Siña e Secreto di Keda Contento cu Loke Bo Tin

Den un carta animante na e cristiannan di Filipos, apostel Pablo a skirbi: “Mi a siña di ta contento den ki circunstancia cu mi haya mi aden. . . . Den cualkier y den tur circunstancia mi a siña e secreto di ta bariga yen y di pasa hamber, tanto di tin abundancia como di pasa necesidad.”—Filipensenan 4:11, 12.

Pablo tawata contento cu loke e tawatin. Kico tawata su secreto? Teniendo cuenta cu e costo di bida halto y e instabilidad economico di nos tempo, sigur lo ta bon pa cristiannan berdadero siña con nan por keda contento cu loke nan tin pa asina nan por keda enfoca riba nan sirbishi na Dios.

MAS prome den su carta, Pablo a describi e carera exitoso cu antes e tawatin. El a bisa: “Si algun otro hende ta kere di por pone confiansa den e carni, ami mucho mas: sircuncida riba e di ocho dia, di e nacion di Israel, di e tribu di Benjamin, un Hebreo di Hebreonan; encuanto lei, un Farizeo; encuanto celo, un persiguido di iglesia; encuanto e husticia cu tin den lei, sin culpa.” (Filipensenan 3:4-6) Ademas, como un Hudiu fanatico, Pablo a haya autoridad y tambe respaldo serca e sacerdotenan principal na Herusalem. Tur esaki a indica cu den futuro lo e tawatin poder y prestigio riba tereno politico, religioso y sin duda tambe financieramente den e sistema Hudiu.—Echonan 26:10, 12.

Sinembargo, ora Pablo a bira un predicado cristian celoso, cosnan a cambia drasticamente. Pa causa di e bon nobo e tawata dispuesto pa bandona su carera exitoso y tur loke anteriormente tawata importante. (Filipensenan 3:7, 8) Con e mester a percura pa su mes awor? Lo el a ricibi un salario como predicado? Con e por a satisface su necesidadnan personal?

Pablo a efectua su ministerio sin ricibi pago. Pesei, pa e no tawata un carga pa esnan cu e tawata sirbi, el a join Akila y Pricila den e trabou di traha tent ora e tawata na Corinto, y tambe el a haci otro cosnan pa sostene su mes. (Echonan 18:1-3; 1 Tesalonicensenan 2:9; 2 Tesalonicensenan 3:8-10) Pablo a haci tres biahe largo como misionero, y tambe el a biaha pa bishita e congregacionnan cu tawatin mester di un bishita. Door cu e tawata completamente ocupa cu e sirbishi di Dios, e no tawatin mucho pertenencia material. Normalmente e rumannan tawata percura pa su necesidadnan. Pero debi na circunstancianan dificil a yega di sosode cu el a hay’e den necesidad. (2 Corintionan 11:27; Filipensenan 4:15-18) Toch, nunca Pablo a keha tocante su situacion  penoso, ni e no a cudisha loke otronan tawatin. E tawata dispuesto y contento pa traha na beneficio di su compañeronan cristian. De echo, ta Pablo ta esun cu a cita e palabranan bon conoci di Hesus: “Ta mas bendiciona pa duna cu pa ricibi.” Esta un excelente ehempel pa nos!—Echonan 20:33-35.

Kico Kiermen Contenta Bo Mes cu Loke Bo Tin

E factor principal cu a contribui na Pablo su felicidad y satisfaccion ta e echo cu e tawata contento cu loke e tawatin. Kico esei ta nifica? Cu palabranan simpel, e ta nifica keda contento cu e cosnan basico. Relaciona cu esaki, Pablo a bisa su compañero di sirbishi Timoteo: “Ma di berdad, santidad acompaña pa contentamento [“keda contento cu loke bo tin”, NW] ta di gran ganashi. Pasobra nos no a trece nada den mundo, y nos no por hiba nada for di dje tampoco. Y si nos tin cuminda y paña pa bisti, cu esakinan nos mester ta contento.”—1 Timoteo 6:6-8.

Tuma nota cu Pablo a relaciona contentamento cu santidad of debocion na Dios. El a reconoce cu berdadero felicidad no ta bini door di pertenencianan material of rikesa, sino door di debocion na Dios, cu ta nifica pone e sirbishi na Dios na prome luga. Pa Pablo, “cuminda y paña pa bisti” tawata simplemente medionan pa yud’e sigui cu su debocion na Dios. Pues Pablo por a keda contento cu loke e tawatin door di depende riba Yehova, sin importa ki circunstancia e haya su mes aden.

Hopi hende awe ta yen di ansha y infelis pasobra nan no conoce e secreto aki of nan ta ignor’e. En bes di siña contenta nan cu loke nan tin, nan ta prefera di pone nan confiansa den placa y loke placa por cumpra. E industria di propaganda y medionan di comunicacion ta  laga hende sinti cu nan no ta felis si nan no por dispone mesora di e producto- y aparatonan di mas moderno y caro. Consecuentemente, hopi di nan ta bira victima di e coremento tras di placa y cosnan material. En bes di haya felicidad y satisfaccion, nan ta “cai den tentacion y den trampa y den hopi deseonan loco y dañino, cuanan ta hundi hende den ruina y destruccion.”—1 Timoteo 6:9, 10.

