“El A Yena un Bashi den Mi Curason”

“MI KIER gradici boso di henter mi curason pa e bunita regalo Hala Serca Yehova. El a yena un bashi den mi curason: e necesidad di sinti cu Yehova ta stima mi y aprecia mi. Awor mi ta sinti mi hopi mas serca di Yehova y su Yiu stima. Mi kier conta tur hende tocante e buki aki y duna un ehemplar na tur mi sernan keri.” Esei ta loke un Testigo di Yehova a bisa di e buki nobo di 320 pagina cu a sali publica na e Congresonan di Districto “Proclamadonan Celoso di e Reino” cu a ser teni durante aña 2002-2003. Laga nos analisa algun rasgo di e buki nobo aki y e motibo pakico el a ser publica.

Algun Rasgo di e Buki Nobo

Kico e buki nobo aki tin aden? Tur e informacion presenta den e dos articulonan di studio di e revista aki y hopi mas! E buki tin 31 capitulo, y cada un ta mas o menos mes largo cu un articulo di studio di Toren di Vigilancia. Despues di e prologo y e prome tres capitulonan, e buki ta parti den cuater seccion, un pa cada cualidad principal di Yehova. Cada seccion ta habri cu un capitulo cu ta duna un idea general di e cualidad cu ta ser trata. E capitulonan cu ta sigui ta trata e manera cu Yehova ta desplega e cualidad ei. Cada seccion tin un capitulo tocante Hesus. Dicon? Wel, Hesus a bisa: “Esun cu a mira mi a mira e Tata.” (Huan 14:9) Door cu Hesus a refleha Yehova su cualidadnan perfectamente, el a percura pa nos algun ehempel bibo di Dios su cualidadnan den accion. Cada seccion ta conclui cu un capitulo cu ta siña nos con pa imita Yehova den desplega e cualidad cu a wordo trata. E buki nobo aki cu ta analisa Yehova su cualidadnan ta referi na tur buki di Bijbel.

E buki Hala Serca Yehova tin tambe algun rasgo special. Cuminsando na capitulo 2, cada capitulo tin un cuadro titula: “Pregunta pa Medita Ariba.” E textonan biblico y preguntanan cu tin den e cuadro no ta pa repasa e capitulo. Mas bien, nan ta diseña pa yuda bo uza Bijbel pa medita profundamente riba e tema. Ta recomendabel pa bo lesa tur e pasashinan di Bijbel cu sumo atencion. Caba medita riba e pregunta, y trata di aplic’e na bo mes. E manera ei di medita por stimula bo curason, y lo yuda bo hala asta mas y mas serca di Yehova.—Salmo 19:14.

E plachinan den e buki Hala Serca Yehova a wordo prepara y investiga cuidadosamente pa nan por educa y motiva. Den 17 capitulo tin plachi di esenanan biblico masha bunita riba henter un pagina.

Dicon A Public’e?

Dicon a publica e buki Hala Serca Yehova? E proposito principal di e publicacion nobo aki ta pa yuda nos siña conoce Yehova miho di manera cu nos lo por forma un relacion personal mas fuerte cu nos Dios.

Bo por pensa riba un hende cu lo beneficia di e buki Hala Serca Yehova, kisas un studiante di Bijbel of asta un ruman cristian cu ta inactivo? Ke tal di abo? Bo a cuminsa lesa e buki nobo aki? Si no ta asina, dicon bo no ta programa tempo pa cuminsa mas pronto posibel? Tuma bo tempo pa reflexiona riba loke bo ta lesa. Nos ta spera cu e publicacion nobo aki lo yuda bo hala semper mas serca di Yehova Dios, ya asina bo por proclama su bon nobo di Reino cu mas celo y goso!