“Mira, Esaki Ta Nos Dios”
“Mira, Esaki Ta Nos Dios”
E informacion cu ta ser trata den e dos articulonan di studio aki ta basa riba e buki Hala Serca Yehova. E buki aki a keda presenta na e congresonan di districto cu a ser teni rond mundo durante aña 2002-2003.—Wak e articulo “El A Yena un Bashi den Mi Curason”, na pagina 20.
“Mira, esaki ta nos Dios, riba kende nos a spera pa e salba nos. Esaki ta e SEÑOR.”—ISAIAS 25:9.
1, 2. (a) Kico Yehova a yama e patriarca Abraham, y kico esaki lo por pone nos puntra nos mes? (b) Con Bijbel ta sigura nos cu nos por tin un amistad intimo cu Dios?
“MI AMIGO.” Asina Yehova, Creador di shelo y tera, a yama e patriarca Abraham. (Isaias 41:8) Djis imagina bo: un simpel hende disfrutando di un amistad cu e Señor Soberano di universo! Kisas bo ta puntra bo mes: ‘Ami lo por tin un amistad asina sera cu Dios?’
2 Bijbel ta sigura nos cu nos por tin un amistad intimo cu Dios. Abraham a haya chens di tin tal amistad intimo pasobra el a pone fe den Yehova. (Santiago 2:23) Awe tambe, Yehova “tin comunion intimo cu e hende recto.” (Proverbionan 3:32) Na Santiago 4:8, Bijbel ta anima nos: “Hala serca Dios y e lo hala serca boso.” Pues ta bisto cu si nos dal paso pa hala serca Yehova, lo e reacciona riba esei. De echo, e tambe lo hala serca nos. Pero, e palabranan inspira aki ta nifica cu ta nos—hende imperfecto y pecaminoso—ta dal e prome paso? No, di ningun manera. Ta door cu Yehova a dal dos paso importante caba, ta posibel pa nos por tin amistad intimo cu ne.—Salmo 25:14.
3. Cua dos paso Yehova a dal pa haci posibel cu nos por forma un amistad cu ne?
3 Como prome paso, Yehova a haci areglo pa Hesus “duna su bida como prijs di rescate pa hopi.” (Mateo 20:28) E sacrificio di rescate ei a habri caminda pa nos por tin un amistad intimo cu Dios. Bijbel ta declara: “Nos ta stima, pasobra el a stima nos prome.” (1 Huan 4:19) Si, siendo cu Dios “a stima nos prome”, ta e a pone e base pa nos por forma un amistad cu ne. Como di dos paso, Yehova a revela su mes na nos. Ora nos sera amistad cu un hende, e banchi di e amistad ei ta basa riba e echo cu nos conoce e persona a fondo y ta admir’e y apreci’e pa su caracteristicanan unico. Pensa un rato kico esaki ta nifica. Si Yehova tawata un Dios scondi cu nos no por a conoce, nunca nos lo por tawatin amistad cu ne. Sinembargo, en bes di sconde su mes, Yehova kier pa nos siña conoc’e. (Isaias 45:19) Den su Palabra, Bijbel, Yehova ta revela su mes di un manera cu nos por compronde. Esaki ta duna prueba no solamente cu e ta stima nos, pero cu e kier pa nos siña conoc’e y stim’e como nos Tata celestial.
4. Con nos lo sinti tocante Yehova segun cu nos ta siña conoce su cualidadnan miho?
4 Bo a yega di mira un mucha chikito bisa su amiguitonan cu echt un goso y orguyo inocente: “Ata mi papi ei”? Dios su adoradonan tin tur motibo pa sinti mescos pa cu Yehova. Bijbel ta profetisa di un tempo ora cu hende fiel lo bisa: “Mira, esaki ta nos Dios.” (Isaias 25:8, 9) Mas profundo e conocemento cu nos adkiri di e cualidadnan di Yehova ta, mas nos lo sinti cu nos tin e miho Tata y e Amigo di mas intimo cu nos por imagina. Si, door di compronde Yehova su cualidadnan, nos ta haya hopi motibo pa hala serca dje. Pesei laga nos examina con Bijbel ta revela Yehova su cualidadnan principal, esta, poder, husticia, sabiduria y amor. Den e articulo aki nos lo trata e prome tres cualidadnan.