Nan A Siña e Secreto

Ta realmente posibel pa haya felicidad y satisfaccion awendia door di hiba un bida di contentamento y debocion na Dios? Si, ta posibel. De echo, awendia tin miyones di hende ta biba precisamente asina. Nan a siña e secreto pa keda contento cu e cosnan material cu nan tin. Nan ta Testigonan di Yehova cu a dedica nan mes na Dios, y cu ta haci su boluntad y ta siña hende tur caminda e proposito di Dios.

 Considera por ehempel esnan cu a ofrece nan mes pa ser entrena y manda como misionero na paisnan desconoci pa predica e evangelio di e Reino di Dios. (Mateo 24:14) Hopi bes e condicionnan di bida den e paisnan cu nan ta bai no ta mes avansa cu loke nan a custumbra cu ne. Por ehempel, ora e misioneronan a yega un pais na Asia na principio di 1947, ainda e efectonan di guera tawata bisto, y masha poco cas tawatin coriente. Den hopi pais, e misioneronan a haña nan ta laba paña un pa un na washi of riba baranca den riu en bes di uza wasmashin electrico. Pero ta e berdad nan a bin siña e pueblo, pues nan a adapta nan mes na e circunstancianan local y a ocupa nan mes cu e sirbishi.

Otronan a cuminsa traha den e sirbishi di tempo completo of a muda bai areanan caminda e bon nobo no a ser predica ainda. Adulfo a traha como un predicado di tempo completo pa mas cu 50 aña na varios parti di Mexico. El a bisa: “Mescos cu apostel Pablo, ami cu mi casa a siña adapta nos mes na e circunstancianan di bida. Por ehempel, un di e congregacionnan cu nos a bishita tawata hopi leu for di stad of plasa. Como cuminda, nan tawata contenta nan mes cu un tortiya cu un tiki res, salo y un copi cofi. Esei tawata tur loke nan tawatin pa come, tres tortiya pa dia. Pues nos a siña biba mescos cu nos rumannan. Mi a disfruta di varios experencia manera esaki durante e 54 añanan cu mi tin ta sirbi Yehova den sirbishi di tempo completo.”

Florentino ta corda con e cu su famia mester a adapta nan mes na circunstancianan dificil. Cordando e prome añanan di su bida, e ta bisa: “Mi tata tawata un comerciante prospero. E tawatin hopi tereno. Ainda mi ta corda e toonbank cu nos tawatin den nos tienda. E tawatin un lachi di mas o menos 50 centimeter hancho, 20 centimeter halto y parti den cuater. Eiden nos tawata warda e cennan cu nos ricibi durante dia. Na final di dia semper e tawata asina yen di cen los y di papel cu casi nan tawata basha afo.

Anto diripiente, nos a haya nos den problema financiero y nos a sali di abundancia y cai den pobresa. Fuera di nos cas, nos a perde tur cos. Ademas, un di mi ruman hombernan a haya un accidente y a keda paralisa di su sintura bai abou. Nada no tawata mescos mas. Pa un tempo mi tawata traha como bendedo di fruta y carni. Tambe mi tawata cosecha catuna, druif y alfalfa, y mi tawata muha cunucu. Algun hende tawata yama mi handyman. Hopi bes mi mama tawata consola nos door di bisa cu nos tin e berdad, un rikesa spiritual cu masha poco hende tawatin. Pues mi a siña kico kiermen biba den abundancia y tambe cu un tiki of nada mes. Awor cu mi a sirbi Yehova tempo completo pa mas o menos 25 aña, mi por bisa cu semper mi tawatin e goso di sa cu mi a scohe e miho manera di biba, esta, sirbi Yehova tempo completo.”

Bijbel ta bisa nos enfaticamente cu “e mundo aki den su forma actual ta pasando.” Ta pesei e ta urgi nos: “[Laga] esnan cu ta regociha, [ser] como si fuera nan no a regociha; y esnan cu ta cumpra, como si fuera nan no tawatin nada; y esnan cu ta haci uzo di e cosnan di mundo, como si fuera nan no a haci uzo completo di nan.”—1 Corintionan 7:29-31.

Pesei awor ta tempo pa bo analisa e manera cu bo ta biba. Si bo no ta hende di hopi recurso, tene cuidou pa bo no bira amarga ni envidia otronan. Di otro banda, sin importa cuanto cos material bo tin, ta sabi pa bo duna nan e debido luga den bo bida pa nan no bira bo doño. Y manera apostel Pablo a spierta, fiha bo speransa no “riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan.” Si bo ta haci esei, bo tambe por bisa cu bo a siña e secreto di keda contento cu loke bo tin.—1 Timoteo 6:17-19.

[Plachi na pagina 9]

Pablo a traha cu su propio man pa e no bira un carga pa otro hende

[Plachi na pagina 10]

Miles di hende ta hayando felicidad den un bida di “santidad acompaña pa contentamento”