Para y Mira e Salbacion di Yehova!

“Staciona boso mes, para y mira e salbacion di SEÑOR na boso fabor.” —2 CRONICANAN 20:17.

1, 2. Pakico e atake inminente di parti di “Gog di tera di Magog” lo tin un mayor impacto cu e menasa di terorismo internacional?

ALGUN hende a yega di describi terorismo como un atake contra comunidad mundial y asta contra civilisacion mes. Ta di compronde cu mester tuma un menasa asina masha na serio. Di otro banda, tin un otro atake cu lo tin consecuencia asta mas grandi ainda, uno cu comunidad mundial ta duna masha poco atencion na dje. Otronan no ta worry mes cu ne. Kico esei ta?

² Esei ta e atake di “Gog di tera di Magog”, cu Bijbel ta papia di dje den Ezekiel capitulo 38. Ta un exageracion pa bisa cu e atake aki lo tin un mayor impacto cu e menasa di terorismo internacional? No, pasobra e atake di Gog ta mas cu un atake contra gobiernonan humano. E ta un atake contra e gobierno celestial di Dios! Sinembargo, distinto di hende  cu kisas no por haci mucho cos ora nan ser ataca, e Creador si ta completamente capas pa contraresta e atake mas feros di Gog.

Un Atake Contra e Gobierno di Dios

3. Kico gobernantenan mundial a ser invita pa haci desde 1914, y con nan a responde?

³ E conflicto entre Dios su Rei cu aworaki ta na mando y Satanas su mundo malbado a cuminsa for di dia cu e Reino di Dios a ser estableci den shelo na 1914. E tempo ei a notifica gobernantenan humano pa somete nan mes na e Gobernante escohi di Dios. Pero, manera a ser profetisa, nan a nenga di haci esei: “E reinan di mundo ta tuma nan posicion y e gobernantenan ta consulta hunto contra SEÑOR y contra su ungi, bisando: ‘Laga nos kibra nan cadenanan y tira nan cabuyanan for di nos!’” (Salmo 2:1-3) Tur cos ta mustra cu e resistencia contra e gobernacion di Reino lo alcansa su culminacion durante e atake di parti di Gog di Magog.

4, 5. Con hende por bringa contra e gobierno celestial invisibel di Dios?

⁴ Talbes bo ta puntra bo mes con hende por bringa contra un gobernacion celestial invisibel. E gobernacion aki, manera Bijbel ta revela, ta consisti di “144.000 [persona] cu a wordo cumpra for di tera”, hunto cu “e Lamchi”, Cristo Hesus. (Revelacion 14:1, 3; Huan 1:29) Door cu nan ta den shelo, Bijbel ta yama e gobierno nobo e “shelonan nobo”, mientras cu su subditonan riba tera ta ser yama logicamente “un tera nobo.” (Isaias 65:17; 2 Pedro 3:13) Mayoria di e 144.000 cogobernantenan cu Cristo ya caba a finalisa  nan bida riba tera fielmente. Di e manera ei nan a demostra cu nan ta digno pa tuma nan asignacion di sirbishi nobo den shelo.

⁵ Sinembargo, ainda a sobra un resto chikito di e 144.000 riba tera. Di e mas cu 15.000.000 personanan cu a asisti na e celebracion di e Cena di Señor na 2002, solamente 8.760 a expresa e speransa cu nan a ser escohi pa e asignacion celestial aki. Ken cu ta tribi di ataca e sobra prospectivo miembronan di e Reino en realidad ta atentando contra e Reino di Dios.—Revelacion 12:17.

