Dunamento Cu Ta Agrada Dios

HESUS y su disipelnan tawata disfruta di un cuminda delicioso na Betania hunto cu varios amigo pega manera Maria, Marta y Lazaro kende resientemente a ser resusita. Ora Maria a cohe un liber di azeta caro y a hunta Hesus su pianan cu ne, Hudas Iscariot a rabia y a protesta. El a bisa: “Pakico e perfume aki no a wordo bendi pa tresshen denario [ekivalente na mas o menos un aña di salario] y duna na hende pober?” Mesora e otronan tambe a cuminsa keha e mesun cos.—Huan 12:1-6; Marco 14:3-5.

Sinembargo, Hesus a contesta: “Lag’e. . . . Pasobra e pobernan boso tin semper serca boso, y ki ora cu boso kier boso por haci bon na nan; ma ami boso no tin semper.” (Marco 14:6-9) Lidernan religioso Hudiu a siña hende cu donacion caritativo no solamente ta un obra excelente, sino tambe cu e por asta compensa pica. Di otro banda, Hesus a mustra bon cla cu e dunamento cu ta agrada Dios no ta limita na donacionnan caritativo na hende pober.

Un consideracion breve di e manera cu e congregacion di prome a haci donacion lo resalta algun manera practico cu nos por mustra nos interes y asina agrada Dios cu e donacionnan cu nos ta haci. E consideracion aki lo indica tambe con nos por duna na un manera spesifico cu ta trece mayor beneficio.

“Duna Limosna”

Na varios ocasion Hesus a anima su disipelnan pa “duna limosna.” (Lucas 12:33) Sinembargo, Hesus a spierta nan pa no haci cos pa hende mira cu e intencion pa busca gloria pa e dunado y no pa Dios. El a bisa: “Ora bo ta haci bo obranan di caridad, no laga toca trompet bo dilanti, manera e hipocritanan ta haci den snoa y riba caya pa nan ricibi honor serca hende.” (Mateo 6:1-4) Door di aplica e spiertamento aki, e prome cristiannan a evita di desplega e spirito di santidad cu e lidernan religioso den nan tempo tawatin, y nan a prefera di yuda hende den necesidad door di sirbi nan of door di duna regalo personalmente.

Por ehempel, na Lucas 8:1-3 nos ta lesa cu Maria Magdalena, Juana y Susana y otronan a uza “loke nan mes tawatin” pa den un manera modesto nan sirbi Hesus y su apostelnan. Aunke e hombernan aki no tawata pober, nan a  bandona nan fuentenan di entrada pa consentra unicamente riba nan sirbishi. (Mateo 4:18-22; Lucas 5:27, 28) Den un sentido, door di yuda e hombernan aki cumpli cu e tarea cu Dios a asigna nan, e mohenan aki a trece gloria na Dios. Y Dios a mustra cu El a aprecia esaki door di conserva den Bijbel un registro di nan generosidad misericordioso di moda cu tur futuro generacion lo por a lesa di nan.—Proverbionan 19:17; Hebreonan 6:10.

Dorcas tawata un otro señora bondadoso cu “tawata abunda den echonan di caridad y bon obra.” E tawata cose paña pa biudanan pober na Jope, su pueblo cu tawata situa cant’i lama. Nos no sa si ta e mes a paga pa e tela y otro acesorionan pa cose of ta djis el a cose pa nan sin cobra pa su trabou. No obstante, su bon trabou a hacie masha keri serca esnan cu el a yuda y tambe serca Dios kende misericordiosamente a recompensa e bondad cu el a mustra.—Echonan 9:36-41.

Motivacion Corecto Ta Vital

Kico a motiva e personanan aki pa duna? No tawata djis un sintimento di compasion impulsa door di un yamada emocional pa yudansa. Nan a sinti cu nan tin un responsabilidad pa haci tur loke nan por tur dia pa yuda hende cu ta pasa den pobresa, adversidad, malesa y otro dificultadnan. (Proverbionan 3:27, 28; Santiago 2:15, 16) Esaki ta e clase di donacion cu ta agrada Dios. E ta ser motiva principalmente door di un amor profundo pa Dios, y un deseo pa imita su personalidad misericordioso y generoso.—Mateo 5:44, 45; Santiago 1:17.

Apostel Huan a enfatisa e aspecto vital aki di duna ora el a puntra: “Ken cu tin e bienesnan di mundo, y ta mira su ruman den necesidad y ta sera su curason p’e, ta con e amor di Dios ta permanece den dje?” (1 Huan 3:17) E contesta ta obvio. Amor di Dios ta motiva hende pa ta generoso. Dios ta aprecia y ta recompensa esnan cu, mescos cu ne, ta desplega un spirito generoso. (Proverbionan 22:9; 2 Corintionan 9:6-11) Nos ta mira e clase di generosidad ei awe? Wak kico a pasa resientemente den un congregacion di Testigonan di Yehova.

Mester a drecha cas di un ruman mohe cristian di edad urgentemente. E tawata biba su so y e no tawatin ningun famia pa yud’e. Atrabes di añanan, semper el a ofrece su cas pa tene reunionnan cristian, y hopi bes el a invita rumannan pa bin come serca dje. (Echonan 16:14, 15, 40) Mirando su situacion penoso, e rumannan di e congregacion a dicidi di coopera pa yud’e. Algun a contribui cu placa y otronan cu nan labor. Den algun weekend, boluntarionan a pone un dak nobo, renoba e baño completamente, pleister y ferf henter e prome piso y pone cashi di cushina nobo. E echo cu nan a duna no solamente a yena e necesidad di e  señora sino tambe a hala e miembronan di congregacion mas serca otro y a impresiona e biciñanan ya cu e rumannan a duna un bon ehempel di con cristiannan berdadero ta duna.

