Un Registro Fasinante

DI 1928 pa 1956 explorado Richard E. Byrd a haci cinco expedicion pa Antartica. Door di tene un registro exacto, hunto cu su teamnan e por a determina movemento di biento, prepara mapa y haya bastante informacion di e continente di Antartica.

Byrd su expedicionnan ta mustra con importante ta pa tene un registro of diario di nabegacion (logboek). Den un diario asina, e exploradonan ta anota e detayenan di un biahe of un buelo. Despues por uza e informacion aki pa repasa loke a tuma luga of pa analisa informacion cu por ta util pa futuro biahenan.

Bijbel ta duna un relato fasinante di e Dilubio cu a tuma luga den e dianan di Noe. E Dilubio mundial ei a dura mas cu un aña. Como preparacion pa e Dilubio, Noe cu su casa hunto cu nan tres yiunan y nan respectivo casanan a dedica 50 pa 60 aña pa construi un arca—un barco enorme cu tawatin un volumen di rond di 40.000 meter cubico. Pakico nan a trah’e? Pa tene algun hende y bestia na bida atrabes di e Dilubio.—Genesis 7:1-3.

Den un sentido, e buki biblico di Genesis ta contene loke nos por yama Noe su registro of diario di nabegacion di loke a tuma luga for di ora e Dilubio a cuminsa te ora e cu su famia a bandona e arca. E ta contene algo importante pa nos awe?