“No Tene Miedo Ni Desmaya”

“No tene miedo ni desmaya. . . . SEÑOR ta cu boso.”—2 CRONICANAN 20:17.

1. Ki efecto terorismo tin riba hende, y pakico nan miedo ta comprendibel?

TERORISMO! E palabra so caba ta hinca miedo den curpa di hende, y pone nan sinti nan insigur y impotente. E ta lanta un sintimento mixto di teror, tristesa y rabia. Y e ta un palabra cu ta describi loke masha hende ta teme lo plaga humanidad pa hopi aña mas. E echo cu algun nacion pa hopi decada ta bringando terorismo den su varios formanan sin mucho exito ta base pa e miedo ei.

2. Con Testigonan di Yehova ta reacciona riba e problema di terorismo, y esei ta hiba na ki pregunta?

² No obstante, tin bon motibo pa carga speransa. Testigonan di Yehova cu ta predicando activamente den 234 pais y teritorio di e tera, tin un optimismo remarcabel. En bes di tene miedo cu nunca mas lo por elimina terorismo, nan tin confiansa cu esei lo sosode—anto pronto. Ta realistico pa nos tin e mesun optimismo aki? Ken lo por logra libra mundo di e plaga aki, y con esei lo por tuma luga? Siendo cu nos tur probablemente a yega di ser afecta di un of otro forma pa violencia, lo ta bon pa analisa ki base nos por tin pa e optimismo ei.

3. Kico ta e causanan di miedo, y kico a ser profetisa tocante nos tempo?

 ³ Awe, hende tin miedo y ta spanta pa varios motibo. Pensa riba e tantisimo hendenan cu no por percura pa nan mes mas debi na edad avansa, e personanan cu ta sufri di enfermedad incurabel cu ta caba cu nan, y e famianan cu ta lucha pa tene cabes riba awa. De echo, wak con insigur bida mes ta! Un momento pa otro nos por haya nos cu morto repentino debi na un accidente of un desaster cu ta pone fin na tur loke nos ta balora den bida. Tal miedo y ansiedad, hunto cu numeroso conflicto y decepcion cu nos ta haya nos cu ne, a haci nos tempo precisamente loke apostel Pablo a describi: “Sabi esaki, cu den e ultimo dianan temponan trabahoso lo bin. Pasobra hende lo ta stimado di nan mes, . . . sin amor, ireconsiliabel, cu mala lenga, sin dominio propio, grosero, odiado di loke ta bon.”—2 Timoteo 3:1-3.

4. Aunke cosnan ta pinta scur segun 2 Timoteo 3:1-3, ki aspecto positivo e pasashi aki ta presenta?

⁴ Aunke segun e pasashi aki cosnan ta pinta scur, toch e ta duna speransa. Ripara cu ta “den e ultimo dianan” di Satanas su mal sistema di cosnan lo mester presenta temponan trabahoso. Esaki ta nifica cu alivio ta dilanti porta y cu pronto e mundo malbado lo ser remplasa door di e Reino perfecto di Dios, pa cua Hesus a siña su siguidonan pidi. (Mateo 6:9, 10) E Reino ei ta e gobierno celestial di Dios cu segun profeta Daniel, “nunca lo no wordo destrui”, pero cu “lo garna y pone un fin na tur e reinonan [humano] aki, [y] e mes lo dura pa semper.”—Daniel 2:44.

Neutralidad Cristian Versus Terorismo

5. Con e nacionnan a reacciona resientemente riba e menasa di terorismo?

⁵ Pa hopi decada, actonan terorista a costa miles di bida. Specialmente despues di e atentadonan di 11 di september 2001 na New York y Washington, mundo completo a bira mucho mas conciente di e peliger aki. En bista di e magnitud y alcanse mundial di terorismo, nacionnan rond mundo a uni forsa mesora pa combatie. Por ehempel dia 4 di december 2001, segun informenan di medionan di comunicacion, “ministernan di asuntonan exterior di 55 pais Europeo, di Nort America y Asia central a adopta unanimamente un plan” prepara pa cordina nan esfuersonan. Un alto funcionario di Merca a elogia e accion aki como un “nivel nobo di impulso” na e esfuersonan pa combati terorismo. Diripiente, miyones di hende a haya nan mes envolvi den loke The New York Times Magazine a yama “cuminsamento di un bataya historico.” Ainda nos tin cu mira si cuanto exito e esfuersonan ei lo tin. Sinembargo, e repercucionnan di tal guera contra teror a lanta sintimentonan di miedo y temor den hopi hende, pero no den esnan cu ta confia den Yehova.

