Con Nos Mester Mira Hende Segun Cu e Dia di Yehova Ta Acerca?

“Señor no ta tarda cu su promesa . . . ma e tin pasenshi pa cu boso, y no kier pa ningun hende bai perdi, ma pa tur bini na repentimento.”—2 PEDRO 3:9.

1, 2. (a) Ki punto di bista Yehova tin di hende djawe? (b) Ki preguntanan nos por haci nos mes?

YEHOVA su sirbidonan a haya e asignacion pa “haci disipel di hende di tur nacion.” (Mateo 28:19, NW) Mientras nos ta cumpli cu e asignacion aki y ta warda riba “e gran dia di SEÑOR” nos mester mira hende manera Yehova ta mira nan. (Sofonias 1:14) Y ta con Yehova ta mira hende, esta, ki punto di bista e tin di hende? Apostel Pedro ta bisa: “Señor no ta tarda cu su promesa manera algun tin esaki pa tardansa, ma e tin pasenshi pa cu boso, y no kier pa ningun hende bai perdi, ma pa tur bini na repentimento.” (2 Pedro 3:9) Dios ta mira cada hende individualmente como personanan cu por repenti. Su deseo ta “pa tur hende wordo salba y yega na conocemento di e berdad.” (1 Timoteo 2:4) Figura bo cu Yehova ta sinti un gran goso ora cu un hende “malbado bira for di su caminda y biba”!—Ezekiel 33:11.

² Personalmente, bo tin e mesun punto di bista cu Yehova tin di hende? Nos tambe ta considera cu hende di tur rasa y nacion lo por bira ‘carne cu e ta pastorea’? (Salmo 100:3; Echonan 10:34, 35) Laga nos ban wak dos ehempel cu ta mustra e importancia di tin Dios su punto di bista. Den ambos caso, destruccion tawata inminente, y Yehova su sirbidonan a haya sa esei di antemano. E ehempelnan aki ta specialmente importante segun cu nos ta warda riba e gran dia di Yehova.

 Abraham Tawatin Yehova Su Punto di Bista

3. Ki punto di bista Yehova tawatin di e habitantenan di Sodoma y Gomora?

³ E prome ehempel ta di e fiel patriarca Abraham y e stadnan malbado Sodoma y Gomora. Ora Yehova a tende “e clamor contra Sodoma y Gomora”, no ta mesora el a destrui e stadnan ei hunto cu tur nan habitantenan. Prome el a haci un investigacion. (Genesis 18:20, 21) El a manda dos angel bai Sodoma, caminda nan a keda den cas di e homber husto Lot. Riba e anochi cu e angelnan a yega, “e hombernan di e stad, . . . a rondona e cas, tanto hoben como bieu, henter e pueblo for di tur parti”, cu e deseo di tene relacion sexual cu e angelnan. Claramente, e condicion sumamente inmoral di e habitantenan di e stad a proba cu e tawata merece destruccion. Sinembargo, e angelnan a puntra Lot: “Ken mas bo tin aki? Yerno, bo yiu hombernan, bo yiu mohenan, y ken cu bo tin den e stad, saca nan for di e luga aki”! Yehova a habri caminda pa algun habitante di e stad ei wordo salba, pero na final di cuenta ta Lot y su dos yiu mohenan so a scapa e destruccion.—Genesis 19:4, 5, 12, 16, 23-26.

4, 5. Pakico Abraham a haci suplica na fabor di e habitantenan di Sodoma, y su punto di bista di hende tawata na harmonia cu esun di Yehova?