“Excelente den Poder”
5. Dicon ta na su luga cu ta Yehova so ta wordo yama “Todopoderoso”, y den ki maneranan e ta uza su inmenso poder?
5 Yehova ta “excelente den poder.” (Job 37:23) Yeremias 10:6 ta bisa: “No tin ningun manera bo, o SEÑOR; grandi bo ta, y bo nomber ta grandi den poder.” Distinto di tur criatura, Yehova su poder no tin limite. Ta pesei mes ta e so ta wordo yama “Todopoderoso.” (Revelacion 15:3) Yehova ta uza su inmenso poder pa crea, destrui, proteha y restaura. Laga nos considera djis dos ehempel: su poder di crea y su poder di proteha.
6, 7. Con poderoso solo ta, y di ki berdad importante e ta duna prueba?
6 Si bo ta para pafo riba un dia sin nubia, kico bo ta sinti riba bo cuero? E cayente di solo. Pero loke en realidad bo ta sinti ta e resultado di Yehova su poder di crea. Con poderoso solo ta? Den su nucleo, e temperatura ta mas o menos 15 miyon grado Celsius. Si bo por a kita djis e tamaño di un cabes di feneta for di e nucleo di solo y pon’e aki riba tera, lo bo mester para na un distancia di 140 kilometer pa e no haci bo daño! Cada seconde, solo ta produci mes tanto energia cu e explosion di cientos di miyones di bom nuclear. Sinembargo, tera ta drei net na e distancia corecto for di e inmenso forno termonuclear ei cu yama solo. Si tera tawata mucho serca di solo, tur awa na mundo lo a evapora; si e tawata mucho leu, tur awa lo a vries. Tur dos extremo lo a haci bida riba nos planeta imposibel.
7 Maske nan bida ta depende di solo, hopi hende no ta para pensa riba e manera cu solo ta funciona. Door di esei nan no ta capta e les cu solo por siña nos. Salmo 74:16 ta bisa di Yehova: “Abo a prepara lus y solo.” Si, solo ta glorifica Yehova, “e Creador di shelo y tera.” (Salmo 146:6) Asina mes esaki ta djis un di e tantisimo cosnan di creacion cu ta siña nos tocante Yehova su inmenso poder. Mas nos siña tocante Yehova su poder di crea, mas respet y admiracion nos ta haya p’e.
8, 9. (a) Ki ilustracion tierno ta mustra nos cu Yehova ta dispuesto pa proteha y cuida su adoradonan? (b) Ki cuido un wardado den tempo biblico a percura pa su carnenan, y kico esaki ta siña nos tocante nos Gran Wardado?
8 Tambe Yehova ta uza su poder inmenso pa proteha su sirbidonan y cuida nan. Bijbel ta uza algun ilustracion bibo y conmovedor pa describi e maneranan cu Yehova a priminti di duna cuido y proteccion. Por ehempel, tuma nota di Isaias 40:11. Einan Yehova ta compara su mes cu un wardado di carne, y su pueblo cu carne. Nos ta lesa: “Manera un wardado di carne e lo cuida su tou, e lo cohe e lamchinan den su brasa, y tene nan serca di su curason; cu ternura e lo guia esnan cu tin yiu chikito.” Bo por visualisa loke e versiculo ei ta describi?
