Busca Loke Ta Bon den Tur Hende

“Corda di mi, o mi Dios, pa bon.”—Nehemias 13:31.

1. Con Yehova ta mustra bondad na tur hende?

DESPUES di varios dia scur yen di nubia, claridad di solo ta bonbini. Hende su beis ta drecha, y nan ta sinti nan mas contento. Asina tambe, despues di periodonan largo di solo cayente y un weer sofocante y seco un pal’i awasero—asta si ta djis pa un rato—ta refresca y duna alivio. Ta Yehova nos Creador amoroso ta esun cu a diseña e maraviyoso regalo aki di weer den e atmosfer. Hesus a hala hende su atencion riba Dios su generosidad ora el a siña nan: “Stima boso enemigonan, bendiciona esnan cu ta maldiciona boso, haci bon na esnan cu ta odia boso, y haci oracion pa esnan cu ta maltrata boso y ta persigui boso, pa boso por ta yiunan di boso Tata cu ta den shelo; pasobra E ta haci su solo sali riba mal hende y riba bon hende, y ta laga awa yobe riba hende husto y riba hende inhusto.” (Mateo 5:43-45) Si, Yehova ta mustra bondad na tur hende. Su sirbidonan mester haci esfuerso pa imit’e door di busca loke ta bon den otro hende.

2. (a) Riba ki base Yehova ta mustra bondad? (b) Relaciona cu e manera cu nos ta reacciona riba Yehova su bondad, kico E ta ripara?

² Riba ki base Yehova ta mustra bondad? For di tempo cu Adam a cai den pica, semper Yehova a sigui busca loke ta bon den hende. (Salmo 130:3, 4) Su proposito ta pa restaura humanidad obediente na bida den Paradijs. (Efesionan 1:9, 10) Su bondad inmereci a duna nos e speransa di por ser libera for di pica y imperfeccion mediante e Simiña priminti. (Genesis 3:15; Romanonan 5:12, 15) Si nos acepta e areglo di rescate, cu tempo esei ta habri caminda pa nos por bolbe bek na perfeccion. Actualmente Yehova ta observa cada un di nos pa wak con nos ta reacciona riba, entre otro, su generosidad. (1 Huan 3:16) E ta ripara tur loke  nos ta haci pa demostra nos aprecio pa su bondad. “Dios no ta inhusto pa lubida boso trabou y e amor cu boso a mustra pa su nomber.”—Hebreonan 6:10.

3. Ki pregunta merece nos consideracion?

³ Con anto nos por imita Yehova door di busca loke ta bon den otro hende? Laga nos analisa e pregunta aki den cuater area di bida: (1) e ministerio cristian, (2) famia, (3) e congregacion y (4) nos relacion cu otro hende.

Den e Trabou di Predica y Haci Disipel

4. Den ki sentido participacion den e sirbishi cristian ta un manera di busca loke ta bon den otro hende?

⁴ “E cunucu ta e mundo”, Hesus a splica su disipelnan ora el a contesta nan pregunta tocante e nificacion di e ilustracion di trigo y yerba shimaron. Como Cristo su disipelnan di tempo moderno, nos ta reconoce e berdad aki ora nos ta den sirbishi. (Mateo 13:36-38; 28:19, 20) Nos sirbishi di veld ta encera duna declaracion publico di nos fe. E echo so cu Testigonan di Yehova awendia ta bon conoci pa nan sirbishi di cas pa cas y riba caya, ta un prueba cu nos ta trahando diligentemente pa busca hende cu ta merece e mensahe di Reino. Si, Hesus a duna e instruccion: “Den cualkier stad of pueblito cu boso drenta, busca pa haya sa ta ken ta digno den dje.”—Mateo 10:11; Echonan 17:17; 20:20.

5, 6. Dicon nos ta persevera den bishita hende bes tras bes na nan cas?

⁵ Ora nos ta haci bishita inespera serca hende, nos ta observa nan reaccion riba nos mensahe. Sa sosode cu nos ta haya un miembro di famia cu kier scucha nos, pero otro ta stroba e combersacion door di grita for di den cas: “Nos no ta interesa.” Nos ta haya masha laf cu oposicion of falta di interes di un persona ta afecta reaccion di un otro! Pero awor, kico nos por haci pa persevera den busca loke ta bon den tur hende?

⁶ Nos siguiente bishita na e cas ei ora nos ta predica den e teritorio atrobe lo por duna nos e oportunidad pa papia direct cu e persona cu a kibra nos combersacion anterior. Si nos ta corda loke a pasa e prome bes, esei por yuda nos pa ta prepara. Kisas e persona cu tawata contra biaha pasa tawatin bon intencion,  pensando cu e mester stop esun cu a reacciona, di scucha e mensahe di Reino. Podise informacion eroneo tocante nos intencionnan a influencia su punto di bista. Pero esei no ta stroba nos di persisti den predica e bon nobo di Reino na e cas ei. Anto cu tacto nos lo purba di corigi e punto di bista incorecto. Nos ta interesa pa yuda tur hende yega na un conocemento exacto di Dios. Despues di esei probablemente Yehova lo hala e persona ei cerca dje.—Huan 6:44; 1 Timoteo 2:4.

