Pregunta di Lector

Dicon Satanas ta ser yama “esun cu tin e medio pa causa morto” na Hebreonan 2:14 (NW)?

Den poco palabra, Pablo tawata kiermen cu Satanas, personalmente of mediante su agentenan, por causa e morto fisico di hende. Na harmonia cu esei, Hesus a yama Satanas “un matado for di principio.”—Huan 8:44.

Por surgi mal comprondemento tocante Hebreonan 2:14 debi na e manera cu algun Bijbel ta traducie, bisando cu Satanas tin e “poder di morto” of e “poder riba morto.” (King James Version; Beibel Santu; Beibel na papiamentu koriente; Jerusalem Bible) E traduccionnan ei ta laga parce cu Satanas tin e capasidad sin limite di mata ken cu e kier. Sinembargo, ta claro cu esaki no ta e caso, pasobra si tawata asina, probablemente masha tempo lo el a extermina e adoradonan di Yehova for di riba tera.—Genesis 3:15.

E expresion Griego traduci “poder riba morto” den algun traduccion, y “e medio pa causa morto” den Traduccion di Mundo Nobo ta “krá·tos tou tha·ná·tou.” Tou tha·ná·tou ta un forma di e expresion cu ta nifica “morto.” Krá·tos basicamente ta nifica “forsa, fortalesa, poder.” Segun e Theological Dictionary of the New Testament, e ta indica “e presencia y importancia di forsa of fortalesa mas bien cu su uzo.” Pues, na Hebreonan 2:14, Pablo no ta indica cu Satanas tin poder absoluto riba morto. Mas bien, e ta hala atencion na e capasidad of potencial cu Satanas tin pa causa morto.

Con Satanas ta uza “e medio pa causa morto”? Den e buki di Job, nos ta lesa di un ocasion cu kisas tawata un poco excepcional. E relato ta bisa cu Satanas a uza un tormenta pa ‘causa e morto’ di e yiunan di Job. Pero ripara cu Satanas por a haci esaki solamente pasobra Dios a permitie. El a haya e permit ei pasobra tawatin un cuestion vital cu mester a ser dicidi. (Job 1:12, 18, 19) De echo, Satanas no por a mata Job mes. E no a haya permit pa esei. (Job 2:6) Esaki ta mustra cu maske de bes en cuando Satanas por a causa morto di hende fiel, nos no tin nodi tene miedo cu e por caba cu nos bida ki ora cu e kier.

Tambe Satanas a causa morto mediante agentenan humano. Pesei hopi cristian a muri pa nan fe; tin di nan a ser asesina door di multitudnan furioso of a ser ehecuta inhustamente riba orden di funcionarionan gubernamental of huesnan corupto.—Revelacion 2:13.

Ademas, tawatin biaha cu Satanas a causa morto door di probecha di debilidadnan humano. Den tempo di Israel di pasado, profeta Balam a conseha e Moabitanan pa tenta e Israelitanan pa “bira infiel na SEÑOR.” (Numbernan 31:16) Esei a resulta den morto di mas cu 23.000 Israelita. (Numbernan 25:9; 1 Corintionan 10:8) Awe tambe algun hende ta cai den Satanas su “trampanan” y ta ser tenta pa comete inmoralidad sexual of otro practicanan malbado. (Efesionan 6:11) Ta berdad cu por lo general e personanan ei no ta perde nan bida mesora. Pero nan ta core e riesgo di perde bida eterno, y den e manera ei Satanas ta causa nan morto.

Maske nos ta reconoce cu Satanas tin e potencial di causa daño, nos no tin nodi tene un miedo exagera di dje. Ora Pablo a bisa cu Satanas tawatin e medio pa causa morto, el a bisa tambe cu Cristo a muri afin cu e “por reduci [Satanas] na nada . . . y pa e por emansipa tur esnan cu pa miedo di morto a keda someti na sclabitud durante henter nan bida.” (Hebreonan 2:14, 15, NW) Si, Hesus a paga e rescate y asina a libra humanidad creyente for di sclabitud na pica y morto.—2 Timoteo 1:10.

Claro cu ta un cos serio pa pensa cu Satanas tin e medio pa causa morto, pero nos tin e confiansa cu Yehova por drecha cualkier daño cu Satanas y su agentenan por causa. Yehova ta sigura nos cu Hesus resusita lo “destrui e obranan di Diabel.” (1 Huan 3:8) Cu poder di Yehova, Hesus lo resusita e mortonan y asina caba cu morto mes. (Huan 5:28, 29) Cu tempo, Hesus na un manera dramatico lo revela con limita Satanas su poder ta door di ser’e den abismo. Y finalmente Satanas ta ser condena na destruccion eterno.—Revelacion 20:1-10.