Historia di Bida

Sirbi Otro Hende Ta Alivia Bo Sufrimento

SEGUN E RELATO DI JULIÁN ARIAS

Na 1988, tempo cu mi tawatin 40 aña di edad, mi carera tawata mustra basta sigur. Mi tawata director regional di un compania multinacional. Como compensacion pa mi trabou mi tawatin un auto caro, un bon salario y un oficina luhoso den centro di Madrid, Spaña. E compania asta a duna cierto indicacionnan cu nan lo a haci mi nan director nacional. E tempo ei mi no tawatin e minimo idea cu mi bida tawata bai cambia drasticamente.

RIBA un dia den e aña ei, mi docter a bisa mi cu mi tin multiple sclerosis, un malesa incurabel. E noticia ei a kibra mi. Despues ora mi a lesa kico multiple sclerosis por haci cu hende, mi a spanta. * A parce como si fuera cu pa e resto di mi bida lo mi mester a biba cu e pensamento cu un ora pa otro tur cos por caba pa mi. Con mi por a percura pa mi casa Milagros y mi yiu homber di tres aña, Ismael? Con nos lo por enfrenta e situacion aki? Mientras mi tawata buscando contesta pa e preguntanan aki, mi a haya un otro golpi duro.

Mas o menos un luna despues cu mi docter a bisa mi di mi malesa, mi supervisor a yama mi den su oficina y a informa mi cu e compania tawatin mester di hende “representabel”, y cu un persona cu un malesa degenerativo—asta si e ta den e prome fasenan—ta daña imagen di e compania. Pues mesora mi superviser a kita mi for di trabou. Diripiente mi no tawatin carera mas!

 Dilanti mi famia mi tawata purba haci duro, pero mi tawata anhela di ta mi so, pa mi por a pensa riba mi circunstancia nobo y medita riba mi futuro. Mi a purba bringa contra un sintimento creciente di depresion. Loke tawata duel mi mas ta e echo cu di un dia pa otro mi no tawata sirbi mas pa mi compania.

Con pa Saca Forsa for di Debilidad

Menos mal cu durante e tempo dificil aki mi por a conta cu varios fuente di fortalesa. Rond di 20 aña mas prome, mi a bira Testigo di Yehova. Pesei mi a haci oracion sinsero na Yehova tocante mi sintimentonan y inkietudnan pa cu futuro. Mi casa, kende tambe ta un Testigo, tawata un fuente constante di fortalesa pa mi, y tambe mi tawatin apoyo di algun amigo pega kende nan cariño y compasion a resulta di ta sumamente balioso.—Proverbionan 17:17.

Loke tambe a yuda mi ta e echo cu mi a sinti cu mi tin responsabilidad pa cu otro hende. Mi kier a cria mi yiu bon, siñ’e, hunga cu ne y entren’e den e trabou di predica. Pues, mi no por a entrega. Ademas, mi tawata sirbi como anciano den un di e congregacionnan di Testigonan di Yehova, y mi rumannan cristian tawatin mester di mi yudansa. Si mi a permiti tristesa caba cu mi fe, ki sorto di ehempel lo mi tawata pa otronan?

No tin duda, mi bida a cambia fisicamente y economicamente; den algun sentido el a bira piyo y den otro sentido el a bira miho. Un biaha mi a tende un docter bisa: “Malesa no ta caba cu un hende, mas bien e ta cambi’e.” Mi a descubri cu no ta semper e cambionan ta negativo.

Na prome luga, “mi sumpiña den carni” a yuda mi compronde miho e problemanan di salu cu otro hende tin y tene consideracion cu nan. (2 Corintionan 12:7) Mas cu nunca prome, mi a compronde e palabranan di Proverbionan 3:5: “Confia den SEÑOR cu henter bo curason, y no depende riba bo mes comprondemento.” Y mas cu tur cos, mi circunstancia nobo a siña mi kico realmente ta importante den bida y kico ta duna berdadero satisfaccion y balor propio. Ainda tawatin hopi cos cu mi por a haci den e organisacion di Yehova. Mi a descubri e berdadero nificacion di e palabranan di Hesus: “Ta mas bendiciona pa duna cu pa ricibi.”—Echonan 20:35.