7. Kico por yuda nos keda positivo ora nos ta acerca hende?

⁷ Den e instruccionnan cu Hesus a duna su disipelnan el a tene cuenta tambe cu oposicion di parti di miembronan di famia. No ta e mes a bisa: “Mi a bin pa pone un homber contra su tata, y un yiu mohe contra su mama, y un nuera contra su suegra”? Hesus a agrega: “Un hende su enemigonan lo ta e miembronan di su mes cas.” (Mateo 10:35, 36) Sinembargo, circunstancia y actitud di hende sa cambia. Un malesa inespera, morto di un famia, desaster, crisis emocional y cantidad di otro factor por influencia e manera cu hende ta reacciona riba nos predicacion. Si nos tin un punto di bista negativo—esta, si nos ta pensa cu e hendenan cu nos ta predica na dje lo no reacciona nunca—nos ta realmente buscando loke ta bon den hende? Pakico no bolbe bishita e casnan ei cu smak na un otro ocasion? Kisas nan por reacciona otro. Tin biaha no ta loke nos ta bisa so por pone un persona reacciona otro, sino tambe e manera cu nos ta bis’e. Oracion ferviente prome cu nos cuminsa predica sin duda lo yuda nos keda positivo y presenta e mensahe di Reino na un manera cu ta atrae tur hende.—Colosensenan 4:6; 1 Tesalonicensenan 5:17.

8. Kico lo por ta e resultado ora cristiannan ta busca loke ta bon den miembronan di famia cu no ta Testigo?

⁸ Den algun congregacion tin varios miembro di e mesun famia ta sirbi Yehova. Con bin? Hopi bes tawatin un miembro di famia di mas edad cu a persevera y cu tawatin un bon relacion cu e otro miembronan y tambe cu su casa. Door di esei el a gana e admiracion y respet di esnan mas jong, y asina a bira mas facil pa nan cambia nan actitud. Siguiendo e conseho di apostel Pedro a yuda hopi esposa cristian gana nan esposo “sin palabra.”—1 Pedro 3:1, 2.

Den Famia

9, 10. Con tanto Yacob como Hose a busca loke ta bon den nan miembronan di famia?

⁹ E banchinan estrecho cu ta mara miembronan di famia na otro ta un otro area den cua nos por busca loke ta bon den otro hende. Saca un les for di e manera cu Yacob a trata cu su yiu hombernan. Na Genesis 37 versiculo 3 y 4, Bijbel ta mustra cu Yacob tawatin un amor special pa Hose. Hose su rumannan tawata asina yalurs, cu nan a bai asina leu di a conspira pa mata nan ruman. Sinembargo, tuma nota di e manera cu Yacob y Hose a actua mas despues. Nan tur dos a busca loke ta bon den nan miembronan di famia.

¹⁰ Tempo cu Hose tawata traha como administrado principal di cuminda den e añanan cu tawatin gran scarsedad di cuminda na Egipto, el a ricibi su rumannan bon. Aunke e no a laga nan sa mesora ken e tawata, el a maniobra cosnan di tal manera cu a percura bon pa nan  y cu nan tawatin cuminda pa bai hiba pa nan tata cu tawata di mayor edad. Si, maske Hose su rumannan a odi’e, el a actua na nan bienestar. (Genesis 41:53–42:8; 45:23) Tambe Yacob a duna tur su yiunan un bendicion profetico ora e tawata bai muri. Aunke nan actonan robes a pone cu nan a haya menos privilegio, ningun di nan no a keda sin haya herencia den e tera. (Genesis 49:3-28) Esta un maraviyoso expresion di amor berdadero Yacob a demostra!

11, 12. (a) Cua ehempel profetico ta enfatisa e importancia di busca loke ta bon den famia? (b) Ki les nos ta saca for di e ehempel di e tata den e ilustracion di Hesus di e yiu perdi?