Tin masha hopi manera cu nos por yuda otronan personalmente. Nos por dedica tempo na un mucha homber of un mucha mohe cu no tin un tata den cas? Nos por haci compra of cose paña pa un biuda di edad cu nos conoce? Nos por cushina of yuda paga gasto di un persona cu no tin mucho recurso? Nos no tin nodi ta rico pa yuda otronan. Apostel Pablo a skirbi: “Si e boluntad t’ei, e ta aceptabel segun loke un hende tin, no segun loke e no tin.” (2 Corintionan 8:12) Pero ta e clase di dunamento personal ei, esta, di duna directamente so Dios ta bendiciona? No.

Kico di Yudansa Organisa?

Tin biaha esfuersonan personal no ta suficiente. De echo, Hesus y su apostelnan tawatin un fondo pa yuda hende pober, y nan tawata acepta contribucion di hendenan bondadoso cu nan a topa den nan trabou. (Huan 12:6; 13:29) Asina tambe, congregacionnan di prome siglo a tene colecta ora tawatin necesidad y a organisa yudansa na un escala mas grandi.—Echonan 2:44, 45; 6:1-3; 1 Timoteo 5:9, 10.

Un ocasion asina a presenta na aña 55 di nos era. E congregacionnan na Hudea a cai den pobresa, kisas door di e gran scarsedad di cuminda cu tawata reina. (Echonan 11:27-30) Apostel Pablo, kende semper tawata interesa den hende pober, a pidi yudansa for di congregacionnan mas aleu, asta te na Macedonia. Personalmente el a organisa e colecta y a uza hombernan aproba pa hiba esaki. (1 Corintionan 16:1-4; Galationan 2:10) Ni e ni otro rumannan envolvi no a ricibi pago pa nan trabou.—2 Corintionan 8:20, 21.

Awe tambe Testigonan di Yehova ta cla pa yuda ora un desaster surgi. Por ehempel, durante zomer di aña 2001, tormentonan a causa inundacionnan serio na Houston, Texas, Merca. Na tur, 723 cas di Testigonan a ricibi daño, y hopi di nan a keda den bastante mal condicion. Mesora a forma un comite di ausilio di desaster cu a consisti di ancianonan cristian cualifica pa duna yudansa personal y pa reparti e fondonan di alivio pa yuda Testigonan local pa trata cu e situacion y drecha nan casnan. Rumannan boluntario for di congregacionnan den bicindario a haci tur e trabou. Un Testigo a aprecia e yudansa cu el a ricibi asina tanto cu ora el a ricibi pago di seguro pa cubri e gastonan di reparacion na su cas, mesora el a duna e cen na e fondo di alivio pa por yuda otro hende den necesidad.

Sinembargo ora ta trata di institucionnan caritativo nos mester ta cauteloso ora nos ta  evalua e hopi yamadanan cu nan ta haci riba nos. Algun institucion caritativo tin gastonan di administracion of gastonan pa organisa fund-raising cu ta masha halto. Door di esei masha tiki di e placa colecta ta yega su destinacion. Proverbionan 14:15 ta bisa: “E hende simpel [“sin experencia”, NW] ta kere tur cos, ma e homber prudente ta wak bon unda e ta bai.” Pues ta masha sabi pa analisa e factornan cuidadosamente.

Dunamento Cu Ta Trece Mas Beneficio

Tin un clase di dunamento cu ta asta mas importante cu obra di caridad. Hesus a referi na esaki ora un hoben gobernante a puntr’e kico e tin cu haci pa haya bida eterno. Hesus a bis’e: “Bai y bende bo propiedadnan y duna na hende pober, y lo bo tin tesoro den shelo; y bin, sigui mi.” (Mateo 19:16-22) Tuma nota cu Hesus no a djis bis’e ‘duna na hende pober y lo bo haya bida eterno.’ Mas bien el a agrega: “Bin, sigui mi.” Cu otro palabra, aunke obranan di caridad ta digno di elogio y beneficioso, ser un disipel di Cristo ta encera mas cu esei.

Hesus su interes principal tawata pa yuda otro hende spiritualmente. Djis prome cu su morto el a bisa Pilato: “Pa esaki mi a nace y pa esaki mi a bin den mundo, pa duna testimonio di e berdad.” (Huan 18:37) Maske el a hiba delantera den yuda hende pober, cura hende malo, y alimenta esnan cu hamber, na prome luga Hesus a train su disipelnan pa nan por predica. (Mateo 10:7, 8) De echo den su ultimo instruccionnan na nan tawatin tambe e mandamento: “Pesei, bai y haci tur e nacionnan disipel di mi.”—Mateo 28:19, 20.

Claro cu e trabou di predica no ta e solucion pa tur problema na mundo. Sinembargo, door di comparti e bon nobo di Reino di Dios cu tur sorto di hende nos ta glorifica Dios pasobra e trabou di predica ta cumpli cu Dios su proposito y ta habri caminda pa beneficionan eterno pa esnan cu acepta e mensahe dibino. (Huan 17:3; 1 Timoteo 2:3, 4) Pakico no scucha loke Testigonan di Yehova tin di bisa e siguiente bes cu nan yama na bo porta? Nan ta bin cu un regalo spiritual. Y nan sa cu esaki ta e miho cos cu nan por duna bo.

[Plachi na pagina 6]

Tin hopi manera cu nos por mustra cu nos ta interesa den hende

[Plachi na pagina 7]

Nos predicacion di e bon nobo ta agrada Dios y ta habri caminda pa beneficionan eterno