⁴ Laga nos bai bek na e momento cu Yehova a revela su intencion pa inspecciona Sodoma y Gomora. Tawata na e ocasion ei cu Abraham a suplica: “Supone cu tin cincuenta hende husto den e stad; di berdad lo bo destru’e sin salba e luga pa causa di e cincuenta hendenan husto cu tin den dje? Cu esei keda leu di bo pa haci un cos asina, esta, mata e husto hunto cu e malbado, asina cu e husto y e malbado ta wordo trata igual. Cu esei keda leu di bo! E Hues di henter mundo lo no haci husticia?” Dos bes Abraham a uza e expresion “cu esei keda leu di bo.” Esei ta indica cu di experencia Abraham tawata sa cu Yehova lo no destrui e husto hunto cu e malbado. Ora Yehova a bisa cu lo e no destrui Sodoma si tin “cincuenta hende husto den e stad”, Abraham gradualmente a reduci e cantidad te ora el a yega na dies so.—Genesis 18:22-33.

⁵ Yehova lo a scucha Abraham su suplicanan si nan no tawata na harmonia cu su mes punto di bista? Claro cu no. Como “amigo di  Dios”, Abraham aparentemente tawata conoce y comparti Yehova su punto di bista. (Santiago 2:23) Ora Yehova a dirigi su atencion na Sodoma y Gomora, e tawata dispuesto pa considera Abraham su peticion. Dicon? Pasobra nos Tata celestial “no kier pa ningun hende bai perdi, ma pa tur bini na repentimento.”

Yonas Su Punto di Bista di Hende—Un Contraste Skerpi

6. Con e Ninivitanan a reacciona riba Yonas su proclamacion?

⁶ Awor laga nos considera e di dos ehempel, esun di Yonas. Den e ehempel aki e stad marca pa destruccion tawata Ninive. Profeta Yonas a haya e asignacion pa proclama cu e maldad di e stad ei ‘a yega te dilanti Yehova.’ (Yonas 1:2) Hunto cu e area residencial na rand di e stad, Ninive tawata un stad grandi y “tawata tuma tres dia pa por a pasa door di dje.” Ora cu porfin Yonas a obedece Dios y a drenta Ninive, el a sigui declara: “‘Aki cuarenta dia Ninive lo wordo destrui.’ E ora ei e hendenan di Ninive a kere den Dios, y nan a proclama un yunamento y a bisti paña-di-saco.” Asta e rei di Ninive a repenti.—Yonas 3:1-6.

7. Kico Yehova a pensa di e echo cu e Ninivitanan a repenti?

⁷ Esei tawata un contraste bastante grandi compara cu e reaccion di e hendenan di Sodoma! Kico Yehova a pensa di e Ninivitanan cu a repenti? Yonas 3:10 ta bisa: “Dios a repenti di e calamidad cu el a declara cu e lo trece riba nan. Y e no a hacie.” Yehova “a repenti” den e sentido cu el a cambia su manera di trata cu e Ninivitanan pasobra nan a cambia nan caminda. E normanan di Dios no a cambia, pero Yehova a cambia su decision ora el a mira cu e Ninivitanan a repenti.—Malakias 3:6.

8. Dicon Yonas tawata desgusta?

⁸ Ora cu Yonas a realisa cu Yehova lo no destrui Ninive, el a mira e asunto for di Yehova su punto di bista? No, pasobra Bijbel ta bisa: “Ma esaki a desgusta Yonas masha, y el a rabia.” Kico mas Yonas a haci? E relato ta bisa: “El a haci oracion na SEÑOR y a bisa: ‘Pa fabor, SEÑOR, esaki no ta loke mi a bisa ora mi tawata na mi mes tera ainda? Ta pesei mi kier a evita esaki door di hui bai Tarsis, pasobra mi tawata sa cu bo ta un Dios yen di gracia y compasion, kende no ta rabia lihe y ta abunda den misericordia, y kende ta repenti di calamidad.’” (Yonas 4:1, 2) Yonas tawata sa di Yehova su cualidadnan. Sinembargo, na e momento ei e profeta tawata desgusta y no tawatin e mesun punto di bista cu Dios tawatin di e habitantenan repenti di Ninive.

9, 10. (a) Ki les Yehova a siña Yonas? (b) Dicon nos por asumi cu finalmente Yonas a bin acepta e punto di bista cu Yehova tawatin di e Ninivitanan?