E Rei Ta Completa Su Victoria

6. Con Yehova y Cristo ta mira e oposicion dirigi contra e pueblo di Dios?

⁶ Bijbel ta profetisa con Yehova ta reacciona riba e oposicion contra su Reino estableci: “Esun cu ta sinta den e shelonan ta hari; Señor ta haci bofon di nan. Anto E lo papia cu nan den su rabia y terorisa nan den su furia: ‘Ma pa loke ta ami, Mi a establece mi rei riba Sion, mi sero santo.’” (Salmo 2:4-6) Awor a yega e tempo pa Cristo, bou di direccion di Yehova, “completa su victoria.” (Revelacion 6:2, NW) Con Yehova ta mira e oposicion dirigi contra su pueblo durante e tempo di conkista final aki? Yehova ta mira esei como si fuera dirigi contra dje y contra su Rei na mando. “Esun cu mishi cu boso ta mishi cu [“mi”, NW] pret’i wowo”, Yehova ta bisa. (Zacarias 2:8) Y Hesus a declara enfaticamente cu e ta conta loke hende haci of laga di haci cu su rumannan ungi como si fuera nan a haci of laga di haci cu ne.—Mateo 25:40, 45.

7. Pa ki motibonan e miembronan di e “multitud grandi”, describi na Revelacion 7:9, ta experencia e furia di Gog?

⁷ Claro cu esnan cu ta apoya e resto ungi activamente tambe lo sinti e furia di Gog. E futuro miembronan aki di Dios su “tera nobo”, ta “un multitud grandi” yama for “di tur nacion y tur tribu y pueblo y lenga.” (Revelacion 7:9) Bijbel ta bisa cu nan ta “para dilanti di e trono y dilanti di e Lamchi, bisti na paña blanco.” Pues nan tin un posicion aproba dilanti Dios y dilanti Cristo Hesus. Cu “rama di palma den nan man”, nan ta aclama Yehova como Soberano legitimo di universo, kende su gobernacion a ser expresa mediante e reinado di su Rei entronisa, Hesucristo, “e Lamchi di Dios.”—Huan 1:29, 36.

8. Kico e atake di Gog lo pone Cristo haci, y cu ki resultado?

⁸ E atake di Gog lo pone e Rei entronisa di Dios drenta accion y bringa e guera di Armagedon. (Revelacion 16:14, 16) Esnan cu a nenga di reconoce e soberania di Yehova lo ser destrui. Di otro banda, esnan cu a wanta afliccion of tribulacion pa motibo di nan lealtad na e Reino di Dios lo haya alivio permanente. Relaciona cu esaki, apostel Pablo  a skirbi: “Esaki ta un indicacion bon cla di e huicio husto di Dios, pa boso wordo considera digno di e reino di Dios, pa cual di berdad boso ta sufri. Pasobra ta husto dilanti di Dios pa paga cu afliccion esnan cu ta aflihi boso, y pa duna alivio na boso cu ta wordo aflihi y na nos tambe ora Señor Hesus wordo manifesta for di shelo cu su angelnan poderoso den candela tur na vlam, pa duna pago mereci na esnan cu no conoce Dios y na esnan cu no ta obedece e evangelio di nos Señor Hesus.”—2 Tesalonicensenan 1:5-8.

9, 10. (a) Con Yehova a duna Huda e victoria riba un enemigo formidabel? (b) Kico cristiannan djawe mester sigui haci?

⁹ Durante e benidero tribulacion cu ta culmina na Armagedon, Cristo lo bataya contra tur maldad. Pero su siguidonan lo no tin nodi bringa, mescos cu mas cu 2.900 aña pasa Huda su habitantenan di e reino di dos tribu no tawatin nodi bringa. E bataya a pertenece na Yehova, y E a duna e victoria. E relato ta bisa: “SEÑOR a prepara atakenan di sorpresa contra e yiu hombernan di Amon, Moab y Sero Seir, kendenan a bin contra Huda; asina nan a wordo derota. Pasobra e yiu hombernan di Amon y Moab a lanta contra e habitantenan di Sero Seir y a destrui nan completamente, y ora nan a caba cu e habitantenan di Seir, nan a yuda destrui otro. Ora Huda a yega na e toren di vigilancia den desierto, nan a wak den direccion di e multitud; y mira, nan tur tawata cadaver benta na suela; y ningun hende no a scapa.”—2 Cronicanan 20:22-24.

