Imita e Dios di Berdad

“Sea imitadonan di Dios, manera yiunan stima.”—EFESIONAN 5:1.

1. Kico algun hende ta pensa tocante berdad, y dicon nan manera di rasona ta robes?

“KICO ta berdad?” (Juan 18:38) E pregunta ei cu Poncio Pilato a haci yen di duda y menosprecio casi 2.000 aña pasa, kier mustra indirectamente cu berdad ta mucho dificil pa alcansa y pesei no ta bale la pena busc’e. Awe hopi hende lo ta di acuerdo cu esei. Pues, loke ta bou di discusion ta kico precis ta e definicion di berdad. Podise bo a yega di tende hende bisa cu ta cada persona ta dicidi pa su mes kico ta berdad, cu berdad ta algo relativo of cu berdad ta algo cu semper ta cambia. E maneranan di rasona ei ta robes. E meta di investigacion y educacion ta juist pa haya sa echonan, e berdad, tocante e mundo den cua nos ta biba. Berdad no ta un asunto di opinion personal. Por ehempel, sea alma humano ta inmortal of e no ta. Sea Satanas ta existi of e no ta existi. Bida tin proposito of e no tin. Den tur e casonan ei ta un contesta so por ta corecto. Uno ta berdad, y e otro ta mentira; nan tur dos no por ta berdad.

2. Den ki maneranan Yehova ta e Dios di berdad, y ki preguntanan nos lo considera awor?

2 Den e articulo anterior nos a mira cu Yehova ta e Dios di berdad. E sa e berdad di tur cos. Tin un contraste skerpi entre Yehova y su adversario engañoso, Satanas e Diabel, pasobra Yehova semper ta papia berdad. Es mas, Yehova ta revela berdad na abundancia na otronan. Apostel Pablo a anima su compañeronan cristian: “Sea imitadonan di Dios, manera yiunan stima.” (Efesionan 5:1) Como Testigo di Yehova, con nos lo por imit’e door di papia y biba di acuerdo cu e berdad? Dicon ta importante pa nos haci esei? Y ki garantia nos tin cu Yehova ta aproba di esnan cu ta papia y biba di acuerdo cu e berdad? Laga nos ban wak.

3, 4. Con apostel Pablo y apostel Pedro a describi loke lo a bai pasa durante “e ultimo dianan”?

3 Nos ta biba den un era caminda mentira religioso ta plama tur caminda. Manera apostel Pablo a profetisa bou di inspiracion di Dios, hopi hende den e “ultimo dianan” aki tin aparencia di ta religioso ma nan ta nenga e  poder di e debocion ei. Algun di nan ta resisti e berdad door cu nan tin “mente corupto.” Ademas, “hendenan malbado y gañadonan [ta] bai di malo pa piyo, gañando y siendo gaña.” Aunke e hendenan aki ta siña keto bai, nunca nan no ta yega na e ‘conocemento exacto di e berdad.’—2 Timoteo 3:1, 5, 7, 8, 13.

4 Apostel Pedro tambe a ser inspira pa skirbi tocante e ultimo dianan. Y net manera el a skirbi, hende no solamente ta rechasa e berdad, sino tambe ta haci bofon di e Palabra di Dios y di esnan cu ta proclama e berdad cu e ta contene. “Di nan mes boluntad”, e hacidonan di bofon aki no kier acepta e echo cu e mundo di tempo di Noe a ser inunda cu awa, poniendo asina un patronchi pa un futuro dia di huicio. Nan manera di pensa lo nifica desaster pa nan ora e tempo di Dios yega pa destrui hende malbado.—2 Pedro 3:3-7.

Yehova Su Sirbidonan Sa e Berdad

5. Segun profeta Daniel, kico lo a sosode durante “e tempo di e fin”, y con e profecia aki a cumpli?

5 Den un descripcion di “e tempo di e fin”, profeta Daniel a profetisa un desaroyo completamente diferente den e pueblo di Dios: restauracion di berdad religioso. El a skirbi: “Hopi hende lo core pariba-pabou, y conocemento lo aumenta.” (Daniel 12:4) E gran Gañado lo no confundi ni ciega e pueblo di Yehova. Door di core pariba-pabou, na moda di papia, den e paginanan di Bijbel, nan a yega na berdadero conocemento. Den prome siglo, Hesus a ilumina su disipelnan. El “a habri nan huicio pa nan compronde e Scrituranan.” (Lucas 24:45) Den nos tempo Yehova a haci mescos. Mediante su Palabra, su spirito y su organisacion, el a yuda miyones di hende rond mundo compronde loke e mes sa caba: e berdad.

