Evidencia Cu Hesucristo A Yega di Biba Riba Tera

MAYORIA hende nunca no a topa e famoso cientifico cu yama Albert Einstein personalmente. Den algun pais, nan no sa mes ta ken e ta. Pero informenan confiabel di su hazañanan ta proba cu el a yega di existi. Comunidad por sinti su influencia a base di e manera cu ciencia ta aplica su descubrimentonan. Por ehempel, hopi hende ta beneficia di electricidad cu ta ser genera, den algun caso, a base di su descubrimentonan.

E mesun rasonamento ta conta pa Hesucristo tambe, kende ta ser reconoci como e homber di mas influencia den historia humano. Loke a ser skirbi tocante dje y evidencia visibel di e  influencia cu el a eherce ta proba fuera di tur duda cu el a existi. Pa interesante cu e descubrimento arkeologico resien di e inscripcion di Santiago por ta (mira articulo anterior), e prueba cu Hesus a yega di existi no ta depende di esaki ni di ningun otro obheto. Echo ta cu nos por haya evidencia di Hesus su existencia den loke historiadonan di mundo a skirbi tocante dje y su siguidonan.

Testimonio di Historiadonan

Tuma por ehempel e testimonio di Flavio Yosefo, un historiado Hudiu di prome siglo kende tawata un Farizeo. El a referi na Hesucristo den e buki Jewish Antiquities. Aunke algun hende ta duda cu e prome referencia caminda Yosefo ta menciona Hesus como e Mesias ta autentico, Profesor Louis H. Feldman di Universidad Yeshiva ta bisa cu masha poco hende tawatin duda cu e di dos referencia si ta berdadero. Ei Yosefo a bisa: “[Sumo Sacerdote Anano] a convoca e huesnan di e Sanedrin y a presenta dilanti nan un homber cu yama Santiago, ruman di Hesus cu tawata yama e Cristo.” (Jewish Antiquities, XX, 200) Si, un Farizeo, miembro di e secta di cua hopi di su siguidonan a declara abiertamente cu nan ta enemigo di Hesus, a reconoce cu a existi un tal “Santiago, ruman di Hesus.”

Hesus tawatin un gran influencia riba e actividadnan di su siguidonan; un evidencia cu e mester a existi. Ora apostel Pablo tawata encarsela na Roma rond di aña 59 di nos era, e hombernan principal di e Hudiunan a bis’e: “Encuanto e secta aki, nos sa cu e ta wordo contradeci tur caminda.” (Echonan 28:17-22) Nan a yama e disipelnan di Hesus “e secta aki.” Bo no ta kere cu si tur caminda nan tawata papia contra nan, casi sigur historiadonan lo mester a menciona esei?

Tacito, kende a nace rond di aña 55 di nos era y considera como un di e gran historiadonan di mundo, a menciona e cristiannan den su obra Anales. Den su relato caminda Nero ta culpa e cristiannan pa e candela grandi na Roma na aña 64, el a skirbi: “Nero a tira e culpa riba un grupo di hende odia pa nan cosnan repugnante, cu pueblo tawata yama cristian, y el a somete nan na torturanan sumamente cruel. Cristo, for di cua e nomber a bini, a sufri pena capital durante e reinado di Tiberio na man di un di nos procuradonan, Poncio Pilato.” E detayenan di e relato aki ta cuadra cu e informacion relaciona cu e Hesus di Bijbel.

Un otro escritor cu a comenta riba Hesus su siguidonan tawata Plinio e Menor, gobernado di Bitinia. Rond di aña 111, Plinio a skirbi Emperado Trajano pa puntra con mester trata cu e cristiannan. Plinio a skirbi cu hendenan cu a ser acusa falsamente di ta cristian lo a invoca e diosnan y adora e estatua di Trajano, djis pa proba cu nan no tawata cristian. Plinio a continua: “Aparentemente, lo bo no por a forsa hende cu ta berdaderamente cristian di cumpli cu ningun di e cosnan aki.” Esei ta duna prueba cu Cristo en berdad a existi, y cu su siguidonan tawata prepara pa sacrifica nan bida pa motibo di nan fe den dje.

