Nos Realmente Tin Mester di Otro Hende?

“ORA nos analisa nos bida y actividadnan, nos ta ripara mesora cu casi tur loke nos ta haci y ta desea ta envolve otro hende”, e famoso cientifico Albert Einstein a declara. El a agrega: “Nos ta come cuminda cu otro hende a produci, bisti paña cu otro hende a cose, biba den cas cu otro hende a traha. . . . E hende ta loke e ta, pero su balor no ta sinta den loke e ta como persona individual, sino mas bien den e echo cu e ta miembro di un gran comunidad humano cu ta dirigi su bida den sentido material y spiritual for di su nacemento te na su morto.”

Den e mundo di animal, ta normal pa bo mira compañerismo basa riba instinto. Olifantinan ta move hunto como tou y nan ta cuida nan yiunan cu masha atencion. Leonnan embra ta yag hunto y nan ta comparti loke nan a coi cu e machonan. Dolfeinnan ta hunga hunto y asta a yega di proteha otro animal of landadonan cu a haya nan cu problema.

Sinembargo serca hende, sociologonan a ripara un tendencia cu ta causando mas y mas precupacion. Segun un corant publica na Mexico, algun sociologo ta di opinion cu “decadanan di isolacion personal y e echo cu hende no ta biba mas como un comunidad uni, a causa un daño inmenso na sosiedad Mericano.” E corant a declara cu “bienestar di e nacion ta depende di un cambio social radical, cu ta encera bai bek na e bida di comunidad.”

E problema aki ta comun specialmente serca esnan cu ta biba den paisnan desaroya. Einan hende tin e tendencia di isola nan mes for di otronan. Y e tendencia aki ta creciendo rapidamente. Hende kier ‘biba nan bida’ y nan ta masha contra pa otro hende ‘mete den nan bida.’ Expertonan ta bisa cu e actitud aki a pone sosiedad humano bira mas vulnerable pa problemanan emocional, depresion y casonan di suicidio.

Relaciona cu esaki dr. Daniel Goleman a declara: “Isolacion social—e pensamento cu bo no tin ningun otro hende cu ken bo por comparti bo sintimentonan of mantene un bon relacion cu ne—ta pone cu un persona tin dos bes mas tanto chens di bira malo of muri.” Un informe publica den e revista Science a yega na e conclusion cu isolacion social ‘ta hunga un papel mes importante riba e cifranan di mortalidad cu e habito di huma, presion y colesterol halto, obesidad y falta di ehercicio fisico.’

Pesei anto, pa varios motibo nos realmente tin mester di otro hende. Nos no por ta completamente independiente. Con nos por soluciona e problema di isolacion anto? Kico a duna bida di hopi hende berdadero proposito? E siguiente articulo lo trata e preguntanan ei.

[Comentario na pagina 3]

“Casi tur loke nos ta haci y ta desea ta envolve otro hende.” —Albert Einstein