¹⁰ Tawata exactamente manera Yehova a profetisa: “Boso no tin mester di bringa.” (2 Cronicanan 20:17) Esaki ta establece e patronchi pa cristiannan sigui ora Hesucristo drenta accion “pa completa su victoria.” Mientrastanto, nan ta sigui lucha contra maldad, no cu arma carnal, sino spiritual. Di e forma ei nan ta sigui “vence malo cu bon.”—Romanonan 6:13; 12:17-21; 13:12; 2 Corintionan 10:3-5.

Ken Lo Dirigi e Atake di Gog?

11. (a) Ki elementonan Gog lo uza pa realisa su atake? (b) Kico ta encera keda spiritualmente alerta?

¹¹ Gog di Magog ta ser identifica como Satanas e Diabel den su posicion degrada desde 1914. Como un criatura spiritual, e mes no por ataca directamente, pero lo e uza elementonan humano pa realisa su atakenan. Ken e elementonan humano aki lo ta? Bijbel no ta duna nos detaye, pero si e ta duna nos cierto indicacion cu por yuda nos identifica ken  esakinan lo ta. Segun cu susesonan di mundo ta cumpli cu profecia di Bijbel, nos lo haya gradualmente un cuadro mas cla. E pueblo di Yehova ta evita speculacion pero ta keda spiritualmente alerta, plenamente conciente di desaroyonan politico y religioso cu ta cuadra cu e profecianan di Bijbel cu mester cumpli.

12, 13. Con profeta Daniel a predeci un atake final riba e pueblo di Dios?

¹² Profeta Daniel ta revela mas informacion tocante un atake final contra e pueblo di Dios, skirbiendo: “Cu gran furia e [rei di nort] lo sali pa destrui y caba cu hopi hende. Y e lo lanta su tentnan real entre e lamanan y e bunita sero santo.”—Daniel 11:44, 45.

¹³ Den contexto di Bijbel, “e lama” tawata Lama Grandi, of Lama Mediteraneo, y “e sero santo” tawata Sion, di cua Yehova a bisa: “Mi a establece mi rei riba Sion, mi sero santo.” (Salmo 2:6; Hosue 1:4) Pues den un sentido spiritual, e tera “entre e lama y e bunita sero santo” ta representa e tereno di actividad spiritual prospero di e cristiannan ungi. Ya nan no ta ser identifica mas cu e lama di humanidad aleha for di Dios, y nan ta anhela pa goberna cu Cristo Hesus den e Reino celestial. Claramente, e sirbidonan ungi di Dios, hunto cu nan compañeronan leal di e multitud grandi, lo ta e blanco di e rei di nort ora e lansa su atake feros na cumplimento di e profecia di Daniel.—Isaias 57:20; Hebreonan 12:22; Revelacion 14:1.

Con e Sirbidonan di Dios Lo Reacciona?

14. Kico ta e tres cosnan cu e pueblo di Dios lo haci ora nan ser ataca?

¹⁴ Kico sirbidonan di Dios lo tin cu haci ora nan ser ataca? Un biaha mas e reaccion di e nacion tipico di Dios den e tempo di Josafat ta establece e patronchi. Tuma nota cu su ciudadanonan mester a haci tres cos: (1) staciona nan mes, (2) keda para y (3) mira e salbacion di Yehova. Con e pueblo di Dios lo actua awe na harmonia cu e palabranan aki?—2 Cronicanan 20:17.

15. Kico kiermen cu e pueblo di Yehova ta staciona nan mes?

¹⁵ Staciona nan mes: Sin basila, e pueblo di Dios lo sigui staciona of posiciona nan mes activamente na banda di e Reino di Dios. Nan lo sigui mantene nan posicion neutral como cristian. Nan lo ta “firme, constante” den nan sirbishi leal na Yehova y lo sigui alaba Yehova publicamente pa su misericordia y bondad amoroso. (1 Corintionan 15:58; Salmo 118:28, 29) Ningun presion actual ni den futuro por sagudi nan for di e posicion aki aproba pa Dios.

