Imita Yehova, Nos Dios Imparcial

“No tin distincion di persona serca Dios.”—Romanonan 2:11.

1, 2. (a) Kico tawata Yehova su proposito relaciona cu e Cananeonan en general? (b) Kico Yehova a haci, y ki preguntanan esaki ta lanta?

TAWATA na aña 1473 prome cu nos era, y e pueblo di Israel cu tawata den nan campamento riba e Sabananan di Moab, a scucha Moises cu sumo atencion. Un situacion dificil tawata spera nan na otro banda di Riu Yordan. Moises a bisa nan cu Yehova tawata kier pa e pueblo di Israel derota e shete poderoso nacionnan Cananeo cu tawata habita e Tera Priminti. Moises a curasha nan masha cu e palabranan: “Dios [lo] entrega nan na bo y [lo] bo derota nan”! Israel no mester a sera ningun aliansa cu e nacionnan aki, ni tene misericordia cu nan.—Deuteronomio 1:1; 7:1, 2.

² Sinembargo, Yehova a spar un famia cu tawata biba den e prome stad cu Israel a ataca. Hende di cuater otro pueblo tambe a ricibi Dios su proteccion. Dicon? Kico e susesonan remarcabel aki relaciona cu e sobrevivencia di e Cananeonan ei ta siña nos tocante Yehova? Y con nos por imit’e?

Reaccion Riba Yehova Su Fama

3, 4. Ki efecto e noticianan tocante e victorianan di e Israelitanan tawatin riba cierto hendenan den Canan?

³ Durante e 40 añanan cu Israel a pasa den e desierto prome cu nan a drenta e Tera Priminti, Yehova a proteha su pueblo y bringa p’e. Suit di e Tera Priminti, Israel a enfrenta e Rei Cananeo Arad. Cu yudansa di Yehova, e Israelitanan a derot’e hunto cu su pueblo na Horma. (Numbernan 21:1-3) Despues, Israel a pasa door di e tera di Edom y biaha bai den direccion nort pa e parti nortost di Lama Morto. Den e area aki caminda antes tawatin Moabita, awor tawatin Amoreo. E Rei Amoreo Sehon a nenga di laga Israel pasa door di su teritorio. Nan a confronta otro den un guera na Jahaza, cu evidentemente tawata situa nort di e Vaye di Arnon, caminda Sehon a perde su bida. (Numbernan 21:23, 24; Deuteronomio 2:30-33) Mas panort, Og tawata gobernante di e Amoreonan na Basan. Aunke Og tawata un gigante, e no tawata por cu Yehova. Og a ser mata na Edrei. (Numbernan 21:33-35; Deuteronomio 3:1-3, 11) Noticia tocante e victorianan aki hunto cu e relatonan tocante e exodo di Israel for di Egipto a causa un gran impacto riba algun persona cu tawata biba na Canan. *

⁴ Ora cu Israel a caba di yega Canan despues cu nan a crusa Yordan, nan a establece nan campamento na Gilgal. (Hosue 4:9-19) No mucho leu for di einan, Yerico, un stad rondona cu muraya, tawata situa. Ora cu e Cananeo Rahab a tende di Yehova su echonan, esaki a motiv’e pa actua cu fe. Esei a pone cu ora Yehova a destrui Yerico, el a spar Rahab y su hendenan di cas.—Hosue 2:1-13; 6:17, 18; Santiago 2:25.