⁹ Yonas a sali for di Ninive. El a traha un ramada y a sinta bou di su sombra “te ora cu e por a mira kico lo a bai pasa den e stad.” Yehova a laga un mata crece pa Yonas haya sombra. Sinembargo, e siguiente dia e mata a marchita. Ora Yonas a rabia pa motibo cu esei  a sosode, Yehova a bis’e: “Bo tawatin duele di e mata . . . Y ami no mester tene duele di Ninive, e stad grandi, caminda tin mas cu shentibinti mil persona, cu no sa e diferencia entre nan man drechi y man robes, y tambe hopi bestia?” (Yonas 4:5-11) Esei tawata un bon les pa Yonas tocante e punto di bista cu Yehova tin di hende!

¹⁰ Bijbel no ta bisa con Yonas a reacciona riba loke Yehova a bis’e tocante sinti duele di e hendenan di Ninive. Sinembargo, ta evidente cu e profeta a ahusta su punto di bista di e Ninivitanan cu a repenti. Nos ta saca e conclusion ei for di e echo cu Yehova a uza Yonas mes pa skirbi e relato inspira aki.

Cua Punto di Bista Abo Tin?

11. Ki punto di bista Abraham probablemente lo tawatin di hende djawe?

¹¹ Awendia, nos ta enfrenta un otro destruccion, esun di e mal sistema di cosnan actual durante e gran dia di Yehova. (Lucas 17:26-30; Galationan 1:4; 2 Pedro 3:10) Ki punto di bista Abraham lo tawatin di hende cu ta biba riba e mundo aki cu pronto lo wordo destrui? Probablemente lo e ta interesa den esnan cu ainda no a tende e bon nobo of ‘evangelio di e reino.’ (Mateo 24:14) Abraham bes tras bes a suplica Dios na fabor di hende den Sodoma cu kisas tawata husto. Personalmente, nos ta precupa pa hende cu podise lo rechasa e camindanan di e mundo aki cu ta bou di control di Satanas si nan haya e oportunidad pa repenti y sirbi Dios?—1 Huan 5:19; Revelacion 18:2-4.

12. Dicon ta facil pa desaroya un actitud manera di Yonas pa cu hende cu nos topa den sirbishi, y kico nos por haci tocante esei?

¹² Ta na su luga pa desea pa e fin di maldad bin. (Habacuk 1:2, 3) Sinembargo, ta masha facil pa desaroya un actitud manera esun di Yonas, un actitud di no ta interesa den e bienestar di hende cu kisas lo repenti. Esaki por ta specialmente e caso ora nos ta topa hende cu ta indeferente of ta opone nos of ta asta cla pa pleita ora nos bishita nan pa duna nan e mensahe di Reino. Nos lo por perde for di bista esnan cu Yehova ainda lo saca for di e mal sistema di cosnan aki. (Romanonan 2:4) Si nos examina nos mes sinseramente, anto resulta cu nos tin maske ta un tiki di e actitud cu Yonas tawatin originalmente pa cu e Ninivitanan, nos por pidi yudansa den oracion pa nos adapta nos punto di bista na harmonia cu esun di Yehova.

13. Dicon nos por bisa cu Yehova ta interesa den hende djawe?

¹³ Yehova ta interesa den esnan cu ainda no  ta sirbie, y e ta scucha e peticionnan di su pueblo dedica. (Mateo 10:11) Por ehempel, lo e contesta nan oracionnan door di “haci husticia” pa nan. (Lucas 18:7, 8) Ademas, na su debido tempo Yehova lo cumpli cu tur su promesa- y propositonan. (Habacuk 2:3) Esaki lo inclui libra mundo di tur maldad, mescos cu el a haci ora el a destrui Ninive despues cu su habitantenan a bolbe cai den maldad.—Nahum 3:5-7.

