Pregunta di Lector

Satanas e Diabel por lesa hende su mente?

Maske nos no por ta absolutamente sigur tocante e asunto, ta parce cu ni Satanas ni su demoñonan no por lesa nos pensamento.

Pensa un rato riba e nombernan descriptivo cu Satanas a haya. E ta wordo yama Satanas (Resistido), Diabel (Calumniado), Colebra (sinonimo di Engañado), Tentado y Gañado. (Job 1:6; Mateo 4:3; Huan 8:44; 2 Corintionan 11:3; Revelacion 12:9) Ningun di e nombernan descriptivo aki ta indica cu Satanas tin e habilidad di lesa mente.

Pero na contraste, Yehova Dios si ta wordo describi como esun cu “ta sondea curason.” (Proverbionan 17:3; 1 Samuel 16:7; 1 Cronicanan 29:17) Hebreonan 4:13 ta bisa: “No tin ningun criatura scondi pa [Yehova] su bista, ma tur cos ta habri y bisto dilanti di wowo di esun cu nos tin di aber cu ne.” Nada straño anto cu Yehova a duna su Yiu, Hesus, e habilidad di sondea of samina curason. Hesus resusita a declara: “Ami ta esun cu ta samina mente y curason; y lo mi duna cada un di boso segun boso obranan.”—Revelacion 2:23.

Bijbel no ta bisa cu Satanas por sondea hende su mente y curason. Esaki ta importante, ya cu apostel Pablo ta sigura nos cu “[Satanas] su trikinan no ta desconoci” pa cristiannan. (2 Corintionan 2:11) Pues, nos no tin nodi sinti miedo cu Satanas tin cierto habilidad extraordinario cu nos no sa mes di dje.

No obstante, esaki no kiermen cu nos Adversario no por discerni kico ta nos debilidadnan. Satanas tawatin siglonan pa studia comportacion humano. E no tin nodi lesa mente pa discerni ki patronchi di comportacion nos tin, pa observa ki dibirticion nos lo busca, of pa scucha di kico nos ta papia, etcetera. Nos expresion di cara y nos lenguahe di curpa tambe por duna un idea ta kico nos ta pensa of sinti.

Pero en general, ainda Satanas ta uza e mesun trikinan cu el a uza den hofi di Eden: mentira, engaño y informacion robes. (Genesis 3:1-5) Maske cristiannan no mester tin miedo cu Satanas lo lesa nan mente, nan tin motibo pa ta precupa tocante ki pensamentonan Satanas ta purba hinca den nan mente. E kier pa cristian bira hende cu “mente corupto y priva di e berdad.” (1 Timoteo 6:5) Nada straño cu e mundo di Satanas ta bombardia nos cu informacion y dibirticion corupto. Pa resisti e atake aki, cristiannan mester proteha nan mente door di bisti “e helm di salbacion.” (Efesionan 6:17) Nan ta haci esaki door di yena nan mente cu berdadnan di Bijbel y evita contacto innecesario cu mal influencianan di e mundo di Satanas.

Satanas ta un enemigo poderoso. Pero nos no mester tin un miedo exagera p’e ni pa su demoñonan. Santiago 4:7 ta sigura nos: “Resisti Diabel y e lo hui for di boso.” Si nos sigui e conseho aki, nos lo por bisa mescos cu Hesus, cu Satanas no tin dominio riba nos.—Huan 14:30, NW.