Scol di Galad—60 Aña Entrenando Misionero

“NOS estudio intensivo di Bijbel a yuda nos hala mas serca Yehova y siña mas tocante su organisacion. Esaki a prepara nos pa biba den estranheria.” Asina un graduado di e prome klas a describi e curso di studio cu el a sigui na e Scol Biblico di Galad di Watchtower. For di tempo cu e Scol di Galad a cuminsa 60 aña pasa, e ta mandando misionero afo. Dia 8 di maart 2003, graduacion di e di 114 klas a tuma luga na e Centro Educativo di Watchtower na Patterson, New York. E 6.404 personanan cu a bini hunto den e sala y na otro sitionan caminda e presentenan por a sigui un transmision di e programa, a scucha cu atencion na e programa aki cu a consisti di discurso, entrevista y un sesion den cua e graduadonan a conta nan experencianan.

Theodore Jaracz, miembro di e Cuerpo Gobernante, a fungi como presidente di e programa. Su comentarionan di introduccion a hala atencion na e caracter internacional di e auditorio, cu tawata consisti di bishitantenan for di Asia, Caribe, Centro y Sur America y Europa. Ruman Jaracz a basa su comentarionan riba 2 Timoteo 4:5, y el a enfatisa kico ta e trabou principal di un misionero entrena na Galad: ‘Haci e trabou di evangelisa.’ E misioneronan ta duna testimonio di e berdad door di siña e hendenan Bijbel.

Instruccion Final pa e Studiantenan

Pa cuminsa cu un serie di discurso cortico, John Larson, miembro di e Comite di Sucursal di Merca, a papia riba un tema cu ta fortalece fe: “Si Dios Ta pa Nos, Ken Por Ta Contra Nos?” (Romanonan 8:31) E orado a duna e motibonan biblico pakico e studiantenan por tin confiansa absoluto den e poder di Yehova pa yuda nan vence cualkier obstaculo cu por presenta den nan asignacion. Uzando Romanonan 8:38 y 39, Ruman Larson a conseha e studiantenan: “Para un rato y pensa con Dios ta uzando su poder na fabor di boso, y corda cu nada no por stroba Yehova di mustra interes personal den boso.”

Despues a sigui Guy Pierce, miembro di Cuerpo Gobernante. El a scohe e tema “Mantene Boso Wowonan Felis!” (Lucas 10:23, NW) El a splica cu berdadero felicidad ta encera conoce Yehova y compronde su proposito eterno y tambe mira e cumplimento di profecia di Bijbel. Unda cu e studiantenan bai, nan por mantene berdadero felicidad door di mantene nan wowo felis. Ruman Pierce a anima e graduadonan pa medita profundamente riba e bondad di Yehova y mantene nan mente y curason enfoca riba Su boluntad. (Salmo 77:12) Door di keda cu un actitud positivo, e graduadonan por vence cualkier problema cu por presenta den nan caminda.

Despues, dos di e rumannan cu a sirbi como instructor riba un base diario a duna e klas palabranan di estimulo como despedida. E titulo di Lawrence Bowen su discurso tawata “Bo Ta Buscando Gloria?” Mayoria hende cu ta pensa riba e palabra gloria ta  conecta esei cu alabansa, honor y distincion pa nan mes. Sinembargo, e salmista Asaf a bin compronde kico ta berdadero gloria; esei ta e tesoro preciosisimo di un relacion bendiciona cu Yehova. (Salmo 73:24, 25) E orado a anima e graduadonan pa mantene un relacion intimo cu Yehova mediante un studio di Bijbel profundo y continuo. E angelnan “ta anhela di mira” con e detayenan relaciona cu e realisacion di Yehova su proposito mediante Cristo lo cumpli. (1 Pedro 1:12) Nan kier siña mas tanto posibel tocante nan Tata pa por refleha su gloria. E ora ei e orado a anima e studiantenan pa glorifica Yehova den nan asignacion como misionero door di yuda otro hende haya e tesoro di balor incalculabel.

E secretario di e scol, Wallace Liverance, a conclui e prome serie di discurso cu e tema “Papia e Sabiduria di Dios den un Secreto Sagrado.” (1 Corintionan 2:7, NW) Kico ta e sabiduria di Dios aki cu apostel Pablo a papia di dje durante su sirbishi como misionero? Esei ta e medio sabi y poderoso cu Yehova lo uza pa trece pas y union universal. E sabiduria aki ta enfoca riba Hesus. Pablo no a predica un evangelio social, mas bien el a yuda e hendenan mira con Dios lo elimina e consecuencianan di e pica di Adam. (Efesionan 3:8, 9) E orado a haci  un apelacion na e studiantenan: “Uza boso privilegio di sirbishi mescos cu Pablo, kende a mira su asignacion como misionero como un oportunidad pa yuda hende mira con Yehova ta bai cumpli cu su proposito.”

