Con Nos Por Cultiva Berdadero Amor

“Amor ta e cura lo todo di bida; amor ta bida.” —Living to Purpose (Biba cu un Proposito), di Joseph Johnson, 1871.

CON un hende ta siña stima? Door di studia psicologia? Door di lesa buki pa desaroyo personal? Door di wak pelicula romantico? Claro cu no. Hende ta siña stima na prome luga door di e ehempel y educacion di nan mayornan. Yiunan lo siña e nificacion di amor si, den un ambiente di tierno cariño, nan mira nan mayornan alimenta nan y proteha nan, comunica cu nan, y mustra interes personal profundo den nan. Tambe nan ta siña stima ora nan mayornan siña nan biba segun e principionan sano di loke ta bon y malo.

Berdadero amor ta mas cu djis un emocion superficial. E ta busca semper loke ta e miho interesnan di otro hende, asta ora cu na cierto momento nan no ta compronde esei completamente, y specialmente serca mucha esei sa ta e caso ora mester disiplina nan cu amor. Un ehempel perfecto di un persona cu ta mustra amor inegoista ta e Creador mes. Apostel Pablo a skirbi: “Mi yiu, no menosprecia e disiplina di SEÑOR, ni desmaya ora cu e reprende bo; pasobra esnan cu SEÑOR ta stima, e ta disiplina.”—Hebreonan 12:5, 6.

Mayornan, con boso por imita Yehova den mustra amor na boso famia? Y con importante e ehempel cu boso ta pone den boso relacion cu otro como esposo y esposa ta?

Siña Yiu Kico Ta Amor cu Boso Ehempel

Si bo ta un esposo, bo ta aprecia bo casa y dun’e hopi balor? Bo ta trat’e cu honor y respet? Si bo ta un esposa, bo ta un persona amoroso y bo ta apoya bo casa? Bijbel ta bisa cu esposo y esposa mester stima otro y respeta otro. (Efesionan 5:28; Tito 2:4) Ora nan ta haci esei, nan yiunan ta mira personalmente con mester mustra amor cristian. Esei por ta un les masha efectivo y balioso!

Tambe mayornan ta promove amor na cas ora nan ta pega na normanan halto pa e famia relaciona cu cosnan manera dibirticion, moralidad, metanan y prioridadnan. Rond mundo, hende a ripara cu Bijbel ta un gran yudansa pa fiha e normanan di famia ei, dunando evidencia palpabel cu Bijbel en berdad “ta inspira pa Dios y ta util pa siñansa, pa reprendemento, pa coreccion, pa educa den husticia.” (2 Timoteo 3:16) Si, hopi hende ta considera por ehempel e consehonan y principionan  moral di bida den e Sermon Riba Sero como algo sin igual.—Mateo, capitulo 5 pa 7.

Ora henter e famia ta acudi na Dios pa guia y ta pega na su normanan, cada individuo ta sinti su mes mas sigur y yiunan tin mas chens di crece cu amor y respet pa nan mayornan. Di otro banda, den un cas caminda mayornan ta midi cu dos midi, of caminda e normanan ta robes of suak, esei por irita e yiunan, pone nan rabia y bira rebelde.—Romanonan 2:21; Colosensenan 3:21.

Kico di mayornan soltero? Nan tin un desbentaha serio den siña nan yiunan kico ta amor? No necesariamente. Aunke no tin miho cu un mama y tata cu ta traha hunto como un bon team, experencia ta mustra cu te na cierto grado e calidad di relacionnan di famia por compensa e ausencia di un di e mayornan. Si bo ta un mayor soltero, haci esfuerso pa aplica principionan di Bijbel den bo cas. Si, un proverbio ta bisa nos: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” Un di e “bereanan” ei ta bo trabou como mayor.—Proverbionan 3:5, 6; Santiago 1:5.

Den e miles di congregacionnan cristian di Testigonan di Yehova rond mundo tin hopi hoben excelente cu awor ta sirbiendo Dios fielmente pero cu a lanta den cas cu un solo mayor. Esaki ta evidencia cu mayornan soltero tambe por tin exito den siña nan yiunan tocante amor.

