Pregunta di Lector

Dicon E Toren di Vigilancia di 1 di april 2002, ta declara na pagina 11, paragraf 7, cu e bautismo den awa di creyentenan nobo Hudiu na Pentecoste di aña 33 di nos era, a simbolisa “nan dedicacion personal na Dios mediante Cristo”, mientras cu anteriormente e punto di bista tawata cu Hudiunan cu a batisa entre aña 33 te cu 36 no tawatin nodi haci tal dedicacion personal?

Na aña 1513 prome cu nos era, Yehova Dios a duna e Israelitanan e oportunidad di bira un nacion santo p’e basta cu nan ‘di berdad a obedece su bos y warda su aliansa.’ Nan a contesta: “Tur loke SEÑOR a bisa, nos lo haci.”—Exodo 19:3-8; 24:1-8.

Door di bai di acuerdo pa cumpli cu e pacto of aliansa di e Lei di Moises, e Israelitanan a dedica nan mes na Dios. Generacionnan di Hudiu cu a bini despues a nace den e nacion dedica aki. Sinembargo, e bautismo di Hudiu cu a bira siguido di Hesucristo for di Pentecoste di aña 33 en adelante, no a nifica cu nan a presenta nan mes na Dios como miembro di un nacion dedica. E bautismo ei a simbolisa nan dedicacion na Yehova Dios den un relacion nobo cu ne mediante Hesucristo. Con asina?

Despues cu spirito santo a wordo drama riba mas o menos 120 disipel cu a reuni den un sala ariba na Herusalem na Pentecoste di aña 33, apostel Pedro a lanta para y a cuminsa predica na e multitud di Hudiu y proselito cu a core bin wak ta kico a sosode. Despues di duna nan un testimonio cabal, el a bisa e Hudiunan aki kende nan consenshi a molestia nan: “Repenti, y laga cada un di boso wordo batisa den e nomber di Hesucristo pa pordon di boso picanan.” Reaccionando riba Pedro su apelacion urgente, “esnan cu a ricibi su palabra a wordo batisa; y e dia ei a wordo añadi na nan mas o menos tres mil alma.”—Echonan 2:1-41.

Acaso e Hudiunan ei cu a batisa despues di Pedro su apelacion no tawata miembro caba di un nacion dedica? Nan no tawatin un relacion dedica cu Dios? No. Apostel Pablo a skirbi cu ‘Dios a kita e Lei for di caminda door di clab’e na staca di tormento.’ (Colosensenan 2:14, NW) Mediante e morto di Cristo na aña 33, Yehova Dios a kita e aliansa di Lei, cu tawata netamente e base pa trece e Israelitanan den un relacion dedica cu ne.  Asina Dios mes a rechasa e nacion cu a rechasa Su Yiu. ‘Loke tawata Israel den sentido carnal’ no por a pretende mas di ta un nacion dedica na Dios.—1 Corintionan 10:18, NW; Mateo 21:43.

E aliansa di Lei a ser aboli na aña 33, pero Dios su periodo di consideracion y atencion special pa cu e Hudiunan no a termina na e tempo ei. * E periodo ei lo a dura te cu aña 36, ora cu Pedro a predica na e Italiano deboto Cornelio y na su hendenan di cas y tambe na otro personanan cu no tawata Hudiu. (Echonan 10:1-48) A base di kico Dios a rek e periodo di consideracion aki?

Daniel 9:27 [NW] ta declara: “[E Mesias] tin cu mantene e pacto na vigor pa hopi hende pa un siman.” E pacto of aliansa cu a ser manteni na vigor pa shete aña—of “un siman”—cuminsando for di e bautismo di Hesus y e sirbishi publico di e Mesias na aña 29, tawata e aliansa cu Dios a sera cu Abraham. Pa un persona por tawata den e aliansa ei, simplemente e mester tawata un desendiente Hebreo di Abraham. E aliansa unilateral ei no a duna e persona un relacion dedica cu Yehova. Pesei, maske e creyentenan Hudiu cu a batisa despues di Pedro su discurso na Pentecoste di aña 33 a ricibi atencion special como Hudiu natural, nan no por a pretende di tin un relacion dedica cu Dios unabes cu e aliansa di Lei a ser kita. Nan mester a dedica nan mes personalmente na Dios.

Tawatin un motibo mas pakico tawata importante pa e Hudiunan y proselitonan cu a presenta nan mes pa bautismo riba e dia di Pentecoste di aña 33 haci un dedicacion personal. Apostel Pedro a stimula su oyentenan pa repenti y ser batisa den nomber di Hesus. Pa nan haci esei nan mester a renuncia e caminda di mundo y reconoce Hesus como Señor y Mesias, como Sumo Sacerdote y como esun cu ta sinta na man drechi di Dios den shelo. Nan tawatin cu invoca e nomber di Yehova Dios pa haya salbacion mediante Cristo Hesus, locual a encera eherce fe den Cristo y reconoc’e como nan Lider. Awor henter e base pa nan por tin un relacion cu Dios y haya pordon di pica a cambia. Individualmente, e Hudiunan creyente mester a acepta e areglo nobo aki. Con? Door di haci un dedicacion na Dios y demostra publicamente cu nan a haci esaki door di batisa den awa den nomber di Hesucristo. Bautismo den awa a simbolisa nan dedicacion na Dios, y a trece nan den un relacion nobo cu ne mediante Hesucristo.—Echonan 2:21, 33-36; 3:19-23.

[Nota]