14. Kico nos mester ta haciendo mientras nos ta warda riba e gran dia di Yehova?

¹⁴ Nos lo sigui warda cu pasenshi, y alabes keda ocupa haciendo Dios su boluntad, te ora cu e mal sistema di cosnan aki ser elimina durante e gran dia di Yehova? Nos no sa e detayenan tocante te na ki grado e trabou di predica tin cu ser haci ainda prome cu e dia di Yehova ta yega. Pero loke si nos sa ta cu prome cu e fin bin e bon nobo di Reino lo ser predica den henter e tera habita te ora cu Dios ta satisfecho. Y sin duda nos mester ta interesa den e “cosnan deseabel” cu ainda Yehova lo trece den su cas segun cu e ta sigui yen’e cu gloria.—Hageo 2:7, NW.

Nos Accionnan Ta Revela Kico Nos Punto di Bista Ta

15. Kico por yuda nos mira e balor di e trabou di predica?

¹⁵ Kisas nos ta biba den un comunidad caminda e trabou di predica no ta masha gusta y nos no ta den un posicion pa muda bai caminda tin mas necesidad pa proclamado di Reino. Supone cu nos lo por haya dies hende den nos teritorio prome cu e fin yega. Nos ta sinti cu ta bale la pena pa busca nan? Hesus a “sinti compasion” di e multitudnan “pasobra nan tawata cansa y plama, manera carne sin wardado.” (Mateo 9:36) Door di studia Bijbel y lesa cu atencion e articulonan den E Toren di Vigilancia y Spierta!, nos por bin compronde e situacion dificil di e mundo aki mas miho. Como resultado, esaki por yuda nos pa nos ta mas conciente di e balor di predica e bon nobo. Ademas, ora nos ta aprecia e informacionnan biblico cu e “esclabo fiel y prudente” ta percura y ta haci bon uzo di nan, esei por yuda nos papia di un manera mas combencente den teritorionan traha cu frecuencia.—Mateo 24:45-47; 2 Timoteo 3:14-17.

16. Con nos por ta mas eficas den sirbishi?

¹⁶ Nos interes den esnan cu ainda por reacciona faborabel riba e mensahe biblico cu ta salba bida ta motiva nos pa considera ki ora ta mas apropiado pa acerca doñonan di cas den nos sirbishi y den ki maneranan nos por haci esei. Hopi hende no ta na cas ora nos bishita nan? Si esei ta e caso, kisas nos por ta mas eficas den sirbishi door di varia e ora- y luganan di nos actividad di predica. Piscado ta pisca ora pisca ta come. Nos por haci algo similar den nos trabou di piscamento spiritual? (Marco 1:16-18) Pakico bo no ta purba predica anochi of via telefon, caminda esei ta legal? Algun publicado a ripara cu riba parkeerplaats, parada di bus, na pomp di gasolin y tiendanan ta ‘luganan di pisca’ productivo. Si nos tin un actitud manera di Abraham pa cu hende esei lo ta bisto tambe ora nos ta probecha di oportunidadnan pa predica informalmente.

17. Den ki maneranan nos por anima misioneronan y otro hende cu ta sirbi den otro pais?

¹⁷ Miyones di hende no a tende e mensahe di Reino ainda. Banda di nos predicacion, nos por mustra interes den hende asina asta sin sali for di cas? Wel, nos conoce misioneronan of predicadonan di tempo completo cu ta sirbi den otro pais? Si ta asina, kisas lo ta bon si nos por skirbi carta pa nan pa mustra nos aprecio pa nan trabou. Con esei ta demostra interes pa hende en general? Nos cartanan di animacion y elogio por fortalece e misioneronan pa keda den nan asignacion, y asina por yuda hopi hende mas pa haya conocemento di e berdad. (Huesnan 11:40) Tambe nos por resa pa e misioneronan y pa hende hambra pa e berdad den otro pais. (Efesionan  6:18-20) Un otro manera pa mustra interes ta door di haci donacion na e obra mundial di Testigonan di Yehova.—2 Corintionan 8:13, 14; 9:6, 7.

Abo Lo Por Muda?