6. Ki berdadnan biblico e pueblo di Dios djawe ta compronde?

6 Como e pueblo di Dios nos ta compronde hopi cos cu di otro manera nos lo no tawata sa. Nos sa e contesta riba preguntanan cu e sabionan di mundo a lucha cu ne pa siglonan. Por ehempel, nos sa dicon tin sufrimento, pakico hende ta muri, y dicon hende no por logra e meta di pas y union mundial. Tambe nos a ser bendiciona cu un bista di loke lo bini den futuro: e Reino di Dios, un paradijs riba tera y bida perfecto pa semper. Nos a siña conoce Yehova, e Supremo. Nos a siña tocante su personalidad atractivo y tambe kico nos tin cu haci pa nos haya su bendicion. Door cu nos sa e berdad, nos por reconoce loke no ta berdad. Aplica e berdad ta proteha nos di metanan vano, e ta yuda nos saca lo miho for di bida, y ta duna nos un speransa maraviyoso pa futuro.

7. Ken si por compronde e berdadnan di Bijbel, y ken no?

7 Abo ta compronde e berdadnan di Bijbel? Si esei ta e caso, bo ta hopi bendiciona. Ora un autor ta skirbi un buki, por lo general e ta hacie di un manera cu e ta atrae un grupo spesifico di hende. Algun buki ta ser skirbi pa hende cu hopi educacion, otronan ta pa mucha, y tin tambe pa hende specialisa den cierto ramonan. Aunke ta facil pa tur hende yega na un Bijbel, el a wordo skirbi pa un grupo spesifico di hende comprond’e y disfruta di dje. Yehova a prepar’e pa hende manso y humilde. Ta e hendenan ei por capta e sentido di Bijbel, sin importa nan educacion, cultura, grupo etnico of status den bida. (1 Timoteo 2:3, 4) Di otro banda, hende cu no tin e disposicion corecto pa bida eterno no ta compronde e berdad di Bijbel ni maske con inteligente y educa nan ta. Hende arogante y orguyoso no por capta e berdadnan balioso di e Palabra di Dios. (Mateo 13:11-15; Lucas 10:21; Echonan 13:48, NW) Ta Dios so por a produci un buki asina.

Yehova Su Sirbidonan Ta Papia Berdad

8. Dicon Hesus tawata e berdad en persona?

8 Mescos cu Yehova, su Testigonan fiel ta honesto y ta papia berdad. Hesucristo, e Testigo principal di Yehova, a duna prueba di e  berdad door di loke el a siña hende, y na e manera cu el a biba y muri. El a sostene e berdad di Yehova su palabra y promesanan. Pues, manera Hesus mes a bisa, e tawata e berdad en persona.—Huan 14:6; Revelacion 3:14; 19:10.

9. Kico e Scritura ta bisa tocante papia berdad?

9 Hesus tawata “yen di gracia y berdad” y “mentira no a wordo haya den su boca.” (Huan 1:14; Isaias 53:9) Cristiannan berdadero ta sigui e ehempel cu Hesus a pone di papia e berdad cu otro hende. Pablo a conseha su rumannan den fe: “Cada un di boso papia berdad cu su prohimo, pasobra nos ta miembro di otro.” (Efesionan 4:25) Mas prome profeta Zacarias a skirbi: “Papia berdad un cu otro.” (Zacarias 8:16) Cristiannan ta papia berdad pasobra nan kier agrada Dios. Semper Yehova ta papia berdad y e sa ki daño mentira por haci. Pesei, e tin derecho di spera pa su sirbidonan tambe papia berdad.

10. Dicon hende ta gaña, y kico ta e resultadonan negativo?

10 Pa hopi hende, mentira por parce un manera cumbiniente pa logra cierto bentaha. Hende ta gaña pa scapa castigo, pa saca probecho di un of otro manera of pa haya elogio di otro hende. Sinembargo, e custumber di gaña ta un bicio. Es mas, un hende cu ta gaña no por haya e aprobacion di Dios. (Revelacion 21:8, 27; 22:15) Ora nos ta conoci como un persona cu ta papia berdad, otro hende ta kere loke nos ta bisa; nan ta confia nos. Sinembargo, si hende haya sa di un solo mentira cu nos a papia, nan por cuminsa duda di tur loke nos bisa despues di esei. Un proverbio Africano ta bisa: “Un mentira ta daña mil berdad.” Un otro proverbio ta bisa: “Den boca di gañado lo cierto ta dudoso.”

