Scucha Loke e Spirito Ta Bisa!

“Esun cu tin horea, lag’e tende loke e spirito ta bisa e iglesianan.”—REVELACION 3:22.

1, 2. Ki conseho nos ta bolbe haya relaciona cu e mensahenan cu Hesus tawatin pa e shete congregacionnan menciona den Revelacion?

YEHOVA su sirbidonan tin cu paga bon tino na e palabranan inspira pa spirito cu Hesucristo a declara na e shete congregacionnan menciona den e buki biblico di Revelacion. De echo, cada un di e mensahenan aki ta contene e conseho aki: “Esun cu tin horea, lag’e tende loke e spirito ta bisa e iglesianan [of, e congregacionnan].”—Revelacion 2:7, 11, 17, 29; 3:6, 13, 22.

² Nos a considera caba e mensahe cu Hesus tawatin pa e angelnan—of superintendentenan—di Efeso, Smirna y Pergamo. Con nos por saca beneficio di loke el a bisa mediante spirito santo na e cuater otro congregacionnan?

Na e Angel di Tiatira

3. Unda Tiatira tawata keda, y pa ki producto e tawata specialmente famoso?

³ “E Yiu di Dios” ta elogia plus scual e congregacion di Tiatira. (Lesa Revelacion 2:18-29.) Tiatira (awor Akhisar) a ser construi na oriya di un taki di e Riu Gediz (antes Hermus) den  parti west di Asia Menor. E stad tawata renombra pa varios ofishi di su artesanonan. Su trahadonan di tiña a uza e raiz di e mata di rubia (meekrapwortel) pa saca nan famoso colo escarlata of purpura. Lidia, kende despues a bira un cristian durante Pablo su bishita na Filipos na Grecia, tawata ‘un bendedo di tela purpura di e stad di Tiatira.’—Echonan 16:12-15.

4. Pa kico e congregacion di Tiatira a haya elogio?

⁴ Hesus a elogia e congregacion di Tiatira pa su bon obranan, su amor, fe, perseverancia y sirbishi. De echo, ‘nan obranan di awor tawata mas grandi cu esunnan di prome.’ Sinembargo, asta si nos a traha un bon nomber, nos nunca mester neglisha nos moralidad.

5-7. (a) Ken “e mohe Jezabel” tawata, y kico mester a haci cu su influencia? (b) Cu kico Cristo su mensahe na e congregacion di Tiatira ta yuda hende mohe deboto?

⁵ E congregacion di Tiatira a tolera idolatria, siñansa falso y inmoralidad sexual. Den dje tawatin “e mohe Jezabel”, kisas un grupo di hende mohe cu caracteristicanan mescos cu e reina malbado Jezabel di e reino di dies tribu di Israel. Algun intelectual ta indica cu posiblemente e “profeta” ei di Tiatira a purba hinca cristiannan den tentacion pa adora e dios- y diosanan di e gremionan di artesano y pa participa den fiestanan cu a inclui cuminda sacrifica na idolo. No laga ningun mohe cu ta proclama su mes como profeta, trata na manipula otro rumannan den e congregacion cristian djawe!

⁶ Cristo tawata bai ‘tir’e riba cama di malesa, y esnan cu a comete adulterio cu ne lo e tira den gran tribulacion, a menos cu nan a repenti di su obranan.’ Superintendentenan nunca mester entrega na tal siñansa y influencia malbado, y ningun cristian tin nodi comete fornicacion spiritual ni carnal of participa den idolatria pa nan realisa cu e “cosnan profundo di Satanas” ta realmente baho. Si nos haci caso di Hesus su spiertamento, ‘nos lo tene firme na loke nos tin’, y pica lo no domina nos. Como cu e unginan resusita a rechasa practicanan, pasionnan y metanan malbado, nan ta ricibi “autoridad riba e nacionnan” y nan lo join Cristo ora e ta kibra e nacionnan na pida pida. E congregacionnan djawe tin streya simbolico, y e unginan lo ricibi “e streya briyante di marduga”, cu ta e Bruidegom Hesucristo, ora nan ser resusita pa bida den shelo.—Revelacion 22:16.

