin mañan.”—Yoël 1:15.

Si, e gran dia di Yehova ta hopi serca. Sinembargo, tanten nos keda serca Dios nos no tin nada di teme. Si nos tene duro na su normanan husto y keda firme, nos por core e careda pa bida eterno cu exito!—Proverbionan 11:19; 1 Timoteo 6:12, 17-19.

[Plachi na pagina 23]

Bo ta haciendo tur loke bo por pa yuda bo rumannan cristian keda firme?

[Reconocemento di plachi na pagina 21]

The Complete Encyclopedia of Illustration/J. G. Heck