9 Masha poco bestia ta asina indefenso manera carne. Un wardado den tempo biblico mester tawatin curashi pa proteha su carnenan for di wolf, beer y leon. (1 Samuel 17:34-36; Huan 10:10-13) Pero tawatin bes cu e mester a mustra ternura ora di proteha y cuida su carnenan. Por ehempel, si un carne a werp leu di e tou, con e wardado lo a proteha e lamchi indefenso cu a caba di nace? Lo el a carg’e—kisas pa varios dia—“serca di su curason”, es decir, den e plooinan di su paña cu a forma un saco na su pecho. Pero con un lamchi tawata logra yega te den brasa di e wardado di carne? Kisas e lamchi tawata bai serca e wardado y asta pasa push’e na su pia. Pero ta e wardado di carne lo tawatin cu sak abou y saca man pa coi e lamchi, anto dun’e proteccion den su brasanan. Esta un descripcion tierno! E ta mustra con dispuesto nos Gran Wardador ta pa proteha y cuida su sirbidonan!
10. Ki proteccion Yehova ta percura awe, y dicon e proteccion ei ta hopi importante?
10 Pero Yehova a haci mas cu djis priminti proteccion. Den tempo biblico el a demostra den maneranan milagroso cu e por “libra hende deboto na dje for di prueba.” (2 Pedro 2:9, NW) Kico djawe? Nos sa cu aworaki e no ta uza su poder pa proteha nos di tur calamidad. Pero e ta duna nos algo mas importante si, esta, proteccion spiritual. Nos Dios amoroso ta proteha nos di daño spiritual door di ekipa nos cu loke nos tin mester pa por wanta prueba y proteha e relacion precioso cu nos tin cu ne. Por ehempel, Lucas 11:13 ta bisa: “Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!” E forsa poderoso ei por ekipa nos pa handle cualkier prueba of problema cu nos por confronta. (2 Corintionan 4:7) Pues, Yehova ta traha pa preserva nos bida, no pa djis un par di aña cortico so, sino pa eternidad. Cu e speransa ei na mente, nos en berdad ta mira cualkier sufrimento den e mundo aki como algo ‘leve y pa un momento so.’ (2 Corintionan 4:17) Nos no ta sinti nos atrai na un Dios cu di un manera asina amoroso ta uza su poder na nos beneficio?
Yehova “Ta Stima Husticia”
11, 12. (a) Dicon Yehova su husticia ta atrae nos na dje? (b) Na ki conclusion David a yega relaciona cu Yehova su husticia, y con e palabranan inspira aki por consola nos?
11 Yehova ta haci loke ta husto y recto, y e ta haci esei consistentemente, sin haci distincion di persona. Husticia dibino no ta un cualidad severo sin sintimento cu ta aleha nos for di Dios. Al contrario, e ta un cualidad atractivo cu ta pone nos hala serca Yehova. Bijbel ta describi bon cla e caracter alentador di e cualidad aki. Pesei laga nos analisa tres manera den cua Yehova ta eherce husticia.
12 Na prome luga, Yehova su husticia ta motiv’e pa mustra fieldad y lealtad na su sirbidonan. E salmista David personalmente a experencia e faseta aki di Yehova su husticia. Ki conclusion David a saca for di su experencia personal y for di su estudio di Dios su manera di haci cosnan? El a declara: “SEÑOR ta stima husticia y no ta bandona su santonan. Nan ta keda preserva pa semper.” (Salmo 37:28) Ki un garantia consolador! Ni pa un momento so nos Dios lo no bandona esnan cu ta santo of leal na dje. Pesei nos por conta cu su amistad y cuido amoroso. Su husticia ta garantisa esaki!—Proverbionan 2:7, 8.
13. Con Yehova su precupacion pa esnan margina tawata bisto den e Lei cu el a duna Israel?
13 Na di dos luga, husticia dibino ta tene cuenta cu e necesidadnan di esnan cu ta sufri. Yehova su precupacion pa esnan margina ta bisto den e Lei cu el a duna Israel. Por ehempel, e Lei tawatin areglo pa haci sigur cu huerfano y biuda ta haya cuido. (Deuteronomio 24:17-21) Door cu Yehova tawata conciente cu bida por ta hopi dificil pa famianan asina, e mes a bira nan Hues y Protector amoroso. (Deuteronomio 10:17, 18) El a spierta e Israelitanan pa nan no pone hende mohe of mucha indefenso sufri, pasobra sin falta lo e scucha nan sclamacion. Anto “mi rabia lo sende”, Yehova a bisa, manera ta para skirbi na Exodo 22:22-24. Aunke rabia no ta un di Dios su cualidadnan dominante, e ta sinti indignacion husto ora actonan delibera di inhusticia tuma luga, specialmente si e victimanan ta hende indefenso.—Salmo 103:6.