⁷ E congregacion di Tiatira a haya e spiertamento pa no tolera e influencia malbado di mohenan apostata. Cristo su mensahe inspira pa spirito na e congregacion ta yuda hende mohe deboto djawe mantene nan posicion cu Dios a asigna na hende mohe. Nan no ta purba eherce autoridad riba hende homber ni nan no ta purba seduci ningun ruman homber pa comete fornicacion spiritual ni carnal. (1 Timoteo 2:12) Mas bien, tal hende mohe ta pone un bon ehempel den haci obranan excelente y di sirbi pa e alabansa di Dios. (Salmo 68:11, NW; 1 Pedro 3:1-6) Si e congregacion proteha loke e tin—esta, su doctrina y conducta puro y su precioso sirbishi di Reino—Cristo lo bini cu recompensanan maraviyoso y no cu ehecucion.

Na e Angel di Sardis

8. (a) Unda Sardis tawata situa, y kico ta algun detaye di e stad ei? (b) Dicon e congregacion di Sardis tawatin mester di yudansa?

⁸ E congregacion di Sardis tawatin mester di yudansa urgente pasobra e tawata spiritualmente morto. (Lesa Revelacion 3:1-6.) Sardis tawata un stad prospero, situa rond di 50 kilometer suit di Tiatira. Comercio, e tereno fertil y e produccion di tela y tapijt di lana a yuda hacie un stad rico cu na dado momento tawatin  alrededor di 50.000 habitante. Segun e historiado Yosefo, Sardis tawatin un comunidad Hudiu grandi den siglo 1 prome cu nos era. Entre e ruinanan di e stad tin un sinagoga y un tempel di e diosa di Efeso, Artemis.

9. Kico nos mester haci si nos actividadnan di sirbishi ta superficial y sin smak?

⁹ Cristo a bisa e angel di e congregacion di Sardis: “Mi conoce bo obranan, cu bo tin e nomber di ta bibo, ma bo ta morto.” Kico nos por haci si nos tin e reputacion di ta personanan spiritual, ma en realidad nos no ta mucho interesa den privilegionan cristian y nos actividadnan di sirbishi ta superficial, sin smak y spiritualmente nos ta ‘casi morto’? Den tal caso nos tin cu sigui ‘corda con nos a ricibi y tende’ e mensahe di Reino, y nos mester rebiba nos esfuersonan den sirbishi sagrado. Un cos cu sigur nos mester cuminsa haci bek ta participa di henter alma den e reunionnan cristian. (Hebreonan 10:24, 25) Cristo a spierta e congregacion di Sardis: “Si bo no spierta, lo mi bin manera un ladron, y lo bo no sa ki ora mi ta bin riba bo.” Ke tal di nos tempo? Pronto nos lo tin cu duna cuenta.

10. Kico por ta e caso di algun cristian asta den un situacion manera esun na Sardis?

¹⁰ Asta den un situacion manera esun na Sardis, por tin algun persona cu ‘no ta mancha nan paña y cu por cana cu Cristo na blanco bisti pasobra nan ta digno.’ Na tur momento hende por reconoce cu nan ta cristian, y nan ta percura pa nan keda sin mancha moral of religioso di e mundo aki. (Santiago 1:27) Pesei Hesus ‘lo no kita nan nomber for di e buki di bida, ma lo confesa nan dilanti di su Tata y e angelnan.’ Cristo su bruid di unginan a ser declara digno di cana cu ne, y nan lo ta bisti na lino fini, briyante y limpi cu ta simbolisa e echonan husto di e santonan di Dios. (Revelacion 19:8) E privilegionan maraviyoso di sirbishi cu ta spera nan den shelo ta stimula nan pa vence e mundo aki. Bendicion ta spera tambe esnan cu ta den fila pa bida eterno riba tera. Nan nomber tambe ta skirbi den e buki di bida.