6. (a) Pakico algun hende kisas tin problema pa acepta e posicion cristian neutral cu Testigonan di Yehova ta tuma? (b) Ki ehempel relaciona cu actividad politico Hesus a pone pa su siguidonan?

⁶ Testigonan di Yehova ta bon conoci pa nan posicion neutral den asuntonan politico. Aunke mayoria hende talbes ta dispuesto pa acepta e posicion aki den tempo  di pas, nan ta bira menos tolerante ora surgi circunstancianan extraordinario. Hopi bes, e miedo y insiguridad cu guera ta causa ta lanta sintimento fuerte di nacionalismo. Door di esei kisas algun hende tin problema pa compronde con por tin personanan cu no ta dispuesto pa apoya movementonan nacional popular. No obstante, cristiannan berdadero sa cu nan tin cu obedece e mandamento di Hesus pa “no ta [parti] di mundo.” (Huan 15:19; 17:14-16; 18:36; Santiago 4:4) Esaki ta exigi pa nan keda neutral den asuntonan politico of social. Hesus mes a pone e ehempel corecto. En bista di su sabiduria perfecto y habilidadnan sobresaliente, e por a duna un bon contribucion na e asuntonan humano di su tempo. Pero el a nenga di drenta politica. Na cuminsamento di su ministerio, el a rechasa redondamente e oferta di Satanas pa e haya tur e reinonan di mundo. Mas despues, sin bira rond, el a evita cu nan a scoh’e pa un encargo politico.—Mateo 4:8-10; Huan 6:14, 15.

7, 8. (a) E echo cu Testigonan di Yehova ta neutral den asuntonan politico, kico esei no kiermen, y pakico no? (b) Con Romanonan 13:1 y 2 ta exclui cualkier participacion den actividadnan violento contra gobiernonan?

⁷ E posicion neutral cu Testigonan di Yehova ta tuma no kiermen cu nan ta apoya of hustifica actonan di violencia. Sino ta con nan lo por pretende cu nan ta sirbido di “e Dios di amor y di pas”? (2 Corintionan 13:11) Nan a siña kico Yehova ta pensa di violencia. E salmista a skirbi: “SEÑOR ta pone e husto y e malbado na prueba, ma esun cu ta gusta violencia su alma ta odia.” (Salmo 11:5) Tambe nan ta conciente di loke Hesus a bisa apostel Pedro: “Pone bo spada bek na su luga; pasobra tur esnan cu saca spada lo perece pa medio di spada.”—Mateo 26:52.

⁸ Aunke historia ta mustra bon cla con hopi bes cristiannan falso a uza “spada”, esei no ta e caso cu Testigonan di Yehova. Nan ta abstene nan mes di tur e actividadnan ei. E Testigonan ta obedece fielmente e mandamento di Romanonan 13:1 y 2: “Laga tur hende somete nan mes na e autoridadnan cu ta goberna. Pasobra no tin autoridad cu no ta di Dios, y esnan cu ta existi, ta Dios a establece nan. Pesei, esun cu resisti autoridad a opone e ordenansa di Dios; y esnan cu opon’e lo ricibi condenacion riba nan mes.”

9. Den ki dos maneranan Testigonan di Yehova ta combati terorismo?

⁹ Pero ya cu terorismo ta asina malo, Testigonan di Yehova no mester haci algo pa yuda combatie? Si, nan mester haci algo, y ta loke nan ta haci tambe. Na prome luga, nan mes no ta participa den ningun di e actividadnan ei. Di dos, nan ta siña hende e principionan cristian cu si nan aplica nan, lo por elimina violencia den tur su formanan. * Aña pasa, e Testigonan a dedica 1.202.381.302 ora na yuda hende siña tocante e manera di biba cristian aki. Nan no a tira nan tempo afo, ya cu como resultado di e actividad aki, 265.469 persona a batisa como Testigo di Yehova, mustrando asina publicamente cu nan ta rechasa violencia categoricamente.