Con Nos Tur Por Cultiva Amor

Bijbel a profetisa cu den “e ultimo dianan” hende lo ta “sin amor”, esta sin e cariño natural cu miembronan di famia por lo general mester tin pa otro. (2 Timoteo 3:1, 3) Pero, asta hende cu kisas a lanta den un ambiente den cua no tawatin cariño por siña cultiva amor. Con? Door di siña for di Yehova, kende ta e Fuente di amor y kende ta demostra amor y cariño na tur persona cu di curason ta acudi na dje. (1 Huan 4:7, 8) “Maske mi tata y mi mama bandona mi, SEÑOR lo recohe mi”, segun un salmista.—Salmo 27:10.

Yehova ta expresa su amor pa nos den hopi diferente manera. Esakinan ta entre otro e manera amoroso cu e ta guia nos pa medio di Bijbel, e yudansa cu e ta duna nos pa medio di spirito santo y e sosten caloroso cu nos ta ricibi di e hermandad cristian. (Salmo 119:97-105; Lucas 11:13; Hebreonan 10:24, 25) Laga nos wak con e tres percuracionnan aki por yuda bo crece den amor pa Dios y pa prohimo.

Guia Inspira Duna cu Amor

Pa nos por cultiva un relacion di cariño cu un persona, nos tin cu conoce e persona ei bon. Door di revela su mes mediante e paginanan di Bijbel, Yehova ta invita nos pa hala serca dje. Sinembargo, lesa Bijbel so no ta basta. Nos tin cu aplica su siñansanan y mira pa nos mes e beneficionan cu esei ta duna. (Salmo 19:7-10) “Ami ta SEÑOR bo Dios, Kende ta siña bo, pa bo prospera, Kende ta guia bo den e caminda cu bo mester cana”, segun Isaias 48:17. Si, Yehova, e personificacion di amor, ta instrui nos pa nos beneficio—no pasobra e kier restringi nos libertad cu reglanan innecesario.

Un conocemento exacto di Bijbel tambe ta yuda nos crece den amor pa nos prohimo.  Esei ta pasobra e berdad di Bijbel ta siña nos con Dios ta mira hende. Ademas e ta siña nos a base di ki principionan nos mester trata otro hende. Cu e informacion ei, nos tin un base solido pa cultiva amor pa prohimo. Apostel Pablo a bisa: “Esaki ta mi oracion, cu boso amor por abunda mas y mas ainda den conocemento berdadero [“exacto”, NW] y tur discernimento.”—Filipensenan 1:9.

Pa ilustra con conocemento exacto por yuda hende mustra amor den e manera corecto, considera e berdad fundamental declara na Echonan 10:34 y 35: “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.” Si Dios ta evalua hende segun nan obranan husto y nan temor p’e, y no segun nan nacionalidad of rasa, nos no mester mira nos prohimo for di e mesun punto di bista imparcial?—Echonan 17:26, 27; 1 Huan 4:7-11, 20, 21.

Amor—Un Fruta di Dios Su Spirito

Mescos cu un awasero na tempo ta yuda un cunucu produci un bon cosecha, asina e spirito di Dios por produci den personanan receptivo cualidadnan cu Bijbel ta describi como ‘fruta di spirito.’ (Galationan 5:22, 23) Esun di mas principal ta e fruta di amor. (1 Corintionan 13:13) Pero con nos por haya e spirito di Dios? Un manera vital ta mediante oracion. Si nos ta pidi Dios pa su spirito, lo e duna nos e. (Lucas 11:9-13) Abo ta sigui pidi pa spirito santo? Si bo ta hacie, e ora ei su fruta precioso, entre cua amor, mester bira mas bisto cu nunca den bo bida.

Sinembargo, tin un otro clase di spirito cu ta obra contra e spirito di Dios. Bijbel ta yama esaki “e spirito di mundo.” (1 Corintionan 2:12; Efesionan 2:2) Esei ta un influencia malbado, y su fuente ta Satanas e Diabel mes, “prins di e mundo aki” di humanidad aleha for di Dios. (Huan 12:31) Mescos cu biento ta lanta stof cu sushi, asina “e spirito di mundo” ta lanta deseonan perhudicial cu ta caba cu amor y stimula e debilidadnan di carni.—Galationan 5:19-21.