5. Kico a pone e Gabaonitanan uza astucia?

⁵ Despues di esei, Israel a subi for di e vayenan den bicindario di e riu y a bai den e seronan central di e region. Siguiendo e instruccionnan di Yehova, Hosue a ataca e stad di Ai di sorpresa. (Hosue, capitulo 8) Noticia tocante e derota aplastante cu a sigui a pone cu hopi rei Cananeo a sera cabes pa bai guera contra Israel. (Hosue 9:1, 2) E habitantenan den e stad  biciña Heveo di Gabaon si a reacciona otro. Segun Hosue 9:4, nan a asta “uza astucia.” Mescos cu Rahab, nan tambe a tende con Yehova a libra su pueblo for di Egipto y durante e derota di Sehon y Og. (Hosue 9:6-10) E Gabaonitanan a realisa cu ta pornada nan lo a resisti. Pesei, e Gabaonitanan y tres stad biciña—Cafira, Beerot y Kiriat-jearima—a manda un delegacion, disfrasa como si fuera nan a bin di un tera leu, serca Hosue na Gilgal. Nan tawatin exito cu nan strategia. Hosue a sera un pacto cu nan, y esaki a garantisa nan sobrevivencia. Tres dia despues Hosue y e Israelitanan a haya sa cu nan a gaña nan. Sinembargo nan a hura den nomber di Yehova cu nan lo a cumpli cu e pacto, y pesei nan a cumpli cu ne. (Hosue 9:16-19) Yehova a aproba esei?

6. Con Yehova a reacciona relaciona cu e pacto cu Hosue a sera cu e Gabaonitanan?

⁶ Hosue a permiti e Gabaonitanan bira kapdo di palo y cargado di awa pa e Israelitanan, y asta “pa e altar di SEÑOR” den e tabernakel. (Hosue 9:21-27) Ademas di esei, ora cu cinco rei Amoreo y nan ehersitonan a menasa e Gabaonitanan, Yehova a yuda nan di un manera milagroso. Piedra di hagel a mata mas enemigo cu e soldanan di Hosue a mata. Yehova a asta contesta Hosue su suplica pa laga solo y luna para keto pa e por caba di derota su enemigonan. Hosue a remarca: “No tawatin un dia manera esei, ni prome ni despues, cu SEÑOR a scucha bos di un homber; pasobra SEÑOR [mes] a bringa pa Israel.”—Hosue 10:1-14.

7. Ki berdad cu Pedro a reconoce a ser demostra den caso di cierto Cananeonan?

⁷ E Cananeo Rahab y su famia, y tambe e Gabaonitanan, a teme Yehova y a actua di acuerdo cu esei. Loke a sosode cu nan ta un prueba cla di un berdad cu e apostel cristian Pedro a declara despues: “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.”—Echonan 10:34, 35.

Yehova Su Trato cu Abraham y Israel

8, 9. Con Yehova a mustra cu E ta imparcial den e manera cu El a trata Abraham y e nacion di Israel?

⁸ Disipel Santiago a hala atencion na e bondad inmereci cu Dios a manifesta den e manera cu El a trata Abraham y su desendencia. Ta Abraham su fe a hacie “amigo” di Yehova, y no e rasa for di cua el a bini. (Santiago 2:23) Abraham su fe y amor pa Yehova a trece bendicion pa e y pa su desendientenan. (2 Cronicanan 20:7) Yehova a priminti Abraham: “Di berdad lo Mi bendiciona bo grandemente, y lo Mi multiplica bo desendientenan grandemente manera e streyanan di e shelonan y manera e santo cu tin canto di lama.” Pero tuma nota di e promesa den e siguiente versiculo: “Den bo desendientenan tur e nacionnan di e tera lo ta bendiciona.”—Genesis 22:17, 18; Romanonan 4:1-8.

⁹ Den su trato cu Israel Yehova no a haci distincion di persona; mas bien El a demostra loke E por haci pa esnan cu ta obedec’e. E manera cu El a trata nan ta un ehempel di con Yehova ta expresa su amor leal na su sirbidonan fiel. Aunke Israel tawata Yehova su “tesoro peculiar”, esaki no a nifica cu Dios no a mustra bondad na otro pueblonan. (Exodo 19:5;  Deuteronomio 7:6-8) Ta cierto cu ora Yehova a cumpra Israel bek for di sclabitud na Egipto El a bisa nan: “Ta boso so mi a scohe for di entre tur e famianan di tera.” Pero mediante profeta Amos y otronan, Yehova a priminti un maraviyoso futuro tambe na hende di ‘tur e nacionnan.’—Amos 3:2; 9:11, 12; Isaias 2:2-4.

