Historia di Bida

Felis Ta Esun Kende Su Dios Ta Yehova

SEGUN E RELATO DI TOM DIDUR

Ya nan a huur e centro di bario caba y a spera alrededor di 300 hende na e asamblea na Porcupine Plain, Saskatchewan, Canada. Sneu a cuminsa cai diaranson, y ya pa diabierna e tempestad di sneu a pone cu bo no por a mira nada nada. Temperatura a baha te na 40 grado Celsius bou di cero. Tawatin bintiocho hende presente, incluso un par di mucha. Esaki tawata mi prome asamblea como superintendente di sircuito. Mi tawatin 25 aña y tawata nervioso. Prome cu mi conta bo kico a pasa, laga mi splica con mi a haya e privilegio special di sirbishi aki.

NOS ta ocho ruman homber, y ami ta esun di shete. Bill ta e mayo, despues ta bin Metro, John, Fred, Mike y Alex. Ami a nace na 1925, y Wally ta esun mas chikito. Nos tawata biba serca di e pueblo Ucrania, Manitoba, caminda mi mayornan Michael y Anna Didur, tawatin un cunucu chikito. Papa tawata traha den mantencion di spoorbaan. Nos a keda na cunucu ya cu e luga caminda Papa a keda no tawata adecua pa lanta un famia grandi. Pa gran parti di e tempo Papa tawata for di cas, pues Mama tawata esun cu mester a lanta nos. Tempo tempo, e tawata bai serca Papa pa mas o menos un siman, pero el a percura di siña nos cushina, horna cos y haci trabou di cas. Y door cu nos tawata miembro di e Iglesia Catolico Griego, for di chikito Mama a siña nos memorisa oracion y haci otro ritonan.

 Contacto cu Berdad di Bijbel

Mi anhelo pa compronde Bijbel a crece durante mi hubentud. Un biciña Testigo di Yehova a bishita nos famia regularmente pa lesa partinan di Bijbel tocante e Reino di Dios, Armagedon y e speransa bunita di e mundo nobo. Mama no tawata niun tiki interesa den loke e tawata bisa, pero Mike y Alex si a sinti nan atrai na e mensahe. Loke nan a siña a motiva nan pa rechasa sirbishi militar durante segundo guera mundial, ya cu esei a bai contra nan consenshi. Despues Mike a bai sera pa un poco tempo anto nan a manda Alex campo di trabou forsa na Ontario. Cu tempo Fred y Wally tambe a acepta e berdad. Pero mi tres rumannan grandi si no. Pa añanan largo Mama a opone e berdad pero despues el a sorprende nos tur, ora el a dicidi di sirbi Yehova. El a batisa cu 83 aña. Anto el a muri na edad di 96 aña. Prome cu Papa a muri e tambe tawatin un actitud faborabel pa e berdad.

Cu 17 aña mi a bai Winnipeg pa busca trabou y pa asocia cu esnan cu por a yuda mi studia Bijbel. Na e tempo ei e trabou di Testigonan di Yehova tawata prohibi, pero nan tawata tene nan reunionnan regularmente. E prome reunion cu mi a bai tawata na un cas di famia. Door cu mi a lanta den e religion catolico Griego, loke mi a tende einan a zona straño den mi horea. Pero tiki tiki mi a bin compronde dicon e diferencia cu ta existi entre clero y laico no ta basa riba Bijbel y dicon Dios no ta aproba e echo cu clero ta bendiciona guera. (Isaias 2:4; Mateo 23:8-10; Romanonan 12:17, 18) Bida den Paradijs riba tera a parce mi mucho mas realistico y rasonabel cu bai na un luga leu aya pa eternidad.

Combenci cu esaki ta e berdad, mi a dedica mi mes na Yehova y a batisa na 1942 na Winnipeg. Pa aña 1943 e trabou di Testigonan di Yehova na Canada no tawata prohibi mas, y e predicacion a cuminsa progresa mas lihe. E berdad di Bijbel tambe a cuminsa afecta mi curason mas profundamente. Mi a haya e privilegio di sirbi como sirbido di congregacion, participa den campañanan di reunion publico y tambe traha den teritorio cu no ta asigna. Congresonan grandi na Merca ta loke a yuda mi masha hopi mes pa haci progreso spiritual.