Un Bida Nobo

Net despues cu mi malesa a ser diagnostica, mi a haya invitacion pa bai un seminario na Madrid caminda cristiannan boluntario tawata ser siña con pa forma un laso di cooperacion entre docternan y pashentnan Testigo. Despues, a uza e boluntarionan aki pa forma diferente Comite di Contacto cu Hospital. Pa mi, e seminario a yega net na tempo. Mi a descubri un miho carera, uno cu lo a duna mi hopi mas satisfaccion cu cualkier otro trabou cu ta paga salario.

Na e seminario nos a siña cu e Comitenan di Contacto cu Hospital resien forma mester a bishita hospitalnan, entrevista docternan y duna presentacion na hendenan cu ta traha den departamento di salubridad, tur esei cu e proposito di desaroya un laso di cooperacion y preveni confrontacion. E comitenan ta yuda nan compañeronan Testigo haya docternan cu ta dispuesto pa haci operacion sin uza sanger. Claro cu como laico mi tawatin hopi di siña tocante terminologia medico, etica di medicina y di e manera cu hospital ta organisa. Apesar di esei, ora mi a bai cas despues di e seminario ei mi a bira manera un hende nobo, ekipa cu un reto nobo cu a entusiasma mi.

 Bishitanan na Hospital —Un Fuente di Satisfaccion

Aunke mi malesa tawata manca mi gradualmente sin misericordia, mi responsabilidadnan como miembro di un Comite di Contacto cu Hospital a sigui aumenta. Door cu mi tawata haya un pension di invalido y mi no por a traha, mi tawatin tempo cu mi por a bishita hospitalnan. Aunke de bes en cuando mi a keda desapunta, e bishitanan aki a resulta mas facil y mas recompensador cu mi a spera. Awor mi ta den rolstul, pero esaki no ta un obstaculo importante. Semper tin un otro miembro di comite cu ta compaña mi. Ademas, docternan tin custumber di papia cu hende den rolstul, y tin bes ta parce cu nan ta scucha cu mas respet ora nan ripara cuanto esfuerso mi ta haci pa bishita nan.

Atrabes di e ultimo 10 añanan aki, mi a bishita centenares di docter. Algun di nan tawata dispuesto pa yuda nos casi for di principio. Dr. Juan Duarte—un cardiologo na Madrid kende ta masha orguyoso di por respeta e consenshi di un pashent—a ofrece su servicionan mesora. Desde e tempo ei el a haci mas cu 200 operacion riba pashentnan Testigo di varios parti di Spaña sin uza sanger. Segun cu añanan ta pasa, mas y mas docter a cuminsa haci operacion sin sanger. Nos bishitanan regular a hunga un rol den esaki, pero e progreso tawata debi tambe na avancenan den medicina y e excelente resultadonan cu hende a logra door di haci operacion sin sanger. Y nos ta combenci cu Yehova a bendiciona nos esfuersonan.

Loke mas a anima mi ta e reaccion di algun cardiologo cu a specialisa nan mes pa trata mucha. Dos aña largo nos a bishita un team di dos ciruhano y nan anestesiologonan. Nos a duna nan literatura di medicina cu a splica kico otro docternan ta haci riba e tereno aki. Nos esfuersonan a keda recompensa na 1999 durante e Conferencia Medico Riba Operacion Cardiovascular Infantil. E dos ciruhanonan—bou dje direccion profesional di un ciruhano for di Inglatera cu ta coopera cu nos—a efectua un operacion sumamente dificil riba un baby Testigo kende su klep di ader mayo mester a ser remedia. * Mi a alegra hunto cu e mayornan ora un di e ciruhanonan a sali for di camber di operacion y a bisa cu e operacion a bai bon y cu nan a respeta consenshi di e famia. Awor e dos docternan aki regularmente ta acepta pashentnan Testigo di rond Spaña.