11. Kico nos mester haci si nos ta cabishando spiritualmente?

¹¹ Niun di nos no kier cai den e situacion spiritual lamentabel di e congregacion di Sardis. Pero kico si nos ripara cu nos ta cabishando spiritualmente? Nos mester actua rapidamente pa nos mes bon. Supone cu cosnan malbado ta atrae nos of nos ta birando floho pa bai reunion of den nos sirbishi di veld. Laga nos busca Yehova su yudansa mediante oracion sinsero. (Filipensenan 4:6, 7, 13) Lesa Bijbel tur dia y studia e Scritura y publicacionnan di ‘e mayordomo fiel’ lo yuda nos keda spiritualmente lanta. (Lucas 12:42-44) E ora ei nos lo ta manera esnan na Sardis cu tawatin e aprobacion di Cristo, y nos lo ta un bendicion pa nos rumannan den fe.

Na e Angel di Filadelfia

12. Con lo bo describi e situacion religioso na antiguo Filadelfia?

¹² Hesus a elogia e congregacion di Filadelfia. (Lesa Revelacion 3:7-13.) Filadelfia (awor Alasehir) tawata e centro prospero di un region den west di Asia Menor caminda nan tawata produci biña. De echo, nan dios principal tawata Dioniso, e dios di biña. Evidentemente e Hudiunan na Filadelfia a purba combence cristiannan Hudiu pa nan keda sigui cierto practicanan di e Lei di Moises of bolbe bek na nan. Pero nan no a logra den nan intento.

13. Con Cristo a uza “e yabi di David”?

¹³ Cristo “tin e yabi di David”, pues el a ser confia cu tur e interesnan di Reino y cu administracion di e famia di fe. (Isaias 22:22; Lucas 1:32) Hesus a uza e yabi ei pa habri oportunidadnan y privilegionan relaciona cu e Reino pa e cristiannan na Filadelfia y na otro parti. Desde 1919 el a pone dilanti di e ‘mayordomo fiel’ “un porta hancho” cu ta hiba na predicacion di e Reino, un porta cu ningun opositor no por sera. (1 Corintionan 16:9; Colosensenan 4:2-4) Claro cu a sera e porta cu ta hiba na privilegionan di Reino pa esnan di “e snoa [sinagoga]  di Satanas”, pasobra nan no ta Israelitanan spiritual.

14. (a) Kico Hesus a priminti e congregacion na Filadelfia? (b) Con nos por evita di cai durante “e ora di prueba”?

¹⁴ Hesus a duna cristiannan den antiguo Filadelfia e promesa aki: “Pasobra bo a warda mi mandamento pa persevera, ami tambe lo warda bo di e ora di prueba cu lo bin riba henter mundo.” Pa un cristian por predica, e mester tin e clase di perseverancia cu Hesus a desplega. Nunca e no a entrega na enemigo, sino mas bien a sigui haci e boluntad di su Tata. Pesei Cristo a ser resusita pa bida inmortal den shelo. Si nos tene firme na nos decision pa adora Yehova y nos apoya e Reino door di predica e bon nobo, nos lo no cai durante “e ora di prueba”, esta e actual periodo di prueba. Nos lo sigui ‘tene firme na loke nos tin’ di Cristo door di haci esfuerso pa aumenta e interesnan di Reino ei. Haciendo esaki lo resulta den un corona celestial preciosisimo pa e unginan y bida eterno riba tera pa nan compañeronan fiel.

15. Kico ta ser rekeri di esnan cu lo ta ‘pilar den e tempel di Dios’?

¹⁵ Cristo ta agrega: “Esun cu vence, lo mi hacie un pilar den e tempel di mi Dios, . . . y lo mi skirbi riba dje e nomber di mi Dios, y e nomber di e stad di mi Dios, e Herusalem nobo, cu ta baha for di shelo for di mi Dios, y mi nomber  nobo.” Superintendentenan ungi mester boga pa adoracion berdadero. Nan mester sigui cualifica como miembro di “e Herusalem nobo” door di predica tocante e Reino di Dios y keda spiritualmente limpi. Esaki ta necesario si nan kier ta pilar den e tempel celestial glorifica y pa nan por carga e nomber di e stad di Dios como su ciudadanonan celestial y comparti e nomber di Cristo como su bruid. Y claro cu nan mester tin horea cu ta “tende loke e spirito ta bisa e iglesianan.”