Ampliando Mi Sirbishi na Yehova

Na 1950 mi a bira pionero, y na december di e aña ei mi a haya invitacion pa sirbi como superintendente di sircuito. Mi tawatin e privilegio di haya mi entrenamento oficial den bicindario di Toronto for di Charlie Hepworth, un ruman leal y cu experencia. Tambe mi tawatin e goso di pasa e ultimo siman di mi entrenamento hunto cu mi ruman Alex, kende ya caba tawata den e trabou di sircuito na Winnipeg.

Mi prome asamblea di sircuito cu mi a menciona na principio, a keda graba den mi mente. Manera bo mes por compronde, mi tawata precupa tocante con cos lo a bai. Anyway, nos superintendente di districto, Ruman Jack Nathan, a tene nos bon ocupa y contento. Nos a resumi e programa di asamblea cu e participantenan cu tawata presente. Cada un di nos a haya turno pa conta experencia, mustra con ta predica di cas pa cas, haci rebishita y conduci studio di Bijbel na cas. Tambe nos a canta cantica di Reino y tawatin hopi cuminda. Cada dos ora asina nos a bebe cofi y come gebak. Algun ruman a drumi riba banki y riba plataforma, anto otronan a drumi riba flur. Pa diadomingo e tempestad a baha un poco, y nos tawatin un asistencia di 96 hende pa e discurso publico. E experencia aki a siña mi trata cu situacionnan dificil.

 Mi siguiente asignacion den e trabou di sircuito tawata den nort di Alberta, British Columbia, y e Teritorio di Yukon caminda solo no ta baha den zomer. Biaha riba e autopista malo Alaska Highway, cu ta core di Dawson Creek, British Columbia, pa Whitehorse, Yukon (un distancia di 1.477 kilometer), y duna testimonio na caminda a rekeri perseverancia y cautela. Un berdadero desafio tawata e avalanchanan, bahada- y subidanan di sero cu ta slip y biento cu sneu cu ta stroba bo di wak.

Mi a keda asombra di mira con e berdad a casi yega te na Polo Norte. Na un ocasion, ami cu Walter Lewkowicz a yama na un casita simpel serca di Lower Post, British Columbia, banda di Alaska Highway no mucho leu for di e frontera di Teritorio di Yukon. Nos tawata sa cu tin hende ta biba den e casita pasobra nos por a mira un tiki lus ta sali for di un bentana chikito. Tawata banda di nueb’or di anochi, y nos a bati na porta. Un stem a bisa nos bin paden, pues nos a drenta. Nos a keda masha sorprendi di mira un homber bieu drumi riba su cama di piso lesando e revista Toren di Vigilancia! Pa colmo su revista tawata mas nobo cu esun cu nos tawatin pa ofrece. El a splica nos cu el a haya di dje via post. Nos tawatin ocho dia sin bai nos congregacion y pesei nos no a haya revista nobo ainda. E homber a introduci su mes como Fred Berg, y maske e tawatin basta aña ta abona caba, esaki tawata e prome biaha cu el a haya bishita di Testigonan di Yehova. Fred a pone nos pasa anochi serca dje. Nos a haya oportunidad pa mustr’e varios berdad biblico y a haci areglo pa otro Testigo cu ta pasa eibanda regularmente, bishit’e.

Pa algun aña mi a traha den tres sircuito chikito. Di Grande Prairie, Alberta, cu ta keda den oost, te Kodiak, Alaska, cu ta keda den west, un distancia di mas cu 3.500 kilometer.