Hesus, un Maestro Imparcial

10. Con Hesus a imita su Tata den mustra imparcialidad?

¹⁰ Durante su ministerio terenal, Hesus kende ta un representacion exacto di su Tata, a imita Yehova su imparcialidad. (Hebreonan 1:3) E tempo ei su interes principal tawata pa haya e “carnenan perdi di e cas di Israel.” Sinembargo, esei no a strob’e di duna testimonio na un mohe Samaritano na un pos. (Mateo 15:24; Huan 4:7-30) Tambe ora un funcionario di ehersito cu aparentemente no tawata un Hudiu a pidie haci un milager, el a hacie. (Lucas 7:1-10) Hunto cu eseinan ta bin tambe su actonan cu a demostra su amor pa e pueblo di Dios. Hesus su disipelnan tambe a predica tur caminda. A bira bisto cu e bendicion di Yehova no a depende di un persona su nacionalidad sino di su actitud. Hende humilde y sinsero cu hamber pa e berdad a reacciona riba e bon nobo di Reino. Na contraste cu nan, hende orguyoso y arogante a menosprecia Hesus y su mensahe. Hesus a declara: “Mi ta alaba Bo, o Tata, Señor di shelo y tera, cu Bo a sconde e cosnan aki pa sabinan y inteligentenan y a revela nan na mucha chikito. Si, Tata, pasobra asina tawata agradabel den bo bista.” (Lucas 10:21) Ora nos ta trata otro hende cu amor y fe, nos ta actua di un manera imparcial pasobra nos sa cu esaki ta e manera cu Yehova ta aproba.

11. Con e congregacion cristian di prome siglo a trata otro sin mustra parcialidad?

¹¹ Den e congregacion cristian di prome siglo, cristiannan Hudiu y esnan cu no tawata Hudiu tawata igual. Pablo a splica: “Gloria y honor y pas pa cada hende cu ta haci bon, pa Hudiu prome y tambe pa Griego. Pasobra no tin distincion di persona serca Dios.” * (Romanonan 2:10, 11) Loke a determina si nan lo a beneficia di Yehova su bondad inmereci no tawata nan nacionalidad, sino e manera cu nan a reacciona riba loke nan a siña di Yehova y e prospectonan cu El a ofrece nan mediante e rescate di su Yiu, Hesus. (Huan 3:16, 36) Pablo a skirbi: “No ta esun cu ta Hudiu di pafo, ta Hudiu; ni sircuncision no ta loke ta wordo haci di pafo na e carni. Ma Hudiu ta esun cu ta Hudiu di paden; y sircuncision ta esun di curason, segun e spirito, no segun e letter.” Referiendo na e nificacion di e palabra “Hudiu” (di “Huda” cu ta nifica alaba of elogia), Pablo a agrega: “Un hende asina su elogio no ta bin di hende sino di Dios.” (Romanonan 2:28, 29) Yehova ta duna elogio sin haci distincion di persona. Nos ta haci mescos?

12. Ki speransa Revelacion 7:9 ta ofrece, y na ken?

¹² Despues, den un vision, apostel Huan a mira e fiel cristiannan ungi como un nacion spiritual di 144.000 persona cu a ser “seya for di tur e tribunan di e yiunan di Israel.” Despues di esaki Huan a mira “un multitud grandi . . . di tur nacion y tur tribu y pueblo y lenga, para dilanti di e trono y dilanti di e Lamchi, bisti na paña blanco y cu rama di palma den nan man.” (Revelacion 7:4, 9) Pesei, ningun grupo etnico (rasa) of idioma no ta ser exclui for di e congregacion cristian moderno. Hende di tur antecedente tin e speransa di sobrevivi e benidero “gran tribulacion” y bebe di “fuentenan di e awa di bida” den e mundo nobo.—Revelacion 7:14-17.