11. Den ki manera ser honesto ta mas cu simplemente papia berdad?

11 Ser honesto ta nifica mas cu simplemente papia berdad. E ta e manera cu nos ta biba. E ta defini ken nos ta. Nos ta laga hende conoce e berdad no solamente pa medio di loke nos ta bisa sino tambe pa medio di loke nos ta haci. Apostel Pablo a puntra: “Abo, cu ta siña un otro, bo no ta siña bo mes? Abo cu ta predica cu hende no mester horta, bo mes ta horta? Abo cu ta bisa cu hende no mester comete adulterio, bo mes ta comete adulterio?” (Romanonan 2:21, 22) Pa nos por comparti e berdad cu otro hende, nos mester ta honesto y ta papia berdad den tur loke nos ta haci. Nos reputacion di ta hende honesto y cu ta papia berdad lo tin un impacto poderoso riba e manera cu hende ta reacciona riba loke nos ta siña nan.

12, 13. Kico un hoben a skirbi tocante honestidad, y con bin e tawatin normanan moral halto?

12 Hobennan entre e sirbidonan di Yehova tambe ta compronde e importancia di ser honesto y papia berdad. Den un opstel cu Jenny a traha pa scol tempo cu e tawatin 13 aña di edad, el a skirbi: “Ser honesto ta algo cu pa mi ta hopi balioso. Ta jammer, pero hopi hende no ta completamente honesto awe. Ami a priminti mi mes cu semper lo mi keda honesto den mi bida. Tambe lo mi ta honesto asta si papia e berdad lo no beneficia ami ni mi amigonan mesora. Mi ta haci sigur cu mi amigonan ta hende honesto cu ta papia berdad.”

13 Comentando riba e opstel aki, Jenny su juffrouw a remarca: “Bo ta hopi jong pa ya caba a desaroya etica y normanan moral fuerte. Mi sa cu lo bo tene bo na bo normanan pasobra bo tin e fortalesa moral.” Con bin e mucha di scol aki tawatin e fortalesa moral ei? Den e introduccion di su opstel Jenny a declara cu su religion “ta establece e normanan pa [su] bida.” Ya ta shete aña caba cu Jenny a skirbi e opstel aki. Manera su juffrouw a asumi, Jenny ta sigui manifesta normanan moral halto den su bida como un Testigo di Yehova.

Yehova Su Sirbidonan Ta Revela e Berdad

14. Dicon sirbidonan di Dios tin un responsabilidad serio y special di sostene loke ta berdad?

14 Claro cu hende cu no ta Testigo di Yehova tambe sa papia berdad y haci esfuerso pa ta  honesto. Sinembargo, como sirbidonan di Dios, nos tin un responsabilidad serio y special: sostene loke ta berdad. Nos a ser confia cu e berdadnan di Bijbel—berdadnan cu por duna un persona bida eterno. Pesei nos tin e obligacion di comparti e conocemento ei cu otro hende. Hesus a bisa: “Esun cu hopi a wordo confia na dje, di esei nan lo exigi mucho mas.” (Lucas 12:48) Definitivamente, ‘mucho mas ta ser exigi’ di esnan cu a ser bendiciona cu e conocemento balioso di Dios.

15. Ki felicidad bo ta haya ora bo comparti e berdad di Bijbel cu otro hende?

15 Comparti e berdad di Bijbel cu otro hende ta trece felicidad. Mescos cu Hesus su disipelnan di prome siglo, nos tambe ta declara e bon nobo—un mensahe alentador di speransa—na hende cu ta “cansa y plama, manera carne sin wardado” y na esnan ciega y confundi door di “doctrinanan di demoñonan.” (Mateo 9:36; 1 Timoteo 4:1) Apostel Huan a skirbi: “No tin goso mas grandi pa mi cu di tende cu mi yiunan ta cana den e berdad.” (3 Huan 4) Fieldad di Huan su “yiunan”—kisas e personanan cu el a siña e berdad—a dun’e hopi goso. Nos tambe ta sinti un goso ora nos mira hende reacciona cu aprecio riba e Palabra di Dios.

16, 17. (a) Dicon no ta tur hende ta acepta e berdad? (b) Ki goso abo por haya segun cu bo ta proclama e berdad di Bijbel?

16 Ta cierto cu no ta tur hende lo acepta e berdad. Hesus a papia e berdad tocante Dios asta ora hende no tawata gusta esei. El a bisa Hudiunan cu tawata contra: “Pakico boso no ta kere mi? Esun cu ta di Dios ta tende e palabranan di Dios; pa e motibo aki boso no ta tende nan, pasobra boso no ta di Dios.”—Huan 8:46, 47.