Loke realmente ta duna mi satisfaccion den e casonan aki ta e echo cu mi sa cu mi por yuda mi rumannan cristian. Normalmente, ora nan tuma contacto cu e Comite di Contacto cu Hospital, esaki ta un di e momentonan di mas dificil den nan bida. Nan tin cu opera, y docternan den un hospital local no ta dispuesto of no por trata nan sin sanger. Sinembargo, ora e rumannan haya sa cu tin ciruhanonan cu ta coopera riba tur tereno di medicina aki na Madrid, nan ta haya un gran alivio. Mi a yega di mira con e precupacion riba cara di un ruman homber a cambia bira trankilidad djis pasobra nos tawata hunto cu ne den hospital.

 E Mundo di Huesnan y Etica di Medicina

Den añanan resien, miembronan di e Comitenan di Contacto cu Hospital a bishita huesnan tambe. Durante e bishitanan aki nos ta duna nan un publicacion titula Family Care and Medical Management for Jehovah’s Witnesses (Cuido di Famia y Tratamento Medico pa Testigonan di Yehova), cu a ser prepara specialmente pa informa funcionarionan asina di nos posicion tocante uzo di sanger y di e remedinan alternativo cu no ta contene sanger cu tin disponibel. E bishitanan aki tawata hopi necesario, pasobra antes tawata masha normal pa huesnan na Spaña autorisa docternan pa duna transfusion na pashentnan contra nan boluntad.

E oficinanan di e huesnan ta masha impresionante, y durante mi prome bishita, mi a sinti mi masha insignificante ora mi tawata pasa door e gangnan den mi rolstul. Pa colmo, mi a haya un accidente chikito y bolter for di mi rolstul y cai riba mi rudia. Algun hues y abogado cu a mira mi den mi situacion penoso tawatin e bondad di duna mi un man, pero mi a sinti masha berguensa.

Aunke e huesnan no tawata sigur di e motibonan pakico nos tawata bishita nan, mayoria di nan a trata nos bon. E prome hues cu mi a bishita ya a yega di pensa riba nos posicion, y el a bisa cu lo e kier a combersa cu nos mas aleu. E siguiente biaha cu mi a bai bishit’e, e mes a core mi rolstul pa hiba mi den su oficina y el a scucha cu atencion. E tremendo resultado di e prome bishita aki a anima ami cu mi compañeronan pa vence nos miedo, y no a dura masha cu nos a haya mas resultado bon.

Durante e mesun aña ei, nos a laga un ehemplar di Cuido di Famia serca un otro hues, kende a ricibi nos bon y a priminti di lesa e informacion. Mi a dun’e mi number di telefon pa si e tin cu tuma contacto cu nos den un caso di emergencia. Dos siman despues el a bel mi pa bisa mi cu un ciruhano local a pidie autorisacion pa duna transfusion di sanger na un Testigo cu mester opera. E hues a bisa cu e kier pa nos yud’e haya un solucion cu lo respeta e deseo di e Testigo di no tuma sanger. Nos no tawatin masha problema pa haya otro hospital caminda e ciruhanonan a haci e operacion exitosamente sin uza sanger. E hues a keda masha contento ora el a tende e resultado, y el a sigura nos cu lo e sigui busca solucionnan similar den futuro.

 Durante mi bishitanan na e hospitalnan, hopi bes ta surgi preguntanan tocante etica di medicina, ya cu nos kier pa e docternan tene cuenta cu e derechonan y consenshi di e pashent. Un hospital cu ta coopera cu nos a invita mi pa participa den un curso di etica cu nan tawata duna. E curso aki a duna mi oportunidad pa presenta nos punto di bista biblico na hopi specialista riba e tereno aki. Tambe e curso a yuda mi compronde varios decision dificil cu docternan tin cu tuma.

Un di e instructornan di e curso, Profesor Diego Gracia, regularmente ta organisa cursonan prestigioso duna door di expertonan di etica pa docternan di Spaña y el a bira un defensor firme di nos derecho di scohe un tratamento den asunto di transfusion di sanger despues cu nos a ser bon informa. * Door cu nos tawatin contacto regular cu Profesor Gracia, el a invita algun representante di e oficina di sucursal na Spaña pa splica nos posicion na studiantenan di dje cu a sigui studia despues cu nan a gradua. Y algun di nan ta ser considera e miho docternan di e pais.