Despues di resumi e referencianan cu e historiadonan di e prome dos siglonan a haci na  Hesucristo y su siguidonan, The Encyclopædia Britannica (edicion 2002) ta conclui: “E relatonan independiente aki ta duna prueba cu den pasado ni e opositornan di cristianismo no a duda nunca cu di berdad Hesus a existi. Ta te na final di siglo 18, durante siglo 19 y na cuminsamento di siglo 20 numa hende a cuminsa lanta duda pa prome biaha riba e punto aki, anto sin suficiente base.”

Testimonio di Hesus Su Siguidonan

“E Testament Nobo ta duna casi tur e detayenan cu por yuda bo saca afo con Hesus a biba y muri, y ki importancia e prome cristiannan a duna tur esakinan”, segun The Encyclopedia Americana. Kisas hende cu tin nan dudanan tocante religion no ta acepta Bijbel como evidencia cu Hesus a existi. Pero, dos argumento basa particularmente riba relatonan di Bijbel ta yuda establece cu Hesus en berdad a yega di biba riba tera.

Manera nos a menciona, e gran teorianan di Einstein ta proba cu el a existi. Mescos tambe e siñansanan di Hesus ta proba cu en berdad el a existi. Tuma por ehempel e Sermon Riba Sero, un discurso bon conoci cu Hesus a duna. (Mateo, capitulo 5-7) Apostel Mateo a mustra ki impacto e sermon ei tawatin: “E multitudnan a keda asombra di su siñansa; pasobra e tawata siña nan manera un hende cu tin autoridad.” (Mateo 7:28, 29) Relaciona cu e efecto cu e sermon ei tawatin riba hende durante siglonan, Profesor Hans Dieter Betz a remarca: “Por lo general e influencia cu e Sermon Riba Sero a eherce ta bai hopi mas leu cu e fronteranan di hudaismo y cristianismo, of asta di cultura Occidental.” El a agrega cu e sermon aki tin “un atraccion extraordinario rond mundo.”

Wak e sabiduria cu e siguiente palabranan cortico y practico den e Sermon Riba Sero ta refleha: “Ken cu dal bo na bo banda drechi di cara, dun’e e otro banda tambe.” “Percura pa boso no haci boso obranan di caridad dilanti di hende.” “No precupa boso mes pa e dia di mañan . . . Cada dia tin suficiente problema di su mes.” “No . . . tira boso perlanan pa porco.” “Pidi, y lo wordo duna na boso.” “Tur loke boso kier pa hende haci pa boso, haci mescos pa nan.” “Drenta door di e porta smal.” “Na nan fruta boso lo conoce nan.” “Tur bon palo ta duna bon fruta.”—Mateo 5:39; 6:1, 34; 7:6, 7, 12, 13, 16, 17.

Sin duda bo a tende algun di e expresionnan aki of e esencia di nan. Talbes nan a bira dicho den bo idioma. Tur esakinan ta saca for di e Sermon Riba Sero. E influencia cu e sermon aki tin riba hopi hende y cultura ta duna testimonio inekibocabel di e existencia di “e gran maestro.”

Laga nos imagina cu ta un hende a inventa un personahe cu yama Hesucristo. Supone cu e persona ei tawata suficiente sabi pa crea e siñansanan den Bijbel cu ta ser atribui na Hesus. Lo e no trata pa haci Hesus y su siñansanan mas aceptabel posibel pa hende en general? No obstante, apostel Pablo a remarca: “Hudiunan ta pidi señalnan y Griegonan ta busca sabiduria; ma nos ta predica Cristo [“claba na staca”, NW], pa Hudiu un piedra di trompica, y pa pagano, locura.” (1 Corintionan 1:22, 23) E mensahe di Cristo claba na staca no tawata atractivo ni pa e Hudiunan ni pa e nacionnan. Pero ta esei tawata e Cristo cu e cristiannan di prome siglo a proclama. Pakico e representacion di Cristo claba na staca? E unico splicacion satisfactorio ta cu e escritornan di e Scritura Griego Cristian a skirbi e berdad tocante e bida y morto di Hesus.

