Evidencia Arkeologico Cu Hesus A Existi?

“PRUEBA di Hesus Skirbi den Piedra.” Esei ta loke e revista Biblical Archaeology Review (november/december 2002) a declara riba su portada. Riba kaft di e revista tawatin potret di un cahita traha di piedra di calki cu weso aden (osario) cu nan a haya na Israel. Hudiunan tawata uza e cahitanan aki ampliamente durante e periodo cortico entre siglo uno prome cu nos era y aña 70 di nos era. Loke a haci e cahita aki particularmente significativo tawata un inscripcion na Arameo den un di su bandanan. Expertonan a saca afo cu e ta bisa: “Santiago, yiu di Hose, ruman di Hesus.”

Segun Bijbel, Hesus di Nazaret tawatin un ruman cu yama Santiago y kende tawata ser considera yiu di Hose, esposo di Maria. Ora Hesucristo a predica na e hendenan di su pueblo natal, nan a keda asombra y a puntra: “No ta yiu di e carpinte esaki ta? No ta Maria su mama yama, y su rumannan: Santiago, Hose, Simon y Hudas? Y su ruman mohenan tur no ta aki serca nos?”—Mateo 13:54-56; Lucas 4:22; Huan 6:42.

Si, e inscripcion riba e cahita ta cuadra cu e descripcion di Hesus e Nazareno. Si e Santiago menciona den e inscripcion tawata e mita ruman di Hesucristo, e ora ei “fuera di Bijbel, esaki lo ta e prueba arkeologico mas antiguo di Hesus”, segun André Lemaire, un autoridad riba inscripcionnan di antiguedad y escritor di e articulo menciona den Biblical Archaeology Review. Hershel Shanks, editor di e revista, ta remarca cu e cahita “ta algo palpabel y visibel, y e ta data for di e tempo cu e personahe mas importante cu a yega di biba a cana riba tera.”

Sinembargo, tur e tres nombernan riba e cahita cu por a wordo lesa tawata comun den e prome siglo. Pues ta posibel cu ademas di e famia di Hesucristo por tawatin mas famia den cua tawatin un Santiago, un Hose y un Hesus. Lemaire ta calcula cu “durante e dos generacionnan na Herusalem prome cu aña 70 di nos era, tawatin . . . probablemente rond di 20 hende cu lo por tawata yama ‘Santiago (of Yacobo) yiu di Hose, ruman di Hesus.’” No obstante, e ta sinti cu tin 90 porshento chens cu e Santiago riba e cahita di weso tawata e mita ruman di Hesucristo.

Tin un otro factor cu ta pone hende kere cu e Santiago den e inscripcion tawata e mita ruman di Hesucristo. Aunke tawata comun pa menciona tata di un defunto den inscripcionnan asina, masha poco biaha tawata menciona nomber di un ruman. Pesei algun experto ta kere cu e Hesus aki lo mester tawata un persona importante. Y esei ta  pone nan pensa cu aki tawata trata di Hesucristo, fundado di cristianismo.

E Cahita di Weso Ta Autentico?

Despues cu e curpa di un defunto a putri te caba na nada den cueba cu a sirbi como graf, nan tawata coi e wesonan y pone nan den un cahita of osario. Ta masha ladronicia di cahita di weso tawatin for di e santananan rond di Herusalem. E cahita cu e inscripcion di Santiago a bini for di un plasa di cosnan antiek, no for di un sitio oficial caminda a coba saca cos. Aparentemente e doño di e cahita a cumpr’e pa un par di shen dollar den decada di 1970. Pues for di unda e cahita a bini si ta un misterio. “Si bo no por bisa unda un obheto a wordo haya y unda e tawata pa casi 2.000 aña, bo no por pretende sin mas cu e obheto ta conecta cu e hendenan cu lo e por ta mencionando”, segun Profesor Bruce Chilton di e Colegio Bard, na New York.

Pa compensa e falta di un background arkeologico, André Lemaire a manda e cahita pa e Departamento di Investigacion Geologico na Israel. Aya e investigadonan a constata cu e cahita a ser traha di piedra di calki for di e prome of di dos siglo di nos era. Nan a informa cu no tawatin “ningun señal cu a uza un herment moderno” pa traha e cahita. Pero, e expertonan di Bijbel cu The New York Times a entrevista tawata di opinion cu “posiblemente e evidencia circunstancial cu ta apoya un conexion cu Hesus tawata fuerte, pero cu e ta keda djis un evidencia circunstancial.”

E revista Time a comenta cu “awendia casi ningun hende educa ta duda cu Hesus a yega di existi.” Toch, hopi ta haya cu fuera di e relatonan di Bijbel tocante Hesus, mester tin mas prueba cu el a yega di existi. Arkeologia mester ta e base pa un hende kere den Hesucristo? Ki evidencia nos tin di cu “e personahe mas importante cu a yega di cana riba tera” di berdad a existi?

[Reconocemento pa Potret na pagina 3]

Man robes, Cahita di Weso di Santiago: AFP PHOTO/J.P. Moczulski; man drechi, inscripcion: AFP PHOTO/HO