14. Kico ta un evidencia realmente remarcabel di e echo cu Yehova no ta haci distincion di persona?
14 Na di tres luga, Bijbel ta sigura nos na Deuteronomio 10:17 cu Yehova “no ta haci distincion di persona, ni ta acepta placa pasa bou di mesa.” Distinto for di hopi hende cu poder of influencia, Yehova no ta laga rikesa material ni aparencia influenci’e. Lo e no mustra prehuicio ni faborece un hende riba otro. Un evidencia berdaderamente remarcabel di e echo cu e no ta haci distincion di persona ta lo siguiente: No ta un grupito privilegia so tin e oportunidad di bira berdadero adorado di dje, cu e speransa di biba pa semper. Al contrario, Echonan 10:34 y 35 ta bisa: “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.” Tur hende—sin importa nan posicion social, colo di cuero of e nacion den cua nan ta biba—tin oportunidad di biba pa semper. Ta existi miho husticia cu esei? En berdad un miho comprondemento di Yehova su husticia ta hala nos serca dje!
‘O Profundidad di e Sabiduria di Dios!’
15. Kico ta sabiduria, y con Yehova ta despleg’e?
15 Apostel Pablo a sintie conmovi pa expresa, manera tin para skirbi na Romanonan 11:33: ‘O profundidad di e sabiduria y di e conocemento di Dios!’ Si, segun cu nos ta analisa e diferente aspectonan di Yehova su sabiduria inmenso, nos no por keda sin haya profundo respet y admiracion p’e. Pero con nos por defini e cualidad aki? Sabiduria ta aplica conocemento, discernimento y comprondemento hunto pa haya e efecto desea. Haciendo uzo di su conocemento extenso y di su comprondemento profundo, Yehova semper ta tuma e miho decision posibel, y ta cumpli cu ne di e miho manera cu nos por imagina.
16, 17. Con Yehova su creacion ta confirma su sabiduria inmenso? Duna un ehempel.
16 Cua ta algun evidencia spesifico di Yehova su inmenso sabiduria? Salmo 104:24 ta bisa: “O SEÑOR, ki numeroso bo obranan ta! Cu sabiduria bo a traha tur; tera ta yen di loke bo a crea.” Si, mas nos siña tocante e cosnan cu Yehova a crea, mas su sabiduria ta impresiona nos. Figura bo cu cientificonan mes a siña hopi cos door di studia Yehova su creacion! Asta tin un ramo di ingenieria cu yama biomimetica cu ta purba imita diseñonan cu tin den naturalesa.
17 Por ehempel, kisas bo a yega di admira un bunita cas di haraña. Y en berdad e ta un diseño maraviyoso. Algun di su hilonan ta mustra fragil, pero proporcionalmente nan ta mas fuerte cu hero y cu e fibranan di un chaleco antibala. Pero con fuerte precis esei ta? Imagina bo un cas di haraña mes grandi cu un reda di pisca. Un cas di haraña di e tamaño ei lo ta asina fuerte cu lo e por para un avion di pasahero den pleno buelo! Si, Yehova a traha tur e cosnan ei “cu sabiduria.”
