Kimamento di Sencia Ta Aceptabel den Adoracion Berdadero?

“E DIOSNAN stima holo dushi.” Esei tawata un dicho conoci entre e Egipcionan di antiguedad. Pa nan, kimamento di sencia tawata un parti importante di nan adoracion. Door cu e Egipcionan tawata kere cu e diosnan tawata serca, nan a kima sencia tur dia na tempelnan y altarnan di cas y asta ora nan tawata haci negoshi. Otro nacionnan tambe tawatin custumbernan paresido.

Kico sencia ta? E ta ser traha di hars y gom aromatico, manera olivano y balsem. Hende ta mula esakinan te ora nan bira puiro y hopi biaha ta mescla nan cu substancianan manera specerij, casca di palo y flor, pa crea cierto fragancianan pa uzonan spesifico.

Den antiguedad sencia tawata un producto asina desea, y pesei balioso, cu su ingredientenan a bira articulonan comercial importante. Caravananan cu tawata biaha riba rutanan comercial a trece e ingredientenan for di paisnan leu. Kisas bo ta corda cu nan a bende Hose (Yosef), e yiu hoben di Yacob, cu comerciantenan Ismaelita. Esakinan tawata biniendo “for di Galad, [cu] nan camelnan carga cu specerij, balsem y mirra, cu nan tawata hiba Egipto.” (Genesis 37:25) E demanda pa sencia a bira asina grandi cu e ruta comercial di olivano, cu casi sigur bendedonan di sencia a inicia, a hiba na hopi biahamento entre Asia y Europa.

Te awe hende ta sende sencia durante ceremonia- y ritonan di hopi religion. Ademas, mas y mas hende ta dicidi di sende sencia na cas djis pa disfruta di su dushi aroma. Con cristiannan mester mira kimamento di sencia? Dios ta acept’e den adoracion? Laga nos analisa loke Bijbel tin di bisa riba e asunto.

‘Santo pa Yehova’

Bou di e Israelitanan di antiguedad, kimamento di sencia tawata hunga un papel prominente den e debernan sacerdotal na e tabernakel. E Cyclopedia di McClintock y Strong ta bisa: “Di berdad ta parce cu e kimamento di sencia serca e Hebreonan a ser considera asina tanto como un acto di adoracion of un ofrenda sagrado cu nos no ta lesa di ningun otro uzo di sencia serca nan cu no ta pa esaki.”

Yehova Dios a prescribi cuater ingrediente cu mester a mescla y kima na e tabernakel: “Cohe pa bo mes specerijnan, balsem, onicha y galbanum, specerijnan cu sencia puro; di tur, e mesun cantidad. Y di esaki bo mester traha sencia, un perfume, e obra di un trahado-di-perfume, sala, puro y santo. Y bati poco di dje haci fini-fini, y pone parti di dje dilanti di e testimonio den e tent di reunion.” (Exodo 30:34-36) Comentaristanan ta kere cu despues Hudiunan rabinico a agrega otro ingredientenan pa uza den tempel.

 E sencia cu nan a kima na e tabernakel tawata sagrado, uza exclusivamente den e adoracion di Dios. Yehova a manda: “E sencia cu bo traha, boso no mester traha di e mesun formula pa boso mes; e lo ta santo pa bo pa SEÑOR. Ken cu traha algo paresido, pa uza como perfume, mester wordo corta kita for di su pueblo.” (Exodo 30:37, 38) Sacerdotenan a kima sencia dos biaha pa dia riba un altar spesifico. (2 Cronicanan 13:11) Y riba Dia di Expiacion, e sumo sacerdote a kima sencia den e Santisimo.—Levitico 16:12, 13.

No ta tur ofrenda di sencia tawata aceptabel pa Dios. El a castiga personanan cu no tawata sacerdote pero cu arogantemente a ofrece sencia como si fuera nan ta sacerdote. (Numbernan 16:16-18, 35-40; 2 Cronicanan 26:16-20) E sencia cu e nacion Hudiu a ofrece tawata ofensivo pa Yehova ora cu na mesun tempo nan tawata participa den actonan di adoracion falso y yena nan man cu dramamento di sanger. Nan hipocresia a pone Yehova declara: “Sencia ta un abominacion pa mi.” (Isaias 1:13, 15) E Israelitanan a bira asina negligente pa cu e adoracion cu Yehova a prescribi, cu nan a sera e tempel y a bai kima sencia riba otro altar. (2 Cronicanan 28:24, 25) Añanan despues, nan a uza e sencia santo asta den adoracion degrada di diosnan falso. E practicanan ei a desgusta Yehova.—Ezekiel 16:2, 17, 18.