Hende ta absorba e spirito malbado ei ora nan ta expone nan mes na pensamento materialista, na e idea di ami prome, na actitudnan violento y na e punto di bista eroneo y hopi bes troci di amor cu ta asina comun den mundo. Si bo kier crece den berdadero amor, bo mester resisti e spirito di mundo fuertemente. (Santiago 4:7) Sinembargo, no confia den bo mes forsa; pidi Yehova yuda bo. Su spirito—e forsa di mas poderoso den universo—por fortifica bo y duna bo exito.—Salmo 121:2.

Siña Amor for di e Hermandad Cristian

Mescos cu yiu ta siña mustra amor door di experenci’e na cas, asina nos tur—hoben y bieu—por crece den amor door di asocia cu otro cristiannan. (Huan 13:34, 35) En berdad, un di e funcionnan principal di e congregacion cristian ta pa percura un ambiente den  cua e miembronan por “stimula otro pa stima y haci bon obra.”—Hebreonan 10:24.

Specialmente hende cu ta “cansa y plama” den e mundo aki sin amor ta duna hopi balor na e amor ei. (Mateo 9:36) Experencia a demostra cu un amistad yen di amor entre hende grandi por yuda vence hopi di e mal efectonan di un infancia cu a carece di amor. Pesei ta masha importante anto pa tur cristian dedica ricibi e nobonan den nan seno na un manera caloroso!

“Amor Nunca No Ta Faya”

Bijbel ta bisa cu “amor nunca no ta faya.” (1 Corintionan 13:8) Con asina? Apostel Pablo ta bisa nos: “Amor tin pasenshi, amor ta cariñoso y no ta yalurs; amor no ta gaba, y no ta arogante, e no ta comporta su mes indecente; e no ta busca su propio interes, e no ta wordo proboca, e no ta warda rencor.” (1 Corintionan 13:4, 5) Ta bisto anto cu e amor aki no ta djis un emocion imaginario of un sintimento superficial. Al contrario, esnan cu ta demostr’e ta conciente cu bida tin su desapuntonan y dolornan, pero nan no ta laga esakinan caba cu nan amor pa prohimo. Un amor asina ta berdaderamente un “laso perfecto di unidad.”—Colosensenan 3:12-14.

Tuma por ehempel e caso di un mucha mohe cristian di 17 aña na Corea. Ora el a cuminsa sirbi Yehova Dios, su famia no a gusta esei niun tiki y e mester a sali for di cas. Sinembargo, en bes di rabia, el a haci oracion tocante e asunto y a laga Dios su Palabra y spirito dirigi su pensamentonan. Despues di esei, el a skirbi carta na su famia diferente biaha, y semper su palabranan a refleha e cariño y afecto sinsero cu e tawatin pa nan. Como resultado di esaki, dos di su ruman hombernan mas grandi a cuminsa studia Bijbel y awor ta cristiannan dedica. Su mama y ruman homber mas jong tambe a acepta e berdad di Bijbel. Finalmente, su tata, kende tawata masha contra dje, tambe a cambia su punto di bista. E hoben Testigo ta skirbi: “Nos tur a casa cu un cristian, y nos famia di adoradonan uni ta consisti awor di un total di 23 miembro.” Ki un victoria pa amor!

Bo kier cultiva berdadero amor y yuda otro hende haci mescos? Anto acudi na Yehova, e Fuente di e cualidad precioso ei. Si, tuma su Palabra na pecho, pidi pa spirito santo y asocia regularmente cu e hermandad cristian. (Isaias 11:9; Mateo 5:5) Ta masha alentador pa sa cu pronto tur maldad lo disparce, lagando solamente esnan cu ta practica berdadero amor cristian! En berdad, amor ta e clave pa felicidad y bida.—Salmo 37:10, 11; 1 Huan 3:14.

[Plachi na pagina 6]

Oracion y un studio di e Palabra di Dios lo yuda nos cultiva berdadero amor