Un otro argumento cu ta mustra cu di berdad Hesus a yega di biba riba tera ta e manera incansabel cu su siguidonan a predica tocante su siñansanan. Apenas un 30 aña despues cu Hesus a cuminsa su ministerio, Pablo por a bisa cu e bon nobo “a wordo proclama den henter creacion bou di shelo.” (Colosensenan 1:23) Si, e siñansanan di Hesus a plama den henter e mundo antiguo apesar di oposicion. Pablo mes cu a ser persigui como cristian,  a skirbi: “Si Cristo no a wordo lanta, e ora ei nos predicamento ta [en] vano, y [nos] fe tambe ta [en] vano.” (1 Corintionan 15:12-17) Si e predicacion tocante un Cristo cu no a resusita ta en vano, predicacion tocante un Cristo cu nunca no a existi lo ta mas banidad ainda. Manera nos ta lesa den e informe di Plinio e Menor, e cristiannan di prome siglo tawata dispuesto pa muri pa nan fe den Cristo Hesus. Nan a risca nan bida pa Cristo pasobra e tawata real; el a biba riba tera manera e Evangelionan ta mustra.

Bo A Mira Prueba

Cristiannan mester tawatin fe den e resureccion di Hesucristo prome cu nan por a predica. Den bo mente, abo tambe por visualisa Hesus resusita door di mira e impacto cu e ta causando awe.

Djis prome cu nan a claba Hesus na staca, el a duna un gran profecia tocante su futuro presencia. Tambe el a indica cu lo e ser resusita y sinta na man drechi di Dios, sperando e tempo pa e trata cu su enemigonan. (Salmo 110:1; Huan 6:62; Echonan 2:34, 35; Romanonan 8:34) Despues di esei, lo e tuma accion y saca Satanas y su demoñonan for di shelo.—Revelacion 12:7-9.

Na ki tempo tur esei lo a sosode? Hesus a duna su disipelnan ‘e señal di su binida [“presencia”, NW] y di e fin di tempo.’ E señal pa identifica su presencia invisibel a inclui gueranan grandi, scarsedad di cuminda, temblor, presencia di profeta falso, aumento di maldad y epidemianan severo. E susesonan calamitoso ei tawata cos di spera, pasobra e sacamento di Satanas e Diabel for di shelo lo a nifica “ai di tera.” E Diabel a baha bin den bicindario di e tera “cu gran furia, sabiendo cu ta ked’e solamente un poco tempo mas.” Ademas, e señal ta inclui predicacion di e bon nobo di Reino “den henter mundo como un testimonio na tur nacion.”—Mateo 24:3-14; Revelacion 12:12; Lucas 21:7-19.

Mescos cu e pidanan di un puzzel cu ta pas cu otro, asina e cosnan cu Hesus a profetisa a tuma luga. For di dia cu Prome Guera Mundial a cuminsa na 1914, nos a mira e combinacion di evidencia di e presencia invisibel di Hesucristo. E ta reinando como Rei di e Reino di Dios y ta eherciendo un tremendo influencia. E echo cu bo tin e revista aki den bo man ta evidencia cu e trabou di predica e Reino ta ser efectua awe.

Pa bo por compronde mas miho ki efecto Hesus su existencia tin riba hende, bo tin cu studia Bijbel. Pakico no puntra Testigonan di Yehova tocante e detayenan di Hesus su presencia?

[Plachinan na pagina 5]

Yosefo, Tacito, y Plinio e Menor a referi na Hesucristo y su siguidonan

[Reconocemento]

Tur tres plachi: © Bettmann/CORBIS

[Plachi na pagina 7]

E prome cristiannan tawata combenci cu Hesus tawata un homber real