Sencia y e Prome Cristiannan

E pacto of aliansa di Lei, incluso e decreto sacerdotal di ofrece sencia santo, a termina ora Cristo a inaugura e aliansa nobo na aña 33 di nos era. (Colosensenan 2:14) No tin ningun caminda registra cu e prome cristiannan a kima sencia pa propositonan religioso. Relaciona cu esaki e Cyclopedia di McClintock y Strong ta bisa: “Ta sigur cu [e prome cristiannan] no a uza sencia. En realidad e uzo di dje tawata un indicacion di paganismo . . . Un par di pipita di sencia cu un deboto a benta riba un altar pagano tawata un acto di adoracion.”

E prome cristiannan tambe a nenga di kima sencia como reconocemento di e “dibinidad” di e emperado Romano, maske esei por a costa nan nan bida. (Lucas 4:8; 1 Corintionan 10:14, 20) Como cu den e tempo ei hende a uza sencia pa idolatria, ta di compronde cu e prome cristiannan no a participa ni sikiera den e comercio di sencia.

Kimamento di Sencia Awe

Con hende ta uza sencia awe? Den hopi iglesia di cristiandad, nan ta uza sencia den ceremonianan y liturgia. Serca Asiaticonan, hopi famia ta sende sencia na tempel of dilanti altar di cas pa honra nan diosnan y pa proteha nan defuntonan. Den servicionan religioso, nan a uza sencia pa huma luga, cura, purifica y proteha.

Resientemente, sencia a bolbe bira popular asta serca hende cu no ta sigui un religion. Tin di nan ta sende sencia ora nan ta medita.  Un manual ta sugeri pa uza sencia pa alcansa “nivelnan misterioso di conciencia” y “podernan special” mas aya di e mundo fisico. Pa haya solucion pa e problemanan di bida, e manual ta recomenda tambe ritonan di kimamento di sencia cu ta encera contacto cu “sernan sobrenatural.” Practicanan asina ta apropiado pa cristian?

Yehova rotundamente ta condena esnan cu ta purba mescla practicanan religioso falso cu adoracion puro. Apostel Pablo a cita e profecia di Isaias y a aplic’e na e cristiannan, animando nan pa keda liber di e influencia impuro di religion falso. El a skirbi: “Pesei, sali for di meimei di nan y separa boso mes, SEÑOR ta bisa. Y no mishi cu loke ta impuro; y lo Mi ricibi boso.” (2 Corintionan 6:17; Isaias 52:11) Cristiannan berdadero ta haci sigur di evita tur loke ta conecta cu adoracion falso of cu spiritismo.—Huan 4:24.

Pero, e echo cu hende ta uza sencia den ceremonianan religioso y den spiritismo ta nifica cu tur kimamento di sencia ta malo? No necesariamente. Kisas un persona ta desea di kima sencia como un fragancia den su cas, djis pa e disfruta di su dushi aroma. (Proverbionan 27:9) Asina mes, ora di dicidi si lo e kima sencia of no, un cristian mester considera algun factor. Por ehempel, otro hende den e area cu bo ta biba ta conecta uzo di sencia cu un practica religioso falso? Den bo comunidad, nan ta asocia sencia cu rito- of practicanan di spiritismo? Hende sa uz’e en general pa propositonan cu no ta religioso?

Si un persona scohe pa kima sencia, su decision mester tene cuenta cu tanto su propio consenshi como cu e sintimentonan di otro hende. (1 Corintionan 10:29) Den e caso aki, loke apostel Pablo a bisa e Romanonan ta aplica. El a skirbi: “Laga nos busca e cosnan cu ta trece pas y edificacion di otro. No destrui e trabou di Dios pa motibo di cuminda. Tur cos di berdad ta puro, ma nan ta malo pa e hende cu ta come y ta ofende otro. Ta bon pa no come carni ni bebe biña, of haci cualkier cos cu ta haci bo ruman trompica.”—Romanonan 14:19-21.

Oracionnan Cu Ta Prepara “Manera Sencia”

E ofrenda di sencia serca e Israelitanan tawata un bon simbolo di oracionnan cu Dios ta tende. Pesei e salmista David a canta na Yehova: “Laga mi oracion wordo poni bo dilanti manera sencia.”—Salmo 141:2.

Israelitanan fiel no a considera ofrenda di sencia como un rito sin nificacion. Nan tawata masha precis den prepara y kima sencia na e manera cu Yehova a prescribi. En bes di uza sencia literal, cristiannan djawe ta ofrece oracion cu ta refleha profundo aprecio y respet pa nos Tata celestial. Mescos cu e sencia cu a hole dushi cu e sacerdotenan di tempel tawata ofrece, e Palabra di Dios ta sigura nos: “Oracion di e rectonan ta [Yehova] su delicia.”—Proverbionan 15:8.

[Plachi na pagina 29]

E sencia cu nan a kima na e tabernakel y na e tempel tawata sagrado

[Plachi na pagina 30]

Kimamento di sencia en coneccion cu meditacion ta apropiado pa cristian?