Kico Ta Pasando cu Obranan di Caridad?

DESPUES di e atakenan di 11 di september 2001, na New York City y Washington, D.C., e apoyo cu hende en general a duna na e victimanan di e tragedia aki tawata remarcabel. Institucionnan caritativo a haya nan cu mas di 2,7 mil miyon dollar na donacion pa yuda famianan di e victimanan. Hende rond mundo cu a keda geshock door di e tragedia grandi aki kier a yuda.

Sinembargo, no a dura masha cu algun a sinti nan engaña ora a sali na cla cu algun institucion caritativo prominente tawata haci mal uzo di e fondonan. Hopi hende a rabia masha ora tawatin informe cu un institucion caritativo grandi a plania pa keda cu casi mita di 546 miyon dollar cu el a ricibi y uz’e pa un otro proposito. Aunke e institucion a revoca su decision despues y a disculpa su mes, un reportero a remarca: “Pa criticonan e cambio di decision aki ta un dia laat y ta nifica un dollar menos pa restaura e confiansa” cu e institucion aki tawatin serca e pueblo prome cu e atakenan. Kico di abo? Bo a perde confiansa den institucionnan caritativo ultimamente?

Util of Placa Tira Afo?

Por lo general hende ta considera un donacion na un institucion caritativo como un acto digno di elogio. Pero no ta tur hende ta pensa asina. Mas cu 200 aña pasa, Samuel Johnson, un autor Ingles, a skirbi: “Bo ta mas sigur cu bo ta haciendo algo bon ora bo paga e placa na hende cu ta traha, como un recompensa pa nan trabou, cu ora bo ta djis haci un donacion.” Awe tambe tin hende ta basila pa haci donacion. Informenan tocante institucionnan caritativo cu ta haci mal uzo di donacionnan of cu no ta maneha nan bon, no ta anima pueblo pa pone confiansa den nan. Considera dos ehempel resien.

Nan a retira un director di un institucion caritativo religioso na San Francisco despues cu supuestamente el a laga e institucion paga cuentanan di cirugia plastico cu el a haci y tambe e cuentanan di 500 dollar pa siman cu el a gasta den restaurant pa dos aña largo. Na Gran Bretania, e organisadonan di un teleton masha grandi a keda bergonsa ora a sali na cla cu di e 6,5 miyon libra esterlina (mas o menos 10 miyon dollar Mericano) cu e publico a duna pa yuda traha luga pa muchanan huerfano na Rumania, ta 12 cas so nan a construi, anto cu material inferior, y centenares di miles di dollar a  disparce sin ningun splicacion. Informenan negativo manera esakinan corectamente a pone cu algun hende a bira mas cauteloso tocante e cantidad di placa cu nan ta duna y na ken.

Duna of No Duna

Sinembargo lo ta masha lamentabel si nos laga e actonan di algun individuo of institucion stroba nos di demostra nos interes y compasion sinsero pa otro hende. Bijbel ta bisa: “Esaki ta e religion puro y sin mancha den bista di nos Dios y Tata: bishita huerfano y biuda den nan afliccion.” (Santiago 1:27) Si, un parti integral di cristianismo ta demostra interes activo den hende pober y esnan cu ta den un situacion desfaborabel.

Apesar di esei lo bo por puntra bo mes: ‘Mi mester sigui haci donacion na institucionnan caritativo, of mi mester simplemente purba yuda hende door di duna nan regalo personalmente?’ Con Dios kier pa nos duna? E siguiente articulo lo trata e preguntanan aki.