Na e Angel di Laodicea

16. Kico ta algun echo di Laodicea?

¹⁶ Cristo a scual e congregacion di Laodicea cu tawata satisfecho cu su mes. (Lesa Revelacion 3:14-22.) Laodicea tawata mas o menos 150 kilometer oost di Efeso y situa na un crusada di rutanan comercial importante den e vaye fertil di Riu Lico. E tawata un stad industrial masha prospero y un centro bancario. Bistinan traha di e lana preto di e region ei tawata masha conoci. Siendo e sitio di un scol famoso di medicina, Laodicea probablemente a produci e remedi pa wowo conoci como puiro Frigio. Asclepio (of, Esculapio), un dios di medicina, tawata un di e diosnan principal di e stad. Parce cu Laodicea tawatin un cantidad grandi di Hudiu, y algun di nan aparentemente tawata hopi rico.

17. Dicon Hesus a scual e Laodicensenan?

¹⁷ Dirigiendo su mes na e congregacion di Laodicea via su “angel”, Hesus a papia cu autoridad como “e testigo fiel y berdadero, e principio di e creacion di Dios.” (Colosensenan 1:13-16) El a scual e Laodicensenan pasobra spiritualmente nan no tawata “ni friu ni cayente.” Como cu nan tawata lou, Cristo tawata bai scupi nan for di su boca. Lo no tawata dificil pa nan compronde e ilustracion ei. Hierapolis, un stad pega cu nan, tawatin fontein di awa cayente, y Colosas tawatin awa friu. Sinembargo, como cu nan mester a transporta awa riba un distancia grandi pa Laodicea, e awa probablemente tawata lou ora el a yega e stad. Pa un parti di e trayecto, e awa a pasa via un acuaducto. Yegando mas serca di Laodicea, e awa tawata pasa door di buraco cu nan a bora den blokinan di piedra pega na otro cu cement.

18, 19. Kico por yuda cristiannan djawe cu ta manera esnan na Laodicea?

¹⁸ Personanan djawe cu ta manera e Laodicensenan, no ta un cayente stimulante ni un friu refrescante. Nan lo wordo scupi afo, mescos cu awa lou! Hesus no kier pa nan papia p’e como ‘ambassadornan ungi pa Cristo.’ (2 Corintionan 5:20) A menos cu nan repenti, nan lo perde nan privilegio como proclamado di Reino. E Laodicensenan a busca rikesa terenal y ‘no tawata sa cu nan tawata deplorabel, miserabel, pober, ciego y sunu.’ Ken cu ta manera nan awe, y cu kier stop di ta pober, ciego y sunu den sentido spiritual, mester cumpra serca Cristo e “oro refina” di un fe cu a ser proba, “paña blanco” di husticia, y ‘enguente pa hunta wowo cu ne’ cu ta drecha bista spiritual. Superintendentenan cristian gustosamente lo yuda e personanan ei bira conciente di nan necesidad spiritual ya asina nan por bira “rico den fe.” (Santiago 2:5; Mateo 5:3, NW) Ademas, e superintendentenan mester yuda nan uza e ‘enguente spiritual pa hunta wowo cu ne’, es decir, yuda nan acepta y cumpli cu e siñansa, conseho, ehempel y actitud mental di Hesus. Esaki ta un bon remedi cu ta cura “e deseo di carni y e deseo di wowo y e orguyo di bida.”—1 Huan 2:15-17.

¹⁹ Hesus ta scual y disiplina tur esnan cu e ta stima. Superintendentenan bou di dje mester haci mescos cu ternura. (Echonan 20:28, 29) E Laodicensenan mester a bira “ferviente y repenti”, haciendo cambio den nan manera di pensa y nan estilo di bida. Wel, acaso algun di nos a custumbra cu un estilo di bida cu a pusha nos sirbishi sagrado na Dios na un luga menos importante den nos bida? Si esei ta asina, laga nos ‘cumpra enguente pa hunta wowo cu ne serca Hesus’ di manera cu nos por mira e importancia di celosamente busca prome e Reino.—Mateo 6:33.