¹¹ E gran pasenshi cu Yehova a demostra den su trato cu e nacion infiel di Israel ta yuda nos compronde mas aleu con E ta busca loke ta bon den su pueblo. El a uza e circunstancianan familiar di profeta Oseas pa ilustra su amor duradero. Gomer, esposa di Oseas, a comete adulterio varios bes. Apesar di esei, Yehova a instrui Oseas: “Bai atrobe, stima un mohe cu ta stima door di su esposo, maske cu e ta un adultera, mescos cu SEÑOR ta stima e yiunan di Israel, maske nan ta bira na otro diosnan y ta gusta clompi di rasenchi.” (Oseas 3:1) Dicon el a haya e instruccionnan ei? Yehova tawata sa cu den e nacion cu a desvia for di su camindanan, tawatin hende cu lo a reacciona faborablemente na su pasenshi. Oseas a declara: “Despues e yiunan di Israel lo bolbe y busca SEÑOR nan Dios y David nan rei; y nan lo bin na temblamento na SEÑOR y na su bondad den e ultimo dianan.” (Oseas 3:5) Esaki sigur ta un excelente ehempel pa nos pensa riba dje ora nos tin problema den famia. Si bo sigui busca loke ta bon den otro miembronan di famia, en todo caso bo ta pone un excelente ehempel di pasenshi.

¹² Hesus su ilustracion di e yiu perdi ta mustra nos mas ainda con pa busca loke ta bon den nos propio famia. E yiu homber mas chikito a bolbe cas despues cu el a hiba un bida di paranda y malgastamento. Su tata a trat’e cu misericordia. Con e tata a reacciona riba e kehonan di e yiu homber mayo cu nunca a bandona e famia? Dirigiendo su mes na e yiu homber mayo, e tata a declara: “Mi yiu, abo tawata semper serca mi, y tur loke mi tin ta di bo.” Pues e tata no a rabia scual e, ma simplemente a confirma su amor di tata. El a sigui:  “Ma nos mester a fiesta y regociha, pasobra e ruman homber di bo aki tawata morto y el a bolbe biba, y e tawata perdi y a wordo haya.” Asina tambe nos por sigui busca loke ta bon den otro hende.—Lucas 15:11-32.

Den e Congregacion Cristian

13, 14. Den ki manera asina nos por practica e lei real di amor den e congregacion cristian?

¹³ Como cristiannan nos tur ta haci esfuerso pa cumpli cu e lei real di amor. (Santiago 2:1-9) Ta cierto cu podise nos ta acepta miembronan di nos congregacion cu no tin e mesun cosnan material cu nos tin. Pero nos ta haci “distincion di persona” debi na rasa, cultura of asta religion? Si esei ta e caso, con nos por cumpli cu e conseho di Santiago?

¹⁴ Un actitud amigabel cu tur persona cu asisti na reunionnan cristian ta duna evidencia cu nos ta hospitalario. Ora nos ta tuma iniciativa pa papia cu esnan nobo cu ta bishita e Salon di Reino, cualkier nerviosidad of timides cu nan lo por tin na principio probablemente lo disparce. Ta pesei mes, algun hende cu a asisti na un reunion cristian pa prome bes ta bisa: “Tur hende tawata amigabel. Tawata como si fuera nan tur tawata conoce mi caba. Mi a sinti mi na cas.”

15. Con por yuda esnan mas hoben den congregacion mustra interes den hende grandi?

¹⁵ Den algun congregacion tin cierto hobennan ta reuni hunto paden of pafo di Salon di Reino ora reunion caba, evitando asina di asocia cu hendenan mas grandi. Kico ta e cosnan positivo cu por ser haci pa para e tendencia aki? Claro cu na prome luga, ta e mayornan tin cu entrena nan yiunan na cas y prepara nan pa e reunionnan. (Proverbionan 22:6) Nan por duna nan e tarea pa busca y pone cla e varios publicacionnan necesario pa reunion pa asina tur hende tin loke nan mester pa bai reunion cu ne. Tambe mayornan ta den e miho posicion pa anima nan yiunan pa combersa cu rumannan di edad y esnan enfermo na Salon di Reino. Si e muchanan tin algo significativo pa bisa e rumannan ei, nan mes tambe lo sinti nan satisfecho.

16, 17. Con adultonan por busca loke ta bon den esnan mas jong den e congregacion?

¹⁶ Rumannan mas grandi den e congregacion tambe mester mustra interes den e hobennan di e congregacion. (Filipensenan 2:4) Nan por tuma iniciativa pa hiba un combersacion animante cu e hobennan. Normalmente tin puntonan sobresaliente cu a ser trata durante e reunion. Por puntra e hobennan si nan a disfruta di e reunion y si tawatin puntonan cu nan a gusta mas y cu nan lo por pone na practica. Siendo un parti integral di e congregacion, mester duna hobennan reconocemento pa e echo cu nan ta presta atencion y elogia nan pa e comentarionan cu nan a duna durante reunion of pa cualkier parti cu nan a duna. E manera cu hobennan ta trata cu esnan mas grandi den e congregacion y e manera cu nan ta cumpli cu tareanan simpel na cas, lo indica cu probablemente nan lo por cumpli cu responsabilidadnan mas grandi den bida despues.—Lucas 16:10.

