“Hala Serca Dios y E Lo Hala Serca Boso”

Antes y Awor El A Haya e Forsa pa Cambia

SANDRA, un señora na Mexico, a describi su mes como e zwarte schaap di su famia. Rechaso y falta di cariño a ruina su hubentud. El a bisa: “Durante henter mi adolecencia mi tawata sinti un bashi y mi no tawata sa pakico mi ta na bida, ni ki sentido bida tin.”

Ora Sandra tawata bayendo scol secundario, el a cuminsa bebe biña cu su tata tawatin na cas. Cu tempo e mes a cuminsa cumpra su alcohol y el a bira alcoholico. El a admiti: “Mi no tawata mira pakico biba.” Desesperacion a pone Sandra cuminsa uza droga. E di: “E unico cos cu a yuda mi lubida mi problemanan tawata loke mi tawatin den mi tas: un boter, algun pildo of poco marihuana.”

Despues cu Sandra a caba scol di medicina, el a cai mas profundo den alcoholismo. Asta el a purba comete suicidio. Pero el a scapa.

Sandra a acudi en vano na diferente religion en busca di yudansa spiritual y sosten emocional. Door cu el a perde speransa y a cuminsa desespera, bes tras bes e tawata sclama na Dios: “Unda bo ta? Dicon bo no ta yuda mi?” Ora cu el a perde tur dignidad, un Testigo di Yehova a papia cu ne. Esaki a hiba na un studio di Bijbel. Sandra a keda masha emociona ora el a siña cu Yehova “ta serca di e hende di curason kibra.”—Salmo 34:18.

E persona cu a studia Bijbel cu Sandra a yud’e compronde cu Yehova Dios sa cu nos ta vulnerable debi na e pica y imperfeccion cu nos a hereda di Adam. Sandra a realisa cu Dios ta compronde cu nos no por cumpli perfectamente cu su normanan husto. (Salmo 51:5; Romanonan 3:23; 5:12, 18) El a keda masha contento ora el a siña cu Yehova no ta enfoca solamente riba nos debilidadnan, y cu e no ta spera mas di nos cu loke nos por haci. E salmista a puntra: “Si Abo, SEÑOR, tuma inikidadnan na cuenta, o Señor, ken lo por a keda para?”—Salmo 130:3.

Un berdad importante di Bijbel cu a emociona Sandra ta esun di e sacrificio di rescate di Hesucristo. Mediante e rescate aki, den su gran misericordia Yehova ta otorga un posicion husto na hende obediente apesar di nan imperfeccionnan. (1 Huan 2:2; 4:9, 10) Si, nos por haya “pordon di nos picanan” y asina ser yuda pa vence cualkier sintimento di cu nos no ta bal nada.—Efesionan 1:7.

Sandra a siña un les balioso for di e ehempel di apostel Pablo. Pablo a aprecia masha cu Dios tawatin e bondad di pordon’e pa su erornan di pasado y dun’e apoyo den su lucha fuerte pa vence su debilidadnan cu tawata lanta cabes constantemente. (Romanonan 7:15-25; 1 Corintionan 15:9, 10) Pablo a drecha su bida, el a ‘golpia su curpa y hacie esclabo’, pa e por a sigui riba e caminda cu Dios a aproba. (1 Corintionan 9:27) E no a laga su inclinacionnan pecaminoso hacie catibo of domin’e.

 Sandra tambe tawatin su debilidadnan, pero el a sigui lucha contra nan. El a haci oracion sinsero pidi Yehova pordon’e y tambe yud’e vence su debilidadnan. (Salmo 55:22; Santiago 4:8) Door cu Sandra a sinti cu Dios ta interesa den dje personalmente, e por a cambia su bida. El a bisa: “Mi tin e goso di por traha como un predicado di tempo completo pa siña otro hende loke Bijbel ta bisa.” Sandra tawatin e privilegio di yuda su ruman mayo y tambe esun mas chikito siña conoce Yehova. Segun cu e ta sigui “haci bon”, e ta haci uzo tambe di su conocemento medico trahando como boluntario den e departamento di prome ausilio na congresonan di Testigonan di Yehova.—Galationan 6:10.

Kico di Sandra su adiccionnan? Cu confiansa el a bisa: “Mi tin un mente cla. Mi no ta bebe mas, ni huma ni uza droga. Mi no tin mester di nan. Mi a haya loke mi tawata busca.”

[Comentario na pagina 9]

“Mi a haya loke mi tawata busca”

[Cuadro na pagina 9]

Principionan di Bijbel den Accion

E siguiente principionan di Bijbel a yuda hopi hende libra nan mes di adiccionnan degradante:

“Laga nos purifica nos mes di tur impuresa di carni y spirito, y asina perfecciona nos santidad den e temor di Dios.” (2 Corintionan 7:1) Dios ta bendiciona hende cu a purifica nan mes di sushedad, y ta evita practicanan impuro.

“E temor di SEÑOR ta pa odia maldad.” (Proverbionan 8:13) Temor y respet pa Dios ta yuda un persona libra su mes for di mal habito, incluso uzo di droga. Ademas di agrada Yehova, e persona cu a cambia ta keda proteha di malesanan teribel.

Sea “sumiso na gobernantenan y na autoridadnan.” (Tito 3:1) Den hopi pais posicion of uzo di droga ta un violacion di lei. Cristiannan berdadero no ta posee ni uza droga.