Resultadonan Positivo

13-15. (a) Con nos por supera e diferencianan cu tin di aber cu rasa y cultura? (b) Cita algun ehempel cu ta mustra ki beneficio un trato amabel por trece cu ne.

¹³ Yehova conoce nos mes bon cu un bon  tata conoce su yiunan. Di mes manera, ora nos cuminsa compronde otro hende door di mustra interes den nan cultura y antecedente, e diferencianan ta bira menos importante. Bareranan etnico ta disparce, y e lasonan di amistad y amor y nos union ta bira mas fuerte. (1 Corintionan 9:19-23) Nos por mira esaki bon cla pa via di e actividad di misioneronan cu ta sirbi den estranheria. Door cu e misioneronan ta mustra interes den e hendenan local, no ta dura masha cu nan ta sinti cu nan a bira parti di e congregacionnan local.—Filipensenan 2:4.

¹⁴ E resultadonan positivo di un trato imparcial ta bisto den hopi pais. Aklilu, originalmente di Etiopia, tawata sintie su so na Londen, capital di Gran Bretania. Su sintimentonan di soledad a bira piyo door di loke, pa e, tawata un falta general di amabilidad pa cu hende di otro pais, algo cu bo ta sinti den hopi stad grandi den e Europa djawe. Aklilu a sinti algo hopi diferente ora el a asisti na un reunion cristian na Salon di Reino di Testigonan di Yehova! Esnan presente a dun’e un bonbini, y no a dura masha cu e tawata sintie na cas. Su comprondemento y aprecio pa su Creador a crece masha lihe. No a dura masha cu el a cuminsa busca oportunidad pa predica e bon nobo di Reino na otronan den e districto ei. Ta asina cu un dia ora Aklilu su compañero di predicacion a puntr’e ki meta e kier logra den bida, mesora Aklilu a contesta cu e ta spera cu un dia e por ta parti di un congregacion cu ta papia Amarico, su idioma. Ora e ancianonan di e congregacion local di abla Ingles a tende esaki, mesora nan a haci areglo pa tene un discurso publico den e idioma nativo di Aklilu. Hopi hende stranhero y local a acepta e invitacion y a asisti hunto pa apoya e prome reunion publico na Amarico na Gran Bretania. Awe, Etiopenan y otro hende den e area ei ta uni den un congregacion Amarico floreciente. Hopi di nan a ripara cu no tawatin nada ta stroba nan di scohe pa sirbi Yehova y simbolisa nan dedicacion door di bautismo cristian.—Echonan 8:26-36.

¹⁵ Claro cu tin diferencia den personalidad y antecedencia. Pero esakinan no ta un base pa mustra cu hende ta superior of inferior na otro; nan ta simplemente diferencia. Durante un bautismo riba e isla di Malta di sirbidonan di Yehova cu resientemente a dedica nan mes, no ta solamente e Testigonan local a expresa nan emocion di goso; wowo di bishitantenan cu a bini for di Gran Bretania tambe a yena cu lagrima di goso. Tanto e grupo di Malta como esun di Gran Bretania a expresa nan sintimentonan, pero den un manera diferente, y nan amor fuerte pa Yehova a fortalece nan lasonan di hermandad cristian.—Salmo 133:1; Colosensenan 3:14.

Con Nos Por Supera Prehuicio

16-18. Relata un experencia cu ta mustra con nos por supera prehuicio den e congregacion cristian.