¹⁷ Door di acepta responsabilidad, algun  hoben a progresa asina bon te cu nan por a ricibi tareanan di mas peso despues cu nan a desaroya nan cualidadnan spiritual. Si un hoben tin cos di haci, esei tambe ta evita cu e ta comete bobedad. (2 Timoteo 2:22) E tareanan ei lo por ‘proba’ con apto ruman hombernan cu ta haci esfuerso pa bira sirbido ministerial ta. (1 Timoteo 3:10) E echo cu nan ta cla pa participa den e reunionnan, nan celo den sirbishi y tambe e interes personal cu nan ta mustra pa tur hende den e congregacion, ta yuda ancianonan determina ki potencial nan tin ora nan ta considera pa duna nan mas responsabilidad.

Busca Loke Ta Bon den Tur Hende

18. Ki trampa ancianonan mester evita ora di husga, y pakico?

¹⁸ ‘No ta bon pa haci distincion di persona den hacimento di huicio’, Proverbionan 24:23 ta declara. Sabiduria dibino ta rekeri pa ancianonan evita di mustra parcialidad ora nan ta husga asuntonan den e congregacion. Santiago a declara: “Sabiduria di ariba primeramente ta puro, despues pacifico, suave, rasonabel, yen di misericordia y bon fruta, imparcial, sin hipocresia.” (Santiago 3:17) Ta obvio cu ora ancianonan ta busca loke ta bon den otronan, nan tin cu tene cuidou pa relacionnan personal of emocion no influencia nan huicio. E salmista Asaf a skirbi: “Dios ta para den su mes congregacion; E ta husga meimei di e diosnan [of tambe esnan cu parce dios, cu ta referi na huesnan humano]. Cuanto tempo mas lo bo husga inhustamente, y faborece e malbado?” (Salmo 82:1, 2) Di acuerdo cu esei, ancianonan cristian ta evita cualkier tendencia di faboritismo ora ta trata di asuntonan cu ta envolve un amigo of famia. Di e manera aki nan ta conserva unidad di e congregacion y ta permiti Yehova su spirito flui libremente.—1 Tesalonicensenan 5:23.

19. Den ki maneranan nos por busca loke ta bon den otro hende?

¹⁹ Ora nos ta busca loke ta bon den nos rumannan, nos ta refleha e actitud cu Pablo a manifesta ora cu el a dirigi su mes na e congregacion di Tesalonica. El a bisa: “Y nos tin confiansa den Señor tocante di boso, cu boso ta haciendo y lo sigui haci loke nos ta ordena.” (2 Tesalonicensenan 3:4) Ora nos ta busca loke ta bon den otronan nos lo ta mas inclina pa pasa por halto di nan fayonan. Nos lo busca areanan riba cua nos por elogia nos rumannan, y siguramente nos lo evita di critica nan. Pablo a skirbi: “Ademas, ta wordo rekeri di mayordomo cu cada un ta wordo haya fiel.” (1 Corintionan 4:2) No ta nos rumannan cu ta hiba delantera so nos ta stima debi na nan fieldad; esaki ta conta pa tur nos rumannan. Asina nos ta hala mas serca nan, fortaleciendo e lasonan di amistad cristian. Nos ta adopta un punto di bista manera esun cu Pablo tawatin di e rumannan den su tempo. Nan ta “compañeronan di trabou pa e reino di Dios” y “un encurashamento” pa nos. (Colosensenan 4:11) Asina nos ta manifesta e actitud di Yehova.

20. Ki bendicionnan esnan cu ta busca loke ta bon den tur hende lo haya?

²⁰ Siguramente nos ta haci e mesun oracion cu Nehemias: “Corda di mi, o mi Dios, pa bon.” (Nehemias 13:31) Nos ta masha contento cu Yehova ta busca loke ta bon den hende! (1 Reinan 14:13) Laga nos actua mescos den nos trato cu otro hende. Door di haci esei, nos ta habri caminda pa nos por tin e speransa di ser salba y haya bida eterno den e mundo nobo cu awor ta masha serca.—Salmo 130:3-8.

Con Lo Bo Contesta?

• Riba ki base Yehova ta mustra bondad na tur hende?

• Con nos por busca loke ta bon den otro hende

• den nos sirbishi?

• den nos famia?

• den nos congregacion?

• den tur nos relacionnan?

[Preguntanan di Estudio]

[Plachi na pagina 18]

Maske Hose su rumannan a odi’e anteriormente, el a busca loke ta bon den nan

[Plachi na pagina 19]

Oposicion no ta stroba nos di purba yuda tur hende

[Plachi na pagina 20]

Apesar di nan pasado, niun di e yiunan di Yacob no a keda sin haya su bendicion

[Plachi na pagina 21]

Ricibi tur hende na reunionnan cristian