Despues di esaki, Mark Noumair, otro instructor di Galad, a dirigi un sesion anima cu varios studiante di e klas. E tema “Un Studio di e Palabra di Dios Ta Produci Predicadonan Celoso” a resalta Pablo su palabranan na Romanonan 10:10. E klas a relata varios experencia di sirbishi di veld cu nan tawatin durante e tempo cu nan a asisti na e scol. Nan experencianan a demostra cu ora nos studia e Palabra di Dios y medita riba dje, e bon cosnan relaciona cu Yehova Dios y su Reino lo yena nos curason. Y ta di e cosnan ei nos lo papia. Durante e cinco lunanan cu e studiantenan a pasa na e Centro Educativo di Watchtower, nan a cuminsa mas cu 30 studio di Bijbel cu personanan interesa den e teritorionan cu e congregacionnan eibanda ta traha cu frecuencia.

Bos di Experencia Ta Duna Conseho Sano

Durante e curso, e studiantenan a beneficia di e asociacion cu miembronan di e famia di Betel di Merca. Miembronan di e personal di sucursal, Robert Ciranko y Robert P. Johnson, a entrevista varios fiel sirbido di Yehova cu hopi aña di sirbishi, entre cua superintendentenan biahero cu actualmente ta ricibiendo entrenamento special na e Centro Educativo di Watchtower. Tur e personanan entrevista tawata graduadonan di Galad cu un tempo a yega di traha como misionero. Tawata un bunita animacion pa e studiantenan, y nan famia- y amigonan, tende palabranan di sabiduria di e hombernan spiritual y experencia aki.

Algun di e consehonan tawata: “Keda mas ocupa posibel den sirbishi y den congregacion.” “No tuma bo mes mucho na serio. Keda enfoca riba bo proposito como misionero, y mira bo asignacion como bo hogar.” Otro comentarionan balioso a ilustra con entrenamento di Galad ta prepara un minister pa bon obra, sin importa unda e ta asigna. Ata algun di e comentarionan aki: “Nos a siña coopera y traha hunto.” “E scol a yuda nos acepta culturanan nobo.” “Nos a siña uza e Scritura for di un otro angulo.”

John E. Barr, miembro di hopi tempo di e Cuerpo Gobernante, a duna e discurso principal di e programa. Su tema biblico tawata “Nan Bos A Sali Bai den Henter e Tera.” (Romanonan 10:18) El a lansa e pregunta: E pueblo di Dios por a cumpli cu e tarea dificil aki awe? Sigur cu si! For di 1881, e revista Toren di Vigilancia a puntra su lectornan: “Abo ta predica?” Anto e orado a recorda tur e presentenan di e yamada historico na e congreso di 1922 na Cedar Point, Ohio, Merca: “Anuncia e Rei y su Reino!” Den transcurso di añanan, e celo di Dios su fiel sirbidonan a impulsa nan pa declara e berdadnan maraviyoso di Reino na tur nacion. Cu boca y mediante literatura, e expresionnan di e bon nobo a alcansa tur skina di e tera habita—tur esei pa e honor y gloria di Yehova. Den un conclusion conmovedor, Ruman Barr a stimula e graduadonan pa conta nan bendicionnan. El a bisa nan: “Tur dia, ora bo ta na e luga caminda nos a manda bo y bo ta haci oracion na Dios, gradicie di henter bo curason cu El a permiti bo contribui na cumplimento di e palabranan, ‘nan bos a sali bai den henter e tera.’”

Despues di e discurso aki, a lesa saludonan, y e presidente a entrega diploma na cada graduado. Despues, cu sintimentonan mixto di goso y tristesa pa motibo cu nan ta bai laga e scol tan stima, un representante di e klas a lesa un resolucion di curason dirigi na e Cuerpo Gobernante y e famia di Betel, expresando e determinacion di e graduadonan pa alaba Yehova “for di awor y pa semper.”—Salmo 115:18.

Nos ta pidi Yehova yuda e graduadonan aki ahusta nan mes na nan hogar nobo y duna un contribucion excelente na e progreso di e trabou di predica rond mundo, mescos cu esnan cu a bai prome cu nan ta haciendo pa 60 aña caba.

[Cuadro na pagina 23]

ESTADISTICANAN DI E KLAS

Cantidad di pais representa: 12

Cantidad di pais na cua a asigna nan: 16

Cantidad di studiante: 48

Edad promedio: 34,4

Promedio di aña den e berdad: 17,6

Promedio di aña den sirbishi di tempo completo: 13,5

[Plachi na pagina 24]

E di 114 Klas di Graduadonan di e Scol Biblico di Galad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.