20, 21. Ken awe ta reacciona na e manera corecto ora Hesus ta ‘bati na porta’, y ki speransa nan tin?

 ²⁰ Cristo a bisa: “Ata, mi ta para na porta y ta bati; si un hende tende mi bos y habri porta, lo mi drenta serca dje, y lo cena cu ne y e cu mi.” Hopi bes Hesus a duna instruccion spiritual ora e tawata come. (Lucas 5:29-39; 7:36-50; 14:1-24) Awor e ta bati na porta di congregacionnan cu ta manera esun di Laodicea. E miembronan di e congregacionnan ei lo reacciona, rebiba nan amor p’e, ricibie paden y lag’e siña nan? Si nan hacie, Cristo lo come un bankete cu nan y esei lo ta di gran beneficio spiritual pa nan.

²¹ E “otro carnenan” djawe na moda di papia ta laga Hesus drenta, y tal accion ta hiba na bida eterno. (Huan 10:16; Mateo 25:34-40, 46) Cada ungi cu vence, Cristo lo duna e privilegio di ‘sinta hunto cu ne riba su trono, mescos cu e tambe a vence y a sinta hunto cu su Tata riba Su trono.’ Si, Hesus ta priminti e unginan cu vence, e gran recompensa di un trono hunto cu ne na man drechi di su Tata den shelo. Y e otro carnenan cu vence ta anticipa un luga maraviyoso riba tera bou di gobernacion di e Reino.

Nos Tur Por Siña un Les

22, 23. (a) Con tur cristian por beneficia di loke Hesus a bisa e shete congregacionnan? (b) Kico nos mester ta determina pa haci?

²² No tin duda cu tur cristian por saca masha hopi beneficio di loke Hesus a bisa e shete congregacionnan na Asia Menor. Por ehempel, tumando nota cu Cristo a duna e elogio apropia, ancianonan cristian amoroso ta ser motiva pa elogia personanan y congregacionnan cu ta bai bon spiritualmente. Caminda tin debilidad, e ancianonan ta yuda nan rumannan den fe aplica remedinan biblico. Nos tur por sigui beneficia di e varios rasgonan di e conseho cu Cristo a duna na e shete congregacionnan, basta nos ta aplica nan hunto cu oracion sinsero y sin tarda. *

²³ E ultimo dianan aki no ta tempo pa materialismo, pa ta satisfecho cu nos mes ni pa nada otro cu lo por pone nos rindi un sirbishi na Dios cu ta djis pa cara di hende, superficial y sin smak. Pesei laga tur congregacion sigui briya bon cla manera candela cu Hesus ta mantene na nan luga. Como cristiannan fiel, laga nos ta semper determina pa paga bon tino ora Cristo ta papia y scucha loke e spirito ta bisa. Anto nos lo tin goso eterno como cargadonan di lus pa e gloria di Yehova.

[Nota]

Con Lo Bo Contesta?

• Ken “e mohe Jezabel” tawata, y pakico hende mohe deboto no ta imit’e?

• Ki situacion tawatin den e congregacion di Sardis, y kico nos por haci pa evita di bira manera hopi di e cristiannan cu a biba einan?

• Kico Hesus a priminti e congregacion di Filadelfia, y con nos por aplica esei awe?

• Dicon Hesus a scual e Laodicensenan, pero ki speransa tin dilanti di cristiannan cu ta celoso?

[Preguntanan di Estudio]

[Plachi na pagina 16]

Nos mester evita e camindanan malbado di “e mohe Jezabel”

[Plachi na pagina 18]

Hesus a pone dilanti di su siguidonan “un porta hancho” cu ta hiba na privilegionan di Reino

[Plachi na pagina 20]

Bo ta laga Hesus drenta y ta scuch’e?