16. Den ki sentido Yehova su sirbidonan lo keda para?

¹⁶ Keda para: Yehova su sirbidonan lo no purba salba nan mes sino lo pone nan confiansa absoluto den dje. Ta Yehova so por rescata su sirbidonan for di caos mundial, y el a priminti di haci esei. (Isaias 43:10, 11; 54:15; Lamentacionnan 3:26) Confia den Yehova ta nifica entre otro confia den e canal visibel cu E ta uzando pa mas cu 100 aña caba den e era aki pa sirbi su proposito. Manera nunca prome, cristiannan berdadero lo tin cu pone nan confiansa den e rumannan cu Yehova a autorisa y den su Rei na mando pa hiba delantera. E hombernan fiel aki lo dirigi e pueblo di Dios. Lo por ta fatal pa esun cu ta rechasa nan guia.—Mateo 24:45-47; Hebreonan 13:7, 17.

17. Pakico e fiel sirbidonan di Dios lo mira e salbacion di Yehova?

 ¹⁷ Mira e salbacion di Yehova: Salbacion lo ta e recompensa pa tur esnan cu ta mantene nan integridad como cristian y cu ta confia den Yehova pa libra nan. Te na e ora final—y te caminda nan por—nan lo anuncia e yegada di e dia di Yehova su huicio. Henter creacion mester sa cu Yehova ta e Dios berdadero y cu E tin sirbidonan fiel riba tera. Nunca mas no tin nodi lanta un controversia largo riba e legitimidad di Yehova su soberania.—Ezekiel 33:33; 36:23.

18, 19. (a) Con e cantica di victoria den Exodo capitulo 15 ta refleha e sintimentonan di esnan cu lo sobrevivi e atake di Gog? (b) Ta na su luga pa e pueblo di Dios haci kico awor?

¹⁸ Cu energia renoba, e pueblo di Dios lo drenta den e mundo nobo, ancioso pa canta un cantica di victoria, mescos cu e Israelitanan di antiguedad a canta despues cu nan a ser libra pasando door di Lama Cora. Semper gradicido na Yehova pa e proteccion cu El a brinda nan personalmente y como pueblo, nan lo resona e palabranan di hopi tempo pasa: “Lo mi canta na SEÑOR, pasobra E ta grandemente halsa. . . . SEÑOR ta un guerero; [Yehova] ta su nomber. . . . Bo man drechi, o SEÑOR, ta kibra e enemigo na pida-pida. Y den e grandesa di bo excelencia Bo ta derota esnan cu lanta contra Bo; Bo ta manda bo rabia ardiente, y esei ta caba cu nan manera bagas. . . . Den bo misericordia Bo a guia e pueblo cu Bo a redimi; den bo fortalesa Bo a guia nan na bo habitacion santo. . . . Abo lo hiba nan y planta nan den e sero di bo herencia, e luga, o SEÑOR, cu abo a traha como bo luga di biba, e santuario, o SEÑOR, cu bo mannan a establece. SEÑOR lo reina pa semper y semper.”—Exodo 15:1-19.

¹⁹ Awor cu e posibilidad di haya bida eterno ta mas bisto cu nunca prome, ta un tempo oportuno pa e sirbidonan di Dios demostra nan debocion na Yehova y renoba nan determinacion pa sirbie como nan Rei eterno!—1 Cronicanan 29:11-13.

Bo Por Splica?

• Pakico e atake di Gog lo ta dirigi contra e unginan y e otro carnenan?

• Con e pueblo di Dios lo staciona nan mes?

• Kico kiermen cu nan lo keda para?

• Con e pueblo di Dios lo mira e salbacion di Yehova?

[Preguntanan di Estudio]

[Plachi na pagina 18]

Yehova a duna Josafat y su pueblo e victoria, sin cu nan tawatin nodi bringa

[Plachi na pagina 20]

E unginan y e otro carnenan ta yuda sostene e soberania di Yehova

[Plachi na pagina 22]

Mescos cu e Israelitanan di antiguedad, e pueblo di Dios pronto lo canta un cantica di victoria