18. Con nos ta mira Yehova su sabiduria den e echo cu el a uza hende pa skirbi su Palabra, Bijbel?
18 Nos por haya e prueba mas grandi di Yehova su sabiduria den su Palabra, Bijbel. E conseho sabi cu tin den dje ta mustra nos en berdad cua ta e miho manera di biba. (Isaias 48:17) Pero tambe nos por mira Yehova su sabiduria incomparabel den e manera cu Bijbel a wordo skirbi. Con asina? Haciendo uzo di su sabiduria, Yehova a scohe hende pa skirbi su Palabra. Si el a uza angel pa skirbi e Palabra inspira, Bijbel lo tawata mes atractivo? Ta berdad cu angelnan lo por a describi Yehova for di nan posicion superior y expresa nan propio debocion na dje. Pero realmente nos lo por a compronde e punto di bista di criaturanan spiritual perfecto cu tin hopi mas conocemento, experencia y forsa cu nos?—Hebreonan 2:6, 7.
19. Ki ehempel ta mustra cu ta e echo cu Dios a uza hende pa skirbi Bijbel ta loke a hacie sumamente atractivo y conmovedor?
19 E echo cu ta hende a skirbi Bijbel ta pone cu e ta sumamente atractivo y conmovedor. Su escritornan tawata hende cu sintimento manera nos. Siendo cu nan tawata imperfecto, nan tambe a enfrenta prueba- y presionnan mescos cu nos. Den algun caso, nan a skirbi relatonan personal tocante nan mes sintimento- y luchanan. (2 Corintionan 12:7-10) Pues, nan a skirbi palabranan cu ningun angel lo por a expresa. Por ehempel, considera e palabranan di David skirbi na Salmo 51. Segun e titulo riba e salmo, David a compone esaki despues cu el a comete picanan grave. El a revela su sintimentonan di mas intimo, a expresa su tristesa profundo y a roga Dios pa pordon’e. Versiculo 2 i 3 ta bisa: “Laba mi kita tur mi inikidad, y purifica mi di mi pica. Pasobra mi ta reconoce mi transgresionnan, y mi pica ta semper mi dilanti.” Wak kico versiculo 5 ta bisa: “Mira, den inikidad mi a wordo forma, y den pica mi mama a consebi mi.” Versiculo 17 ta sigui bisa: “E sacrificionan di Dios ta un spirito kibra; un curason repenti y kibra, o Dios, bo no ta desprecia.” Bo no ta sinti e angustia di e escritor? Ken fuera di un ser humano imperfecto lo por a expresa e tipo di sintimentonan ei?
20, 21. (a) Dicon nos por bisa cu Bijbel ta contene e sabiduria di Yehova, aunke ta hende a skirbie? (b) Kico nos lo considera den e siguiente articulo?
20 Door di uza hende imperfecto asina, Yehova a provee net loke nos tin mester—un relato “inspira pa Dios” pero cu a keda cu e toke humano. (2 Timoteo 3:16) Si, e escritornan ei a wordo guia door di spirito santo. Pues nan a skirbi Yehova su sabiduria, no esun di nan mes. E sabiduria ei ta completamente confiabel. Dios su sabiduria ta asina mas superior cu nos sabiduria, cu amorosamente Yehova ta urgi nos: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” (Proverbionan 3:5, 6) Door di sigui e conseho sabi ei, nos ta hala serca nos Dios cu tin un sabiduria incomparabel.
21 E cualidad mas bunita y atractivo di tur Yehova su cualidadnan ta amor. Den e siguiente articulo nos lo considera con Yehova a mustra amor.
Bo Ta Corda?
• Ki pasonan Yehova a dal pa haci posibel cu nos por cultiva un amistad cu ne?
• Cua ta algun ehempel di Yehova su poder di crea y di su poder di proteha?
• Den ki maneranan Yehova ta eherce su husticia?
• Con nos por mira Yehova su sabiduria den creacion y tambe den Bijbel?
[Preguntanan di Estudio]
[Plachi na pagina 10]
Mescos cu un wardado cu ta carga un lamchi den su brasa, Yehova ta cuida Su carnenan cu ternura
[Plachi na pagina 13]
Nos por mira Yehova su sabiduria den e manera cu a skirbi Bijbel