Mi a bira hopi contento ora mi a descubri cu Yehova su bondad inmereci ta pa tur hende, esta, pa esnan cu ta biba na luganan aisla tambe, y cu Dios su spirito ta motiva mente y curason di hende cu ta dispuesto pa bida eterno. Un di e  hendenan ei ta Henry Lepine di Dawson City, Yukon, cu awor yama Dawson. Henry tawata biba den un area isola. E tawatin mas cu 60 aña sin sali for di e zona caminda nan ta mina oro. Maske nunca el a yega di bai un reunion di congregacion, toch Yehova su spirito a motiva e homber aki di 84 aña pa biaha mas cu 1.600 kilometer y bai Anchorage pa un asamblea di sircuito. E programa a emocion’e masha hopi mes y el a disfruta masha di e asociacion. Despues cu Henry a bai Dawson City bek, el a keda fiel te na morto. Hopi hende cu tawata conoce Henry tawata puntra nan mes ta kico a motiva e homber bieu aki pa haci un biahe asina largo. E curiosidad aki a pone cu algun hende bieu mas a acepta e berdad. Pues indirectamente, Henry por a duna un excelente testimonio.

Mi A Ricibi e Bondad Inmereci di Yehova

Na aña 1955 mi a keda masha contento ora mi a haya un invitacion pa asisti na e di 26 klas di Scol Biblico di Galad di Watchtower. E entrenamento aki a fortalece mi fe y a yuda mi hala mas serca Yehova. Despues di mi graduacion, mi a haya e asignacion pa sigui den e trabou di sircuito na Canada.

Mi a traha den e provincia di Ontario pa mas o menos un aña. Despues nan a asigna mi pa traha na Alaska atrobe, un pais impresionante. Ainda mi por visualisa paisahenan bunita manera autopistanan cu a pasa cant’i lagonan limpi y briyante y ta subi cadenanan di sero cu nan topnan tapa cu sneu. Den zomer, e vaye- y sabananan ta parce manera un tapijt colorido di flornan di mondi masha bunita mes. E aire ta fresco y e awa ta puro. Ber, wolf, elk, caribu y otro bestianan salbahe libremente ta cana rond den nan medio ambiente.

Toch tin desafionan na Alaska; no solamente e clima cu ta cambia sino tambe e distancianan largo. Di oost pa west mi sircuito tawata 3.200 kilometer largo. E tempo ei no tawatin areglo pa superintendente di sircuito haya un auto. E rumannan local tawata ofrece nan mes pa hiba mi di un congregacion pa e otro. Pero tin bes mi mester a para cant’i caminda pa pidi truck of auto di turista lift.

Esei a sosode un biaha banda di un seccion di Alaska Highway entre Tok Junction, Alaska, y Mile 1202, esta e area Scotty Creek. E oficinanan di duana dje dos luganan aki tawata mas o menos 160 kilometer leu for di otro. Mi a pasa na e duana Mericano na Tok y a haya un cabe’i boto pa un distancia di 50 kilometer. Despues di esei mi mester a pidi lift atrobe, pero ningun auto no tawata pasa, y mi mester a cana pa alrededor di dies ora, esta mas di 40 kilometer. Ta despues mi a bin haya sa cu ora mi a caba di pasa e oficina di duana, tur trafico cu tawata pasa riba e seccion aki di e autopista mester a para pasobra no mucho leu for di e oficina di duana na frontera tawatin un avalancha di sneu. Meianochi temperatura a baha te na 23 grado Celsius bou di cero, y ainda mi tawata un 80 kilometer leu for di un luga caminda mi por a sconde. Tawata sumamente importante pa mi haya un luga pa descansa.

Mientras mi tawata cococha, mi a mira un auto para cant’i caminda cu tawata tapa cu sneu. Mi a pensa cu si mi drenta y drumi riba e asiento, lo mi por sobrevivi e anochi friu ei.  Mi a logra kita basta sneu, anto habri e porta. Pa mi sorpresa e unico cos cu mi por a mira den dje tawata e frame di hero. Felismente, no mucho leu djei mi a bin haya un casita bashi. Ora mi a logra drenta paden y sende un candela, mi por a descansa pa algun ora. Mainta mi a haya un lift pa bai na un luga di hospedahe, caminda mi a come un tiki y por a cuida mi dedenan cu tawata tur corta.

