Informe di Proclamadonan di Reino

Pasenshi y Perseverancia Ta Duna Bon Resultado

HESUCRISTO a profetisa cu den e ultimo dianan “amor di hopi hende lo fria.” Esei a pone cu awe, den hopi parti di mundo, hende en general a bira indeferente pa e bon nobo di Reino. Algun asta ta mira religion cu menosprecio.—Mateo 24:12, 14.

Toch, apesar di esei, cu fe y pasenshi, publicadonan di Reino ta enfrentando e desafio cu exito, manera e siguiente experencia for di Republica Checo ta mustra.

Dos Testigo a papia cu un señora cu tawata tras di un porta sera. Despues di un rato e señora a habri e porta djis un tiki, saca man tuma e revistanan Toren di Vigilancia y Spierta! cu e Testigonan tawata ofreciendo, bisa danki y sera e porta. E Testigonan a puntra nan mes si nan mester a bai bek serca e señora. Un di nan, un pionero, of sirbido di tempo completo, a dicidi di bai bek. Pero a bolbe sosode mescos y esaki a sigui pa un aña largo.

E pionero a pensa cu lo e tin cu cambia su sistema di aborda e señora y pesei el a pidi Yehova yud’e. E siguiente biaha cu el a ofrece e revistanan, el a puntra e señora amigablemente: “Con ta bai cu bo, señora? Con bo a haya e revistanan?” Na principio, e señora no tawata responde, pero despues di un par di bishita mas, e señora a cuminsa bira mas amabel. Na un ocasion el a habri e porta completamente, pero e combersacion tawata cortico.

Door cu e señora no tawata gusta papia na porta, e pionero a dicidi di skirbie un carta pa splic’e e proposito di e bishitanan y pa ofrece un studio di Bijbel. Finalmente, despues di un aña y mei di esfuerso cu hopi pasenshi, e pionero a logra cuminsa un studio di Bijbel cu e doño di cas. El a keda sorprendi, a la bes anima, ora e señora a bis’e despues: “Mi a cuminsa kere den Dios for di dia cu bo a cuminsa trece e revistanan pa mi.”

En berdad, pasenshi y perseverancia por duna recompensa den e obra di predica e Reino y haci disipel.—Mateo 28:19, 20.