Pregunta di Lector

Ta robes pa laga mata un bestia di cas cu ta hopi malo of bieu?

Mayoria hende ta considera varios bestia interesante y como algo cu ta duna nan goso. Algun bestia di cas ta bon compaño como mascota. Por ehempel, ta conoci cu cacho ta fiel na nan doño y ta pega masha na nan. Pesei ta di compronde cu hende ta pega nan curason na un bestia asina, specialmente si nan tine pa hopi aña.

Sinembargo, mayoria bestia di cas no ta biba masha largo. Cacho y kisas pushi tambe, ta biba un 10 pa 15 aña, dependiendo di nan rasa. Den nan biehes, bestianan di cas por sufri di malesa y incapasidad cu ta haci nan doño tristo, specialmente door cu nan ta corda con e bestianan aki tawata tempo cu nan tawata mas jong y bibito. Lo ta algo malo si bo libra e bestianan aki di nan miseria door di laga mata nan?

Un cristian lo kier actua na harmonia cu e boluntad di Dios ora e ta trata cu bestia. Trato cruel sigur ta contra e boluntad di Dios, pasobra su Palabra ta bisa: “Un hende husto ta cuida bida di su bestia.” (Proverbionan 12:10) Sinembargo, esaki no kiermen cu Dios ta mira bestia mescos cu e ta mira hende. Ora Dios a crea hende, El a mustra cu lo tawatin un distincion bon cla entre hende y bestia. Por ehempel, El a duna hende e speransa di bida eterno, pero nunca E no a ofrece e speransa aki na bestia. (Romanonan 6:23; 2 Pedro 2:12) Siendo cu E ta e Creador, E tin derecho di determina kico ta e relacion apropiado entre hende y bestia.

Genesis 1:28 ta conta nos ki relacion esei ta. Dios a bisa e prome hendenan: “Goberna riba e piscanan di lama y riba e paranan di shelo, y riba tur ser bibo cu ta move riba tera.” Asina tambe Salmo 8:6-8 ta bisa: “[Dios] a pone tur cos bou di [hende] su pia, tur carne y baca, y tambe e bestianan di mondi, e parhanan di shelo y e piscanan di lama.”

Dios a duna di compronde bon cla cu hende por a uza bestia debidamente y mata nan. Por ehempel, nan por a uza nan cuero pa traha bisti. Despues di e Dilubio di dia di Noe, Dios a duna permit tambe pa hende come carni di bestia, y asina suplementa e dieta di berdura cu nan a ricibi originalmente.—Genesis 3:21; 4:4; 9:3.

Pero esaki no ta duna lus berde na hende pa mata bestia pa loco, djis pa sport. Na Genesis 10:9, Bijbel ta describi Nimrod como “un yagdo poderoso dilanti di SEÑOR.” Den e idioma original, e expresion “dilanti di SEÑOR” ta duna e idea di “contra”, “na oposicion” cu Yehova (NW).

Pues, maske hende tin dominio riba bestia, e no mag abusa di e autoridad ei, sino mas bien mester uz’e na harmonia cu e principionan di e Palabra di Dios. Esaki lo por encera cu bo no ta laga un bestia di cas sufri innecesariamente debi na biehes, lesion grave of malesa fatal. Den un caso asina, ta e cristian mester dicidi kico pa haci. Si e dicidi cu lo ta un muestra di misericordia pa no laga un bestia sigui sufri sin ningun speransa di recuperacion, e por scohe pa laga mat’e.