Rasona cu Sano Huicio y Actua Sabi

IMAGINA bo e esena aki: Hesucristo ta splicando cu lo e sufri hopi cos na man di enemigonan religioso na Herusalem y caba nan lo mat’e. Apostel Pedro, su amigo intimo, no por kere esei. Asta e ta hala Hesus un banda y ta scual e. No cabe duda cu Pedro ta sinsero y echt precupa. Pero con Hesus ta evalua Pedro su manera di rasona? Hesus ta bisa: “Kita for di mi dilanti, Satanas! Bo ta un piedra di trompica pa mi; pasobra bo no tin bo pensamento riba e cosnan di Dios, sino riba esnan di hende.”—Mateo 16:21-23.

Esei lo mester tawata un shock grandi pa Pedro! En bes di ta un yudansa y apoyo, e tawata den e caso aki “un piedra di trompica” pa su Señor stima. Con bini esaki a sosode? Pedro kisas a bira victima di un falta comun den hende su manera di rasona: el a kere solamente loke e kier a kere.

No Confia Mucho den Nos Mes

Un cos cu por stroba nos di rasona cu sano huicio ta e tendencia di confia mucho den nos mes. Apostel Pablo a spierta compañeronan cristian di Corinto di antiguedad: “Laga esun cu ta kere cu e ta para tene cuidou pa e no cai.” (1 Corintionan 10:12) Dicon Pablo a bisa esaki? Aparentemente pasobra e tawata sa con facil ta pa hende kiboca nan mes den nan manera di pensa, si, asta pa mente di cristiannan ser “desvia for di e debocion simpel y puro na Cristo.”—2 Corintionan 11:3.

Esaki a sosode cu henter un generacion di Pablo su antepasadonan. Na e tempo ei Yehova a bisa nan: “Mi pensamentonan no ta boso pensamentonan, ni boso camindanan no ta mi camindanan.” (Isaias 55:8) Nan a bira “sabi den nan mes wowo”, y esei a resulta den calamidad. (Isaias 5:21) Pesei siguramente ta rasonabel pa analisa con nos por pensa cu sano huicio y asina evita un calamidad similar.

Tene Cuidou cu Pensamento Carnal

Algun hende na Corinto tawata mal afecta door di pensamento carnal. (1 Corintionan 3:1-3) Nan a pone mas enfasis riba filosofia humano cu riba e Palabra di Dios. E filosofonan Griego di e tempo ei sin duda tawata hombernan masha sabi. Sinembargo, den bista di Dios nan tawata bobo. Pablo a bisa: “Ta para skirbi: ‘Lo mi destrui e sabiduria di e sabinan, y e inteligencia di e inteligentenan lo mi pone un banda.’ Unda e hende sabi ta? Unda e escriba ta? Unda e disputador di e siglo aki ta? Dios no  a haci sabiduria di e mundo aki bira locura [of, “bobedad”, NW]?” (1 Corintionan 1:19, 20) E intelectualnan ei a ser goberna pa “e spirito di mundo” en bes di pa e spirito di Dios. (1 Corintionan 2:12) Nan filosofia- y ideanan no tawata na harmonia cu Yehova su manera di rasona.

E fuente fundamental di tal pensamento carnal ta Satanas e Diabel, kende a uza e colebra pa gaña Eva cu astucia. (Genesis 3:1-6; 2 Corintionan 11:3) Ainda e ta un peliger pa nos? Si! Segun e Palabra di Dios, Satanas “a ciega mente” di hende asina tanto cu awor e ta “gaña henter mundo.” (2 Corintionan 4:4; Revelacion 12:9) Ta masha importante anto pa nos ta alerta pa su trikinan!—2 Corintionan 2:11.

Paga Tino cu “Triki di Hende”

Apostel Pablo a spierta nos tambe pa “triki di hende.” (Efesionan 4:14) El a topa “trahadonan engañoso” cu a pretende di ta papia e berdad pero cu en realidad a troce e berdad. (2 Corintionan 11:12-15) Pa alcansa nan metanan, e hendenan ei kisas ta scohe solamente evidencia cu ta apoya nan manera di pensa, tambe nan ta uza un papia carga cu emocion y mita berdadnan cu ta engañoso, insinuacionnan tramposo y asta mentira abierto.

Personanan cu ta propaga ideanan oportunista hopi bes ta uza un palabra manera “secta” pa pone otro hende den un lus negativo. Den un recomendacion na e Asamblea Parlamentario di e Conseho di Europa, un persona a sugeri e autoridadnan cu ta investiga gruponan religioso “pa miho stop di uza e palabra ei.” Dicon? Pasobra e tawata di opinion cu e palabra “culto” tawatin un conotacion demasiado negativo. Den un manera similar, intelectualnan Griego eroneamente a acusa apostel Pablo di ta un “charlatan”, of literalmente “pikido di simiña.” Esaki tawata pa insinua cu e no tawata nada mas cu un papiado di co’i loco, un hende cu a piki y ripiti solamente pida pida di informacion. Pero en realidad, Pablo “tawata predica [e bon nobo di] Hesus y e resureccion.”—Echonan 17:18.