18. Kico algun cristian a haci pa promove interesnan di Reino den e pais caminda nan ta biba?

¹⁸ Esnan cu a bai biba na luganan caminda tin mas necesidad di proclamadonan di Reino a wordo bendiciona pa e sacrificio cu nan a haci. Tin otro Testigo di Yehova cu a keda den nan mes pais, pero a siña un otro idioma pa nan por duna yudansa spiritual na imigrantenan. Tal esfuerso sin duda ta recompensador. Por ehempel na aña 2001, shete Testigo cu ta yuda hende Chines den un stad na Texas, Merca, a duna bonbini na 114 hende cu a asisti na e Cena di Señor. Ta como si fuera cu esnan cu ta yuda gruponan asina a haya nan cunucunan cla pa wordo cosecha.—Mateo 9:37, 38.

19. Kico ta consehabel pa haci si bo tin pensa di muda bai un otro pais pa promove e trabou di predica e Reino?

¹⁹ Kisas abo y bo famia ta sinti cu boso ta den un posicion pa muda bai un luga caminda tin mas necesidad di proclamado di Reino. Naturalmente, ta sabi pa prome boso “sinta calcula e gastonan.” (Lucas 14:28) Esaki ta specialmente e caso ora un hende tin pensa di muda bai un otro pais. Ta bon pa ken cu tin pensa di haci esei puntra su mes e siguiente preguntanan: ‘Lo mi por cria mi famia? Lo mi por haya un visa apropiado? Mi por papia e idioma di e pais caba of mi ta dispuesto pa siñ’e? Mi a pensa caba riba e clima y e cultura? Realmente lo mi por ta “un encurashamento” y no un carga pa e rumannan den e pais ei?’ (Colosensenan 4:10, 11) Pa haya sa cuanto necesidad tin den e pais caminda bo tin pensa di bai, semper ta bon pa skirbi e oficina di sucursal di Testigonan di Yehova cu ta supervisa e trabou di predica den e area ei. *

20. Con un hoben cristian a uza su vigor na beneficio di rumannan di otro pais?

²⁰ Un cristian hoben cu tawata envolvi den construccion di Salonnan di Reino na Hapon a haya sa cu tawatin un necesidad pa trahadonan habil pa construi un luga di adoracion na Paraguay. Door cu e tawata soltero y tawatin e vigor di hubentud, el a muda bai e pais ei y a traha pa ocho luna como e unico trahado di tempo completo riba e proyecto. Durante su estadia einan, el a siña Spaño y a dirigi studionan di Bijbel. E por a mira cu e pais tawatin necesidad di proclamadonan di Reino. Maske el a bai Hapon bek, no a dura masha cu el a regresa Paraguay y a yuda busca hende pa reuni den e mesun Salon di Reino ei.

21. Kico mester ta nos interes principal y punto di bista segun cu nos ta warda riba e gran dia di Yehova?

²¹ Dios lo percura pa e trabou di predica wordo haci cabalmente, na harmonia cu su boluntad. Awe, e ta pura of acelera e cosecha spiritual final. (Isaias 60:22) Pues segun cu nos ta spera riba e dia di Yehova, laga nos traha cu celo den e trabou di cosecha y laga nos mira hende manera Dios ta mira nan.

[Nota]

Bo Ta Corda?

• Segun cu nos ta spera e dia di Yehova, ki punto di bista nos mester tin di hende?

• Ki punto di bista Abraham tawatin di hende husto cu lo por tawatin den Sodoma?

• Ki punto di bista Yonas tawatin di e Ninivitanan cu a repenti?

• Con nos por mustra cu nos tin e mesun punto di bista cu Yehova tin di hende cu ainda no a tende e bon nobo?

[Preguntanan di Estudio]

[Plachi na pagina 16]

Abraham a mira hende manera Yehova ta mira nan

[Plachi na pagina 17]

Yonas a siña mira e Ninivitanan repenti manera Yehova a mira nan

[Plachi na pagina 18]

Interes den hende ta motiva nos pa considera varios ora y manera pa predica e bon nobo