17 Mescos cu Hesus, nos tampoco no ta keda sin conta hende e berdad balioso tocante Yehova. Nos no ta spera cu tur hende ta acepta loke nos bisa nan, pasobra no ta tur hende a acepta loke Hesus a bisa. Sinembargo, e echo cu nos sa cu nos ta haci loke ta corecto ta duna nos goso. Debi na Yehova su bondad  amoroso, e kier pa hende haya sa e berdad. Como esnan cu tin e berdad, cristiannan ta bira cargado di lus den un mundo scur. Door di laga e lus di berdad briya mediante nos palabra- y echonan, nos por yuda otro hende duna gloria na nos Tata celestial. (Mateo 5:14, 16) Publicamente nos ta laga hende sa cu nos ta rechasa e clase di berdad falso cu Satanas ta promove, y cu nos ta sostene e Palabra puro di Dios. E berdad cu nos conoce y ta comparti por duna berdadero libertad na hende cu acept’e.—Huan 8:32.

Papia y Biba di Acuerdo cu e Berdad

18. Dicon y di ki manera Hesus a mustra su aprobacion na Natanael?

18 Hesus a stima e berdad y papia e berdad. Durante su ministerio riba tera, el a duna su aprobacion na hende cu a papia berdad. Por ehempel, Hesus a bisa di Natanael: “Ata un berdadero Israelita, den kende no tin mentira!” (Huan 1:47) Despues, Natanael, kende probablemente tambe a ser yama Bartolome, a ser scohi como un di e 12 apostelnan. (Mateo 10:2-4) Esta un privilegio!

19-21. Con un homber cu un tempo tawata ciego a ser bendiciona pa e echo cu el a papia berdad cu curashi?

19 Henter un capitulo den e buki biblico di Huan ta conta e relato di un otro homber honesto cu Hesus a bendiciona. Nos no sa su nomber. Loke nos sa ta cu e tawata un pidido di limosna cu a nace ciego. E hendenan a keda asombra ora Hesus a cur’e. E noticia di e curacion milagroso aki a yega na horea di e Farizeonan, kendenan tawata odia e berdad. Nan a sera cabes pa expulsa for di sinagoga cualkier persona cu pone fe den Hesus. Door cu e mayornan miedoso di e homber cu tawata ciego a haya sa di e complot aki, nan a gaña e Farizeonan y a bisa cu nan no tawata sa con bin nan yiu por a mira awor ni ta ken a cur’e.—Huan 9:1-23.

20 E Farizeonan a bolbe manda yama e homber cu a ser cura. Sin importa e consecuencianan, el a bisa nan e berdad cu curashi. El a splica nan con el a ser cura y cu ta Hesus a hacie. El a keda straño cu e hombernan prominente y educa aki no tawata kere cu Hesus a bin di Dios. Pesei, cu curashi el a haci un apelacion na nan pa acepta loke ta bisto: “Si e homber aki no tawata di Dios, e lo no por a haci nada.” Door cu e Farizeonan no por a contesta nada mas, nan a acus’e di ta tribi y a sac’e afo.—Huan 9:24-34.

21 Ora Hesus a haya sa esaki, amorosamente el a tuma su tempo pa busca e homber. Despues di esei, el a sigui edifica e fe di e homber cu antes tawata ciego. Abiertamente Hesus a identifica su mes como e Mesias. Ki un bendicion e homber ei a haya pasobra el a papia berdad! Definitivamente, hende cu ta papia berdad tin aprobacion di Dios.—Huan 9:35-37.

22. Dicon nos mester papia y biba di acuerdo cu e berdad?

22 Practica e berdad ta algo cu nos mester tuma na serio. E ta fundamental pa forma y mantene bon relacion cu hende y cu Dios. Ser honesto ta nifica ser franco, sinsero, acercabel y digno di confiansa, y e ta pone nos haya Yehova su aprobacion. (Salmo 15:1, 2) Ser deshonesto ta nifica ser engañoso, inconfiabel y falso, y e ta pone nos perde Yehova su aprobacion. (Proverbionan 6:16-19) Pesei, sea determina pa papia y biba di acuerdo cu e berdad. Realmente, pa imita e Dios di berdad, nos mester sa e berdad, papia e berdad y biba e berdad.

Con Lo Bo Contesta?

• Dicon nos por ta gradicido cu nos sa e berdad?

• Con nos lo por imita Yehova dor di ta hende honesto?

• Ki beneficio tin den comparti berdad di Bijbel cu otro hende?

• Pakico ta importante pa papia y biba di acuerdo cu e berdad?

[Preguntanan di Estudio]

[Plachi na pagina 17]

Cristiannan a ser confia cu e berdad di Bijbel, y cu celo nan ta compartie cu otro hende

 [Plachi na pagina 18]

E homber ciego cu Hesus a cura a haya gran bendicion pasobra el a papia berdad