¹⁶ Segun cu nos amor pa Yehova y pa nos rumannan cristian ta bira mas profundo, nos por imita Yehova miho den e manera cu nos ta mira otro hende. Nos por supera cualkier  prehuicio cu nos por a yega di sinti pa cu un cierto nacionalidad, rasa of cultura. Tuma por ehempel, e caso di Albert kende a sirbi den Ehersito Britanico durante Segundo Guera Mundial y kende a ser captura ora cu Singapur a cai den man di e Haponesnan na 1942. Despues el a traha tres aña riba e “trein di morto”, den bicindario di loke a bira conoci como e brug riba Riu Kwai. Ora el a haya su libertad na fin di guera, e tawata pisa 32 kilo, e tawatin cachete y nanishi kibra, diarea cronico, renwe y malaria. Miles di su compañeronan di prizon tawata den un condicion piyo; hopi no a sobrevivi. Debi na tur e crueldadnan cu Albert a mira y experencia, el a bolbe cas na 1945 como un homber amarga, y no tawata kier tin nada di aber cu religion ni Dios.

¹⁷ Irene, casa di Albert, a bira Testigo di Yehova. Pa complac’e, Albert a asisti na algun reunion di e congregacion local di Testigonan di Yehova. Un hoben cristian cu yama Paul y cu ta den e sirbishi di tempo completo a bishita Albert pa studia Bijbel cu ne. No a dura masha cu Albert a compronde cu Yehova ta mira hende di acuerdo cu loke tin den nan curason. El a dedica su bida na Yehova y a batisa.

¹⁸ Despues Paul a muda bai Londen, el a siña Hapones y a cuminsa asocia cu un congregacion di abla Hapones. Ora el a avisa su congregacion anterior cu lo e bini hunto cu algun Testigo Hapones cu ta di bishita, e rumannan einan a corda cu Albert tawatin bastante prehuicio contra hende di Hapon. For di tempo cu Albert a regresa Gran Bretania, el a evita contacto cara cara cu cualkier hende di Hapon. Pesei e rumannan tawata puntra nan mes con lo el a bai trata cu e situacion. Nan no tawatin nodi precupa. Albert a ricibi e bishitantenan cu un amor fraternal sin reserva.—1 Pedro 3:8, 9.

“Habri Boso Curason Hancho”

19. Cua conseho di Pablo por yuda nos si nos tin cualkier tendencia di haci distincion di persona?

¹⁹ Rei sabi Salomon a skirbi: “No ta bon pa tin distincion di persona.” (Proverbionan 28:21) Ta facil pa tin un bon relacion cu un persona cu nos conoce bon. Sinembargo, nos sa tin e tendencia di no mustra mucho interes  den hende cu nos no conoce dje bon ei. No ta pas pa un sirbido di Yehova haci distincion di persona. Definitivamente, nos tur mester sigui e conseho cla cu Pablo a duna pa ‘habri nos curason hancho’, si, mustra nos amor tambe na compañeronan cristian cu background diferente.—2 Corintionan 6:13.

20. Den ki areanan di bida nos mester imita Yehova, nos Dios imparcial?

²⁰ Sea cu nos tin e privilegio di ta yama pa bida celestial of nos tin e prospecto di biba pa semper riba tera, e echo cu nos ta imparcial ta yuda nos ser uni den un tou, bou di un Wardador. (Efesionan 4:4, 5, 16) Si nos ta haci esfuerso pa imita Yehova, nos Dios imparcial, esaki por yuda nos den nos ministerio cristian, den nos famia, den congregacion, si, den tur area di bida. Con asina? E siguiente articulo lo trata e topico aki.

[Nota]

Con Lo Bo Contesta?

• Con Yehova a demostra cu E no ta haci distincion di persona den e caso di Rahab y di e Gabaonitanan?

• Con Hesus a mustra imparcialidad den e manera cu el a siña hende?

• Kico por yuda nos supera cualkier prehuicio debi na cultura y rasa?

[Preguntanan di Estudio]

[Plachi na pagina 13]

Israel ta cuminsa conkista Canan

[Plachi na pagina 15]

Hesus no a keda sin duna testimonio na un mohe Samaritano

[Plachi na pagina 16]

Un reunion publico na idioma Amarico na Gran Bretania

[Plachi na pagina 16]

Albert su amor pa Yehova a yud’e supera prehuicio