Yehova Ta Haci e Obra Crece na Alaska

Mi prome bishita na Fairbanks tawata masha animador. Nos tawatin exito den sirbishi, y mas o menos 50 hende a asisti na e discurso publico e diadomingo ei. Nos a reuni den un cas di misionero chikito caminda Vernor y Lorraine Davis tawata biba. Esnan presente tawata saca nan cabes for cushina, camber y gang pa tende e discurso. Door cu asina hopi hende a asisti, nos tawata sa cu un Salon di Reino lo duna stabilidad na e trabou di predica na Fairbanks. Pues cu Yehova su yudansa, nos a cumpra un edificio grandi cu anteriormente tawata un sala di baile. Nos a hala e edificio aki y a pon’e riba un tereno mas adecua. Nan a bora un pos pa nan haya awa, a traha baño y a instala verwarming. Den un aña, nan por a cuminsa uza e Salon di Reino na Fairbanks. Despues cu nan a traha un cushina, nan a uza e salon pa e congreso di districto na 1958 y 330 hende a asisti.

Durante zomer di 1960, mi a haci un biahe largo cu auto pa bai e sede mundial di Testigonan di Yehova na New York, pa mi asisti na un curso suplementario pa tur superintendente biahero na Merca y Canada. Ora mi tawata einan Ruman Nathan Knorr y otro rumannan den puesto di responsabilidad a haci mi pregunta tocante e posibilidad pa habri un oficina di sucursal na Alaska. Un par di luna despues, nos a keda contento di tende cu Alaska lo haya su propio oficina di sucursal riba 1 di september 1961. Ruman Andrew K. Wagner a keda encarga cu supervision di e sucursal. E cu su casa Vera a traha 20 aña na Betel di Brooklyn y tawatin experencia den e trabou di sircuito tambe. Establecimento di e oficina di sucursal na Alaska a wordo aprecia masha, pasobra el a reduci e cantidad di ora cu e superintendente di sircuito mester a biaha y a yud’e consentra mas riba e necesidadnan spesifico di e congregacionnan y teritorionan aisla.

E zomer di 1962 tawata un temporada dushi na Alaska. E sucursal di Alaska a wordo dedica, y tawatin un congreso di districto na Juneau. A construi Salonnan di Reino nobo na Juneau y Whitehorse, Yukon, y tambe a forma algun grupo aisla.

Bek pa Canada

Pa varios aña caba ami cu Margareta Petras di Canada tawata skirbi otro. Reta, cu ta su nomber di cariño, a cuminsa traha pionero na 1947, a gradua na Galad na 1955, y tawata traha pionero na oost Canada. Mi a pidie pa casa, y el a acepta. Nos a casa na februari 1963 na Whitehorse. Pa herfst di e aña ei, mi a haya e asignacion pa traha den sircuito den west Canada, y tawatin e goso di traha einan pa e siguiente 25 añanan.

Pa motibo di salu, nan a asigna nos na 1988 pa traha como pionero special na Winnipeg, Manitoba. Esaki a inclui cuida un Salon di Asamblea pa cinco aña. Te na e grado posibel, ainda nos ta participa den e trabou gososo di haci disipel. Den e trabou di sircuito nos a cuminsa hopi studio di Bijbel anto otro hende a sigui cu nan. Awor, mediante e bondad inmereci di Yehova, nos ta cuminsa studionan di Bijbel y nos ta mas felis ainda pasobra nos mes ta mira e studiantenan progresa te na dedicacion y bautismo.

Mi ta combenci cu sirbi Yehova ta e miho cos pa haci den bida. E ta duna bo bida satisfaccion y nificacion, y esaki ta pone nos stima Yehova cada dia mas. Esaki ta loke ta duna berdadero felicidad. Sin importa ki asignacion teocratico nos tin, of na unda nos ta biba, nos ta di acuerdo cu loke e salmista a bisa: “Felis [ta] e pueblo cu nan Dios ta Señor!”—Salmo 144:15, BPK.

[Plachi na pagina 24, 25]

Den trabou di sircuito

[Plachi na pagina 25]

Di bishita serca Henry Lepine na Dawson City. Ami ta na man robes

[Plachi na pagina 26]

Prome Salon di Reino na Anchorage

[Plachi na pagina 26]

Ami cu Reta na 1998