10. Ki posibilidad tin pa elimina violencia den e mundo djawe?

¹⁰ Ademas, Testigonan di Yehova ta reconoce cu riba nan mes, hamas nan lo por caba cu maldad. Pesei nan ta pone nan confiansa total den esun cu si por: Yehova Dios. (Salmo 83:18, NW) Apesar di hende su esfuerso sinsero, nan no por pone fin na violencia. E escritor inspira di Bijbel a spierta nos adelanta tocante nos tempo, “e ultimo dianan”, y a bisa: “Hendenan malbado y gañadonan lo bai di malo pa piyo, gañando y siendo gaña.” (2 Timoteo 3:1, 13) Mira for di e punto di  bista aki, e posibilidadnan pa hende gana e bataya contra maldad no ta dje faborabel ei. Di otro banda, nos por confia cu Yehova lo elimina violencia totalmente y permanentemente.—Salmo 37:1, 2, 9-11; Proverbionan 24:19, 20; Isaias 60:18.

Sin Temor Apesar di un Atake Inminente

11. Ki pasonan Yehova a dal caba pa elimina violencia?

¹¹ Ya cu e Dios di pas ta odia violencia, nos por compronde pakico El a dal e pasonan inicial pa destrui su causa basico, Satanas e Diabel. De echo, ya caba El a pone Satanas sufri un derota humiliante na man di Miguel e arcangel, cu ta Cristo Hesus, Dios su Rei resien entronisa. Bijbel ta describi e suseso cu e palabranan aki: “Tawatin guera den shelo, Miguel y su angelnan tawata haci guera contra e dragon. Y e dragon y su angelnan tawata haci guera, y nan no a prevalece, y no tawatin luga mas pa nan den shelo. Y e gran dragon a wordo tira abou, e colebra di antiguedad, kende ta wordo yama Diabel y Satanas, kende ta gaña henter mundo; el a wordo tira abou riba tera, y su angelnan a wordo tira abou hunto cu ne.”—Revelacion 12:7-9.

12, 13. (a) Kico ta notabel tocante e aña 1914? (b) Kico e profecia di Ezekiel ta pronostica pa loke ta esnan cu ta respalda e Reino di Dios?

¹² Bijbel su conteo di tempo combina cu susesonan di mundo ta indica cu ta na aña 1914 e guera ei a tuma luga den shelo. Desde e tempo ei, condicionnan di mundo a empeora gradualmente. Revelacion 12:12 ta splica pakico, bisando: “Pa e motibo aki, regociha, o shelonan y boso cu ta biba den nan. Ai di tera y lama, pasobra Diabel a baha bin serca boso cu gran furia, sabiendo cu ta ked’e solamente un poco tempo mas.”

¹³ Ta di compronde cu e furia di Diabel ta dirigi principalmente contra Dios su adoradonan ungi y nan compañeronan cu ta forma e “otro carnenan.” (Huan 10:16; Revelacion 12:17) Pronto e oposicion aki lo alcansa su culminacion ora Diabel lansa un atake intenso contra tur hende cu ta apoya e Reino estableci di Dios y cu ta pone nan confiansa den dje. Ezekiel capitulo 38 ta referi na e atake total aki como un atake cu “Gog di tera di Magog” lo lansa.

14. Ki proteccion Testigonan di Yehova a yega di haya den pasado, y esaki lo ta semper e caso?

¹⁴ For di dia cu Satanas a ser saca for di shelo, tawatin algun ocasion cu cierto elementonan politico, describi den idioma simbolico na Revelacion 12:15 y 16, a brinda e pueblo di Dios proteccion contra e atakenan di Satanas. Na contraste, Bijbel ta indica cu durante e atake final di Satanas, ningun agencia humano lo sali na defensa di esnan cu ta pone nan confiansa den Yehova. Esaki mester hinca miedo y spanto den curpa di cristiannan? Lubida!

15, 16. (a) Ki motibo pa optimismo e garantia cu Yehova a duna su pueblo den tempo di Josafat ta duna cristiannan awe? (b) Ki patronchi Josafat y e pueblo a establece pa sirbidonan di Dios awe?

¹⁵ Dios lo respalda su pueblo mescos cu El a apoya su nacion tipico den tempo di Rei  Josafat. Bijbel ta bisa: “Scucha, henter Huda y habitantenan di Herusalem y Rei Josafat: Asina SEÑOR ta bisa boso: ‘No tene miedo ni desmaya pa motibo di e multitud grandi aki, pasobra e bataya no ta di boso, ma di Dios. . . . Boso no tin mester di bringa den e bataya aki; staciona boso mes, para y mira e salbacion di SEÑOR na boso fabor, o Huda y Herusalem. No tene miedo ni desmaya; sali mañan pa enfrenta nan, pasobra SEÑOR ta cu boso.’”—2 Cronicanan 20:15-17.