E metodonan di e personanan cu ta plama nan ideanan ta duna resultado? Si. Nan tawata un factor principal den crea odio etnico y religioso door di troce hende su manera di mira otro nacion y religion. Hopi di nan a uza nan metodonan pa tene minorianan impopular abou den comunidad. Adolf Hitler a uza tal metodonan eficasmente ora el a pinta e Hudiunan y otro gruponan minoritario como “degenera”, “malbado” y un “menasa” pa Estado. Nunca nos no mester permiti e tipo di triki aki venena nos rasonamento.—Echonan 28:19-22.

No Gaña Bo Mes

Ta facil tambe pa gaña nos mes. De echo, por ta masha dificil pa nos leumai of asta cuestiona ideanan cu nos ta gusta masha. Dicon? Pasobra nos ta pega nos curason na nos puntonan di bista. Anto nos por gaña nos mes door di racionalisa, es decir, nos ta inventa motibonan pa hustifica loke en realidad ta creencianan robes y engañoso.

Esaki ta loke a sosode cu algun cristian di prome siglo. Nan tawata conoce e Palabra di Dios, pero nan no a lag’e dirigi nan manera di pensa. Na final di cuenta nan a “gaña nan mes.” (Santiago 1:22, 26) Un cos cu por indica cu nos a bira victima di e tipo di engaño propio aki ta si nos ta ripara cu nos ta rabia ora hende cuestiona nos creencianan. En bes di rabia, ta sabi pa nos tene un mente habri y scucha cuidadosamente loke otronan tin di bisa, asta ora nos ta sinti nos sigur cu nos opinion ta corecto.—Proverbionan 18:17.

Coba pa Haya “e Conocemento di Dios”

Kico nos por haci pa keda rasona cu sano huicio? Tin hopi yudansa disponibel, pero nos mester ta dispuesto pa traha pa haya nan. Rei sabi Salomon a bisa: “Mi yiu, si bo kier ricibi mi palabranan y warda mi mandamentonan den bo, haci bo horea atento na sabiduria, y  inclina bo curason na comprondemento; pasobra si bo sclama pa discernimento, halsa bo bos pa comprondemento, si bo busc’e manera plata, y rondi’e manera tesoro scondi, e ora ei lo bo discerni e temor di SEÑOR, y descubri e conocemento di Dios.” (Proverbionan 2:1-5) En berdad, si personalmente nos haci esfuerso pa yena nos mente y curason cu e berdadnan di e Palabra di Dios, nos lo haya berdadero sabiduria, comprondemento y discernimento. De echo, nos lo ta cobando pa haya cosnan cu tin hopi mas balor cu plata of cualkier otro tesoro material.—Proverbionan 3:13-15.

Sabiduria y conocemento sigur ta factornan importante pa nos por rasona cu sano huicio. E Palabra di Dios ta bisa: “Sabiduria lo bin den bo curason, y conocemento lo ta agradabel na bo alma. Discrecion lo warda bo; comprondemento lo cuida bo. Sabiduria lo libra bo for di e caminda di maldad, for di e hende cu ta papia cosnan perverso, for di esnan cu ta bandona e bereanan di rectitud, pa cana den e camindanan di scuridad.”—Proverbionan 2:10-13.

Ta specialmente importante pa laga e pensamentonan di Dios guia nos manera di pensa na momento di tension y peliger. Emocionnan fuerte manera rabia of miedo por stroba nos di rasona cu sano huicio. Salomon a bisa: “Opresion ta haci un hende sabi bira loco [of, “actua manera hende loco”, NW].” (Eclesiastes 7:7) Ta asta posibel cu nos ta “bira raso contra SEÑOR.” (Proverbionan 19:3) Con? Door di culpa Dios pa nos problemanan y uza nan como un excuse pa haci cosnan cu no ta na harmonia cu su lei- y principionan. En bes di pensa cu semper nos sa miho, laga nos scucha humildemente na conseheronan sabi cu ta purba yuda nos door di uza e Scritura. Y si ta necesario, laga nos ta prepara pa no insisti riba nos propio punto di bista ora ta bisto cu nos ta kiboca.—Proverbionan 1:1-5; 15:22.

Sigui “Pidi Dios”

Nos ta biba den un tempo peligroso y confuso. Pa nos por eherce sano huicio y actua sabi ta esencial pa nos haci oracion regularmente pa pidi Yehova su guia. Pablo a skirbi: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.” (Filipensenan 4:6, 7) Si nos falta sabiduria pa maneha problema- y pruebanan pa cua nos no sa e salida, nos tin cu sigui “pidi Dios, kende ta duna na tur hende generosamente y sin reproche.”—Santiago 1:5-8.

Como cu apostel Pedro tawata sa cu cristiannan mester eherce sabiduria, el a trata na ‘stimula nan facultadnan di pensa cla.’ E tawata kier pa nan “corda e dichonan papia previamente door di e profetanan santo y e mandamento di e Señor y Salbador”, Hesucristo. (2 Pedro 3:1, 2, NW) Si nos tambe haci esaki y mantene nos manera di pensa na harmonia cu e Palabra di Yehova, nos lo rasona cu sano huicio y actua sabi.

[Reconocemento]

Filosofonan di robes pa drechi: Epicuro: Potret saca pa cortesia di British Museum; Cicero: Reproduci for di The Lives of the Twelve Caesars; Plato: Roma, Musei Capitolini

[Plachi na pagina 21]

Cristiannan di prome siglo a laga sabiduria dibino, y no rasonamento filosofico forma nan manera di pensa

[Plachi na pagina 23]

Ta esencial pa haci oracion y studia e Palabra di Dios