Enfrentando Realidad

Claro cu e trabou aki cu ta duna satisfaccion y cu ta na beneficio di mi compañeronan creyente no a resolve tur mi problemanan personal. Mi malesa no ta para keto, e ta avansa sin piedad. Afortunadamente mi mente ta funciona bon ainda. Danki na mi casa y mi yiu homber, kendenan nunca no ta keha, ainda mi por cumpli cu mi responsabilidadnan. Sin nan yudansa y apoyo esaki lo tawata imposibel. Mi no por ni sikiera sera mi carson ni bisti mi bachi. Mi ta gusta specialmente predica tur diasabra cu mi yiu homber Ismael kende ta core mi den rolstul pa bai predica serca varios doño di cas. Y ainda mi por cumpli cu mi responsabilidadnan como anciano di congregacion.

Durante e ultimo 12 añanan aki mi a confronta algun momentonan traumatico. Tin bes ora mi mira con mi incapasidad ta afecta mi famia, esaki ta haci mi mas dolor cu e malesa mes. Mi sa cu nan ta sufri, aunke nan ta hacie den silencio. No mucho tempo pasa, den un lapso di un aña, tanto mi suegra como mi tata a muri. Durante e mesun aña ei mi no por a move mas sin un rolstul. Mi tata, kende tawata biba hunto cu nos, a muri di un otro malesa degenerativo. Milagros kende tawata cuid’e, a sinti como si fuera e tawata observando loke lo pasa cu mi den futuro.

Sinembargo, e punto positivo di e malesa aki ta cu nos famia ta uni segun cu nos ta enfrenta e dificultadnan hunto. Mi a cambia mi stul di ehecutivo pa un rolstul, pero si bo wak bon mi bida ta miho aworaki pasobra e ta completamente dedica na sirbi otro hende. Duna di bo mes na otronan por alivia bo sufrimento, y Yehova ta cumpli cu su promesa di fortalece nos ora nos tin mester di esei. Mescos cu Pablo, mi por bisa sinseramente: “Pa tur cos mi tin e forsa den birtud di esun cu ta duna mi poder.”—Filipensenan 4:13, NW.

[Nota]

[Cuadro na pagina 24]

Punto di Bista di un Esposa

Pa un esposa biba cu un partner cu ta sufri di multiple sclerosis ta hopi dificil mentalmente, emocionalmente y fisicamente. Mi mester ta rasonabel den loke mi ta plania pa haci y ser dispuesto pa no ansha innecesariamente tocante futuro. (Mateo 6:34) Apesar di esei, biba cu sufrimento por revela e miho cualidadnan di un persona. Nos matrimonio ta mas fuerte cu antes, y mi tin un miho relacion cu Yehova. Historia di bida di otronan cu tambe ta den situacion dificil asina a yuda fortalece mi masha. Mi tambe ta sinti e mesun satisfaccion cu Julián ta sinti como resultado di su sirbishi balioso na beneficio di e rumannan. Y mi a ripara cu aunke cada dia ta bin cu su dificultadnan, Yehova nunca ta laga nos na caya.

[Cuadro na pagina 24]

Punto di Bista di un Yiu Homber

E perseverancia y optimismo di mi tata ta un bon ehempel pa mi, y mi ta sinti cu mi ta util ora mi ta cor’e den su rolstul. Mi sa cu no ta semper lo mi por haci loke mi kier. Aworaki mi ta un teenager, pero ora mi bira grandi, lo mi kier sirbi como miembro di un Comite di Contacto cu Hospital. E promesanan di Bijbel a siña mi cu sufrimento ta temporal y mi sa cu tin hopi ruman ta sufri mas cu nos.

[Plachi na pagina 22]

Mi esposa ta un fuente di fortalesa pa mi

[Plachi na pagina 23]

Combersando cu e cardiologo, Dr. Juan Duarte

[Plachi na pagina 25]

Ami cu mi yiu homber ta gusta traha hunto den sirbishi