Amor Ta Indespensabel

NO TA importa edad, cultura, idioma of rasa; tur hende tin un hamber pa amor. Si nan no satisface e hamber ei, nan no ta felis. Un investigado medico a skirbi: “Amor y relacionnan intimo ta e causa fundamental di loke ta haci nos malo y loke ta haci nos bon, di loke ta ocasiona tristesa y loke ta trece felicidad, di loke ta pone nos sufri y loke ta hiba na curacion. Si un remedi nobo tawatin e mesun impacto, anto practicamente tur docter di nos pais lo a recomend’e na nan pashentnan. Un docter cu no skirbi e recept ei pa su pashent lo ta masha negligente.”

No obstante, sosiedad moderno, specialmente su medionan di comunicacion y su figuranan popular cu hende gusta imita, hopi bes ta pone mas enfasis riba rikesa, poder, fama y sex cu riba e necesidad cu hende tin di relacionnan caloroso y amoroso. Hopi educado ta boga pa sigui metanan materialista y un carera den bida. Pa nan, un persona exitoso ta uno cu a logra un bon posicion den sosiedad. Ta berdad cu educacion y desaroyo di talentonan ta importante, pero bo mester bai asina ciegamente tras di nan cu no ta resta tempo pa amigo y famia? Un escritor bon educa di hopi tempo pasa y kende a studia naturalesa humano a fondo, a compara un persona talentoso pero sin amor cu un “gong cu ta zona of un cimbal cu ta resona.” (1 Corintionan 13:1) Hende asina por bira rico, asta famoso, pero nunca berdaderamente felis.

Hesucristo, kende tawatin un comprondemento profundo di hende y un cariño masha special pa nan, a duna amor pa Dios y pa prohimo e luga central den su siñansa. El a bisa: “Stima SEÑOR bo Dios cu henter bo curason, y cu henter bo alma, y cu henter bo mente. . . . Stima bo prohimo manera bo mes.” (Mateo 22:37-39) Ta solamente esnan cu sigui e palabranan aki lo ta berdadero siguido di Hesus. Pesei, el a bisa: “Na esaki tur hende lo sa cu boso ta mi disipel, si boso tin amor un pa otro.”—Huan 13:35.

Pero con bo ta cultiva amor den e mundo djawe? Y con mayornan por siña nan yiunan mustra amor? E siguiente articulo lo contesta e preguntanan aki.

[Plachi na pagina 3]

No ta facil pa cultiva amor den un mundo golos pa cos