¹⁶ Yehova a garantisa e pueblo di Huda cu nan no tawatin nodi bringa. Mescos tambe, ora Gog di Magog ataca e pueblo di Dios, nan lo no cohe arma pa defende nan curpa. Mas bien, nan lo “para y mira e salbacion di SEÑOR” na nan fabor. Claro cu e echo cu nan ta para mira no ta nifica cu nan ta completamente inactivo, mescos cu e pueblo di Dios den tempo di Josafat no tawata totalmente inactivo. Nos ta lesa: “Y Josafat a baha su cabes cu su cara te na suela, y henter Huda y e habitantenan di Herusalem a tira nan curpa abou dilanti di SEÑOR, y a adora SEÑOR. . . . Y ora cu [Josafat] a consulta cu e pueblo, el a apunta esnan cu tawata canta na SEÑOR y esnan cu tawata alab’e bisti na paña santo, mientras cu nan tawata sali dilanti di e ehersito, bisando: ‘Duna danki na SEÑOR, pasobra su misericordia ta pa semper.’” (2 Cronicanan 20:18-21) Si, asta ora nan a haya nan confronta cu atake di enemigo, e pueblo a sigui alaba Yehova activamente. Esaki ta establece e patronchi cu Testigonan di Yehova mester sigui ora Gog lansa su atake contra nan.

17, 18. (a) Relaciona cu e atake di Gog, ki actitud positivo Testigonan di Yehova tin? (b) Ki recordatorio hobennan cristian a haya resientemente?

¹⁷ Te cu e tempo ei—y asta despues cu e atake di Gog cuminsa—Testigonan di Yehova lo sigui duna nan apoyo na e Reino di Dios. Nan lo sigui haya forsa y proteccion den nan asociacion cu e mas di 94.600 congregacionnan rond mundo. (Isaias 26:20) Aworaki ta tempo oportuno pa alaba Yehova cu curashi! Biba den expectativa di e benidero atake di Gog no ta pone nan hala atras di miedo. Al contrario, e ta anima nan pa aumenta nan sacrificio di alabansa te caminda ta rasonablemente posibel.—Salmo 146:2.

¹⁸ Miles di hoben rond mundo cu a cuminsa e sirbishi di tempo completo a echt demostra  e actitud positivo aki. E tratado Hoben—Kico Lo Bo Haci cu Bo Bida? presenta na e congreso di districto di 2002 a resalta con superior e curso di bida aki ta. Cristiannan, hoben y bieu, ta gradicido pa e recordatorionan oportuno aki.—Salmo 119:14, 24, 99, 119, 129, 146.

19, 20. (a) Pakico cristiannan no tin nodi spanta ni tene miedo? (b) Kico e siguiente articulo di studio lo mustra nos?

¹⁹ Apesar di condicionnan di mundo, cristiannan no tin nodi spanta ni desmaya di miedo. Nan sa cu pronto e Reino di Yehova lo elimina tur forma di violencia di unabes pa semper. Tambe nan ta haya consuelo den e echo cu e resureccion lo permiti hopi hende cu a perde nan bida door di violencia bolbe bek na bida. Aunke esaki lo duna algun di nan nan prome oportunidad pa siña tocante Yehova, lo e permiti otronan sigui cu nan bida di sirbishi dedica na dje.—Echonan 24:15.

²⁰ Como cristiannan berdadero, nos sa cu nos tin cu keda neutral y nos ta determina pa haci esei. Nos kier tene firme na e speransa maraviyoso di por “para y mira e salbacion di SEÑOR.” E siguiente articulo lo fortalece nos fe door di haci nos conciente di susesonan actual cu pocopoco pero sigur ta yuda nos compronde con profecia di Bijbel ta cumpli.

[Nota]

Bo Por Splica?

• Pakico hopi hende ta asina pesimista awe?

• Pakico Testigonan di Yehova ta optimista tocante futuro?

• Kico Yehova a haci caba tocante e causa di tur violencia?

• Pakico nos no tin nodi tene miedo di e atake di Gog?

[Preguntanan di Estudio]

[Roconocemento di plachi na pagina 12]

UN PHOTO 186226/M. Grafman

[Plachi na pagina 13]

Hesus a pone e ehempel corecto pa cristiannan keda neutral

[Plachi na pagina 16]

Miles di hoben Testigo cu un curason contento a cuminsa e sirbishi di tempo completo